أيُّوب يشْكي
١٦
١ وَ أَيُّوبْ شَالْ الْكَلَامْ وَ قَالْ:
٢ أَنَا سِمِعْت أَشْيَاءْ كَتِيرِينْ مِثِلْ دَوْل،
إِنْتُو كُلُّكُو الْمُصَبِّرِينْ تِتَعُّبُونِي.
٣ إِنْتُو قُلْتُوا:
«فِي نِهَايَةْ
لِلْكَلَامْ الْفَاضِي دَا وَلَّا؟
وَ شُنُو الْخَلَّاكْ
تُرُدّ مِثِلْ دَا؟»
٤ وَ كَنْ أَنَا كُلَ فِي بَكَانْكُو،
أَنَا ذَاتِي نَقْدَرْ نِحَجِّي مِثِلْكُو.
وَ نُقُولْ كَلَامْ كَتِيرْ فَوْقكُو
وَ نَقْدَرْ نِهِزّ رَاسِي
وَ نِشَّمَّتْ لَيْكُو.
٥ لَاكِنْ بِكَلَامِي أَنَا،
نِقَوِّيكُو
وَ بِلِسَانِي،
نِسَاعِدْكُو!
أيُّوب بِقي هدف للربّ
٦ وَ لَاكِنْ كَنْ أَنَا حَجَّيْت،
وَجَعِي مَا يَنْقُصْ
وَ كَنْ سَكَتّْ،
تَعَبِي
مَا يِبَعِّدْ مِنِّي.
٧ وَ هَسَّعْ خَلَاصْ،
يَا رَبّ،
إِنْتَ عَيَّيْتنِي
وَ دَسَّيْت الْحِزِنْ فِي كُلَّ عَايِلْتِي.
٨ وَ إِنْتَ خَطَّيْت أَلَمْ فِي جِسْمِي الْيَشْهَدْ فَوْقِي
وَ بَطُولِي جَابْ التُّهْمَةْ فَوْقِي.
٩ غَضَبْ الرَّبّ قَطَّعْنِي
مِثِلْ حَيْوَانْ يِقَطِّعْ رِمِّتَهْ.
وَ هُو وَصَّفْ فَوَاطْرَهْ لَيِّ
وَ حَمَّرْنِي مِثِلْ هُو خَصِيمِي.
١٠ نَاسْ فَتَحَوْا خُشُومْهُمْ كُبَارْ ضِدِّي
وَ شَدَّقَوْنِي لِيِعَيُّبُونِي
وَ لَمَّوْا سَوَا ضِدِّي.
١١ الرَّبّ سَلَّمَانِي لِلْفَسْلِينْ.
أَيْوَى،
سَلَّمَانِي فِي إِيدْ الْعَاصِيِينْ.
١٢ أَنَا قَاعِدْ فِي رَاحَةْ وَ هُو ضَرَبْنِي
وَ كَرَبَانِي مِنْ عَنْقَرَتِي وَ رِحِكْنِي.
وَ قَوَّمْنِي وَ خَطَّانِي هَدَفْ
١٣ وَ نَشَاشِيبَهْ لِحْقَوْنِي.
هُو طَعَنِّي فِي نَايْطِي بَلَا مَحَنَّةْ
وَ دَفَّقْ أَمْ مَرَّارْتِي فِي التُّرَابْ.
١٤ هُو يَطْعَنِّي طَعْنَةْ وَرَاءْ طَعْنَةْ
وَ يَجْرِي عَلَيِّ مِثِلْ فَارِسْ.
١٥ أَنَا خَيَّطْت شُوَالْ وَ لِبِسْتَهْ
وَ رَاسِي فِي التُّرَابْ دَسَّيْتَهْ.
١٦ وَ وِجْهِي ضَلَّمْ مِنْ الْحِزِنْ
وَ عُيُونِي حَمَّرَوْا مِنْ الْبَكِي.
١٧ لَاكِنْ إِيدَيْنِي مَا سَوَّوْا أَيِّ عُنُفْ!
وَ صَلَاتِي دَايْماً صَافِيَةْ!
أيُّوب طلب شاهِد
١٨ يَا الْأَرْض!
مَا تِلَبِّدِي دَمِّي!
خَلِّي صِرَاخِي يِنْسَمِعْ فِي أَيِّ بَكَانْ!
١٩ وَ هَسَّعْ،
الْيَشْهَدْ لَيِّ قَاعِدْ فِي السَّمَاءْ
وَ الْيَحْمِينِي قَاعِدْ فِي الْعَالِي.
٢٠ رُفْقَانِي يِشَّمَّتَوْا فَوْقِي
لَاكِنْ أَنَا نِوَجِّهْ بِدُمُوعِي لِلرَّبّ.
٢١ خَلِّي الشَّاهِدْ يِدَافِعْ لَيِّ قِدَّامْ الرَّبّ
مِثِلْ نَادُمْ يِدَافِعْ لِأَخُوهْ.
٢٢ أَشَانْ أَيَّامْ عُمْرِي قَرِيبْ يِكَمُّلُوا
وَ نَمْشِي بِطَرِيقْ الْمَا نَجِي بَيَّهْ.