الكتاب التاني هنا
أخبار الأيّام
من كتب تاريخ بني إسرائيل
سُلَيْمَان طلب حكمة من الربّ
١
١ سُلَيْمَانْ وِلَيْد دَاوُدْ ثَبَّتْ مُلْكَهْ وَ اللّٰهْ إِلٰـهَهْ قَاعِدْ مَعَايَهْ وَ سَوَّاهْ عَالِي.
٢ وَ سُلَيْمَانْ نَادَى كُلَّ بَنِي إِسْرَائِيلْ خَاصَّةً قُيَّادْ الْآلَافْ وَ قُيَّادْ الْمِيَاتْ وَ الْقُضْيَاءْ وَ كُلَّ كُبَارَاتْ بَنِي إِسْرَائِيلْ وَ دَوْل كُبَارَاتْ الْعَايِلَاتْ.
٣ وَ سُلَيْمَانْ وَ كُلَّ الشَّعَبْ مَشَوْا فِي بَكَانْ الْعِبَادَةْ الْفِي حِلَّةْ قِبْعُونْ أَشَانْ فِي الْبَكَانْ دَا بَسْ قَاعِدَةْ خَيْمَةْ الْإِجْتِمَاعْ هَنَا الرَّبّ.
وَ دِي بَسْ الْخَيْمَةْ السَّوَّاهَا مُوسَى عَبْد اللّٰهْ فِي الصَّحَرَاء.
٤ وَ صَنْدُوقْ الرَّبّ كَمَانْ،
دَاوُدْ جَابَهْ مِنْ حِلَّةْ قَرْيَةْ يَعَرِيمْ وَ خَطَّاهْ فِي الْبَكَانْ الْهُو جَهَّزَهْ لَيَّهْ وَ دِي خَيْمَةْ فِي أُورُشَلِيمْ.
٥ وَ الْمَدْبَحْ هَنَا النَّحَاسْ الصَّنَعَهْ بَصَلِيلْ وِلَيْد أُورِي وِلَيْد وِلَيْدَهْ لِحُورْ قَاعِدْ قِدَّامْ خَيْمَةْ الْإِجْتِمَاعْ.
وَ فِي الْبَكَانْ دَا بَسْ،
سُلَيْمَانْ وَ كُلَّ الشَّعَبْ يَسْأَلَوْا اللّٰهْ.
٦ وَ فِي الْبَكَانْ دَا قِدَّامْ اللّٰهْ،
سُلَيْمَانْ رِكِبْ فِي الْمَدْبَحْ هَنَا النَّحَاسْ قَرِيبْ لِخَيْمَةْ الْإِجْتِمَاعْ.
وَ قَدَّمْ فَوْقَهْ 1 000 ضَحَايَا مُحَرَّقِينْ.
٧ وَ فِي اللَّيْل دِي،
الرَّبّ بَانْ لِسُلَيْمَانْ وَ قَالْ لَيَّهْ:
«أَطْلُبْ مِنِّي الشَّيّءْ الْإِنْتَ تِدَوْرَهْ وَ أَنَا نَنْطِيهْ لَيْك.»
٨ وَ سُلَيْمَانْ رَدَّ لِلرَّبّ وَ قَالْ:
«إِنْتَ سَوَّيْت خَيْر كَتِيرْ لِدَاوُدْ أَبُويِ وَ دَرَّجْتِنِي مَلِكْ فِي بَدَلَهْ.
٩ وَ هَسَّعْ دَا،
يَا اللّٰهْ إِلٰـهِي،
خَلِّي كَلَامَكْ الْقُلْتَهْ لِأَبُويِ دَاوُدْ دَا يِلْحَقَّقْ أَشَانْ إِنْتَ بَسْ دَرَّجْتِنِي مَلِكْ فِي رَاسْ الشَّعَبْ الْكَتِيرِينْ مِثِلْ تُرَابْ الْأَرْض.
١٠ وَ أَنْطِينِي الْحِكْمَةْ وَ الْعِلِمْ لِنَعَرِفْ كِكَّيْف نُقُودْ الشَّعَبْ دَا.
