نَبُوخَدْنَصَر كرب صِدْقِيَّا
٥٢
١ صِدْقِيَّا عِنْدَهْ 21 سَنَةْ وَكِتْ بِقِي مَلِكْ وَ حَكَمْ 11 سَنَةْ فِي مَدِينَةْ الْقُدُسْ.
وَ أَمَّهْ أُسُمْهَا حَمُوطَلْ بِنَيَّةْ إِرْمِيَا مِنْ حِلَّةْ لِبْنَةْ.
٢ وَ صِدْقِيَّا سَوَّى الْفَسَالَةْ قِدَّامْ اللّٰهْ مِثِلْ الْمَلِكْ يَهُويَقِمْ سَوَّاهْ.
٣ وَ الْفَسَالَةْ الْهُمَّنْ سَوَّوْهَا فِي مَدِينَةْ الْقُدُسْ وَ فِي بَلَدْ يَهُوذَا جَابَتْ غَضَبْ اللّٰهْ.
وَ فِي شَانْ دَا،
اللّٰهْ طَرَدَاهُمْ بَعِيدْ مِنَّهْ.
وَ صِدْقِيَّا أَتْمَرَّدْ ضِدّ مَلِكْ بَابِلْ.
٤ وَ فِي شَانْ دَا،
فِي الْيَوْم الْعَاشِرْ هَنَا الشَّهَرْ الْعَاشِرْ فِي السَّنَةْ التَّاسْعَةْ هَنَا حُكُمْ صِدْقِيَّا،
نَبُوخَدْنَصَرْ مَلِكْ بَابِلْ جَاءْ بِكُلَّ عَسْكَرَهْ لِمَدِينَةْ الْقُدُسْ.
وَ هُمَّنْ نَزَلَوْا وَ حَوَّقَوْهَا بِرَدْمِيَّةْ.
٥ وَ الْمَدِينَةْ دِي قَعَدَتْ مُحَاصَرَةْ لَحَدِّي سَنِةْ 11 هَنَا حُكُمْ الْمَلِكْ صِدْقِيَّا.
٦ وَ الْجُوعْ بِقِي شَدِيدْ فِي الْمَدِينَةْ وَ النَّاسْ مَا عِنْدُهُمْ شَيّءْ يَاكُلُوهْ.
وَ فِي الْيَوْم التَّاسِعْ هَنَا الشَّهَرْ الرَّابِعْ،
٧ قَدَّوْا خُرْمَةْ فِي دُرْدُرْ الْمَدِينَةْ.
وَ خَلَاصْ بِاللَّيْل،
مَلِكْ مَمْلَكَةْ يَهُوذَا وَ كُلَّ عَسْكَرَهْ مَرَقَوْا وَ عَرَّدَوْا مِنْ الْمَدِينَةْ.
هُمَّنْ مَرَقَوْا بِالدَّرِبْ الْقَاعِدْ أَمْبَيْنَاتْ الدَّرَادِرْ الْإِتْنَيْن هَنَا الدِّفَاعْ الْقَرِيبْ لِجِنَيْنَةْ الْمَلِكْ حَتَّى كَنْ الْبَابِلِيِّينْ مُحَوِّقِينْ الْمَدِينَةْ كُلَ.
وَ الْمَلِكْ صِدْقِيَّا وَ عَسْكَرَهْ شَالَوْا الدَّرِبْ الْمَاشِي عَلَيْ وَادِي الْأُرْدُنْ.
٨ وَ لَاكِنْ عَسْكَرْ بَابِلْ طَرَدَوْه لِلْمَلِكْ صِدْقِيَّا وَ لِحْقَوْه وَ كَرَبَوْه فِي كَدَادَةْ أَرِيحَا.
وَ كُلَّ عَسْكَرَهْ عَرَّدَوْا خَلَّوْه.
٩ وَ عَسْكَرْ بَابِلْ كَرَبَوْه لِلْمَلِكْ.
وَ وَدَّوْه فِي حِلَّةْ رِبْلَةْ فِي بَلَدْ حَمَاتْ قِدَّامْ مَلِكْ بَابِلْ.
وَ فِي الْبَكَانْ دَا،
حَاكَمَهْ.
١٠ وَ هِنَاكْ فِي رِبْلَةْ،
مَلِكْ بَابِلْ دَبَحْ أَوْلَادْ صِدْقِيَّا قِدَّامَهْ وَ بَتَّانْ دَبَحْ كُلَّ كُبَارَاتْ يَهُوذَا.
١١ وَ بَعَدْ دَا،
مَلِكْ بَابِلْ قَدَّدْ عُيُونْ صِدْقِيَّا وَ جَنْزَرَهْ بِجِنْزِيرْ هَنَا نَحَاسْ مَطْبُوقْ وَ وَدَّاهْ فِي بَابِلْ.
وَ خَطَّاهْ فِي السِّجِنْ لَحَدِّي مَوْتَهْ.
