٢٩
١ الرَّاجِلْ الْفَكَّوْا أَدَانَهْ
وَ قَاعِدْ يِقَوِّي رَاسَهْ،
يِنْرَحِكْ مَرَّةْ وَاحِدْ
وَ بَتَّانْ مَا يَلْقَى عِلَاجْ.
٢ كَنْ الصَّالِحْ يَنْجَحْ،
الشَّعَبْ يَفْرَحَوْا
لَاكِنْ كَنْ الْعَاصِي يَحْكِمْ،
الشَّعَبْ يَقُنْتُوا.
٣ الْيِحِبّ الْحِكْمَةْ يِفَرِّحْ أَبُوهْ
وَ لَاكِنْ الْيَمْشِي لِلشَّرَامِيطْ يِوَدِّرْ مَالَهْ.
٤ الْمَلِكْ الْيَحْكِمْ بِالْعَدَالَةْ يَعَمِرْ بَلَدَهْ
وَ الْيِكَتِّرْ الْمِيرِي فِي شَعَبَهْ يِدَمِّرْهَا.
٥ الْيُغُشّ رَفِيقَهْ بِكَلَامْ حَلُو،
دَا مِثِلْ يُكُجّ شَرَكْ تِحِتْ رِجِلَيْنَهْ.
٦ عِصْيَانْ الرَّاجِلْ الْفَسِلْ دَا مِثِلْ شَرَكْ
وَ لَاكِنْ الصَّالِحْ يِرَقْرِقْ وَ يَفْرَحْ.
٧ الصَّالِحْ يَعَرِفْ حُقُوقْ الضَّعِيفِينْ
وَ لَاكِنْ الْعَاصِي مَا يِدَوْر يَعَرِفْهُمْ.
٨ الشَّمَّاتِينْ يِقَوُّمُوا الْفِتْنَةْ فِي الْحِلَّةْ
وَ لَاكِنْ الْعِنْدُهُمْ حِكْمَةْ يِبَرُّدُوا الزَّعَلْ.
٩ كَنْ الْحَكِيمْ يَقْعُدْ فِي الشَّرِيعَةْ ضِدّ الْمُنَافِقْ
هُو مَا يَلْقَى رَاحَةْ
أَشَانْ الْمُنَافِقْ يَزْعَلْ
وَ يِشَّمَّتْ.
١٠ كَتَّالِينْ الدِّمَمْ يَكْرَهَوْا الرَّاجِلْ التَّمَامْ
وَ لَاكِنْ الْعَدِيلِينْ يَحْمُوا حَيَاتَهْ.
١١ الْمَطْمُوسْ يُقُولْ كُلَ كَلَامْ قَلْبَهْ
وَ لَاكِنْ الْحَكِيمْ يِثَبِّتْ نَفْسَهْ.
١٢ الْحَاكِمْ كَنْ يُخُطّ أَدَانَهْ لِلْكَلَامْ الْكِدِبْ،
كُلَّ مَسَائِيلَهْ يَبْقَوْا فَسْلِينْ.
١٣ الضَّعِيفْ وَ الظَّالِمْ هُمَّنْ سَوَا سَوَا
أَشَانْ اللّٰهْ بَسْ أَنْطَاهُمْ الْحَيَاةْ.
١٤ الْمَلِكْ الْيَحْكِمْ لِلْمَسَاكِينْ بِالْحَقّ،
مُلْكَهْ يُدُومْ إِلَى الْأَبَدْ.
١٥ الضَّرْبَةْ وَ اللُّوَامَةْ يِجِيبُوا الْحِكْمَةْ
وَ لَاكِنْ الْمَا مُؤَدَّبْ يِعَيِّبْ أَمَّهْ.
١٦ كَنْ كِتْرَوْا الْعَاصِيِينْ،
يَكْتَرَوْا الذُّنُوبْ
وَ لَاكِنْ الصَّالِحِينْ يِشِيفُوا وَقِعِينْهُمْ.
١٧ أَدِّبْ وِلَيْدَكْ أَشَانْ تَلْقَى رَاحَةْ
وَ نَفْسَكْ تِنْمَلِي بِالْفَرْحَةْ.
١٨ الشَّعَبْ كَنْ مَا عِنْدُهُمْ رُؤْيَةْ لِلْمُسْتَقْبَلْ،
مَا عِنْدُهُمْ حُدُودْ.
وَ لَاكِنْ مَبْرُوكْ
لِلْيَحْفَضَوْا وَصَايَا اللّٰهْ.
١٩ مَا تِأَدِّبْ الْعَبِدْ بِالْكَلَامْ بَسْ.
هُو يَفْهَمْ وَ لَاكِنْ مَا يِطَبِّقْ.
٢٠ أَخَيْر تُخُطّ عَشَمَكْ فِي الْمَطْمُوسْ
مِنْ النَّادُمْ الْيُرُدّ عَجَلَةْ بَلَا فِكِرْ.
٢١ مَا تِجَلِّعْ عَبْدَكْ مِنْ هُو صَغَيَّرْ
أَشَانْ فِي الأَخِيرْ،
هُو يَعَصَاكْ.
٢٢ الزَّعَّالْ يِجِيبْ الْهُرَاجْ
وَ سِيدْ الْغَضَبْ يِكَتِّرْ الْفَسَالَةْ.
٢٣ الْيِعَظِّمْ نَفْسَهْ،
يَرْمُوهْ
وَ الْيِمَسْكِنْ نَفْسَهْ،
يِشَرُّفُوهْ.
٢٤ رَفِيقْ السَّرَّاقْ عَدُو نَفْسَهْ.
يَعَرِفْ الْعِقَابْ وَ بَيْدَا كُلَ،
يِلَبِّدْ الْجَرِيمَةْ.
٢٥ الْخَوْف مِنْ الْإِنْسَانْ،
دَا مِثِلْ شَرَكْ.
وَ لَاكِنْ اللّٰهْ يَحْفَضْ الْيِتْوَكَّلْ عَلَيَّهْ.
٢٦ نَاسْ كَتِيرِينْ يِفَتُّشُوا رِضَى الْمَلِكْ
وَ لَاكِنْ اللّٰهْ بَسْ الْحَاكِمْ فِي النَّاسْ.
٢٧ الصَّالِحِينْ يِحَرُّمُوا الظُّلُمْ
وَ الْعَاصِيِينْ يِحَرُّمُوا الدَّرِبْ الْعَدِيلْ.