الحكمة تِنادي الناس
٩
١ الْحِكْمَةْ قَطَعَتْ شِعَبْ سَبْعَةْ
وَ بَيْهُمْ بَنَتْ بَيْتهَا.
٢ هِي دَبَحَتْ وَ دَايَرَتْ خَمَرْهَا
وَ فَرَّشَتْ بُسْطَاتْهَا.
٣ هِي رَسَّلَتْ خَدَّامَاتْهَا
وَ تِنَادِي مِنْ الْبَكَانْ الْعَالِي هَنَا الْحِلَّةْ.
٤ وَ تُقُولْ:
«أَيِّ نَادُمْ الْجَاهِلْ خَلِّي يَجِي هِنِي.»
وَ لِلْمَا عِنْدَهْ فِهِمْ،
هِي تُقُولْ:
٥ «يَلَّا آكُلُوا مِنْ أَكْلِي
وَ أَشَرْبَوْا مِنْ خَمَرِي الدَّايَرْتَهْ.
٦ خَلُّوا مِنْكُو الْجَهَلْ وَ تَحْيَوْا
وَ شِيلُوا الدَّرِبْ الْيَنْطِيكُو فِهِمْ.»
الحكيم و الشمّاتي
٧ «الْيِأَدِّبْ الشَّمَّاتِي
يَلْقَى الْبَغَاضَةْ
وَ الْيُلُومْ الْعَاصِي
يَلْقَى الْمُعْيَارْ.
٨ مَا تُلُومْ الشَّمَّاتِي
أَشَانْ هُو يَبْغُضَكْ
لَاكِنْ كَنْ تُلُومْ الْحَكِيمْ،
هُو يِرِيدَكْ.
٩ عَلِّمْ الْحَكِيمْ
وَ يَلْقَى حِكْمَةْ زِيَادَةْ.
عَرِّفْ الصَّالِحْ
وَ مَعْرَفَتَهْ تَبْقَى زِيَادَةْ.
١٠ الْخَوْف مِنْ اللّٰهْ
هُو أَسَاسْ الْحِكْمَةْ
وَ مَعْرَفَةْ اللّٰهْ الْقُدُّوسْ
تِفَهِّمَهْ لِلْإِنْسَانْ.
١١ وَ بَيِّ أَنَا الْحِكْمَةْ،
أَيَّامْ حَيَاتَكْ يِزِيدُوا
وَ سِنِينْ عُمْرَكْ يُطُولُوا.
١٢ كَنْ حَكِيمْ،
حِكْمَتَكْ تَنْفَعَكْ
وَ كَنْ شَمَّاتِي،
تِلْحَمَّلْ عَوَاقِبْ فِعِلَكْ.»
المطْموسة تعزِم
١٣ الْمَرَةْ الْمَطْمُوسَةْ كَلَامْهَا كَتِيرْ.
هِي مُغَفَّلَةْ وَ مَا تَعَرِفْ شَيّءْ.
١٤ هِي تَقْعُدْ فِي بَابْ بَيْتهَا
وَ فِي الْبَكَانْ الْعَالِي هَنَا حِلِّتْهَا
١٥ لِتِنَادِي الْفَايْتِينْ بِدَرِبْهُمْ
وَ الْمَاشِينْ عَدِيلْ فِي طَرِيقْهُمْ.
١٦ وَ تُقُولْ:
«أَيِّ نَادُمْ الْجَاهِلْ خَلِّي يَجِي هِنِي.»
وَ لِلْمَا عِنْدَهْ فِهِمْ،
هِي تُقُولْ:
١٧ «الشَّرَابْ الْمَسْرُوقْ،
لَذِيذْ
وَ الْأَكِلْ الْمُلَبَّدْ،
حَلُو.»
١٨ هُمَّنْ مَا يَعَرْفُوا
كَدَرْ دَا بَكَانْ الْمَيْتِينْ
وَ مَعْزُومِينْهَا
قَاعِدِينْ فِي الْهَاوِيَةْ.