أَشَانْ يَاتُو يَقْدَرْ يَحْكِمْ فِي شَعَبَكْ الْكَتِيرِينْ دَوْل؟»
١١ وَ الرَّبّ قَالْ لِسُلَيْمَانْ:
«دَا بَسْ الشَّيّءْ الْقَلْبَكْ دَوَّرَهْ!
إِنْتَ مَا طَلَبْت مِنِّي غُنَى وَ لَا مَالْ وَ لَا عَظَمَةْ.
وَ مَا طَلَبْت مَوْت عُدْوَانَكْ وَ لَا طُولْ الْعُمُرْ لَاكِنْ إِنْتَ طَلَبْت الْحِكْمَةْ وَ الْعِلِمْ لِتَحْكِمْ فِي شَعَبِي الْأَنَا دَرَّجْتَكْ فَوْقهُمْ مَلِكْ.
١٢ وَ فِي شَانْ دَا،
الْحِكْمَةْ وَ الْعِلِمْ أَنْطَيْتهُمْ لَيْك وَ نِزِيدَكْ بَتَّانْ وَ نَنْطِيكْ الْغُنَى وَ الْمَالْ وَ الْعَظَمَةْ الْأَبَداً مُلُوكْ الْقَبْلَكْ مَا لِقَوْه.
وَ بَعَدَكْ كُلَ،
نَادُمْ مَا يَلْقَاهْ.»
١٣ وَ بَعَدْ دَا،
سُلَيْمَانْ قَبَّلْ فِي أُورُشَلِيمْ مِنْ بَكَانْ الْعِبَادَةْ الْفِي قِبْعُونْ الْقَاعِدَةْ فَوْقَهْ خَيْمَةْ الْإِجْتِمَاعْ.
وَ حَكَمْ فِي بَنِي إِسْرَائِيلْ.
الغُنى هنا سُلَيْمَان
١٤ وَ الْمَلِكْ سُلَيْمَانْ لَمَّ عَرَبَاتْ هَنَا حَرِبْ وَ سِيَادْ خَيْل.
هُو عِنْدَهْ 1 400 عَرَبَاتْ حَرِبْ وَ 12 000 سِيَادْ خَيْل.
وَ هُو وَدَّى وَاحِدِينْ مِنْهُمْ فِي الْحِلَّالْ الْيُخُطّ فَوْقهُمْ عَرَبَاتَهْ وَ وَاحِدِينْ كَمَانْ خَلَّاهُمْ مَعَايَهْ فِي أُورُشَلِيمْ.
١٥ وَ الْمَلِكْ جَابْ فِي أُورُشَلِيمْ فُضَّةْ وَ دَهَبْ كَتِيرْ زِيَادَةْ مِثِلْ الْحَصْحَصْ.
وَ حَطَبْ الْأَرْز كُلَ بِقِي كَتِيرْ زِيَادَةْ مِثِلْ شَدَرْ الْجِمَّيْز الْيُقُمّ فِي سَهَلَةْ شَفِيلَةْ.
١٦ وَ خَيْل الْمَلِكْ سُلَيْمَانْ،
قَاعِدِينْ يِجِيبُوهُمْ لَيَّهْ مِنْ مَصِرْ وَ مِنْ كُوِي.
وَ دَا تُجَّارْ الْمَلِكْ بَسْ يَمْشُوا وَ يَشْرُوهُمْ لَيَّهْ مِنْ هِنَاكْ.
١٧ وَ أَيِّ عَرَبَةْ الْيِجِيبُوهَا مِنْ مَصِرْ تَمَنْهَا 600 حَجَرْ فُضَّةْ وَ أَيِّ جُوَادْ تَمَنَهْ 150 حَجَرْ فُضَّةْ.
وَ بِنَفْس التَّمَنْ دَا بَسْ،
التُّجَّارْ قَاعِدِينْ يِجِيبُوا عَرَبَاتْ وَ خَيْل لِمُلُوكْ الْحِتِّيِّينْ وَ لِمُلُوكْ أَرَامْ كُلَ.