وَصِيَّةْ لِكَبِيرْ الْغَنَّايِينْ: لِيِغَنُّوهْ بِصُفَّارَةْ، مَزْمُورْ لِدَاوُدْ
٥
١ خُطّ أَدَانَكْ لِكَلَامِي،
يَا اللّٰهْ،
وَ أَقْبَلْ شَكْوِتِي.
٢ أَسْمَعْ حِسّ مُنَادَاتِي لِتَفْزَعْنِي،
يَا مَلِكِي،
يَا إِلٰـهِي،
إِنْتَ الْأَنَا نَشْحَدَكْ.
٣ يَا اللّٰهْ،
كُلِّ فَجُرْ أَسْمَعْ حِسِّي!
وَ فِي كُلِّ فَجُرْ،
أَنَا نِجَهِّزْ وَ نَرْجَاكْ.
٤ أَشَانْ إِنْتَ إِلٰـهْ الْمَا تَرْضَى بِالشَّرّ
وَ مَا تَقْبَلْ الْفَسَالَةْ.
٥ الْمُتَكَبِّرِينْ مَا يَقِيفُوا فِي حَضَرَتَكْ
وَ إِنْتَ تَكْرَهْ كُلَّ الْيِسَوُّوا الظُّلُمْ.
٦ يَا اللّٰهْ!
إِنْتَ تِدَمِّرْ الْكَدَّابِينْ
وَ كَتَّالِينْ الدِّمَمْ وَ الْغَشَّاشِينْ،
تَجْعَلْهُمْ مِثِلْ مُحَرَّمِينْ.
٧ وَ لَاكِنْ بِرَحْمَتَكْ الْكَبِيرَةْ،
أَنَا نَدْخُلْ فِي فَضَايَةْ بَيْتَكْ.
وَ بِمَخَافَتَكْ،
نَسْجُدْ عَلَيْ بَيْتَكْ الْمُقَدَّسْ.
٨ يَا اللّٰهْ!
قُودْنِي حَسَبْ عَدَالْتَكْ
بِسَبَبْ عُدْوَانِي
وَ سَهِّلْ لَيِّ دَرْبَكْ.
٩ أَشَانْ مَا فِي شَيّءْ أَكِيدْ فِي كَلَامْهُمْ
وَ قُلُوبْهُمْ مَلَانِينْ بِدَمَارْ
وَ كَلَامْ خُشُومْهُمْ يِوَدِّي لِلْقَبُرْ.
وَ لِسْنَيْهُمْ مَلَانِينْ بِكَلَامْ حَلُو غَشَّاشْ.
١٠ يَا رَبّ!
أَجْعَلْهُمْ خَاطِيِّينْ
وَ خَلِّيهُمْ يَقَعَوْا بِسَبَبْ مُؤآمَرَتْهُمْ!
أَطْرُدْهُمْ بِسَبَبْ جَرَايِمْهُمْ الْكَتِيرِينْ
أَشَانْ هُمَّنْ عِصَوْك.
١١ خَلَاصْ،
كُلَّ الْيَلْجَأَوْا لَيْك يَفْرَحَوْا
وَ دَايْماً يِزَغْرُطُوا وَ يِرَقْرُقُوا.
إِنْتَ مَلْجَأْ لِلْيِحِبُّوا أُسْمَكْ
وَ هُمَّنْ يِنَطُّطُوا مِنْ الْفَرَحْ.
١٢ أَشَانْ إِنْتَ،
يَا اللّٰهْ،
تِبَارِكْ الصَّالِحْ
وَ مِثِلْ دَرَقَةْ كَبِيرَةْ،
تَحْمِيهْ بِنِعْمَتَكْ.