المَثَل هنا دقّاق الجِرار
١٨
١ وَ دَاهُو كَلَامْ اللّٰهْ الْقَالَهْ لَيِّ أَنَا إِرْمِيَا:
٢ «قُمّ وَ أَمْشِي عَجَلَةْ بَكَانْ دَقَّاقْ الْجِرَارْ وَ هِنَاكْ أَنَا نُقُولْ لَيْك كَلَامِي.»
٣ وَ خَلَاصْ،
أَنَا مَشَيْت بَكَانْ دَقَّاقْ الْجِرَارْ وَ دَاهُو قَاعِدْ يُدُقّ جَرَّهْ.
٤ وَ كَنْ بَكَانْ وَاحِدْ بَلَا رَايْه الْجَرّ الْقَاعِدْ يُدُقَّهْ بِقِي أَعْوَجْ،
هُو يِلِمّ الطِّينَةْ وَ يِعَجِّنْهَا بَتَّانْ وَ يُدُقّ جَرّ آخَرْ حَسَبْ الْيَعَجِبَهْ.
٥ وَ خَلَاصْ،
اللّٰهْ حَجَّى لَيِّ وَ قَالْ:
٦ «يَا نَاسْ بَنِي إِسْرَائِيلْ،
أَنَا مَا نَقْدَرْ نِسَوِّي فَوْقكُو مِثِلْ دَقَّاقْ الْجِرَارْ قَاعِدْ يِسَوِّيهْ فِي جَرَّهْ وَلَّا؟
يَا نَاسْ بَنِي إِسْرَائِيلْ،
إِنْتُو فِي إِيدَيْنِي مِثِلْ الطِّينَةْ فِي إِيدْ دَقَّاقْ الْجِرَارْ.
وَ دَا كَلَامْ اللّٰهْ.
٧ بَكَانْ وَاحِدْ،
أَنَا نِشِيلْ قَرَارْ لِنَمْرُقْ وَ نَرْمِي وَ نِدَمِّرْ أُمَّةْ أَوْ مَمْلَكَةْ.
٨ وَ لَاكِنْ كَنْ الْأُمَّةْ دِي خَلَّتْ عَمَلْهَا الْفَسِلْ الْبِسَبَبَهْ أَنَا شِلْت الْقَرَارْ ضِدَّهَا،
خَلَاصْ أَنَا نِخَلِّي الْفَسَالَةْ الْأَوَّلْ قَرَّرْت نِسَوِّيهَا فَوْقهَا.
٩ وَ بَكَانْ وَاحِدْ،
أَنَا نِشِيلْ قَرَارْ لِنَبْنِي وَ نِثَبِّتْ أُمَّةْ أَوْ مَمْلَكَةْ.
١٠ وَ لَاكِنْ كَنْ الْأُمَّةْ دِي تِسَوِّي الْفَسَالَةْ الْأَنَا مَا نِدَوْرهَا وَ مَا تَسْمَعْ كَلَامِي،
خَلَاصْ أَنَا نِخَلِّي الْخَيْر الْأَوَّلْ قُلْت نِسَوِّيهْ لَيْهَا.
١١ وَ هَسَّعْ،
قُمّ أَمْشِي لِنَاسْ يَهُوذَا وَ سُكَّانْ مَدِينَةْ الْقُدُسْ وَ قُولْ:
‹دَاهُو اللّٰهْ قَالْ:
”أَكِيدْ أَنَا بَسْ جَهَّزْت لَيْكُو فَسَالَةْ وَ قَمَّيْت بِمُؤآمَرَةْ ضِدُّكُو.
خَلِّي أَيِّ وَاحِدْ يِقَبِّلْ مِنْ دَرْبَهْ الْفَسِلْ وَ يِعَدِّلْ دَرْبَهْ وَ عَمَلَهْ.“
١٢ وَ لَاكِنْ هُمَّنْ يُقُولُوا:
”مَا لَمَّانَا!
أَنِحْنَ نِتَابُعُوا فِكِرْنَا وَ أَيِّ وَاحِدْ يِقَوِّي رَاسَهْ فِي الْفَسَالَةْ بَسْ!“›»
الشعب نِسوا اللّه و هو أباهم
١٣ وَ فِي شَانْ دَا،
دَاهُو اللّٰهْ قَالْ:
«فَتُّشُوا وَ أَسْأَلَوْا فِي لُبّ الْأُمَمْ.
هَلْ يَوْم وَاحِدْ سِمْعَوْا بِشَيّءْ مِثِلْ دَا وَلَّا؟
بَنِي إِسْرَائِيلْ الْمِثِلْ بِنَيَّةْ عُدْرِيَّةْ
سَوَّوْا فَضِيحَةْ.
١٤ هَلْ كُلَّ تَلَجْ جِبَالْ لُبْنَانْ يِسِيلْ
وَ يَنْزِلْ فِي نَوَايِطْ الْجِبَالْ وَلَّا؟
هَلْ الْأَلْمِي الْبَارِدْ
الْقَاعِدْ يِسِيلْ مِنْ بَعِيدْ
يَقِيفْ مَا يَجْرِي وَلَّا؟
لَا!
