هَمَان و مَرْدَكَاي ألْخاصموا
٣
١ وَ بَعَدْ دَا،
الْمَلِكْ أَشَوِرُوشْ أَنْطَاهْ لِهَمَانْ وِلَيْد هَمْدَاتَا الْمِنْ ذُرِّيَّةْ أَقَاقْ شَرَفْ زِيَادَةْ مِنْ كُلَّ الْمَسَائِيلْ الْقَاعِدِينْ مَعَايَهْ.
٢ وَ كُلَّ خَدَّامِينْ الْمَلِكْ الْقَاعِدِينْ فِي خَشُمْ بَابْ قَصِرْ الْمَلِكْ يِدَنْقُرُوا وَ يَسْجُدُوا قِدَّامْ هَمَانْ وَ دَا مِثِلْ الْمَلِكْ أَمَرْ بَيَّهْ.
وَ لَاكِنْ مَرْدَكَايْ وَ لَا يِدَنْقِرْ وَ لَا يَسْجُدْ قِدَّامَهْ.
٣ وَ خَدَّامِينْ الْمَلِكْ الْقَاعِدِينْ فِي خَشُمْ بَابْ قَصْرَهْ قَالَوْا لِمَرْدَكَايْ:
«مَالَا مَا تِطَبِّقْ أَمُرْ الْمَلِكْ؟»
٤ وَ دَايْماً قَاعِدِينْ يِحَجُّوا لَيَّهْ وَ لَاكِنْ هُو مَا يَسْمَعْ كَلَامْهُمْ.
وَ خَلَاصْ،
هُمَّنْ خَبَّرَوْا هَمَانْ أَشَانْ يِشِيفْ كَنْ كَلَامْ مَرْدَكَايْ دَا صَحِيحْ أَشَانْ هُو قَالْ هُو يَهُودِي.
٥ وَ وَكِتْ هَمَانْ شَافْ كَدَرْ مَرْدَكَايْ مَا دَنْقَرْ وَ مَا سَجَدْ،
هُو زِعِلْ زَعَلْ شَدِيدْ.
٦ وَ هَمَانْ مَا دَوَّرْ يُخُطّ إِيدَهْ فَوْق مَرْدَكَايْ وِحَيْدَهْ بَسْ أَشَانْ خَبَّرَوْه كَدَرْ هُو يَهُودِي.
وَ بِمِثِلْ دَا،
هَمَانْ قَاعِدْ يِفَتِّشْ طَرِيقَةْ الْيِدَمِّرْ بَيْهَا كُلَّ الْيَهُودْ شَعَبْ مَرْدَكَايْ الْقَاعِدِينْ فِي كُلَّ مَمْلَكَةْ أَشَوِرُوشْ.
٧ وَ فِي الشَّهَرْ الْأَوَّلْ الْأُسْمَهْ نِيسَانْ فِي سَنِةْ 12 هَنَا حُكُمْ أَشَوِرُوشْ،
سَوَّوْا أَمْ عِيَيْدَاتْ الْأُسُمْهَا فُورِيمْ قِدَّامْ هَمَانْ.
وَ هُو يِدَوْر يِحَدِّدْ الْيَوْم وَ الشَّهَرْ الْعَدِيلْ لِخِطِّتَهْ وَ خَلَاصْ،
أَمْ عِيَيْدَاتْ وَقَعَتْ فِي شَهَرْ 12 الْأُسْمَهْ أَدَارْ.
هَمَان يجهِّز دمار اليَهُود
٨ وَ خَلَاصْ،
هَمَانْ قَالْ لِلْمَلِكْ أَشَوِرُوشْ:
«فِيَّهْ شَعَبْ مُشَتَّتْ وَ مُفَرَّقْ فِي لُبّ الشُّعُوبْ هَنَا كُلَّ وُلَايَاتْ مَمْلَكَتَكْ.
وَ قَوَانِينْهُمْ شِقْ مِنْ قَوَانِينْ كُلَّ الشُّعُوبْ الْآخَرِينْ وَ هُمَّنْ مَا قَاعِدِينْ يِطَبُّقُوا قَانُونَكْ،
يَا الْمَلِكْ.
