إرْمِيا 41

إِسْمَاعِيل كتل قَدَالْيَا و 80 ناس

١ وَ لَاكِنْ فِي الشَّهَرْ السَّابِعْ، إِسْمَاعِيلْ وِلَيْد نَتَنْيَا وِلَيْد أَلِشَمَعْ جَاءْ لِقَدَالْيَا فِي مِصْفَةْ. وَ إِسْمَاعِيلْ دَا هُو مِنْ ذُرِّيَّةْ الْمَمْلَكَةْ وَ وَاحِدْ مِنْ كُبَارَاتْ الْمَلِكْ. هُو جَاءْ مَعَ عَشَرَةْ رُجَالْ وَ أَكَلَوْا مَعَ قَدَالْيَا. ٢ وَ بَعَدْ دَا، إِسْمَاعِيلْ وَ الرُّجَالْ الْعَشَرَةْ الْمَعَايَهْ قَمَّوْا ضَرَبَوْا قَدَالْيَا بِالْسَّيْف وَ كَتَلَوْه. وَ مِثِلْ دَا، هُمَّنْ كَتَلَوْا النَّادُمْ الْمَلِكْ بَابِلْ خَطَّاهْ حَاكِمْ فِي الْبَلَدْ. ٣ وَ إِسْمَاعِيلْ كَتَلْ بَتَّانْ كُلَّ الْيَهُودْ الْقَاعِدِينْ مَعَ قَدَالْيَا فِي مِصْفَةْ وَ عَسْكَرْ بَابِلْ الْقَاعِدِينْ هِنَاكْ.

٤ وَ لَحَدِّي الْيَوْم التَّانِي بَعَدْ مَوْت قَدَالْيَا كُلَ، مَا فِي نَادُمْ سِمِعْ شَيّءْ. ٥ وَ فِي الْوَكِتْ دَا، جَوْا رُجَالْ وَاحِدِينْ عَدَدْهُمْ 80. وَ النَّاسْ دَوْل، دُقُونْهُمْ مُزَيَّنِينْ وَ خُلْقَانْهُمْ مُشَرَّطِينْ وَ جِسِمْهُمْ مُنَخَّشْ مِنْ الْحِزِنْ. وَ هُمَّنْ مِنْ مُدُنْ شَكِيمْ وَ شِيلَوْه وَ السَّامِرَةْ وَ شَايْلِينْ فِي إِيدَيْهُمْ هَدَايَا هَنَا دَقِيقْ وَ بَخُورْ لِيِقَدُّمُوهْ فِي بَيْت اللّٰهْ. ٦ وَ إِسْمَاعِيلْ مَرَقْ مِنْ مِصْفَةْ لِيِلَاقِيهُمْ، مَاشِي وَ قَاعِدْ يَبْكِي. وَكِتْ وَصَّلَاهُمْ قَالْ لَيْهُمْ: «أَلْفَضَّلَوْا بَكَانْ قَدَالْيَا وِلَيْد أَخِقَامْ.»

٧ وَ وَكِتْ دَخَلَوْا فِي الْمَدِينَةْ، إِسْمَاعِيلْ وَ النَّاسْ الْمَعَايَهْ قَمَّوْا كَرَبَوْهُمْ وَ دَبَحَوْهُمْ وَ زَقَلَوْهُمْ فِي نُقْرَةْ. ٨ وَ لَاكِنْ فِي أُسْط الرُّجَالْ دَوْل فِي عَشَرَةْ مِنْهُمْ قَالَوْا لِإِسْمَاعِيلْ: «مَا تَكْتُلْنَا أَشَانْ أَنِحْنَ لَبَّدْنَا مَعَاشْ كَتِيرْ فِي الْكَدَادَةْ، قَمَحْ أَحْمَرْ وَ قَمَحْ أَبْيَضْ وَ دِهِنْ وَ عَسَلْ.» وَ خَلَاصْ، هُو مَا كَتَلَاهُمْ مَعَ أَخْوَانْهُمْ. ٩ وَ النُّقْرَةْ الْإِسْمَاعِيلْ دَفَّقْ فَوْقَهْ الْجِثَثْ هَنَا النَّاسْ الْكَتَلَاهُمْ فِي بَكَانْ قَدَالْيَا، هِي النُّقْرَةْ الزَّمَانْ نَكَتْهَا آسَا مَلِكْ مَمْلَكَةْ يَهُوذَا وَكِتْ هُو قَاعِدْ يِدَافِعْ لِبَلَدَهْ ضِدّ بَعَاشَى مَلِكْ مَمْلَكَةْ إِسْرَائِيلْ. وَ النُّقْرَةْ دِي، إِسْمَاعِيلْ مَلَاهَا بِجِثَثْ النَّاسْ الْهُو كَتَلَاهُمْ.

