٦٤
١ *يَا اللّٰهْ!
أَفْتَحْ السَّمَاوَاتْ وَ أَنْزِلْ
أَشَانْ الْجِبَالْ يِنْهَزَّوْا قِدَّامَكْ!
٢ مِثِلْ بِسُرْعَةْ النَّارْ تَاكُلْ الْقَشّ
وَ تِفَوِّرْ الْأَلْمِي،
إِنْتَ كُلَ تِعَرِّفْ أُسْمَكْ لِخُصْمَانَكْ
وَ تِرَجِّفْ الْأُمَمْ قِدَّامَكْ!
٣ زَمَانْ،
إِنْتَ سَوَّيْت أَشْيَاءْ الْبِخَوُّفُوا
الْأَنِحْنَ مَا خَطَّيْنَا فَوْقهُمْ عَشَمْنَا.
خَلَاصْ،
إِنْتَ نَزَلْت
وَ الْجِبَالْ أَنْهَزَّوْا قِدَّامَكْ.
٤ أَبَداً مَا فِي نَادُمْ سِمِعْ
وَ لَا فَكَّوْا أَدَانَهْ
وَ لَا شَافْ إِلٰـهْ مِثْلَكْ إِنْتَ،
الْيِسَوِّي عَمَلْ عَجِيبْ
لِلْقَاعِدِينْ يَرْجَوْه بِعَشَمْ.
٥ إِنْتَ تِلَاقِي الْيَفْرَحَوْا بِسَوِّيِّنْ الْعَدَالَةْ
وَ الْيِذَّكَّرَوْا دُرُوبَكْ.
وَ إِنْتَ غِضِبْت لَيْنَا
أَشَانْ أَنِحْنَ أَذْنَبْنَا.
لَاكِنْ دَايْماً بِدُرُوبَكْ دَوْل،
أَنِحْنَ نَلْقَوْا النَّجَاةْ.
٦ وَ كُلِّنَا بِقِينَا مَا طَاهِرِينْ
وَ كُلَّ شَيّءْ النِّسَوُّوهْ عَدِيلْ
بِقِي مِثِلْ خَلَقْ مُنَجَّسْ بِدَمّ الْحَيْض.
وَ أَنِحْنَ كُلِّنَا يِبِسْنَا
مِثِلْ وَرَقْ الشَّدَرْ الدَّفَّقْ
وَ خَطَايَانَا شَالَوْنَا
مِثِلْ الرِّيحْ.
٧ مَا فِي نَادُمْ الْيِنَادِي أُسْمَكْ
وَ مَا فِي نَادُمْ الْيُقُمّ وَ يِنْرَبِطْ مَعَاكْ.
أَيْوَى،
إِنْتَ مَا وَجَّهْت عَلَيْنَا
وَ خَلَّيْتنَا وَقَعْنَا
بِتِحِتْ تَقَلَةْ خَطَانَا.
٨ يَا اللّٰهْ!
إِنْتَ بَسْ أَبُونَا.
أَنِحْنَ مِثِلْ الطِّينَةْ
وَ إِنْتَ بَسْ دَقَّاقْنَا
وَ أَنِحْنَ كُلِّنَا،
إِنْتَ بَسْ خَالِقْنَا.
٩ يَا اللّٰهْ!
مَا تَغْضَبْ فَوْقنَا!
مَا تِذَّكَّرْ دَايْماً فِي خَطَانَا!
شِيفْ!
أَنِحْنَ كُلِّنَا شَعَبَكْ.
١٠ مُدُنَكْ الْمُقَدَّسِينْ فِضَوْا
وَ جَبَلْ صَهْيُون بِقَتْ صَحَرَاء
وَ مَدِينَةْ الْقُدُسْ بِقَتْ بَكَانْ خَرَابْ.
١١ بَيْتنَا الْمُقَدَّسْ الْجَمِيلْ
الْفَوْقَهْ جُدُودْنَا شَكَرَوْك،
بِقِي لُقْمَةْ الْأَكَلَتْهَا النَّارْ
وَ كُلَّ شَيّءْ غَالِي الْعِنْدِنَا أَدَّمَّرْ!
١٢ يَا اللّٰهْ!
قِدَّامْ كُلَّ الدَّمَارْ دَا،
إِنْتَ مَا تِسَوِّي شَيّءْ وَلَّا؟
وَلَّا تَسْكُتْ وَ تِزِيدْ تَعَبْنَا؟