كلام البنات
٦
١ حَبِيبْكِ وَيْن مَشَى؟
أَوْرِينَا،
يَا إِنْتِ الْأَجْمَلْ مِنْ الْعَوِينْ!
حَبِيبْكِ فَاتْ بِوَيْن؟
أَوْرِينَا،
أَشَانْ نِفَتُّشُوهْ مَعَاكِ.
كلام المحْبوبة
٢ حَبِيبِي نَزَلْ فَوْقِي أَنَا جِنَيْنِتَهْ
الْمَزْرُوعَةْ بِشَدَرْ الدُّخَّانْ.
وَ يَسْرَحْ فِي جِنَيْنِتَهْ
وَ يَقْطَعْ النُّوَّارْ.
٣ حَبِيبِي،
أَنَا لَيَّهْ هُو وَ هُو لَيِّ أَنَا.
هُو سَارِحْ فِي النُّوَّارْ.
كلام المحْبوب
٤ إِنْتِ جَمِيلَةْ،
يَا حَبِيبْتِي،
مِثِلْ حِلَّةْ تِرْصَةْ
وَ سَمْحَةْ مِثِلْ مَدِينَةْ الْقُدُسْ.
إِنْتِ عَجِيبَةْ مِثِلْ دَيْش عَظِيمْ
الْمَاشِي بِرَايْتَهْ!
٥ دَلِّي عُيُونْكِ مِنِّي
أَشَانْ قَاعِدِينْ يِبَرْجُلُونِي.
وَ شَعَرْكِ مِثِلْ دَنَبْ الْفَرَسْ
النَّازْلَةْ مِنْ جَبَلْ قِلْعَادْ.
٦ وَ سُنُونْكِ بُيُضْ
مِثِلْ لَبَنْ الْغَنَمْ
وَ مِثِلْ الرِّهَيْو الْبَرَّدَهْ الْمَطَرْ.
أَيِّ سِنّ بِقَبِيلِتْهَا،
مَا فِي وَاحِدَةْ كُلَ وَقَعَتْ.
٧ وَ خُدُودْكِ مِثِلْ الرُّمَّانَاتْ
غَادِي لِلَفَّاحِتْكِ.
٨ مُمْكِنْ مَلِكْ الْبَلَدْ عِنْدَهْ
60 مَلِكَاتْ
وَ 80 سِرِّيَّاتْ
وَ بَنَاتْ عُدْرِيَّاتْ بَلَا عَدَدْ.
٩ وَ لَاكِنْ أَنَا،
حَمَامْتِي هِي وَاحِدَةْ وَ جَمِيلَةْ.
هِي وَاحِدَةْ فِي أَمَّهَا
وَ وَالْدِتْهَا تِحِبَّهَا.
الْبَنَاتْ شَافَنْهَا وَ قَالَنْ:
«مَبْرُوكْ لَيْكِ.»
الْمَلِكَاتْ وَ السِّرِّيَّاتْ شَافَنْهَا
وَ شَكَرَنْهَا وَ قَالَنْ:
١٠ «هِي دِي يَاتِي التِّبِينْ
مِثِلْ طَلُوعْ الْحَرَّايْ؟
هِي بَيْضَةْ مِثِلْ الْقَمَرْ
وَ تِرَارِي مِثِلْ الْحَرَّايْ.
هِي عَجِيبَةْ مِثِلْ دَيْش عَظِيمْ
الْمَاشِي بِرَايْتَهْ!»
١١ أَنَا نَزَلْت فِي جِنَيْنَةْ الْفَوَاكِهْ
لِنِشِيفْ نَبَاتْ الْوَادِي.
جِنَيْنَةْ الْعِنَبْ رَمَتْ وَلَّا؟
شَدَرْ الرُّمَّانْ نَوَّرْ وَلَّا؟
١٢ وَ مِنْ دُونْ نَعَرْفَهْ،
حَسَبْت نَفْسِي
أَنَا رَاكِبْ فِي عَرَبَةْ الْمَلِكْ!
كلام الآخرين
١٣ *تَعَالِي!
تَعَالِي،
يَا بِنْت حِلَّةْ شُلَامْ!
قَبِّلِي لِنِشِيفُوكِ!
مَالَا وَاجِبْ نِشِيفُوا بِنْت حِلَّةْ شُلَامْ
التَّلْعَبْ بَيْن صَفّ الْبَنَاتْ وَ صَفّ الصُّبْيَانْ؟