إرْمِيا 39

عسْكر بَابِل شالوا مدينة القدس

١ وَ فِي الشَّهَرْ الْعَاشِرْ فِي السَّنَةْ التَّاسْعَةْ هَنَا حُكُمْ صِدْقِيَّا مَلِكْ يَهُوذَا، نَبُوخَدْنَصَرْ مَلِكْ بَابِلْ جَاءْ بِكُلَّ عَسْكَرَهْ لِمَدِينَةْ الْقُدُسْ وَ حَاصَرْهَا. ٢ وَ فِي الْيَوْم التَّاسِعْ هَنَا الشَّهَرْ الرَّابِعْ فِي سَنِةْ 11 هَنَا حُكُمْ صِدْقِيَّا، قَدَّوْا خُرْمَةْ فِي دُرْدُرْ الْمَدِينَةْ. ٣ وَ خَلَاصْ، كُلَّ قُيَّادْ مَلِكْ بَابِلْ جَوْا وَ قَعَدَوْا فِي الْبَابْ الْأُسُطْ. وَ هُمَّنْ نِرْقَلْ شَرَاصَرْ كَبِيرْ الْقُيَّادْ وَ سَمْقَرْ نَبُو وَ سَرْ سَكِيمْ كَبِيرْ الْمَسَائِيلْ وَ كُلَّ مَسَائِيلْ مَلِكْ بَابِلْ الْآخَرِينْ.

٤ وَ مِنْ شَافَوْا النَّاسْ دَوْل، صِدْقِيَّا مَلِكْ يَهُوذَا وَ كُلَّ عَسْكَرَهْ مَرَقَوْا وَ عَرَّدَوْا مِنْ الْمَدِينَةْ بِاللَّيْل. وَ دَا بِدَرِبْ جِنَيْنَةْ الْمَلِكْ بِالْبَابْ الْقَاعِدْ أَمْبَيْن الدَّرَادِرْ الْإِتْنَيْن هَنَا الدِّفَاعْ. وَ هُمَّنْ مَرَقَوْا بِالدَّرِبْ الْمَاشِي عَلَيْ وَادِي الْأُرْدُنْ. ٥ وَ لَاكِنْ عَسْكَرْ بَابِلْ طَرَدَوْه لِصِدْقِيَّا وَ لِحْقَوْه وَ كَرَبَوْه فِي كَدَادَةْ أَرِيحَا.

وَ هُمَّنْ جَابَوْه فِي حِلَّةْ رِبْلَةْ فِي بَلَدْ حَمَاتْ قِدَّامْ نَبُوخَدْنَصَرْ مَلِكْ بَابِلْ. وَ فِي الْبَكَانْ دَا، حَاكَمَهْ. ٦ وَ مَلِكْ بَابِلْ دَبَحْ أَوْلَادْ صِدْقِيَّا قِدَّامَهْ فِي رِبْلَةْ وَ بَتَّانْ دَبَحْ كُلَّ شُيُوخْ يَهُوذَا. ٧ وَ بَعَدْ دَا، هُو قَدَّدْ عُيُونْ صِدْقِيَّا وَ جَنْزَرَهْ بِجِنْزِيرْ هَنَا نَحَاسْ مَطْبُوقْ لِيِوَدِّيهْ فِي بَابِلْ.

٨ وَ الْبَابِلِيِّينْ قَمَّوْا حَرَّقَوْا قَصِرْ الْمَلِكْ وَ بُيُوتْ الشَّعَبْ فِي مَدِينَةْ الْقُدُسْ وَ رَمَوْا دُرْدُرْهَا. ٩ وَ الشَّعَبْ الْفَضَّلَوْا فِي الْمَدِينَةْ وَ النَّاسْ الْأَنْضَمَّوْا لِمَلِكْ بَابِلْ وَ النَّاسْ الْآخَرِينْ دَا، نَبُوزَرَدَانْ كَبِيرْ الْحُرَّاسْ هَنَا الْمَلِكْ كَرَبَاهُمْ وَ وَدَّاهُمْ فِي الْغُرْبَةْ فِي بَابِلْ. ١٠ وَ لَاكِنْ شَعَبْ وَاحِدِينْ مَسَاكِينْ الْمَا يَمُلْكُوا أَرْض، نَبُوزَرَدَانْ أَنْطَاهُمْ إِذِنْ أَشَانْ يِفَضُّلُوا فِي بَلَدْ يَهُوذَا. وَ فِي الْيَوْم دَا، هُو قَسَّمْ لَيْهُمْ جِنَيْنَاتْ عِنَبْ وَ زِرَاعَةْ.

اللّه نجّى إرْمِيا و عَبْدالْمَلِك

١١ وَ نَبُوخَدْنَصَرْ مَلِكْ بَابِلْ أَنْطَى أَمُرْ لِنَبُوزَرَدَانْ كَبِيرْ حُرَّاسَهْ فِي شَانْ إِرْمِيَا وَ قَالْ: ١٢ «شِيلْ إِرْمِيَا دَا مَعَاكْ وَ فَكِّرْ فَوْقَهْ عَدِيلْ. مَا تِسَوِّي لَيَّهْ أَيِّ شَيّءْ فَسِلْ وَ سَوِّي لَيَّهْ الْيِدَوْرَهْ.» ١٣ وَ خَلَاصْ، نَبُوزَرَدَانْ كَبِيرْ الْحُرَّاسْ وَ نَبُوشَزْبَانْ كَبِيرْ الْمَسَائِيلْ وَ نِرْقَلْ شَرَاصَرْ كَبِيرْ الْقُيَّادْ وَ كُلَّ قُيَّادْ مَلِكْ بَابِلْ ١٤ رَسَّلَوْا جَابَوْا إِرْمِيَا مِنْ فَضَايَةْ الْحُرَّاسْ وَ أَنْطَوْه لِقَدَالْيَا وِلَيْد أَخِقَامْ وِلَيْد شَافَانْ. وَ مِثِلْ دَا، قَدَالْيَا خَلَّى إِرْمِيَا مَشَى بَيْتَهْ وَ قَعَدْ فِي أُسْط الشَّعَبْ.

١٥ وَ وَكِتْ إِرْمِيَا لِسَّاعْ مَكْرُوبْ فِي فَضَايَةْ الْحُرَّاسْ، اللّٰهْ حَجَّى لَيَّهْ وَ قَالْ: ١٦ «قُمّ وَ أَمْشِي لِعَبْدالْمَلِكْ الْحَبَشِي وَ قُولْ لَيَّهْ: ‹دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ”أَكِيدْ أَنَا نِحَقِّقْ الْكَلَامْ الْقُلْتَهْ ضِدّ الْمَدِينَةْ دِي وَ دَا لِلشَّرّ مَا لِلْخَيْر. وَ الْيَوْم دَا، إِنْتَ كُلَ تِشِيفَهْ. ١٧ وَ لَاكِنْ فِي الْيَوْم دَا، أَنَا نِنَجِّيكْ وَ إِنْتَ مَا يِسَلُّمُوكْ لِلنَّاسْ الْإِنْتَ تَخَافْ مِنْهُمْ. وَ دَا كَلَامْ اللّٰهْ. ١٨ وَ أَكِيدْ أَنَا نِنَجِّيكْ. إِنْتَ مَا تُمُوتْ فِي الْحَرِبْ وَ تِعِيشْ وَ تَبْقَى فَرْحَانْ أَشَانْ لِقِيتْ الْحَيَاةْ وَ دَا بِسَبَبْ إِنْتَ أَتْوَكَّلْت عَلَيِّ.“›» وَ دَا كَلَامْ اللّٰهْ.