كتاب مَراثِي إرْمِيا
من كتب الأنبياء
تعب صَهْيُون المِثِل بِنيّة
١
١ يَا السَّلَامْ!
الْمَدِينَةْ أَمْ شَعَباً كَتِيرْ
بِقَتْ مَعْزُولَةْ
مِثِلْ أَرْمَلَةْ مَا عِنْدَهَا مُسَاعَدَةْ.
أَوَّلْ،
هِي فِي الْأُمَمْ سَيِّدَةْ
وَ الْيَوْم،
بِقَتْ خَادِمْ مَمْلُوكَةْ.
٢ هِي تَبْكِي،
تَبْكِي طُولْ اللَّيْل
بِكُلَّ قُدْرِتْهَا
وَ مِنْ صُدْقَانْهَا،
مَا فِي صَدِيقْ الْيِصَبِّرْهَا.
كُلَّ رُفْقَانْهَا خَانَوْهَا
وَ بِقَوْا عُدْوَانْهَا.
٣ تِحِتْ التَّعَبْ هَنَا الْغُرْبَةْ،
بَلَدْ يَهُوذَا وَدَّوْهَا فِي الْعُبُودِيَّةْ.
وَ عَايْشَةْ فِي أُسْط الْأُمَمْ بَلَا رَاحَةْ
وَ عُدْوَانْهَا الطَّارَدَوْهَا
فِي الدَّرِبْ الضَّيِّقْ زَرَّوْهَا.
٤ وَ شَوَارِعْ صَهْيُون حِزْنَوْا
وَ مَا فِي نَاسْ مَاشِينْ لِلْعِيدْ
وَ كُلَّ بِيبَانْ الْمَدِينَةْ دَفَّقَوْا.
وَ رُجَالْ الدِّينْ هِنَيْهَا يَقُنْتُوا
وَ بَنَاتْهَا الْعُدْرِيَّاتْ حَزْنَانَاتْ
وَ مَدِينَةْ صَهْيُون قَاعِدَةْ فِي الْمُرّ.
٥ وَ خُصْمَانْهَا بِقَوْا سِيَادْهَا
وَ عُدْوَانْهَا قَاعِدِينْ فِي الرَّاحَةْ.
وَ اللّٰهْ جَابْ فَوْقهَا الْحِزِنْ
بِسَبَبْ كُتُرْ عِصْيَانْهَا.
وَ كَرَبَوْا عِيَالْهَا
وَ وَدَّوْهُمْ عَبِيدْ.
٦ وَ مَدِينَةْ صَهْيُون الْمِثِلْ بِنَيَّةْ
وَدَّرَتْ كُلَّ شَرَفْهَا.
وَ دَاهُو كُبَارَاتْهَا بِقَوْا مِثِلْ تَيْتَلْ
الْمَا لِقَوْا بَكَانْ مَرْعَاهُمْ
وَ عَرَّدَوْا بَلَا قُدْرَةْ
قِدَّامْ طَرَّادِينْهُمْ.
٧ وَ فِي أَيَّامْهَا هَنَا الضِّيقَةْ وَ التَّعَبْ،
مَدِينَةْ الْقُدُسْ أَذَّكَّرَتْ كُلَّ شَهْوَاتْهَا
الزَّمَانْ قَاعِدَةْ تَفْرَحْ بَيْهُمْ.
وَ وَكِتْ شَعَبْهَا وَقَعَوْا
فِي إِيدَيْن خُصْمَانْهُمْ،
مَا فِي نَادُمْ الْيَفْزَعْهُمْ.
وَ خُصْمَانْهَا شَافَوْهَا
وَ فِرْحَوْا بِدَمَارْهَا.
٨ مَدِينَةْ الْقُدُسْ أَذْنَبَتْ
وَ بَيْدَا،
نَجَّسَتْ نَفِسْهَا.
وَ كُلَّ النَّاسْ الزَّمَانْ كَرَّمَوْهَا،
هَسَّعْ نَكَرَوْهَا أَشَانْ شَافَوْا عِرَيْهَا.
وَ لَاكِنْ هِي قَاعِدَةْ تَقْنِتْ
وَ تَنْطِيهُمْ ضَهَرْهَا.
٩ وَ بِنَجَاسِتْهَا فِي سُرْوَالْهَا،
هِي مَا فَكَّرَتْ فِي مُسْتَقْبَلْهَا.
وَ وَقَعَانْهَا بِقِي عَجِيبْ
وَ مَا فِي نَادُمْ الْيِصَبِّرْهَا.
وَ مَدِينَةْ الْقُدُسْ قَالَتْ:
«يَا اللّٰهْ،
شِيفْ تَعَبِي
أَشَانْ الْعَدُو أَنَّصَرْ فَوْقِي!»
١٠ وَ الْخَصِيمْ خَطَّ إِيدَيْنَهْ
فِي كُلَّ زِينَةْ بَيْتهَا التَّفْرَحْ بَيْهَا.
أَيْوَى،
فِي الْبَيْت الْمُقَدَّسْ
دَخَلَوْا أُمَمْ الْإِنْتَ اللّٰهْ قُلْت
مَا يَدْخُلُوا فِي بَكَانْ جَمَاعْتَكْ.
١١ وَ كُلَّ شَعَبْهَا قَاعِدِينْ يَقُنْتُوا
وَكِتْ يِفَتُّشُوا الْأَكِلْ.
وَ يِبَدُّلُوا كُلَّ زِينَةْ بُيُوتْهُمْ
الْيَفْرَحَوْا بَيْهَا
بِأَكِلْ أَشَانْ يِعِيشُوا.
وَ صَهْيُون قَالَتْ:
«يَا اللّٰهْ!
