أَبِيَّا بِقي ملك في يَهُوذَا
١٣
١ فِي سَنِةْ 18 هَنَا حُكُمْ يَرُبَعَامْ وِلَيْد نَبَاتْ فِي مَمْلَكَةْ إِسْرَائِيلْ،
أَبِيَّا بِقِي مَلِكْ فِي مَمْلَكَةْ يَهُوذَا.
٢ وَ هُو حَكَمْ تَلَاتَةْ سَنَةْ فِي مَدِينَةْ الْقُدُسْ.
وَ أَمَّهْ أُسُمْهَا مِكَايَا بِنَيَّةْ أُرِيِيلْ مِنْ حِلَّةْ قِبَيْعَةْ.
وَ كَانْ حَرِبْ أَمْبَيْن أَبِيَّا وَ يَرُبَعَامْ.
٣ وَ أَبِيَّا بَدَا الْحَرْبَةْ بِدَيْش عَدَدَهْ 400 000 عَسْكَرْ فُرَّاسْ مِنْ أَحْسَنْ الْمُحَارِبِينْ.
وَ يَرُبَعَامْ كَمَانْ قَابَلَهْ بِرُجَالْ فُرَّاسْ مِنْ أَحْسَنْ مُحَارِبِينَهْ وَ عَدَدْهُمْ 800 000.
٤ وَ أَبِيَّا طَلَعْ فِي رَاسْ جَبَلْ صَمَرَايِمْ الْفِي جِبَالْ أَفْرَايِمْ وَ قَالْ:
«أَسْمَعْنِي،
يَا يَرُبَعَامْ!
وَ أَسْمَعَوْنِي،
يَا كُلَّ نَاسْ مَمْلَكَةْ إِسْرَائِيلْ!
٥ إِنْتُو مَا تَعَرْفُوا كَدَرْ اللّٰهْ إِلٰـهْ بَنِي إِسْرَائِيلْ أَنْطَى مُلُكْ بَنِي إِسْرَائِيلْ لِدَاوُدْ وَ عِيَالَهْ إِلَى الْأَبَدْ وَلَّا؟
وَ دِي مَا مُعَاهَدَةْ دَايْمَةْ الْمَا تِنْقَطِعْ وَلَّا؟
٦ «وَ لَاكِنْ يَرُبَعَامْ وِلَيْد نَبَاتْ هُو أَوَّلْ عَبِدْ سُلَيْمَانْ وِلَيْد دَاوُدْ وَ قَمَّ أَتْمَرَّدْ ضِدّ سِيدَهْ.
٧ وَ بَعَدْ دَا،
لَمَّوْا مَعَايَهْ نَاسْ الْكَسْلَانِينْ وَ الْمَا نَافْعِينْ وَ هُمَّنْ قَمَّوْا ضِدّ رَحَبْعَامْ وِلَيْد سُلَيْمَانْ.
وَ فِي الْوَكِتْ دَا،
رَحَبْعَامْ لِسَّاعْ صَبِي مَا عِنْدَهْ قُدْرَةْ.
وَ بَيْدَا،
هُو مَا قِدِرْ يَثْبِتْ قِدَّامْهُمْ.»
٨ وَ أَبِيَّا قَالْ بَتَّانْ:
«هَسَّعْ دَا،
إِنْتُو تُقُولُوا إِنْتُو قَوِيِّينْ وَ تِشِيلُوا مُلُكْ اللّٰهْ الْفِي إِيدْ ذُرِّيَّةْ دَاوُدْ.
وَ إِنْتُو نَاسْ كَتِيرِينْ مَرَّةْ وَاحِدْ وَ عِنْدُكُو مَعَاكُو عَجَّالْ هَنَا دَهَبْ السَّوَّاهُمْ لَيْكُو يَرُبَعَامْ مِثِلْ إِلٰـهَاتْكُو.
٩ وَ مَا إِنْتُو بَسْ الطَّرَدْتُوا رُجَالْ الدِّينْ هَنَا اللّٰهْ وَ دَوْل مِنْ ذُرِّيَّةْ هَارُونْ وَ اللَّاوِيِّينْ؟
وَ دَرَّجْتُوا لَيْكُو رُجَالْ دِينْ آخَرِينْ مِثِلْ نَاسْ قَاعِدِينْ يِسَوُّوا فِي بُلْدَانْ آخَرِينْ؟
وَ أَيِّ نَادُمْ الْيَجِي بِتَوْر وَ سَبْعَةْ كُبْشَانْ،
خَلَاصْ هُو يَبْقَى رَاجِلْ دِينْ هَنَا أَصْنَامْ دَوْل وَ هُمَّنْ مَا إِلٰـهَاتْ.
١٠ «وَ كَنْ لَيْنَا أَنِحْنَ كَمَانْ،
مَا أَبَيْنَا اللّٰهْ إِلٰـهْنَا.
وَ رُجَالْ الدِّينْ الْقَاعِدِينْ يَخْدُمُوا لِلّٰهْ،
هُمَّنْ مِنْ ذُرِّيَّةْ هَارُونْ.
وَ اللَّاوِيِّينْ كُلَ قَاعِدِينْ يِسَوُّوا خِدْمِتْهُمْ.
