وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ الْعِنْدَهَا تَمَانَةْ حَبِلْ، مَزْمُورْ لِدَاوُدْ
١٢
١ نَجِّينِي،
يَا اللّٰهْ!
أَشَانْ مَا فِي صَالِحْ
وَ مَا فِي إِنْسَانْ أَمِينْ فِي أُسْط النَّاسْ.
٢ أَيِّ وَاحِدْ يَكْدِبْ لِأَخُوهْ
وَ شَلَالِيفَهْ يِحَجُّوا كَلَامْ غَشّ
وَ قَلْبَهْ مَا وَاحِدْ.
٣ وَ خَلِّي اللّٰهْ يِكَسِّرْ
كُلِّ خَشُمْ الْيِحَجِّي بِغَشّ
وَ اللِّسْنَيْ الْيِكَلُّمُوا بِإِسْتِكْبَارْ.
٤ هُمَّنْ يُقُولُوا:
«بِلِسْنَيْنَا نِنَّصُرُوا
وَ خُشُومْنَا هِنَيْنَا،
يَاتُو يَحْكِمْ فَوْقنَا؟»
٥ لَاكِنْ اللّٰهْ قَالْ:
«هَسَّعْ نُقُمّ
وَ نِجِيبْ النَّجَاةْ لِلنَّاسْ الْمَحْقُورِينْ.
أَشَانْ الْمَسَاكِينْ،
ظَلَمَوْهُمْ
وَ الضَّعِيفِينْ يَقُنْتُوا.»
٦ وَ كَلَامْ اللّٰهْ صَافِي
مِثِلْ الْفُضَّةْ الْقَطَعَوْهَا
وَ صَفَّوْهَا سَبْعَةْ مَرَّاتْ.
٧ يَا اللّٰهْ،
إِنْتَ تَحْفَضْ الْمَظْلُومِينْ
وَ تَحْمِينَا إِلَى الْأَبَدْ.
٨ الْعَاصِيِينْ يِلِفُّوا فِي كُلَّ بَكَانْ
وَكِتْ الْفَسَالَةْ تِزِيدْ أَمْبَيْن النَّاسْ.