يوم التار و فِدا الشعب
٦٣
١ دَا يَاتُو الْجَايِ مِنْ بَلَدْ أَدَوْم،
مِنْ مَدِينَةْ بُصْرَةْ
بِخُلْقَانَهْ عِنْدُهُمْ نُقَتْ حُمُرْ؟
دَا يَاتُو الْجَايِ
بِخُلْقَانْ الْيِشِيلُوا الْعَيْن
وَ عَظِيمْ بِكَتَرَةْ قُدُرْتَهْ؟
اللّٰهْ قَالْ:
«دَا أَنَا!
وَ أَنَا بَسْ النِّحَجِّي بِعَدَالَةْ
وَ عِنْدِي الْقُدْرَةْ لِنِنَجِّي.»
٢ مَالَا خَلَقَكْ أَحْمَرْ؟
مَالَا خُلْقَانَكْ
مِثِلْ خُلْقَانْ هَنَا نَادُمْ الْيَخْدِمْ فِي عَصَّارَةْ الْعِنَبْ؟
٣ «أَنَا قَاعِدْ نَخْدِمْ وِحَيْدِي فِي الْعَصَّارَةْ
وَ مَا فِي نَادُمْ مِنْ الشُّعُوبْ مَعَايِ.
أَنَا فَجَّقْتُهُمْ فِي زَعَلِي
وَ عَصَرْتُهُمْ فِي غَضَبِي.
وَ دَمُّهُمْ رَشَّ فِي خُلْقَانِي
وَ لَطَّخْ كُلَّ لُبَاسِي.
٤ أَشَانْ فِي قَلْبِي،
دَا يَوْم هَنَا تَارْ
وَ السَّنَةْ النَّفْدَى فِيهَا،
هِي جَاتْ.
٥ أَنَا فَتَّشْت وَ مَا لِقِيتْ الْيِسَاعِدْنِي
وَ حِزِنْت وَكِتْ مَا شِفْت الْيِعَاوِنِّي.
خَلَاصْ،
دُرَاعِي جَابْ نَصْرِي
وَ غَضَبِي عَاوَنِّي.
٦ فِي زَعَلِي،
أَنَا فَجَّقْت شُعُوبْ
وَ فِي غَضَبِي،
سَوَّيْتهُمْ سَكْرَانِينْ
وَ دَفَّقْت دَمُّهُمْ فِي التُّرَابْ.»
رحْمة اللّه و تعب عياله
٧ أَنَا نِذَّكَّرْ رَحْمَةْ اللّٰهْ
وَ عَمَلَهْ الْوَاجِبْ لَيَّهْ الشُّكُرْ
حَسَبْ كُلَّ شَيّءْ السَّوَّاهْ لَيْنَا اللّٰهْ.
أَيْوَى،
خَيْرَهْ الْكَبِيرْ لِبَنِي إِسْرَائِيلْ،
عَدَالْتَهْ السَّوَّاهَا حَسَبْ خَيْرَهْ الْمَا عِنْدَهْ حَدّ.
٨ وَ هُو قَالْ:
«أَكِيدْ،
هُمَّنْ شَعَبِي
وَ عِيَالْ الْمَا يُغُشُّونِي.»
وَ خَلَاصْ،
اللّٰهْ بِقِي لَيْهُمْ مُنَجِّي.
٩ اللّٰهْ شَافْ ضِيقِتْهُمْ دِي،
هِنْتَهْ هُو.
وَ هُو مَا رَسَّلْ مُرْسَالْ وَ لَا مَلَكْ
لَاكِنْ اللّٰهْ هُو ذَاتَهْ بَسْ نَجَّاهُمْ.
وَ بِمَحَبِّتَهْ وَ مَحَنِّتَهْ،
هُو بَسْ فَدَاهُمْ.
وَ رَفَعَاهُمْ وَ حَمَلَاهُمْ
فِي مُدَّةْ كُلَّ الزَّمَنْ دَاكْ.
