إرْمِيا 37

صِدْقِيَّا دوّر يسْألوا ليه اللّه

١ صِدْقِيَّا وِلَيْد يُوشِيَّا بِقِي مَلِكْ فِي بَدَلْ يُيَكِينْ وِلَيْد يَهُويَقِمْ. وَ دَا نَبُوخَدْنَصَرْ مَلِكْ بَابِلْ بَسْ الدَّرَّجَهْ مَلِكْ فِي بَلَدْ يَهُوذَا. ٢ وَ لَا مَلِكْ صِدْقِيَّا وَ لَا كُبَارَاتَهْ وَ لَا شَعَبْ بَلَدَهْ مَا يَسْمَعَوْا كَلَامْ اللّٰهْ الْحَجَّاهْ بِوَاسِطَةْ النَّبِي إِرْمِيَا.

٣ وَ بَيْدَا كُلَ، الْمَلِكْ صِدْقِيَّا رَسَّلْ يَهُوكَلْ وِلَيْد شَلَمْيَا وَ صَفَنْيَا وِلَيْد مَعَسِيَّا رَاجِلْ الدِّينْ أَشَانْ يُقُولُوا لِلنَّبِي إِرْمِيَا: «مِنْ فَضْلَكْ، أَسْأَلْ اللّٰهْ إِلٰـهْنَا فِي شَانَّا!» ٤ وَ فِي الْوَكِتْ دَاكْ، النَّبِي إِرْمِيَا لِسَّاعْ مَا كَرَبَوْه فِي السِّجِنْ. هُو قَاعِدْ يَمْشِي جَايْ وَ جَايْ فِي لُبّ الشَّعَبْ. ٥ وَ وَكِتْ الْبَابِلِيِّينْ قَاعِدِينْ يِحَاصُرُوا مَدِينَةْ الْقُدُسْ، سِمْعَوْا كَدَرْ دَيْش فِرْعَوْن مَلِكْ مَصِرْ مَرَقْ مِنْ بَلَدَهْ وَ جَايِ. وَ خَلَاصْ، الْبَابِلِيِّينْ بَعَّدَوْا مِنْ مَدِينَةْ الْقُدُسْ.

٦ وَ خَلَاصْ، اللّٰهْ حَجَّى لِلنَّبِي إِرْمِيَا وَ قَالْ: ٧ «حَجِّي لِلْمُرَسَّلِينْ دَوْل وَ قُولْ لَيْهُمْ: ‹دَاهُو اللّٰهْ إِلٰـهْ بَنِي إِسْرَائِيلْ قَالْ: أَمْشُوا لِمَلِكْ يَهُوذَا الرَّسَّلَاكُو لَيِّ لِتَسْأَلَوْنِي. وَ قُولُوا لَيَّهْ: ”دَاهُو دَيْش فِرْعَوْن الْمَرَقْ لِيَفْزَعْكُو يِقَبِّلْ فِي بَلَدَهْ مَصِرْ. ٨ وَ خَلَاصْ، الْبَابِلِيِّينْ يَجُوا بَتَّانْ يَهْجُمُوا الْمَدِينَةْ دِي وَ يِشِيلُوهَا وَ يِحَرُّقُوهَا.“ ٩ وَ دَاهُو اللّٰهْ قَالْ: ”مَا تُغُشُّوا نُفُوسْكُو وَ تُقُولُوا الْبَابِلِيِّينْ مَشَوْا بَعِيدْ مِنْكُو. أَبَداً هُمَّنْ مَا يِخَلُّوكُو. ١٠ حَتَّى كَنْ نَصَرْتُوا فِي كُلَّ دَيْش الْبَابِلِيِّينْ الْقَاعِدِينْ يِحَارُبُوكُو كُلَ، كَنْ فَضَّلَوْا مِنْهُمْ إِلَّا رُجَالْ مَجْرُوحِينْ وَ رَاقْدِينْ فِي خِيَمْهُمْ كُلَ، هُمَّنْ يُقُمُّوا وَ يِحَرُّقُوا الْمَدِينَةْ دِي.“›»