١١ فِي كُلِّ فَجُرْ وَ عَشِيَّةْ،
يِحَرُّقُوا ضَحَايَا وَ بَخُورْ مُعَطَّرْ لِلّٰهْ وَ يِقَدُّمُوا الْخُبْزَةْ فِي الطَّرَبَيْزَةْ الطَّاهِرَةْ.
وَ كُلِّ عَشِيَّةْ يِأَوْقُدُوا نِيرَانْ الْفَانُوسْ الْمِنْ دَهَبْ.
أَشَانْ أَنِحْنَ قَاعِدِينْ نَحْفَضَوْا خِدْمَةْ اللّٰهْ إِلٰـهْنَا الْإِنْتُو أَبَيْتُوهْ.
١٢ شِيفُوا!
اللّٰهْ وَ رُجَالْ الدِّينْ هِنَيْه قَاعِدِينْ مَعَانَا وَ عِنْدِنَا الْبُرُنْجِي النَّضُرْبُوهْ لِحَرَكَةْ الْحَرِبْ ضِدُّكُو.
يَا نَاسْ مَمْلَكَةْ إِسْرَائِيلْ،
مَا تِحَارُبُوا اللّٰهْ رَبّ جُدُودْكُو أَشَانْ إِنْتُو مَا تَنْجَحَوْا!»
١٣ وَ وَكِتْ أَبِيَّا قَاعِدْ يِحَجِّي،
يَرُبَعَامْ رَسَّلْ عَسْكَرَهْ وَ حَوَّقَوْهُمْ وَ كَرَسَوْا لِعَسْكَرْ مَمْلَكَةْ يَهُوذَا.
وَ خَلَاصْ،
عَسْكَرْ مَمْلَكَةْ إِسْرَائِيلْ هَجَمَوْا عَسْكَرْ مَمْلَكَةْ يَهُوذَا بِقِدَّامْ وَ الْعَسْكَرْ الْكَرَسَوْا لَيْهُمْ كَمَانْ بِوَرَاءْ.
١٤ وَ وَكِتْ عَسْكَرْ مَمْلَكَةْ يَهُوذَا أَنْلَفَتَوْا وَرَاهُمْ،
شَافَوْا كَدَرْ هَجَمَوْهُمْ مِنْ قِدَّامْ وَ مِنْ وَرَاءْ.
وَ خَلَاصْ،
هُمَّنْ كَوْرَكَوْا لِلّٰهْ.
وَ وَكِتْ رُجَالْ الدِّينْ ضَرَبَوْا الْبُرُنْجِي،
١٥ عَسْكَرْ مَمْلَكَةْ يَهُوذَا كَوْرَكَوْا وَ وَكِتْ هُمَّنْ كَوْرَكَوْا،
الرَّبّ حَارَبْ يَرُبَعَامْ وَ كُلَّ عَسْكَرْ مَمْلَكَةْ إِسْرَائِيلْ قِدَّامْ أَبِيَّا وَ عَسْكَرْ مَمْلَكَةْ يَهُوذَا.
١٦ وَ عَسْكَرْ مَمْلَكَةْ إِسْرَائِيلْ عَرَّدَوْا قِدَّامْ عَسْكَرْ مَمْلَكَةْ يَهُوذَا وَ الرَّبّ سَلَّمَاهُمْ فِي إِيدْ عَسْكَرْ مَمْلَكَةْ يَهُوذَا.
١٧ وَ أَبِيَّا وَ نَاسَهْ أَنَّصَرَوْا فَوْقهُمْ نَصُرْ كَبِيرْ وَ 500 000 رَاجِلْ مِنْ أَحْسَنْ الْمُحَارِبِينْ هَنَا مَمْلَكَةْ إِسْرَائِيلْ مَاتَوْا.
١٨ وَ فِي الْوَكِتْ دَا،
عَسْكَرْ مَمْلَكَةْ إِسْرَائِيلْ أَنْهَزَمَوْا.
وَ عَسْكَرْ مَمْلَكَةْ يَهُوذَا كَمَانْ أَنَّصَرَوْا أَشَانْ هُمَّنْ أَتْوَكَّلَوْا عَلَيْ اللّٰهْ رَبّ جُدُودْهُمْ.
١٩ وَ أَبِيَّا طَرَدْ يَرُبَعَامْ لَحَدِّي قَلَعْ مِنَّهْ مَدِينَةْ بَيْت إِيلْ وَ مَدِينَةْ يَشَانَةْ وَ مَدِينَةْ عَفْرُونْ وَ الْحِلَّالْ التَّابْعِينْ لَيْهُمْ.
٢٠ وَ فِي كُلَّ وَكِتْ حُكُمْ أَبِيَّا،
يَرُبَعَامْ مَا لِقِي بَتَّانْ قُدْرَةْ مِثِلْ أَوَّلْ.
وَ اللّٰهْ ضَرَبْ يَرُبَعَامْ وَ هُو مَاتْ.
٢١ وَ أَبِيَّا كَمَانْ بِقِي شَدِيدْ.
هُو أَخَدْ 14 عَوِينْ وَ وِلِدْ 22 وُلَادْ وَ 16 بَنَاتْ.
٢٢ وَ الْبَاقِي مِنْ عَمَلْ أَبِيَّا وَ الشَّيّءْ السَّوَّاهْ وَ كَلَامَهْ مَكْتُوبِينْ فِي كِتَابْ التَّارِيخْ الْكَتَبَهْ النَّبِي عِدُّو.