أمْثال آخرين هنا سُلَيْمَان
٢٥
١ وَ دَوْل كُلَ أَمْثَالْ سُلَيْمَانْ اللَّمَّوْهُمْ رُجَالْ حِزْقِيَّا مَلِكْ يَهُوذَا.
٢ مَجْد الرَّبّ قَاعِدْ فِي سِرَّهْ
وَ مَجْد الْمُلُوكْ قَاعِدَةْ فِي السِّرّ الْيَكْشُفُوهْ.
٣ السَّمَاءْ بَعِيدَةْ وَ الْأَرْض عَرِيضَةْ
وَ فِكْرَةْ الْمُلُوكْ كُلَ مَا أَكِيدَةْ.
٤ أَمْرُقْ الْوَسَخْ مِنْ الْفُضَّةْ
وَ بَيْدَا،
الصَّيَّاغِي يَصْنَعْ بَيْهَا مَاعُونْ سَمَحْ.
٥ أَمْرُقْ الْعَاصِي مِنْ جَنْب الْمَلِكْ
وَ بَيْدَا،
مُلْكَهْ يَثْبِتْ فِي الْعَدَالَةْ.
٦ مَا تِكَوْلِفْ قِدَّامْ الْمَلِكْ
وَ مَا تِوَصِّفْ نَفْسَكْ فِي أُسْط الْكُبَارَاتْ.
٧ أَخَيْر يُقُولُوا لَيْك:
«تَعَالْ فَوْق هِنِي»
مِنْ يِعَيُّبُوكْ قِدَّامْ الْمَسْؤُولْ.
٨ مَا تِسَّعْجَلْ وَ تِكَلِّمْ فِي الشَّرِيعَةْ
بِالشَّافَتَهْ عَيْنَكْ.
تِسَوِّي شُنُو
كَنْ فِي الأَخِيرْ خَصِيمَكْ يِخَجِّلَكْ؟
٩ حِلّ مُشْكِلْتَكْ مَعَ جَارَكْ
وَ لَاكِنْ مَا تَمْرُقْ عَشِيرْ الْآخَرِينْ.
١٠ أَشَانْ كَنْ سِمْعَوْه،
يِعَيُّبُوكْ.
وَ كَلَامَكْ الْمَرَقْ مِنْ خَشْمَكْ،
مَا يِقَبِّلْ.
١١ الْكَلَامْ النَّافِعْ الْحَجَّوْه فِي وَكْتَهْ،
دَا مِثِلْ بَرَّادْ هَنَا دَهَبْ
فِي صُفْرَةْ هَنَا فُضَّةْ.
١٢ لُوَامَةْ الْحَكِيمْ
فِي أَدَانْ الْيَسْمَعْ الْكَلَامْ
أَخَيْر مِنْ شِنِفْ أَوْ خَاتِمْ
هَنَا دَهَبْ صَافِي.
١٣ الْمُرْسَالْ الْعِنْدَهْ أَمَانْ لِلْيِرَسُّلُوهْ
هُو مِثِلْ الْبُرُودَةْ فِي وَكْت الْقَطِعْ.
هُو يِبَرِّدْ جِسِمْ سِيَادَهْ.
١٤ الْقَالْ كَلَامْ وَ مَا تَمَّاهْ
مِثِلْ الْمَطَرْ الشَّالْ وَ مَا صَبَّ.
١٥ طُولْ الرُّوحْ،
يِغَيِّرْ فِكِرْ الْمَسْؤُولْ
وَ الْكَلَامْ الْحَلُو،
يَكْسِرْ الْعَضُمْ.
١٦ كَنْ لِقِيتْ عَسَلْ،
آكُلْ مِنَّهْ الْيِتِمَّكْ
أَشَانْ مَا تَشْبَعْ مِنَّهْ زِيَادَةْ وَ بَعَدَيْن يِقَدِّفَكْ.
١٧ مَا تِكَتِّرْ مَشِيكْ لِبَيْت رَفِيقَكْ
أَشَانْ هُو يَشْبَعْ مِنَّكْ وَ بَعَدَيْن يَكْرَهَكْ.
١٨ الْيَشْهَدْ بِكِدِبْ فِي أَخُوهْ
هُو مِثِلْ سَفَرَوْق أَوْ سَيْف أَوْ نُشَّابْ طَرِينْ.
١٩ أَمَانْ الْخَايِنْ فِي يَوْم الضِّيقَةْ
هُو مِثِلْ سِنّ الْمُشْقُوقَةْ وَ الرِّجِلْ الْمَكْسُورَةْ.
٢٠ الْغِنَيْ جَنْب الْحَزْنَانْ
مِثِلْ تَقْلَعْ خَلَقْ النَّادُمْ الْبَرْدَانْ
وَ تُصُبّ فِي الْعُوَارَةْ طَعَامْ.
٢١ كَنْ عَدُوكْ جِيعَانْ،
أَنْطِيهْ يَاكُلْ
وَ كَنْ عَطْشَانْ،
أَنْطِيهْ يَشْرَبْ.
٢٢ وَ بَيْدَا،
الْعَيْب يَكُرْبَهْ
وَ يَبْقَى مِثِلْ جَمُرْ الصَّبَّوْه فِي رَاسَهْ
وَ اللّٰهْ يِكَافِيكْ بِالْخَيْر.
٢٣ الزَّقَّايْ التَّجِي مِنْ الْوَطِي
تِجِيبْ الْمَطَرْ
وَ اللِّسَانْ الْيَكْشِفْ السِّرّ
يِجِيبْ الْخَطَرْ.
٢٤ أَخَيْر تَسْكُنْ وِحَيْدَكْ فِي رَاسْ بَيْتَكْ
مِنْ تِعِيشْ مَعَ الْمَرَةْ التِّخَالِفَكْ.
٢٥ الْخَبَرْ الْحَلُو الْجَايِ مِنْ بَعِيدْ
مِثِلْ الْأَلْمِي الْبَارِدْ
فِي لِسَانْ الْعَيَّانْ.
٢٦ كَنْ الصَّالِحْ يِقَصِّدْ بِحَالْ الْعَاصِي،
دَا مِثِلْ رَهَدْ أَلْمِي الْيَتْلَفْ
وَ عَيْن أَلْمِي التِّعَفِّنْ.
٢٧ مَا وَاجِبْ تَاكُلْ الْعَسَلْ بِكَتَرَةْ
وَ مَا وَاجِبْ تِدَوْر النَّاسْ يِشَرُّفُوكْ فِي كُلَّ وَكِتْ.
٢٨ الرَّاجِلْ الْمَا يَمْلُكْ نَفْسَهْ،
هُو مِثِلْ مَدِينَةْ الْمَا عِنْدَهَا دُرْدُرْ يَحْمِيهَا.