وَ دَا مَا وَاجِبْ الْمَلِكْ يِخَلِّيهُمْ فِي رَاحَةْ.
٩ وَ كَنْ بِقِي لَيْك عَدِيلْ،
يَا الْمَلِكْ،
خَلِّي تَمْرُقْ قَرَارْ لِدَمَارْهُمْ.
وَ بَيْدَا،
أَنَا نَنْطِي 34 000 كِيلَوْ هَنَا فُضَّةْ لِخَدَّامِينْ الْمَمْلَكَةْ وَ يُصُبُّوهَا فِي مَخَازِنْ الْمَلِكْ.»
١٠ وَ خَلَاصْ،
الْمَلِكْ سَلَّ خَاتْمَهْ الْيَخْتِمْ بَيَّهْ مِنْ أُصْبَعَهْ وَ أَنْطَاهْ لِهَمَانْ وِلَيْد هَمْدَاتَا الْمِنْ ذُرِّيَّةْ أَقَاقْ عَدُو الْيَهُودْ.
١١ وَ الْمَلِكْ قَالْ لِهَمَانْ:
«الْفُضَّةْ دِي،
سَامَحْنَاهَا لَيْك وَ الشَّعَبْ دَا كُلَ،
سَوِّي فَوْقهُمْ مِثِلْ إِنْتَ تِدَوْرَهْ.»
١٢ وَ فِي يَوْم 13 هَنَا الشَّهَرْ الْأَوَّلْ،
نَادَوْا كُلَّ كُتَّابْ الْمَلِكْ وَ كَتَبَوْا كُلَّ أَمُرْ هَمَانْ فِي مَكْتُوبْ لِمُحَافِظِينْ الْمَمْلَكَةْ وَ لِلْحُكَّامْ هَنَا أَيِّ وُلَايَةْ وَ لِلْمَسَائِيلْ هَنَا أَيِّ شَعَبْ وَ كَتَبَوْا لِأَيِّ وُلَايَةْ حَسَبْ كِتَابِتْهَا وَ لُغِّتَهْ.
وَ هُمَّنْ كَتَبَوْا الْجَوَابَاتْ دَوْل بِأُسُمْ الْمَلِكْ أَشَوِرُوشْ وَ خَتَمَوْهُمْ بِخِتِمْ الْمَلِكْ.
١٣ وَ الْجَوَابَاتْ دَوْل رَسَّلَوْهُمْ بِمُرَسَّلِينْ فِي كُلَّ وُلَايَاتْ الْمَمْلَكَةْ أَشَانْ يِدَمُّرُوا وَ يَكْتُلُوا وَ يِكَمُّلُوا كُلَّ الْيَهُودْ،
مِنْ الصُّبْيَانْ لَحَدِّي الشِّيَّابْ،
حَتَّى الْعَوِينْ وَ الْأَطْفَالْ كُلَ.
وَ يَنْهَبَوْهُمْ وَ يَكْسَبَوْا كُلَّ شَيّءْ الْعِنْدُهُمْ.
وَ دَا يَبْقَى فِي يَوْم وَاحِدْ بَسْ يَعْنِي فِي يَوْم 13 هَنَا شَهْرِي 12 فِي الشَّهَرْ الْأُسْمَهْ أَدَارْ.
١٤ وَ نُسْخَةْ الْجَوَابْ دَا،
يَنْشُرُوهَا مِثِلْ قَانُونْ فِي أَيِّ وُلَايَةْ وَ يِبَلُّغُوهَا لِكُلَّ الشُّعُوبْ أَشَانْ يُكُونُوا جَاهِزِينْ فِي الْيَوْم دَا.
١٥ وَ بِأَمُرْ الْمَلِكْ،
الْمُرَسَّلِينْ مَشَوْا بِسُرْعَةْ وَ بَلَّغَوْا الْقَانُونْ دَا فِي مَدِينَةْ شُوشَةْ الْقَوِيَّةْ.
الْمَلِكْ وَ هَمَانْ قَعَدَوْا لِيَشَرْبَوْا وَ لَاكِنْ نَاسْ مَدِينَةْ شُوشَةْ بَرْجَلَوْا مَرَّةْ وَاحِدْ.