الأبو يوصّي وِلَيْده
٣
١ يَا وِلَيْدِي،
مَا تَنْسَى تَعْلِيمِي
وَ فِي قَلْبَكْ أَحْفَضْ وَصِيّتِي
٢ أَشَانْ هُمَّنْ يِطَوُّلُوا عُمْرَكْ وَ سِنِينْ حَيَاتَكْ
وَ بَيْهُمْ تَلْقَى السَّلَامْ.
٣ الْخَيْر وَ الْأَمَانْ،
مَا تِخَلِّيهُمْ.
أَرْبُطْهُمْ فِي رَقَبَتَكْ
وَ أَكْتِبْهُمْ فِي قَلْبَكْ.
٤ وَ بَيْدَا،
تَلْقَى رِضَى وَ نَجَاحْ سَمَحْ
قِدَّامْ الرَّبّ وَ قِدَّامْ النَّاسْ.
٥ أَتْوَكَّلْ عَلَيْ اللّٰهْ بِكُلَّ قَلْبَكْ
وَ مَا تِتْوَكَّلْ عَلَيْ نَفْسَكْ.
٦ قَدِّمْ اللّٰهْ فِي كُلَّ خِدِمْتَكْ
وَ هُو يِسَهِّلْ لَيْك دَرْبَكْ.
٧ مَا تِشِيفْ نَفْسَكْ حَكِيمْ.
أَخَافْ اللّٰهْ وَ قَبِّلْ مِنْ الشَّرّ.
٨ وَ دَا يَشْفِي جِسْمَكْ
وَ يِقَوِّي عُضَامَكْ.
٩ كَرِّمْ اللّٰهْ بِقَدِّمِينْ مَالَكْ
وَ مِنْ أَوَّلْ إِنْتَاجْ زِرَاعْتَكْ.
١٠ وَ بَيْدَا،
دَبَنْقَاتَكْ يِنْمَلُوا مَعَاشْ
وَ قِرَبَّكْ يِنْمَلُوا عَصِيرْ عِنَبْ.
١١ يَا وِلَيْدِي،
مَا تَابَى أَدَبْ اللّٰهْ
وَ مَا تَكْرَهْ عِقَابَهْ
١٢ أَشَانْ اللّٰهْ يِعَاقِبْ الْيِحِبَّهْ
مِثِلْ الْأَبُو يِعَاقِبْ وِلَيْدَهْ الْيِرِيدَهْ.
الحكمة عِنْدها فايْدة
١٣ مَبْرُوكْ لِلنَّادُمْ اللِّقِي الْحِكْمَةْ
وَ النَّادُمْ الْكَرَبْ الْفِهِمْ
١٤ أَشَانْ دَا أَخَيْر مِنْ رِبِحْ الْفُضَّةْ
وَ أَخَيْر مِنْ كَسَيْب الدَّهَبْ.
١٥ الْحِكْمَةْ غَالِيَةْ
مِنْ الدَّهَبْ الصَّافِي
وَ كُلَّ شَيّءْ الْبِرِيدُوا
مَا يِقَادِرْهَا.
١٦ وَ هِي شَايْلَةْ فِي إِيدْهَا الْوَاحِدَةْ
طُولْ الْعُمُرْ
وَ فِي إِيدْهَا الْآخَرَةْ،
غُنَى وَ شَرَفْ.
١٧ دُرُوبْهَا يِوَدُّوا فِي الْحَلُو
وَ كُلَّ طُرُقْهَا سَلَامْ.
١٨ الْحِكْمَةْ هِي شَدَرَةْ الْحَيَاةْ لِلْيَكْرُبْهَا
وَ الْيَمْسُكْهَا يَبْقَى مُبَارَكْ.
١٩ بِالْحِكْمَةْ،
اللّٰهْ أَسَّسْ الْأَرْض
وَ بِعِلْمَهْ،
ثَبَّتْ السَّمَاوَاتْ.
٢٠ بِمَعْرَفَتَهْ،
أَلْمِي مَرَقْ مِنْ الْأَرْض
وَ السَّحَابْ كُلَ نَزَّلْ مَطَرَهْ.
الحكيم يعيش بلا خَوْف
٢١ يَا وِلَيْدِي،
أَحْفَضْ الْحِكْمَةْ
وَ الرَّايْ الْعَدِيلْ،
وَ مَا تِبَعِّدْهُمْ مِنْ عَيْنَكْ
٢٢ أَشَانْ هُمَّنْ رُوحْ جِسْمَكْ
وَ زِينَةْ رَقَبَتَكْ.
٢٣ وَ بَيْدَا خَلَاصْ،
تَمْشِي بِأَمَانْ فِي دَرْبَكْ
وَ مَا فِي شَيّءْ الْيُطُقّ رِجْلَكْ.
٢٤ كَنْ رَقَدْت،
تَرْقُدْ بَلَا خَوْف
وَ كَنْ نُمْت،
نَوْمَكْ يَبْقَى حَلُو.
٢٥ مَا تَرْجِفْ مِنْ الْخَوْف الْمُفَاجِئ
وَ لَا مِنْ خَرَابْ الْعَاصِيِينْ كَنْ يَجِي.
٢٦ أَشَانْ اللّٰهْ يَسْتُرَكْ
وَ يَحْفَضْ رِجْلَكْ مِنْ الشَّرَكْ.
الزَيْن و نتيجْته
٢٧ كَنْ عِنْدَكْ قُدْرَةْ لِتِسَوِّي الزَّيْن
مَا تَمْنَعَهْ لِلنَّاسْ الْحَوْجَانِينْ لَيَّهْ.
٢٨ كَنْ عِنْدَكْ،
مَا تُقُولْ لِأَخُوكْ:
«أَمْشِي،
أَمْبَاكِرْ تَعَالْ نَنْطِيكْ.»
٢٩ مَا تِشِيلْ نِيَّةْ فَسْلَةْ ضِدّ جَارَكْ
الْعَايِشْ بِأَمَانْ جَنْبَكْ.
٣٠ مَا تِهَارِجْ مَعَ نَادُمْ بَلَا سَبَبْ
كَنْ هُو مَا سَوَّى لَيْك شَيّءْ فَسِلْ.
٣١ مَا تَحْسِدْ سِيدْ الْعُنُفْ
وَ أَبَداً مَا تِشِيلْ دَرْبَهْ.
٣٢ أَشَانْ الْفَسَادْ،
اللّٰهْ حَرَّمَهْ
وَ لَاكِنْ النَّادُمْ الْعَدِيلْ،
اللّٰهْ يَنْطِيهْ سِرَّهْ.
٣٣ بَيْت الْعَاصِيِينْ يَلْقَى غَضَبْ اللّٰهْ
وَ بَيْت الصَّالِحِينْ يَلْقَى بَرَكَتَهْ.
٣٤ يِشَّمَّتْ لِلشَّمَّاتِينْ
وَ لَاكِنْ يَرْضَى لِلْمَسَاكِينْ.
٣٥ الْحَكِيمْ يَوْرِثْ الشَّرَفْ
وَ الْمَطْمُوسْ يَلْقَى إِلَّا الْعَيْب.