1 أخبار 24

مجْموعات رجال الدين

١ وَ قَسَّمَوْا ذُرِّيَّةْ هَارُونْ فِي مَجْمُوعَاتْ. وَ أَوْلَادْ هَارُونْ هُمَّنْ نَدَابْ وَ أَبِيهُو وَ أَلِعَازَرْ وَ إِتَمَارْ. ٢ وَ نَدَابْ وَ أَبِيهُو مَاتَوْا قُبَّالْ أَبُوهُمْ وَ مَا جَابَوْا أَوْلَادْ. وَ فِي شَانْ دَا، خِدْمَةْ رُجَالْ الدِّينْ كَلَّفَوْا بَيْهَا أَلِعَازَرْ وَ إِتَمَارْ. ٣ وَ بِمُسَاعَدَةْ صَدُوقْ الْمِنْ ذُرِّيَّةْ أَلِعَازَرْ وَ أَخِيمَلِكْ الْمِنْ ذُرِّيَّةْ إِتَمَارْ، دَاوُدْ قَسَّمْ ذُرِّيَّةْ هَارُونْ فِي مَجْمُوعَاتْ حَسَبْ خِدْمِتْهُمْ الْكَلَّفَوْهُمْ بَيْهَا.

٤ وَ لَاكِنْ ذُرِّيَّةْ أَلِعَازَرْ عِنْدَهَا رُجَالْ زِيَادَةْ مِنْ ذُرِّيَّةْ إِتَمَارْ. وَ أَشَانْ دَا بَسْ، قَسَّمَوْا ذُرِّيَّةْ أَلِعَازَرْ عَلَيْ 16 مَجْمُوعَةْ وَ ذُرِّيَّةْ إِتَمَارْ عَلَيْ 8 مَجْمُوعَةْ. وَ أَيِّ مَجْمُوعَةْ عِنْدَهَا كَبِيرْ عَايِلِتْهَا. ٥ وَ الْقَسِّمِينْ دَا بِقِي بِأَمْ عِيَيْدَاتْ. وَ دَا، أَشَانْ كُبَارَاتْ هَنَا الْبَكَانْ الْمُقَدَّسْ وَ كُبَارَاتْ الرَّبّ بِنْلَقُوا فِي ذُرِّيَّةْ أَلِعَازَرْ وَ ذُرِّيَّةْ إِتَمَارْ كُلَ. ٦ وَ شَمَعْيَا وِلَيْد نَتَنِيلْ هُو الْكَاتِبْ مِنْ اللَّاوِيِّينْ. وَ هُو كَتَبْ أَسَامَيْهُمْ قِدَّامْ الْمَلِكْ وَ قِدَّامْ الْكُبَارَاتْ وَ قِدَّامْ صَدُوقْ رَاجِلْ الدِّينْ وَ قِدَّامْ أَخِيمَلِكْ وِلَيْد أَبِيَاتَرْ وَ قِدَّامْ كُبَارَاتْ عَايِلَاتْ رُجَالْ الدِّينْ وَ اللَّاوِيِّينْ. وَ كَنْ لِقَبِيلَةْ أَلِعَازَرْ، يِسَوُّوا أَمْ عِيَيْدَاتْ مَرَّتَيْن وَ بَعَدْ دَا، لِقَبِيلَةْ إِتَمَارْ، يِسَوُّوهَا مَرَّةْ وَاحِدَةْ بَسْ.

٧ وَ دَاهُو أَسَامَيْ كُبَارَاتْ الْمَجْمُوعَاتْ الْعَزَلَوْهُمْ بِأَمْ عِيَيْدَاتْ.