إرْمِيا تهموه و سجنوه

١١ وَ وَكِتْ دَيْش الْبَابِلِيِّينْ بَعَّدْ مِنْ مَدِينَةْ الْقُدُسْ بِسَبَبْ دَيْش فِرْعَوْن، ١٢ إِرْمِيَا دَوَّرْ يَمْرُقْ مِنْ مَدِينَةْ الْقُدُسْ لِيَمْشِي أَرْض قَبِيلَةْ بَنْيَامِينْ. وَ هِنَاكْ يَلْقَى أَرْض وَرَثَتَهْ فِي أُسُطْ عَايِلْتَهْ. ١٣ وَ وَكِتْ هُو جَاءْ فِي بَابْ الْمَدِينَةْ الْأُسْمَهْ بَنْيَامِينْ، هُو لِقِي كَبِيرْ الْحُرَّاسْ الْأُسْمَهْ يِرِيَا وِلَيْد شَلَمْيَا وِلَيْد حَنَنْيَا قَاعِدْ فِي الْبَابْ دَا. وَ يِرِيَا لَزَمَهْ لِلنَّبِي إِرْمِيَا وَ قَالْ لَيَّهْ: «تِدَوْر تِنْضَمَّ لِدَيْش الْبَابِلِيِّينْ وَلَّا شُنُو؟» ١٤ وَ إِرْمِيَا رَدَّ وَ قَالْ: «مِثْلِي أَنَا نَمْشِي نِنْضَمَّ لِدَيْش الْبَابِلِيِّينْ؟ كَلَامَكْ دَا مَا صَحِيحْ!» وَ لَاكِنْ يِرِيَا مَا سِمِعْ كَلَامَهْ. كَرَبَهْ لِإِرْمِيَا وَ وَدَّاهْ قِدَّامْ الْكُبَارَاتْ. ١٥ وَ الْكُبَارَاتْ زِعِلَوْا زَعَلْ شَدِيدْ ضِدّ إِرْمِيَا وَ قَمَّوْا فَرَشَوْه وَ جَنْزَرَوْه فِي بَيْت يُونَتَانْ الْكَاتِبْ أَشَانْ هُمَّنْ سَوَّوْا فِي الْبَكَانْ دَا سِجِنْ. ١٦ وَ مِثِلْ دَا بَسْ، لِإِرْمِيَا كَرَبَوْه وَ دَسَّوْه فِي السُّلُولُو وَ فَوْقَهْ قَعَدْ مُدَّةْ طَوِيلَةْ.

صِدْقِيَّا سأل إرْمِيا بعشير

١٧ وَ الْمَلِكْ صِدْقِيَّا رَسَّلْ جَابَوْه لِإِرْمِيَا فِي قَصْرَهْ لِيَسْأَلَهْ بِعَشِيرْ. وَ سَأَلَهْ وَ قَالْ لَيَّهْ: «فِيَّهْ كَلَامْ مِنْ اللّٰهْ وَلَّا؟» وَ إِرْمِيَا قَالْ: «أَيْوَى فِي! وَ الْكَلَامْ دَا بُقُولْ، إِنْتَ تَقَعْ فِي إِيدْ مَلِكْ بَابِلْ.» ١٨ وَ إِرْمِيَا قَالْ بَتَّانْ لِمَلِكْ صِدْقِيَّا: «أَنَا سَوَّيْت شُنُو لَيْك إِنْتَ وَ كُبَارَاتَكْ وَ شَعَبَكْ أَشَانْ تِدِسُّونِي فِي السُّلُولُو دَا؟ ١٩ وَ وَيْن أَنْبِيَائْكُو الْغَشَّوْكُو وَ قَالَوْا: ‹مَلِكْ بَابِلْ مَا يَجِي ضِدُّكُو وَلَّا ضِدّ الْبَلَدْ دِي.› ٢٠ وَ هَسَّعْ، يَا سِيدِي الْمَلِكْ، أَسْمَعْ! مِنْ فَضْلَكْ، أَقْبَلْ دُعَايِ! مَا تِقَبِّلْنِي بَتَّانْ فِي بَيْت يُونَتَانْ الْكَاتِبْ. أَكِيدْ أَنَا نُمُوتْ فَوْقَهْ!»

٢١ وَ خَلَاصْ، الْمَلِكْ صِدْقِيَّا أَنْطَى أَمُرْ يُخُطُّوا إِرْمِيَا فِي فَضَايَةْ الْحُرَّاسْ وَ كُلَّ يَوْم يِجِيبُوا لَيَّهْ خُبْزَةْ مِنْ شَارِعْ الْخَبَّازِينْ لَحَدِّي كُلَّ الْخُبْزَةْ هِنْت الْمَدِينَةْ تِكَمِّلْ. وَ بِمِثِلْ دَا، إِرْمِيَا قَعَدْ فِي فَضَايَةْ الْحُرَّاسْ.