١٠ وَ بَعَدْ دَا، إِسْمَاعِيلْ كَرَبْ كُلَّ الشَّعَبْ الْفَضَّلَوْا فِي مِصْفَةْ مَسَاجِينْ وَ هُمَّنْ بَنَاتْ الْمَلِكْ وَ كُلَّ النَّاسْ الْفَضَّلَوْا فِي مِصْفَةْ. وَ دَوْل النَّاسْ النَّبُوزَرَدَانْ كَبِيرْ الْحُرَّاسْ أَمَّنَاهُمْ لِقَدَالْيَا. وَ إِسْمَاعِيلْ كَرَبَاهُمْ مَسَاجِينْ وَ مَشَى بَيْهُمْ عَلَيْ بَلَدْ بَنِي عَمُّونْ.

يُوحَنَان نجّى الشعب

١١ وَ يُوحَنَانْ وِلَيْد قَارِحْ وَ كُلَّ كُبَارَاتْ الرُّجَالْ الْمُسَلَّحِينْ الْمَعَايَهْ سِمْعَوْا بِكُلَّ الْفَسَالَةْ السَّوَّاهَا إِسْمَاعِيلْ وِلَيْد نَتَنْيَا. ١٢ هُمَّنْ شَالَوْا كُلَّ رُجَالْهُمْ وَ مَشَوْا يَهْجُمُوا إِسْمَاعِيلْ وَ لِحْقَوْه فِي الْمَشِيشَةْ الْكَبِيرَةْ هِنْت قِبْعُونْ. ١٣ وَ وَكِتْ كُلَّ الشَّعَبْ الْكَرَبَاهُمْ إِسْمَاعِيلْ شَافَوْا يُوحَنَانْ وِلَيْد قَارِحْ وَ كُبَارَاتْ الرُّجَالْ الْمُسَلَّحِينْ الْمَعَايَهْ، هُمَّنْ فِرْحَوْا. ١٤ وَ خَلَاصْ، كُلَّ الشَّعَبْ الْإِسْمَاعِيلْ كَرَبَاهُمْ فِي مِصْفَةْ قَبَّلَوْا وَ جَوْا لَمَّوْا مَعَ يُوحَنَانْ. ١٥ وَ لَاكِنْ إِسْمَاعِيلْ وَ التَّمَانَةْ نَاسْ الْمَعَايَهْ نِجَوْا مِنْ يُوحَنَانْ وَ مَشَوْا لِبَنِي عَمُّونْ.

١٦ وَ يُوحَنَانْ وَ كُلَّ كُبَارَاتْ الرُّجَالْ الْمُسَلَّحِينْ الْمَعَايَهْ شَالَوْا الشَّعَبْ الْفَضَّلَوْا الْإِسْمَاعِيلْ كَرَبَاهُمْ فِي مِصْفَةْ بَعَدْ كَتَلْ قَدَالْيَا. وَ الشَّعَبْ الْقَبَّلَوْهُمْ مِنْ قِبْعُونْ، هُمَّنْ عَسْكَرْ وَ عَوِينْ وَ عِيَالْ وَ مَسَائِيلْ قَصِرْ الْمَلِكْ. ١٧ هُمَّنْ مَشَوْا لَحَدِّي بَيْت الضِّيفَانْ الْفِي كِمْهَامْ قَرِيبْ لِبَيْت لَحَمْ. وَ مِنْ هِنَاكْ، يِدَوْرُوا يَمْشُوا لِمَصِرْ ١٨ أَشَانْ يَخَافَوْا مِنْ الْبَابِلِيِّينْ بِسَبَبْ إِسْمَاعِيلْ كَتَلْ قَدَالْيَا حَاكِمْ الْبَلَدْ الْخَطَّاهْ مَلِكْ بَابِلْ.