١٥ وَ لَاكِنْ شَعَبِي نِسَوْنِي
وَ حَرَّقَوْا بَخُورْ لِإِلٰـهَاتْ الْمَا يَنْفَعَوْا،
الْيِتَرْتُعُوهُمْ فِي دَرِبْهُمْ.
وَ فِي شَانْ الْإِلٰـهَاتْ دَوْل،
هُمَّنْ أَبَوْا دَرِبْهُمْ الْعَدِيلْ هَنَا زَمَانْ
لِيَمْشُوا فِي دَبَالِيْ الْكَدَادَةْ.
١٦ وَ هُمَّنْ سَوَّوْا بَلَدْهُمْ بَكَانْ مُخِيفْ
وَ الْيِشِيفُوهَا دَايْماً يِنْبَهْتُوا.
وَ أَيِّ نَادُمْ الْيُفُوتْ جَنْبَهَا يِلْعَجَّبْ
وَ يِهِزُّوا رُوسَيْهُمْ.
١٧ وَ أَنَا نِشَتِّتْهُمْ قِدَّامْ الْعَدُو
مِثِلْ شَالَتْهُمْ رِيحْ الصَّبَاحْ الشَّدِيدَةْ.
وَ فِي يَوْم دَمَارْهُمْ،
نَنْطِيهُمْ ضَهَرِي
وَ أَبَداً وِجْهِي مَا يِشِيفُوهْ.»
ناس واحِدين ألآمروا ضِدّ إرْمِيا
١٨ وَ نَاسْ وَاحِدِينْ قَالَوْا:
«يَلَّا خَلِّي نُقُمُّوا بِمُؤآمَرَةْ ضِدّ إِرْمِيَا.
بَلَايَهْ كُلَ عِنْدِنَا رُجَالْ دِينْ كَتِيرِينْ الْيِقَرُّونَا شُرُوطْ التَّوْرَاةْ وَ عِنْدِنَا حُكُمَاءْ الْيِوَصُّونَا وَ عِنْدِنَا أَنْبِيَاء الْيِحَجُّوا لَيْنَا كَلَامْ اللّٰهْ.
يَلَّا نَمْشُوا نَهْجُمُوهْ بِكَلَامْ الْيِعَيِّبَهْ وَ مَا نَجْعَلَوْا كَلَامَهْ الْيُقُولَهْ.»
١٩ وَ إِرْمِيَا شَحَدْ اللّٰهْ وَ قَالْ:
«يَا اللّٰهْ!
فَكِّرْ فَوْقِي
وَ أَسْمَعْ كَلَامْ عُدْوَانِي الْيَتْهَمَوْنِي.
٢٠ هَلْ الْخَيْر
يِكَفُّوهْ بِالشَّرّ وَلَّا؟
هُمَّنْ نَكَتَوْا لَيِّ نُقْرَةْ
لِيَرْمُونِي فَوْقهَا.
يَا اللّٰهْ!
أَذَّكَّرْ يَوْم أَنَا وَقَفْت قِدَّامَكْ
وَ دَافَعْ لَيْهُمْ
لِنِقَبِّلْ غَضَبَكْ مِنْهُمْ.
٢١ «وَ لَاكِنْ هَسَّعْ دَا،
نَزِّلْ الْجُوعْ فِي عِيَالْهُمْ
وَ أَكْتُلْهُمْ بِالْسَّيْف.
وَ خَلِّي عَوِينْهُمْ
يِوَدِّرَنْ أَوْلَادْهِنْ
وَ يَفْقُدَنْ رُجَالْهِنْ.
وَ خَلِّي الرُّجَالْ يُمُوتُوا بِالْوَبَاءْ
وَ صُبْيَانْهُمْ يُمُوتُوا بِالْسَّيْف فِي الْحَرِبْ.
٢٢ خَلِّي كُرَوْرَاكْهُمْ يِنْسَمِعْ
مِنْ لُبّ بُيُوتْهُمْ
وَكِتْ بِغَفْلَةْ
تِجِيبْ فَوْقهُمْ الْمُهَاجِمِينْ.
أَشَانْ نَكَتَوْا نُقْرَةْ لِيَرْمُونِي فَوْقهَا وَ يَكُرْبُونِي
وَ كَجَّوْا لَيِّ شَرَكْ تِحِتْ رِجِلَيْنِي.
٢٣ «يَا اللّٰهْ!
إِنْتَ تَعَرِفْ نِيِّتْهُمْ الْفَسْلَةْ
الْبَيْهَا يِدَوْرُوا يَكْتُلُونِي.
مَا تَغْفِرْ لَيْهُمْ خَطَاهُمْ
وَ مَا تُقُشّ مِنْ قِدَّامَكْ ذَنِبْهُمْ.
قُمّ ضِدُّهُمْ،
يَا اللّٰهْ!
خَلِّي يَقَعَوْا قِدَّامَكْ فِي وَكِتْ غَضَبَكْ.»