نَبُوزَرَدَان تشّ القدس
١٢ وَ فِي الْيَوْم الْعَاشِرْ هَنَا الشَّهَرْ الْخَامِسْ فِي سَنِةْ 19 هَنَا حُكُمْ نَبُوخَدْنَصَرْ مَلِكْ بَابِلْ،
نَبُوزَرَدَانْ كَبِيرْ الْحُرَّاسْ الْيَخْدِمْ لِمَلِكْ بَابِلْ دَخَلْ فِي مَدِينَةْ الْقُدُسْ.
١٣ وَ هُو تَشَّ بَيْت اللّٰهْ وَ قَصِرْ الْمَلِكْ وَ كُلَّ بُيُوتْ مَدِينَةْ الْقُدُسْ.
وَ كُلَّ بُيُوتْ الْمَسَائِيلْ،
هُو حَرَّقَاهُمْ بِنَارْ.
١٤ وَ كُلَّ عَسْكَرْ بَابِلْ الْمَشَوْا مَعَ كَبِيرْ الْحُرَّاسْ كَسَّرَوْا الدُّرْدُرْ الْمُحَوِّقْ مَدِينَةْ الْقُدُسْ.
١٥ وَ نَبُوزَرَدَانْ كَبِيرْ الْحُرَّاسْ شَالْ مَعَايَهْ الشَّعَبْ الْفَضَّلَوْا فِي الْمَدِينَةْ وَ هُمَّنْ وَاحِدِينْ مِنْ الْمَسَاكِينْ وَ النَّاسْ السَّلَّمَوْا نُفُوسْهُمْ لِمَلِكْ بَابِلْ وَ الصِّنَاعِيِينْ.
وَ هُو شَالَاهُمْ وَ وَدَّاهُمْ فِي الْغُرْبَةْ فِي بَابِلْ.
١٦ وَ لَاكِنْ نَبُوزَرَدَانْ خَلَّى وَاحِدِينْ مِنْ مَسَاكِينْ الْبَلَدْ لِيَحَرْتُوا الْعِنَبْ وَ الزِّرَاعَةْ.
١٧ وَ عَسْكَرْ بَابِلْ كَسَّرَوْا عَمَدْ النَّحَاسْ الْقِدَّامْ بَيْت اللّٰهْ وَ الْحِيطَانْ الْمُتَحَرِّكِينْ وَ الْحَوْط الْكَبِيرْ هَنَا نَحَاسْ الْقَاعِدْ قِدَّامْ بَيْت اللّٰهْ وَ وَدَّوْا كُلَّ النَّحَاسْ دَا فِي بَابِلْ.
١٨ وَ هُمَّنْ شَالَوْا الْبُرَامْ وَ الْفَيْلَاتْ وَ السَّكَاكِينْ وَ الْكِيسَانْ وَ الْغَرَارِيفْ وَ كُلَّ الْمَوَاعِينْ الصَّنَعَوْهُمْ مِنْ نَحَاسْ وَ أَسْتَعْمَلَوْهُمْ لِلْعِبَادَةْ.
١٩ وَ كَبِيرْ الْحُرَّاسْ شَالْ الْمَوَاعِينْ وَ خَمَّامَاتْ النَّارْ وَ الْكِيسَانْ وَ الْبُرَامْ وَ الْفَانُوسْ وَ الْغَرَارِيفْ وَ الطَّاسَاتْ كُلُّهُمْ مِنْ دَهَبْ وَ فُضَّةْ.
٢٠ وَ كَنْ لِلْعَمَدْ الْإِتْنَيْن وَ الْحَوْط الْكَبِيرْ وَ الْأَتْنَا عَشَرْ تِيرَانْ الْقَاعِدِينْ تِحْتَهْ وَ الْحِيطَانْ الْمُتَحَرِّكِينْ كُلُّهُمْ كَيْ الصَّنَعَاهُمْ الْمَلِكْ سُلَيْمَانْ لِبَيْت اللّٰهْ،*
وَزِنْ نَحَاسْهُمْ مَا مَعْرُوفْ مِنْ الْكَتَرَةْ.
٢١ وَ أَيِّ وَاحِدْ مِنْ الْعَمَدْ دَوْل طُولَهْ 18 دُرَاعْ وَ دَايِرَتَهْ 12 دُرَاعْ وَ عِنْدَهْ لُبّ وَ تُخْنَهْ 4 أَصَابِعْ.
٢٢ وَ أَيِّ عَمُودْ دَا،
خَطَّوْا فَوْقَهْ رَاسْ هَنَا نَحَاسْ الطُّولَهْ 5 دُرَاعْ وَ مُحَوَّقْ بِسَلَاسِلْ الْمُرَصَّصْ فَوْقهُمْ رُمَّانْ وَ كُلُّهُمْ كَيْ مِنْ نَحَاسْ.
وَ الْعَمُودْ التَّانِي،
صُنْعِتَهْ سَوَا سَوَا مِثِلْ الْعَمُودْ الْأَوَّلَانِي بِرُمَّانَهْ.
