حِزْقِيال 12

حِزْقِيال يمثِّل هو في الغُرْبة

١ وَ اللّٰهْ حَجَّى لَيِّ وَ قَالْ: ٢ «يَا إِبْن آدَمْ، إِنْتَ قَاعِدْ فِي أُسُطْ شَعَبْ عَاصِيِينْ! هُمَّنْ عِنْدُهُمْ عُيُونْ لِلشَّوْف وَ لَاكِنْ مَا يِشِيفُوا وَ عِنْدُهُمْ أُدْنَيْ لِلسَّمَعْ وَ لَاكِنْ مَا يَسْمَعَوْا أَشَانْ هُمَّنْ شَعَبْ عَاصِيِينْ. ٣ أَسْمَعْ، يَا إِبْن آدَمْ، جَهِّزْ خُمَامَكْ وَ مَثِّلْ نَفْسَكْ مِثِلْ يِوَدُّوكْ فِي الْغُرْبَةْ وَ تَبْقَى غَرِيبْ. وَ سَوِّي الْمَثَلْ دَا بِالنَّهَارْ قِدَّامْهُمْ. وَكِتْ قَاعِدِينْ يِشِيفُوكْ، قُمّ مِنْ بَيْتَكْ وَ مَثِّلْ نَفْسَكْ مِثِلْ غَرِيبْ فِي بَكَانْ آخَرْ. وَ مِثِلْ دَا، مُمْكِنْ يَعَرْفُوا كَدَرْ هُمَّنْ شَعَبْ عَاصِيِينْ. ٤ أَمْرُقْ خُمَامَكْ مِنْ بَيْتَكْ وَ دَا مِثِلْ خُمَامْ الْيِوَدُّوا بَيَّهْ فِي الْغُرْبَةْ. وَ سَوِّي الْمَثَلْ دَا بِالنَّهَارْ قِدَّامْهُمْ. وَكِتْ قَاعِدِينْ يِشِيفُوكْ، أَمْرُقْ بِمَغْرِبْ مِثِلْ تَمْشِي فِي الْغُرْبَةْ. ٥ وَ قِدَّامْهُمْ بَسْ، قِدّ دُرْدُرْ بَيْتَكْ وَ أَمْرُقْ خُمَامَكْ بِالْخُرْمَةْ دِي. ٦ وَ قِدَّامْهُمْ بَسْ، شِيلَهْ فِي كِتْفَكْ وَ أَمْرُقْ فِي الضَّلَامْ. وَ غَطِّي وِجْهَكْ لِمَا تِشِيفْ الْبَلَدْ أَشَانْ أَنَا نِدَوْر نِسَوِّيكْ مَثَلْ لِبَنِي إِسْرَائِيلْ.»

٧ وَ خَلَاصْ، أَنَا سَوَّيْت مِثِلْ اللّٰهْ أَمَرَانِي. بِنَهَارْ، مَرَقْت خُمَامِي مِنْ بَيْتِي وَ دَا مِثِلْ خُمَامِي الْيِوَدُّونِي بَيَّهْ فِي الْغُرْبَةْ. وَ بِمَغْرِبْ، قَدَّيْت الدُّرْدُرْ بِإِيدِي وَ مَرَقْت خُمَامِي فِي الضَّلَامْ وَ شِلْتَهْ فِي كِتْفِي. وَ أَنَا سَوَّيْت كُلَّ الْمَثَلْ دَا قِدَّامْهُمْ.

٨ وَ بِفَجُرْ، اللّٰهْ حَجَّى لَيِّ وَ قَالْ: ٩ «يَا إِبْن آدَمْ، بَنِي إِسْرَائِيلْ الشَّعَبْ الْعَاصِيِينْ قَالَوْا لَيْك: ‹إِنْتَ قَاعِدْ تِسَوِّي شُنُو؟› ١٠ خَلَاصْ، قُولْ لَيْهُمْ: ‹دَاهُو اللّٰهْ الرَّبّ قَالْ: ”الْمُحَاكَمَةْ دِي جَايَةْ مِنْ اللّٰهْ ضِدّ مَلِكْ مَدِينَةْ الْقُدُسْ وَ لِكُلَّ بَنِي إِسْرَائِيلْ الْقَاعِدِينْ فَوْقهَا.“› ١١ وَ قُولْ لَيْهُمْ كَدَرْ إِنْتَ بِقِيتْ لَيْهُمْ مَثَلْ وَ مِثِلْ إِنْتَ مَثَّلْتَهْ وَ سَوَّيْتَهْ، يِسَوُّوهْ فَوْقهُمْ وَ يَكُرْبُوهُمْ وَ يِوَدُّوهُمْ فِي الْغُرْبَةْ.

