حِزْقِيال 8

الأصْنام في بيت اللّه

١ وَ فِي الْيَوْم الْخَامِسْ هَنَا الشَّهَرْ السَّادِسْ فِي السَّنَةْ السَّادْسَةْ مِنْ وَدَّوْنَا فِي الْغُرْبَةْ، أَنَا قَاعِدْ فِي بَيْتِي. وَ فِي الْيَوْم دَا، شُيُوخْ بَنِي يَهُوذَا كُلَ قَاعِدِينْ قِدَّامِي وَ خَلَاصْ، قُدْرَةْ اللّٰهْ الرَّبّ نَزَلَتْ فَوْقِي. ٢ وَ طَوَّالِي، أَنَا شِفْت رُؤْيَةْ وَ دَاهُو أَنَا شِفْت شَيّءْ يِشَابِهْ إِنْسَانْ. وَ مِنْ صُلْبَهْ لَحَدِّي تِحِتْ، هُو هَنَا نَارْ. وَ مِنْ صُلْبَهْ لَحَدِّي فَوْق، يِرَارِي مِثِلْ النَّحَاسْ الصَّافِي. ٣ وَ هُو مَدَّ مِثِلْ إِيدْ وَ كَرَبَانِي مِنْ صُوفْ رَاسِي. وَ الرُّوحْ دَا رَفَعَانِي فَوْق أَمْبَيْن السَّمَاءْ وَ الْأَرْض. وَ فِي الرُّؤْيَةْ الْمِنْ الرَّبّ دِي، هُو وَدَّانِي فِي بَيْت اللّٰهْ فِي مَدِينَةْ الْقُدُسْ.

وَ هِنَاكْ، هُو وَدَّانِي فِي خَشُمْ الْبَابْ الْمُقَابِلْ مُنْشَاقْ هَنَا الْفَضَايْ الدَّخْلَانِيَّةْ. وَ دَا الْبَكَانْ الْيِنْلَقِي فَوْقَهْ صَنَمْ الْغِيرَةْ الْيِقَوِّمْ غِيرَةْ اللّٰهْ. ٤ وَ طَوَّالِي، بَانْ مَجْد إِلٰـهْ بَنِي إِسْرَائِيلْ مِثِلْ الرُّؤْيَةْ الْأَوَّلْ أَنَا شِفْتَهَا فِي الْوَادِي. ٥ وَ هُو قَالْ لَيِّ: «يَا إِبْن آدَمْ، أَرْفَعْ رَاسَكْ وَ شِيفْ مُنْشَاقْ.» وَ أَنَا رَفَعْت رَاسِي وَ شِفْت مُنْشَاقْ وَ دَاهُو شِفْت صَنَمْ الْغِيرَةْ مُنْشَاقْ فِي خَشُمْ الْبَابْ الْيِوَدِّي لِلْمَدْبَحْ. ٦ وَ هُو قَالْ لَيِّ: «يَا إِبْن آدَمْ، إِنْتَ شِفْت الشَّيّءْ الْقَاعِدِينْ يِسَوُّوهْ وَلَّا؟ وَ شِفْت الْمُحَرَّمَاتْ الْكُبَارْ الْقَاعِدِينْ يِسَوُّوهُمْ بَنِي إِسْرَائِيلْ لِيِبَعُّدُونِي مِنْ بَيْتِي الْمُقَدَّسْ وَلَّا؟ وَ لَاكِنْ تِشِيفْ مُحَرَّمَاتْ آخَرِينْ كُبَارْ زِيَادَةْ مِنْ دَوْل!»