١٠ لَاكِنْ هُمَّنْ عِصَوْا اللّٰهْ
وَ غَضَّبَوْا رُوحَهْ الْمُقَدَّسْ.
خَلَاصْ،
قَبَّلْ وَ بِقِي لَيْهُمْ عَدُو
وَ هُو ذَاتَهْ قَمَّ حَارَبَاهُمْ.
١١ بَعَدْ دَا،
شَعَبَهْ أَذَّكَّرَوْا الْوَكِتْ الْفَاتْ،
الْوَكِتْ هَنَا مُوسَى.
وَ قَالَوْا:
«وَيْن هُو الْمَرَقْ شَعَبَهْ مِنْ الْبَحَرْ
مَعَ رُعْيَانْ غَنَمَهْ؟
وَ وَيْن هُو الْخَطَّ فَوْقهُمْ
رُوحَهْ الْمُقَدَّسْ؟
١٢ وَيْن هُو السَّاعَدْ مُوسَى بِإِيدَهْ الْمَجِيدَةْ
وَ شَقَّ الْبَحَرْ إِتْنَيْن قِدَّامْهُمْ
لِيِعَلِّي أُسْمَهْ إِلَى الْأَبَدْ؟
١٣ وَيْن هُو الْوَدَّاهُمْ فِي الْبَحَرْ الْغَرِيقْ
وَ مِثِلْ جُوَادْ فِي الصَّحَرَاء؟
وَ هُمَّنْ مَا أَتَّرْتَعَوْا.
١٤ وَ مِثِلْ بَهِيمَةْ التَّنْزِلْ فِي الْوَادِي،
رُوحْ اللّٰهْ وَدَّاهُمْ لِلرَّاحَةْ.»
مِثِلْ دَا،
يَا اللّٰهْ،
إِنْتَ قُدْت شَعَبَكْ
لِتِعَلِّي أُسْمَكْ الْمَجِيدْ.
الشعب يشْحدوا اللّه
١٥ يَا اللّٰهْ!
شِيفْ مِنْ السَّمَاوَاتْ
وَ أَنْظُرْ مِنْ مَسْكَنَكْ الْمُقَدَّسْ الْعَظِيمْ.
وَيْن مَحَبِّتَكْ الشَّدِيدَةْ؟
وَ وَيْن قُدُرْتَكْ؟
أَنِحْنَ مَا نِحِسُّوا بِمَحَنِّتَكْ
وَ لَا بِخَيْرَكْ لَيْنَا.
١٦ إِنْتَ بَسْ أَبُونَا
حَتَّى كَنْ إِبْرَاهِيمْ مَا يَعَرِفْنَا
وَ إِسْرَائِيلْ كُلَ مَا عِنْدَهْ بَيْنَا خَبَرْ.
إِنْتَ بَسْ اللّٰهْ أَبُونَا،
إِنْتَ بَسْ فَادِينَا
وَ دَا أُسْمَكْ مِنْ زَمَانْ.
١٧ وَ مَالَا،
يَا اللّٰهْ،
وَدَّرْتِنَا
بَعِيدْ مِنْ دُرُوبَكْ
وَ قَوَّيْت قُلُوبْنَا
لَحَدِّي مَا نَخَافَوْا مِنَّكْ؟
قَبِّلْ!
تَعَالْ فِي شَانْ عَبِيدَكْ
وَ فِي شَانْ قَبَايِلْ وَرَثَتَكْ.
١٨ وَ شَعَبَكْ الْمُخَصَّصْ
شَالَوْا الْبَلَدْ دِي لِمُدَّةْ قِصَيْرَةْ بَسْ.
وَ بَعَدْ دَا،
خُصْمَانَّا جَوْا
وَ فَجَّقَوْا بَيْتَكْ الْمُقَدَّسْ.
١٩ مِنْ مُدَّةْ طَوِيلَةْ،
أَنِحْنَ بِقِينَا
مِثِلْ نَاسْ الْإِنْتَ مَا حَكَمْت فَوْقنَا
وَ مِثِلْ نَاسْ الْمَا نَادَوْنَا بِأُسْمَكْ.