وَ الْأَمْ عِيَيْدَاتْ الْأَوَّلْ وَقَعَتْ لِيُيَارِبْ

وَ التَّانِي لِيَدَعْيَا

٨ وَ التَّالِتْ لِحَرِيمْ

وَ الرَّابِعْ لِسَعُرِيمْ

٩ وَ الْخَامِسْ لِمَلْكِيَّا

وَ السَّادِسْ لِمِيَامِينْ

١٠ وَ السَّابِعْ لِهَقُّوصْ

وَ التَّامِنْ لِأَبِيَّا

١١ وَ التَّاسِعْ لِيَشُوعْ

وَ الْعَاشِرْ لِشَكَنْيَا

١٢ وَ الْإِحْدَى عَشَرْ لِأَلْيَاشِبْ

وَ الْأَتْنَا عَشَرْ لِيَقِيمْ

١٣ وَ التَّلَاتْةَ عَشَرْ لِحُفَّا

وَ الْأَرْبَعْةَ عَشَرْ لِيَشْبَابْ

١٤ وَ الْخَمْسَةَ عَشَرْ لِبِلْقَا

وَ السِّتَّةَ عَشَرْ لِإِمِّيرْ

١٥ وَ السَّبَعْةَ عَشَرْ لِحِزِيرْ

وَ التَّمَانِيَةَ عَشَرْ لِهَفِصِيصْ

١٦ وَ التِّسْعَةَ عَشَرْ لِفَتَحْيَا

وَ الْعِشْرِينْ لِحِزْقِيَالْ

١٧ وَ الْوَاحِدْ وَ عِشْرِينْ لِيَاكِينْ

وَ الْإِتْنَيْن وَ عِشْرِينْ لِقَامُولْ

١٨ وَ التَّلَاتَةْ وَ عِشْرِينْ لِدَلَايَا

وَ الْأَرْبَعَةْ وَ عِشْرِينْ لِمَعَزْيَا.

١٩ وَ بِمِثِلْ دَا، الْمَجْمُوعَاتْ دَوْل كَلَّفَوْهُمْ بِخِدْمِتْهُمْ فِي بَيْت اللّٰهْ. وَ دَا، حَسَبْ الشُّرُوطْ الْأَنْطَاهُمْ لَيْهُمْ جِدُّهُمْ هَارُونْ مِثِلْ اللّٰهْ إِلٰـهْ بَنِي إِسْرَائِيلْ أَمَرَهْ بَيَّهْ.

اللاوِيِّين الفضّلوا

٢٠ وَ دَاهُو كُبَارَاتْ مِنْ ذُرِّيَّةْ اللَّاوِيِّينْ الْفَضَّلَوْا.

مِنْ أَوْلَادْ عَمْرَامْ، شُبَيِيلْ

وَ مِنْ أَوْلَادْ شُبَيِيلْ، يَحَدْيَا.

٢١ وَ مِنْ ذُرِّيَّةْ رَحَبْيَا، يِشِيَّا هُو الْكَبِيرْ فِي عَايِلْتَهْ.

٢٢ وَ مِنْ ذُرِّيَّةْ يِصْهَارْ، شَلُمُوتْ

وَ مِنْ أَوْلَادْ شَلُمُوتْ، يَحَتْ.

٢٣ وَ أَوْلَادْ حِبْرُونْ، هُمَّنْ يَرِيَّا الْأَوَّلْ وَ أَمَرْيَا التَّانِي وَ يَحَزِيِيلْ التَّالِتْ وَ يَقْمَعَامْ الرَّابِعْ.

٢٤ وَ وِلَيْد عُزِّيِيلْ هُو مِيكَا وَ مِنْ أَوْلَادْ مِيكَا، شَمِيرْ.

٢٥ وَ أَخُو مِيكَا هُو يِشِيَّا وَ مِنْ أَوْلَادْ يِشِيَّا، زَكَرِيَّا.

٢٦ وَ أَوْلَادْ مَرَارِي هُمَّنْ مَحْلِي وَ مُوشِي وَ يَعَزِيَّا.

٢٧ وَ عِيَالْ عِيَالَهْ لِمَرَارِي الْمِنْ وِلَيْدَهْ يَعَزِيَّا هُمَّنْ شُهَمْ وَ زَكُّورْ وَ عِبْرِي.

٢٨ وَ مِنْ مَحْلِي، أَلِعَازَرْ الْمَا جَابْ أَوْلَادْ.

٢٩ وَ مِنْ قِيشْ، يَرْحَمِيلْ.

٣٠ وَ أَوْلَادْ مُوشِي هُمَّنْ مَحْلِي وَ عِدَرْ وَ يَرِمُوتْ.

وَ كُلَّ النَّاسْ دَوْل مِنْ ذُرِّيَّةْ لَاوِي وَ أَيِّ وَاحِدْ كَبِيرْ فِي عَايِلْتَهْ. ٣١ وَ مِثِلْ أَخْوَانْهُمْ مِنْ ذُرِّيَّةْ هَارُونْ، هُمَّنْ كُلَ سَوَّوْا أَمْ عِيَيْدَاتْ قِدَّامْ الْمَلِكْ دَاوُدْ وَ صَدُوقْ وَ أَخِيمَلِكْ وَ كُبَارَاتْ عَايِلَاتْ رُجَالْ الدِّينْ وَ اللَّاوِيِّينْ. وَ هُمَّنْ سَوَّوْا مِثِلْ دَا، سَوَا سَوَا لِكُلَّ الْعَايِلَاتْ كَنْ هَنَا أَخُو كَبِيرْ وَلَّا أَخُو صَغَيَّرْ كُلَ.