أَسْمَعْ
وَ شِيفْ كِكَّيْف أَنَا مَحْقُورَةْ.
١٢ وَ لَيْكُو إِنْتُو كُلُّكُو
التِّعَدُّوا بِالدَّرِبْ دَا،
أَسْمَعَوْا وَ شِيفُوا!
فِيَّهْ تَعَبْ زِيَادَةْ
مِنْ تَعَبِي الْأَنَا عَايْشَةْ بَيَّهْ؟
وَ دَا التَّعَبْ الْجَابَهْ اللّٰهْ
فِي يَوْم غَضَبَهْ الْمُحْرِقْ.
١٣ مِنْ السَّمَاءْ،
هُو رَسَّلْ غَضَبَهْ
مِثِلْ نَارْ دَخَلَتْ فِي عُضَامِي.
وَ كَجَّ لَيِّ شَرَكْ
وَ بَيَّهْ رَمَانِي.
وَ دَسَّانِي فِي الْخَرَابْ
وَ نَقْنِتْ طُولْ يَوْمِي.
١٤ هُو ذَاتَهْ شَالْ ذُنُوبِي
وَ سَوَّاهُمْ مِثِلْ دَامِي.
وَ رَبَطَاهُمْ لَيِّ فِي رَقَبَتِي
وَ بَيْدَا،
وَدَّرْت قُدُرْتِي.
وَ الرَّبّ سَلَّمَانِي لِإِيدْ عُدْوَانِي
وَ مَا نَقْدَرْ نُقُمّ مِنْ تِحِتْهُمْ.
١٥ وَ الرَّبّ أَبَى كُلَّ رُجَالِي الْفُرَّاسْ
الْقَاعِدِينْ مَعَايِ
وَ جَابْ ضِدِّي دَيْش
لِيَكْتُلْ شَبَابِي.
وَ خَطَّ بَلَدْ يَهُوذَا الْمِثِلْ بِنَيَّةْ عُدْرِيَّةْ
بَيْن الْمُرْحَاكَةْ وَ بِنْتَهَا لِيَرْحَكْهَا.
١٦ وَ فِي شَانْ دَا،
أَنَا بَكَيْت
وَ دُمُوعِي جَرَوْا وُدْيَانْ
أَشَانْ الْيِصَبِّرْنِي
وَ الْيِحَيِّينِي بِقِي بَعِيدْ مِنِّي.
وَ عِيَالِي هِلْكَوْا
أَشَانْ الْعَدُو أَنَّصَرْ فَوْقِي.»
١٧ صَهْيُون رَفَعَتْ إِيدَيْنهَا وَ نَادَتْ
وَ لَاكِنْ مَا لِقَتْ نَادُمْ الْيِصَبِّرْهَا.
وَ اللّٰهْ أَنْطَى إِذِنْ لِجِيرَانْ ذُرِّيَّةْ يَعْقُوبْ
يَبْقَوْا عُدْوَانْهُمْ.
وَ فِي عُيُونْهُمْ،
مَدِينَةْ الْقُدُسْ
مَلَانَةْ بِالنَّجَاسَةْ.
١٨ وَ مَدِينَةْ الْقُدُسْ قَالَتْ:
«اللّٰهْ عَادِلْ
أَشَانْ أَنَا عِصِيتْ أَمْرَهْ.
أَسْمَعَوْا،
يَا كُلَّ الشُّعُوبْ،
وَ شِيفُوا تَعَبِي.
كُلَّ صُبْيَانِي وَ بَنَاتِي كَرَبَوْهُمْ
وَ وَدَّوْهُمْ فِي الْغُرْبَةْ.
١٩ وَ أَنَا نَادَيْت صُدْقَانِي
وَ لَاكِنْ هُمَّنْ غَشَّوْنِي.
رُجَالْ الدِّينْ وَ شُيُوخِي مَاتَوْا
فِي الْمَدِينَةْ
وَكِتْ هُمَّنْ فَتَّشَوْا الْأَكِلْ
لِيِعِيشُوا بَيَّهْ وَ مَا لِقَوْه.
٢٠ يَا اللّٰهْ،
شِيفْ الضِّيقَةْ الْفَوْقِي!
نَفْسِي مُبَرْجَلَةْ وَ قَلْبِي مُنْجَرِحْ
أَشَانْ أَنَا عِصِيتَكْ عِصْيَانْ شَدِيدْ.
كَنْ مَرَقْت فِي الشَّارِعْ،
الْمَوْت يِلَاقِينِي
وَ كَنْ قَعَدْت فِي الْبَيْت،
السَّيْف يَقْطَعْ رَقَبَتِي.
٢١ عُدْوَانِي سِمْعَوْا قَنِيتِي
وَ لَاكِنْ مَا فِي نَادُمْ الْيِصَبِّرْنِي.
كُلُّهُمْ سِمْعَوْا بِحِزْنِي
وَ فَرْحَانِينْ بَيَّهْ.
وَ دَا كُلَّ إِنْتَ بَسْ جَعَلْتَهْ
وَ جِبْت يَوْم الْعِقَابْ الْإِنْتَ قَطَعْتَهْ.
وَ خَلِّي عُدْوَانِي يَبْقَوْا مِثْلِي أَنَا!
٢٢ جِيبْهُمْ قِدَّامَكْ
بِكُلَّ الْفَسَالَةْ السَّوَّوْهَا.
وَ سَوِّي فَوْقهُمْ مِثِلْ سَوَّيْت فَوْقِي
بِسَبَبْ كُلَّ عِصْيَانِي.
أَشَانْ قَنِيتِي بِقِي كَتِيرْ
وَ نَفْسِي بِقَتْ مَرْضَانَةْ.»