وَصِيَّةْ لِكَبِيرْ الْغَنَّايِينْ: لِيِغَنُّوهْ بِآلَاتْ الْمُسِيقَى، بِجِقِنْدِيَّةْ الْعِنْدَهَا تَمَانَةْ حَبِلْ، مَزْمُورْ لِدَاوُدْ
٦
١ يَا اللّٰهْ!
أَهْدِينِي بَلَا زَعَلْ
وَ أَدِّبْنِي بَلَا غَضَبْ!
٢ أَرْحَمْنِي،
يَا اللّٰهْ،
أَشَانْ أَنَا مَا عِنْدِي قُدْرَةْ.
أَشْفِينِي،
يَا اللّٰهْ،
أَشَانْ عُضَامِي مَاعَوْا.
٣ أَنَا نِنْبَهِتْ زِيَادَةْ مِنْ دَاخَلْ قَلْبِي.
وَ دَا لِمَتَى،
يَا اللّٰهْ؟
٤ تَعَالْ،
يَا اللّٰهْ!
خَلِّصْنِي
وَ بِرَحْمَتَكْ،
نَجِّينِي!
٥ أَشَانْ الْيُمُوتُوا مَا يِذَّكَّرَوْا أُسْمَكْ
وَ فِي الْقَبُرْ،
يَاتُو يَشْكُرَكْ؟
٦ أَنَا عِيِيتْ مِنْ شِدَّةْ الْقَنِتِينْ
وَ دُمُوعِي يُرُشُّوا فُرَاشِي
وَ كُلِّ لَيْلَةْ،
يِبِلُّوا سَرِيرِي.
٧ وَ عُيُونِي ضِعْفَوْا مِنْ الْحِزِنْ
وَ بِسَبَبْ كُلَّ الْيِضَايُقُونِي.
٨ كِسُّوا مِنِّي بَعِيدْ،
إِنْتُو كُلُّكُو التِّسَوُّوا الظُّلُمْ
أَشَانْ اللّٰهْ سِمِعْ بَكِيِّ!
٩ أَيْوَى،
اللّٰهْ سِمِعْ دُعَايِ
وَ اللّٰهْ قِبِلْ صَلَاتِي.
١٠ كُلَّ عُدْوَانِي يِعِيبُوا وَ يَرْجُفُوا
وَ طَوَّالِي كُلُّهُمْ يِقَبُّلُوا
مُغَطَّيْهُمْ الْعَيْب.