٧ وَ بَعَدْ دَا، هُو وَدَّانِي فِي بَابْ الْفَضَايْ الْبَرَّانِيَّةْ هَنَا بَيْت اللّٰهْ وَ دَاهُو أَنَا شِفْت نُقْرَةْ فِي الدُّرْدُرْ. ٨ وَ هُو قَالْ لَيِّ: «يَا إِبْن آدَمْ، قِدّ الدُّرْدُرْ.» وَ أَنَا قَدَّيْت الدُّرْدُرْ وَ خَلَاصْ، بِقِي دَرِبْ. ٩ وَ هُو قَالْ لَيِّ بَتَّانْ: «أَدْخُلْ وَ شِيفْ الْمُحَرَّمَاتْ الْفَسْلِينْ الْقَاعِدِينْ يِسَوُّوهُمْ هِنِي!» ١٠ أَنَا دَخَلْت وَ دَاهُو شِفْت رَسِمْ هَنَا كُلَّ الزَّوَاحِفْ وَ الْحَيْوَانَاتْ النِّجْسِينْ مَرَّةْ وَاحِدْ وَ كُلَّ أَصْنَامْ بَنِي إِسْرَائِيلْ مَرْسُومِينْ فِي أَيِّ بَكَانْ فِي الدُّرْدُرْ. ١١ وَ 70 رَاجِلْ مِنْ شُيُوخْ بَنِي إِسْرَائِيلْ الْفِي أُسُطْهُمْ يَزَنْيَا وِلَيْد شَافَانْ وَاقْفِينْ قِدَّامْ الْأَصْنَامْ الْمَرْسُومِينْ دَوْل. وَ أَيِّ وَاحِدْ عِنْدَهْ مُخْبَرْ فِي إِيدَهْ وَ رِيحَةْ الدُّخَّانْ قَاعِدَةْ تَطْلَعْ. ١٢ وَ هُو قَالْ لَيِّ: «يَا إِبْن آدَمْ، إِنْتَ شِفْت الشَّيّءْ الْقَاعِدِينْ يِسَوُّوهْ شُيُوخْ بَنِي إِسْرَائِيلْ فِي الضَّلَامْ، أَيِّ وَاحِدْ قِدَّامْ صَنَمَهْ وَلَّا؟ وَ بُقُولُوا: ‹اللّٰهْ مَا يَقْدَرْ يِشِيفْنَا! اللّٰهْ خَلَّى بَلَدْنَا!›» ١٣ وَ هُو قَالْ لَيِّ: «لَاكِنْ تِشِيفْ مُحَرَّمَاتْ آخَرِينْ كُبَارْ زِيَادَةْ مِنْ دَوْل الْقَاعِدِينْ يِسَوُّوهُمْ!»

١٤ وَ هُو وَدَّانِي فِي خَشُمْ الْبَابْ الْمُنْشَاقِي هَنَا بَيْت اللّٰهْ. وَ فِي الْبَكَانْ دَا، فِي عَوِينْ قَاعِدَاتْ تِحِتْ يَبْكَنْ لِإِلٰـهِّنْ الْأُسْمَهْ تَمُوزْ. ١٥ وَ هُو قَالْ لَيِّ: «يَا إِبْن آدَمْ، إِنْتَ قَاعِدْ تِشِيفْ وَلَّا؟ وَ لَاكِنْ تِشِيفْ مُحَرَّمَاتْ آخَرِينْ كُبَارْ زِيَادَةْ مِنْ دَوْل!»

١٦ وَ هُو وَدَّانِي دَاخَلْ فِي فَضَايَةْ بَيْت اللّٰهْ الدَّخْلَانِيَّةْ. وَ دَاهُو فِي خَشُمْ بَيْت اللّٰهْ أَمْبَيْن غُرْفَةْ الْمَدَخَلْ وَ الْمَدْبَحْ، فِيَّهْ حَوَالَيْ 25 رَاجِلْ. أَنْطَوْا ضُهُورْهُمْ لِبَيْت اللّٰهْ وَ وَجَّهَوْا صَبَاحْ عَلَيْ الْحَرَّايْ وَ سَجَدَوْا لَيْهَا. ١٧ وَ هُو قَالْ لَيِّ: «يَا إِبْن آدَمْ، إِنْتَ قَاعِدْ تِشِيفْ وَلَّا؟ دَا شِيَّةْ! بَنِي يَهُوذَا يِسَوُّوا مُحَرَّمَاتْ زِيَادَةْ مِنْ دَوْل. يِغَضُّبُونِي وَ يَمْلَوْا الْبَلَدْ بِالْعُنُفْ وَ يِعَيُّرُونِي مُعْيَارْ خَطِيرْ! ١٨ وَ أَنَا كُلَ نَغْضَبْ ضِدُّهُمْ وَ مَا نِشِيفْهُمْ بِعَيْن الرَّحْمَةْ وَ لَا نِحِنّ فَوْقهُمْ. وَ وَكِتْ يَصْرَخَوْا لَيِّ، أَنَا مَا نَسْمَعْهُمْ!»