الإنْسان وِلْدوه للتعب
٥
١ يَا أَيُّوبْ،
نَادِي!
هَلْ فِي نَادُمْ يُرُدّ لَيْك وَلَّا؟
وَ مِنْ الْمَلَائِكَةْ
إِنْتَ تِوَجِّهْ عَلَيْ يَاتُو؟
٢ أَشَانْ الزَّعَلْ يَكْتُلْ الْمُنَافِقْ
وَ الْحُسُدْ يِكَمِّلْ الْمُغَفَّلْ.
٣ أَنَا شِفْت الْمُنَافِقْ دَسَّ عُرُوقَهْ
لَاكِنْ طَوَّالِي،
أَنَا لَعَنْت
نَاسْ بَيْتَهْ وَ قُلْت:
٤ «خَلِّي عِيَالَهْ مَا يَلْقَوْا فَزَعْ
فِي خَشُمْ بَابْ الْحِلَّةْ.
خَلِّي يِحَاكُمُوهُمْ فِي الشَّرِيعَةْ
وَ مَا فِي نَادُمْ الْيِنَجِّيهُمْ!
٥ خَلِّي الْجِيعَانِينْ يَاكُلُوا
إِنْتَاجْ الْمُنَافِقْ دَا.
أَيْوَى،
يِشِيلُوا إِنْتَاجَهْ
الْفِي لُبّ زَرَايِبْ الشَّوْك كُلَ!
وَ خَلِّي الطَّمَّاعِينْ
يِشِيلُوا غُنَايَهْ.»
٦ صَحِيحْ،
الشَّرّ مَا يَمْرُقْ
مِنْ التُّرَابْ
وَ الْفَسَالَةْ مَا تَبْذُرْ
مِنْ الْأَرْض.
٧ لَاكِنْ الْإِنْسَانْ وِلْدَوْه لِلتَّعَبْ
مِثِلْ شَرَارْ النَّارْ الْيُقُمّ وَ يِطِيرْ.
الربّ ينجّي الضعيف
٨ لَاكِنْ كَنْ لَيِّ أَنَا،
نِفَتِّشْ الرَّبّ
وَ لَيَّهْ هُو بَسْ نَرْفَعْ ضَلِيمْتِي.
٩ هُو يِسَوِّي أَشْيَاءْ كُبَارْ الْمَا يِنْفَهْمُوا
وَ عَجَايِبْ بَلَا عَدَدْ.
١٠ هُو بَسْ الْيِنَزِّلْ مَطَرَةْ فِي وِجْه الْأَرْض
وَ يَزْقِي بَيْهَا الزِّرَاعَةْ.
١١ هُو يَرْفَعْ الْمَسَاكِينْ فَوْق،
وَ الْقَاعِدِينْ فِي الضَّلَامْ يَلْقَوْا النَّجَاةْ.
١٢ هُو يِفَشِّلْ فِكِرْ النَّجِيضِينْ
أَشَانْ مَا يَنْجَحَوْا بِخِدْمَةْ إِيدَيْهُمْ.
١٣ هُو يَرْمِي الْحَكِيمِينْ فِي شَرَكْ مُؤآمَرَتْهُمْ
وَ يِفَشِّلْ شَوْرَةْ الْمُنَافِقِينْ.
١٤ بِنَهَارْ،
النَّاسْ دَوْل يَوَاجُهُوا ضَلَامْ
وَ بِقَايْلَةْ،
يِدَّقَّشَوْا مِثِلْ بِاللَّيْل.
١٥ لَاكِنْ الرَّبّ يِنَجِّي الضَّعِيفْ
مِنْ لِسَانْهُمْ الطَّرِينْ
أَيْوَى،
يِنَجِّي الْمِسْكِينْ
مِنْ إِيدْ الشَّدِيدْ.
١٦ خَلَاصْ،
الضَّعِيفِينْ يَلْقَوْا عَشَمْ
وَ الظَّالِمِينْ خُشُومْهُمْ يِنْسَدَّوْا.
١٧ مَبْرُوكْ لِلْإِنْسَانْ
الْيِأَدِّبَهْ الرَّبّ!
وَ مِثِلْ دَا،
إِنْتَ كُلَ،
مَا تَابَى هِدَايَةْ الْقَادِرْ!
١٨ أَشَانْ الرَّبّ بَسْ يَجْرَحْ وَ يِدَاوِي
وَ يِكَسِّرْ وَ بِإِيدَيْنَهْ،
يِرَكِّبْ.
١٩ وَ سِتَّةْ مَرَّاتْ،
هُو يِنَجِّيكْ
مِنْ التَّعَبْ
وَ فِي الْمَرَّةْ السَّابْعَةْ كُلَ،
الْفَسَالَةْ مَا تَلْحَقَكْ.
٢٠ وَ فِي وَكْت الْجُوعْ،
هُو يَفْدَاكْ مِنْ الْمَوْت
وَ فِي الْحَرِبْ،
يَفْدَاكْ مِنْ ضَرْبَةْ السَّيْف.
٢١ تِدَّارَقْ مِنْ ضَرْبَةْ اللِّسَانْ
وَ مَا تَخَافْ مِنْ الدَّمَارْ وَكِتْ يَجِي.
٢٢ تِشَّمَّتْ لِلدَّمَارْ وَ الْجُوعْ
وَ مَا تَخَافْ مِنْ حَيْوَانَاتْ الْكَدَادَةْ.
٢٣ أَشَانْ عِنْدَكْ عَلَاقَةْ مَعَ حُجَارْ الْكَدَادَةْ
وَ سَلَامْ مَعَ حَيْوَانَاتْ الْكَدَادَةْ.
٢٤ بَيْدَا،
تَعَرِفْ كَدَرْ فِي خَيْمِتَكْ
فِيَّهْ سَلَامْ
وَ تِرَاقِبْ مَرْعَاكْ وَ شَيّءْ
مَا يِقَصِّرْ لَيْك.
٢٥ تِشِيفْ ذُرِّيّتَكْ تَبْقَى كَتِيرَةْ
وَ عِيَالَكْ يَبْقَوْا مِثِلْ قَشّ الْأَرْض.
٢٦ وَ بِقُدُرْتَكْ بَسْ،
تُمُوتْ وَ تَنْزِلْ فِي الْقَبُرْ
مِثِلْ جُرُنْ الْقَنَادِيلْ فِي وَكِتْهُمْ.
٢٧ دَاهُو الشَّيّءْ دَا،
أَنِحْنَ حَقَّقْنَا مِنَّهْ
وَ بِمِثِلْ دَا،
إِنْتَ أَسْمَعَهْ
وَ أَحْفَضَهْ لِنَفْسَكْ.