٢٣ وَ فِي 96 رُمَّانْ الْبِنْشَافَوْا فِي جَوَانِبَهْ وَ لَاكِنْ فِي دَايِرْ السَّلَاسِلْ،
كُلُّهُمْ عَدَدْهُمْ 100 رُمَّانْ.
٢٤ وَ بَتَّانْ كَبِيرْ الْحُرَّاسْ كَرَبْ سَرَايَا كَبِيرْ رُجَالْ الدِّينْ وَ صَفَنْيَا رَاجِلْ الدِّينْ النَّايِبْ وَ الْحُرَّاسْ التَّلَاتَةْ هَنَا مَدَخَلْ بَيْت اللّٰهْ.
٢٥ وَ مِنْ الْمَدِينَةْ،
كَرَبْ كَبِيرْ وَاحِدْ الْمُكَلَّفْ بِالرُّجَالْ الْمُحَارِبِينْ وَ سَبْعَةْ نَاسْ مِنْ خَدَّامِينْ الْمَلِكْ اللِّقَوْهُمْ فِي لُبّ الْمَدِينَةْ.
وَ كَرَبْ بَتَّانْ الْكَاتِبْ هَنَا قَايِدْ الدَّيْش،
هُو الْمُكَلَّفْ بِجَنِّدِينْ الشَّعَبْ فِي الْعَسْكَرِيَّةْ وَ 60 رَاجِلْ مِنْ الشَّعَبْ الْقَاعِدِينْ فِي لُبّ الْمَدِينَةْ.
٢٦ وَ نَبُوزَرَدَانْ كَبِيرْ الْحُرَّاسْ كَرَبَاهُمْ مَسَاجِينْ وَ وَدَّاهُمْ لِمَلِكْ بَابِلْ فِي رِبْلَةْ.
٢٧ وَ مَلِكْ بَابِلْ كَتَلَاهُمْ هِنَاكْ فِي رِبْلَةْ فِي بَلَدْ حَمَاتْ.
وَ بِمِثِلْ دَا،
كُلَّ نَاسْ بَلَدْ يَهُوذَا وَدَّوْهُمْ فِي الْغُرْبَةْ،
بَعِيدْ مِنْ أَرْضُهُمْ.
٢٨ وَ دَاهُو عَدَدْ النَّاسْ الْوَدَّاهُمْ نَبُوخَدْنَصَرْ مَلِكْ بَابِلْ فِي الْغُرْبَةْ.
فِي السَّنَةْ السَّابْعَةْ،
هُو وَدَّى 3 023 يَهُودْ.
٢٩ وَ فِي سَنِةْ 18 هَنَا حُكْمَهْ،
نَبُوخَدْنَصَرْ وَدَّى مِنْ مَدِينَةْ الْقُدُسْ 832 نَاسْ.
٣٠ وَ فِي سَنِةْ 23 هَنَا حُكُمْ نَبُوخَدْنَصَرْ،
نَبُوزَرَدَانْ كَبِيرْ الْحُرَّاسْ وَدَّى فِي الْغُرْبَةْ 745 يَهُودْ.
وَ بِالْجُمْلَةْ عَدَدْهُمْ 4 600 نَاسْ.
ملك بَابِل عفا يُيَكِين
٣١ وَ فِي سَنِةْ 37 مِنْ وَدَّوْا يُيَكِينْ مَلِكْ مَمْلَكَةْ يَهُوذَا فِي الْغُرْبَةْ فِي بَابِلْ،
دَرَّجَوْا أَوِيلْ مَرُودَكْ مَلِكْ فِي بَابِلْ.
وَ فِي يَوْم 25 هَنَا شَهْرِي 12 هَنَا السَّنَةْ دِي،
أَوِيلْ مَرُودَكْ عَفَا يُيَكِينْ مَلِكْ مَمْلَكَةْ يَهُوذَا وَ طَلَقَهْ مِنْ السِّجِنْ.
٣٢ وَ الْمَلِكْ حَجَّى لَيَّهْ بِكَلَامْ حَلُو وَ دَرَّجَهْ فِي بَكَانْ عَالِي زِيَادَةْ مِنْ الْمُلُوكْ الْآخَرِينْ الْقَاعِدِينْ مَعَايَهْ فِي بَابِلْ.
٣٣ وَ مَلِكْ بَابِلْ غَيَّرْ خُلْقَانْ يُيَكِينْ هَنَا السِّجِنْ وَ خَلَّاهْ يَاكُلْ مَعَايَهْ دَايْماً فِي دَبَلَايْتَهْ فِي كُلَّ مُدَّةْ حَيَاتَهْ.
٣٤ وَ بِمِثِلْ دَا،
فِي كُلَّ مُدَّةْ حَيَاتَهْ لَحَدِّي مَوْتَهْ،
يُيَكِينْ لِقِي رِيسَةْ سَمْحَةْ مِنْ مَلِكْ بَابِلْ.