تفْسير المَثَل

١٢ «الْمَلِكْ هَنَا مَدِينَةْ الْقُدُسْ يِشِيلْ خُمَامَهْ فِي كِتْفَهْ وَ يَمْرُقْ فِي الضَّلَامْ بِالْخُرْمَةْ الْيِقِدُّوهَا فِي الدُّرْدُرْ. وَ هُو يِغَطِّي وِجْهَهْ لِمَا يِشِيفْ الْبَلَدْ. ١٣ وَ أَنَا نُكُجّ لَيَّهْ شَرَكِي وَ هُو يَقَعْ فَوْقَهْ وَ نَكُرْبَهْ وَ نِوَدِّيهْ فِي بَلَدْ الْبَابِلِيِّيْن وَ لَاكِنْ هُو مَا يِشِيفْهَا. وَ يُمُوتْ فَوْقهَا. ١٤ وَ كُلَّ نَاسَهْ الْمُحَوِّقِينَهْ وَ الْيِعَاوُنُوهْ وَ كُلَّ عَسْكَرَهْ، نِشَتِّتْهُمْ فِي كُلِّ جِيهَةْ وَ نَطْرُدْهُمْ بِالْسَّيْف. ١٥ وَكِتْ نِشَتِّتْهُمْ بَيْن الْأُمَمْ وَ نِفَرِّقْهُمْ فِي أُسْط الْبُلْدَانْ، خَلَاصْ هُمَّنْ يَعَرْفُوا كَدَرْ أَنَا بَسْ اللّٰهْ. ١٦ وَ نِفَضِّلْ وَاحِدِينْ مِنْهُمْ الْيَنْجَوْا مِنْ الْحَرِبْ وَ الْجُوعْ وَ الْوَبَاءْ أَشَانْ يِحَجُّوا بِكُلَّ مُحَرَّمَاتْهُمْ لِلْأُمَمْ الْيَمْشُوا أَمْبَيْنَاتْهُمْ. وَ بَيْدَا، خَلَاصْ يَعَرْفُوا كَدَرْ أَنَا بَسْ اللّٰهْ.»

١٧ وَ اللّٰهْ حَجَّى لَيِّ وَ قَالْ: ١٨ «يَا إِبْن آدَمْ، تَاكُلْ مَعَاشَكْ بِرَجِفِينْ وَ تَشْرَبْ أَلْمِيكْ بِبَرْجَلَةْ وَ هَمّ. ١٩ وَ تُقُولْ لِشَعَبْ الْبَلَدْ: ‹دَاهُو اللّٰهْ الرَّبّ حَجَّى لِسُكَّانْ مَدِينَةْ الْقُدُسْ الْقَاعِدِينْ فِي بَلَدْ إِسْرَائِيلْ وَ قَالْ: ”هُمَّنْ يَاكُلُوا مَعَاشْهُمْ بِهَمّ وَ يَشَرْبَوْا أَلْمِيهُمْ بِخَوْف أَشَانْ الْأَرْض تَخْرَبْ وَ تَبْقَى فَاضِيَةْ مِنْ كُلَّ شَيّءْ الْفَوْقهَا بِسَبَبْ الْعُنُفْ هَنَا كُلَّ سُكَّانْهَا. ٢٠ وَ الْمُدُنْ الْمَسْكُونِينْ يَخْرَبَوْا وَ الْبَلَدْ كُلَ تَبْقَى خَرَابْ. وَ بَيْدَا، إِنْتُو تَعَرْفُوا كَدَرْ أَنَا بَسْ اللّٰهْ.“›»

كلام اللّه يلْحقّق

٢١ وَ اللّٰهْ حَجَّى لَيِّ وَ قَالْ: ٢٢ «يَا إِبْن آدَمْ، مَالَا تِحَجُّوا بِالْمَثَلْ دَا الْبُخُصّ بَلَدْ إِسْرَائِيلْ؟ الْمَثَلْ بُقُولْ: ‹الْأَيَّامْ يُطُولُوا وَ رُؤْيَةْ وَاحِدَةْ كُلَ مَا تِلْحَقَّقْ.› ٢٣ وَ فِي شَانْ دَا، قُولْ لَيْهُمْ: ‹دَاهُو اللّٰهْ الرَّبّ قَالْ: ”أَنَا نَمْنَعْ الْمَثَلْ دَا وَ بَتَّانْ مَا يِحَجُّوا بَيَّهْ فِي إِسْرَائِيلْ.“ وَ لَاكِنْ أَنْطِيهُمْ مَثَلْ جَدِيدْ الْبُقُولْ: ”الْأَيَّامْ يَجُوا عَجَلَةْ وَ أَيِّ رُؤْيَةْ تِلْحَقَّقْ. ٢٤ أَشَانْ مَا فِي بَتَّانْ رُؤْيَةْ كِدِبْ وَلَّا شَوَّفَانْ غَشّ فِي لُبّ بَنِي إِسْرَائِيلْ. ٢٥ وَ أَنَا اللّٰهْ كَنْ قُلْت شُنُو كُلَ، يِلْحَقَّقْ بَلَا تَأخِيرْ. وَ فِي وَكِتْكُو إِنْتُو، يَا الشَّعَبْ الْعَاصِيِينْ، أَنَا نِحَقِّقْ كَلَامِي الْأَنَا قُلْتَهْ.“›» وَ دَا كَلَامْ اللّٰهْ الرَّبّ.

٢٦ وَ اللّٰهْ حَجَّى لَيِّ وَ قَالْ: ٢٧ «يَا إِبْن آدَمْ، دَاهُو بَنِي إِسْرَائِيلْ يُقُولُوا: ‹الرُّؤْيَةْ الشَّافْهَا الرَّاجِلْ دَا مَا هَنَا أَيَّامْ قَرِيبِينْ. هُو يِتْنَبَّأْ لِوَكِتْ بَعِيدْ.› ٢٨ وَ فِي شَانْ دَا، قُولْ لَيْهُمْ: ‹دَاهُو اللّٰهْ الرَّبّ قَالْ: ”مَا فِي كِلْمَةْ وَاحِدَةْ كُلَ مِنْ كَلَامِي تِأَخِّرْ. كُلَّ كَلَامِي الْقُلْتَهْ يِلْحَقَّقْ.“›» وَ دَا كَلَامْ اللّٰهْ الرَّبّ.