شِيشَق ملك مَصِر هجم يَهُوذَا
١٢
١ وَ وَكِتْ مَمْلَكَةْ رَحَبْعَامْ ثَبَتَتْ وَ بِقَتْ قَوِيَّةْ،
هُو وَ كُلَّ بَنِي إِسْرَائِيلْ خَلَّوْا مِنْهُمْ تَوْرَاةْ اللّٰهْ.
٢ وَ فِي السَّنَةْ الْخَامْسَةْ هَنَا حُكُمْ رَحَبْعَامْ،
شِيشَقْ مَلِكْ مَصِرْ قَمَّ جَاءْ حَارَبْ مَدِينَةْ الْقُدُسْ.
وَ دَا،
أَشَانْ هُمَّنْ عِصَوْا اللّٰهْ.
٣ وَ شِيشَقْ جَاءْ مَعَ 1 200 عَرَبَاتْ هَنَا حَرِبْ وَ 60 000 سِيَادْ خَيْل وَ عَسْكَرْ كَتِيرِينْ مَرَّةْ وَاحِدْ مِنْ مَصِرْ،
هُمَّنْ اللِّيبِيِّينْ وَ السُّكِّيِّينْ وَ الْحَبَشِيِّينْ.
٤ وَ هُو شَالْ الْمُدُنْ الْقَوِيِّينْ هَنَا مَمْلَكَةْ يَهُوذَا وَ وَصَّلْ لَحَدِّي مَدِينَةْ الْقُدُسْ.
٥ وَ وَكِتْ شِيشَقْ قَرَّبْ لِمَدِينَةْ الْقُدُسْ،
النَّبِي شَمَعْيَا جَاءْ لِرَحَبْعَامْ وَ لِكُبَارَاتْ مَمْلَكَةْ يَهُوذَا اللَّمَّوْا فِي مَدِينَةْ الْقُدُسْ وَ قَالْ لَيْهُمْ:
«دَاهُو اللّٰهْ قَالْ:
‹إِنْتُو أَبَيْتُونِي وَ هَسَّعْ أَنَا كُلَ نَابَاكُو وَ نِسَلِّمْكُو فِي إِيدْ شِيشَقْ.›»
٦ وَ كُبَارَاتْ بَنِي إِسْرَائِيلْ وَ الْمَلِكْ أَلْمَسْكَنَوْا وَ قَالَوْا:
«اللّٰهْ صَادِقْ وَ الشَّيّءْ الْقَاعِدْ يِسَوِّي دَا عَدِيلْ.»
٧ وَ وَكِتْ اللّٰهْ شَافْ كَدَرْ هُمَّنْ أَلْمَسْكَنَوْا،
هُو حَجَّى لِشَمَعْيَا وَ قَالْ:
«مِنْ هُمَّنْ مَسْكَنَوْا نُفُوسْهُمْ قِدَّامِي دَا خَلَاصْ،
أَنَا مَا نِدَمِّرْهُمْ.
وَ لَاكِنْ فِي وَكِتْ قَرِيبْ،
أَنَا نِنَجِّيهُمْ وَ غَضَبِي مَا يَنْزِلْ فِي مَدِينَةْ الْقُدُسْ بِإِيدْ شِيشَقْ.
٨ وَ بَيْدَا كُلَ،
هُمَّنْ يَبْقَوْا عَبِيدَهْ وَ يَعَرْفُوا الْفَرَقَةْ أَمْبَيْن خِدِمْتِي أَنَا وَ خِدْمَةْ مُلُوكْ الْأَرْض.»
٩ وَ شِيشَقْ مَلِكْ بَلَدْ مَصِرْ هَجَمْ مَدِينَةْ الْقُدُسْ وَ شَالْ كُلَّ الْغُنَى الْفِي بَيْت اللّٰهْ وَ قَصِرْ الْمَلِكْ.
هُو شَالْ كُلَّ شَيّءْ،
خَاصَّةً الدَّرَقْ هَنَا الدَّهَبْ السُّلَيْمَانْ سَوَّاهُمْ.*
١٠ وَ فِي بَدَلْ الدَّرَقْ دَوْل،
الْمَلِكْ رَحَبْعَامْ سَوَّى دَرَقْ آخَرِينْ هَنَا نَحَاسْ وَ أَمَّنَاهُمْ لِكَبِيرْ الْحُرَّاسْ الْقَاعِدْ يَحْرِسْ خَشُمْ بَابْ قَصِرْ الْمَلِكْ.
١١ وَ كَنْ الْمَلِكْ يَمْشِي بَيْت اللّٰهْ،
الْحُرَّاسْ يِشِيلُوا الدَّرَقْ دَوْل وَ بَعَدَيْن يِقَبُّلُوهُمْ فِي بَيْت الْحُرَّاسْ.
١٢ وَكِتْ الْمَلِكْ مَسْكَنْ نَفْسَهْ،
اللّٰهْ مَا نَزَّلْ فَوْقَهْ غَضَبَهْ لِيِدَمِّرَهْ مَرَّةْ وَاحِدْ.
أَشَانْ فِي أَشْيَاءْ عَدِيلِينْ فِي لُبّ مَمْلَكَةْ يَهُوذَا.
نِهاية حُكُم رَحَبْعَام
١٣ وَ رَحَبْعَامْ عِنْدَهْ 41 سَنَةْ وَكِتْ بِقِي مَلِكْ.
وَ الْمَلِكْ رَحَبْعَامْ ثَبَّتْ مُلْكَهْ وَ حَكَمْ 17 سَنَةْ فِي مَدِينَةْ الْقُدُسْ الْمَدِينَةْ الْعَزَلَاهَا اللّٰهْ مِنْ كُلَّ مُدُنْ قَبَايِلْ بَنِي إِسْرَائِيلْ أَشَانْ يُخُطّ فَوْقهَا أُسْمَهْ.
وَ أَمّ رَحَبْعَامْ أُسُمْهَا نَعْمَةْ مِنْ قَبِيلَةْ بَنِي عَمُّونْ.
١٤ وَ رَحَبْعَامْ سَوَّى الْفَسَالَةْ أَشَانْ هُو مَا ثَبَّتْ قَلْبَهْ لِيِتَابِعْ اللّٰهْ.
١٥ وَ كُلَّ عَمَلْ رَحَبْعَامْ مِنْ الْبِدَايَةْ لِلنِّهَايَةْ مَكْتُوبْ وَ مُسَجَّلْ فِي كُتُبْ الْأَنْبِيَاء شَمَعْيَا وَ عِدُّو.
وَ دَايْماً بِقِي حَرِبْ أَمْبَيْن رَحَبْعَامْ وَ يَرُبَعَامْ.
١٦ وَ رَحَبْعَامْ مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ هَنَا مَدِينَةْ دَاوُدْ.
وَ وِلَيْدَهْ أَبِيَّا حَكَمْ فِي بَدَلَهْ.