1 أخبار 17

دَاوُد دوّر يبْني بيت للّه

١ وَ وَكِتْ دَاوُدْ سَاكِنْ فِي بَيْتَهْ، يَوْم وَاحِدْ قَالْ لِلنَّبِي نَاتَانْ: «شِيفْ، أَنَا سَاكِنْ فِي بَيْت جَمِيلْ هَنَا حَطَبْ الْأَرْز. وَ لَاكِنْ صَنْدُوقْ مُعَاهَدَةْ اللّٰهْ قَاعِدْ فِي خَيْمَةْ بَسْ.» ٢ وَ نَاتَانْ رَدَّ لِدَاوُدْ وَ قَالْ: «سَوِّي كُلَّ شَيّءْ الْفِي قَلْبَكْ أَشَانْ الرَّبّ مَعَاكْ.»

٣ وَ لَاكِنْ فِي اللَّيْلَةْ دِي، الرَّبّ كَلَّمْ لِنَاتَانْ وَ قَالْ: ٤ «أَمْشِي قُولْ لِعَبْدِي دَاوُدْ: ‹دَاهُو اللّٰهْ قَالْ: ”دَا مَا إِنْتَ التَّبْنِي لَيِّ بَيْت الْأَنَا نَسْكُنْ فَوْقَهْ. ٥ أَشَانْ أَنَا أَبَداً مَا سَكَنْت فِي بَيْت مِنْ يَوْم الْأَنَا مَرَقْت بَنِي إِسْرَائِيلْ مِنْ مَصِرْ لَحَدِّي الْيَوْم. وَ لَاكِنْ أَنَا سِرْت مَعَاهُمْ وَ سَكَنْت فِي خَيْمَةْ. ٦ وَ فِي أَيِّ بَكَانْ، أَنَا سِرْت مَعَ كُلَّ بَنِي إِسْرَائِيلْ. وَ أَنَا أَبَداً مَا كَلَّمْت لِوَاحِدْ مِنْ حُكَّامْ بَنِي إِسْرَائِيلْ الْأَنَا أَمَرْتُهُمْ لِيَحْكُمُوا فَوْق شَعَبِي وَلَّا سَأَلْتَهْ مَالَا مَا بَنَاهْ لَيِّ بَيْت هَنَا حَطَبْ الْأَرْز“؟›

٧ «وَ هَسَّعْ دَا، أَمْشِي قُولْ لِعَبْدِي دَاوُدْ: ‹دَاهُو اللّٰهْ الْقَادِرْ قَالْ: ”أَنَا جِبْتَكْ مِنْ سَرْحَةْ الْغَنَمْ أَشَانْ تَبْقَى كَبِيرْ هَنَا شَعَبِي بَنِي إِسْرَائِيلْ. ٨ وَ أَنَا كُنْت مَعَاكْ فِي أَيِّ بَكَانْ الْإِنْتَ مَشَيْت فَوْقَهْ وَ قَشَّيْت كُلَّ عُدْوَانَكْ مِنْ قِدَّامَكْ. وَ أَنَا نِسَوِّي أُسْمَكْ عَالِي مِثِلْ أَسَامَيْ هَنَا النَّاسْ الْكُبَارْ الْفِي الْأَرْض. ٩ وَ أَنَا نَنْطِي بَكَانْ لِشَعَبِي بَنِي إِسْرَائِيلْ وَ نِمَكِّنْهُمْ. وَ هُمَّنْ يَسْكُنُوا فِي الْبَكَانْ دَا بَلَا خَوْف. وَ نَاسْ فَسْلِينْ مَا يَظُلْمُوهُمْ بَتَّانْ مِثِلْ أَوَّلْ. ١٠ وَ مِنْ وَكِتْ الْأَنَا كَلَّفْت حُكَّامْ فِي شَعَبِي بَنِي إِسْرَائِيلْ، أَنَا نَجَّيْتَكْ مِنْ كُلَّ عُدْوَانَكْ. وَ نِخَبِّرَكْ كَدَرْ أَنَا اللّٰهْ نِثَبِّتْ بَيْت عَايِلْتَكْ. ١١ وَ وَكِتْ أَيَّامَكْ يِكَمُّلُوا، تُمُوتْ وَ تَلْحَقْ أَبَّهَاتَكْ. وَ أَنَا نَعَزِلْ وَاحِدْ مِنْ ذُرِّيّتَكْ وَ هُو يَبْقَى وَاحِدْ مِنْ أَوْلَادَكْ وَ أَنَا نِثَبِّتْ مُلْكَهْ. ١٢ وَ هُو بَسْ الْيَبْنِي لَيِّ بَيْت وَ أَنَا نِثَبِّتْ مُلْكَهْ إِلَى الْأَبَدْ. ١٣ وَ أَنَا نَبْقَى لَيَّهْ أَبُو وَ هُو يَبْقَى لَيِّ إِبْن. وَ مَا نِشِيلْ مِنَّهْ رَحْمَتِي مِثِلْ شِلْتَهَا مِنْ شَاوُولْ الْحَكَمْ قَبْلَكْ. ١٤ وَ أَنَا نِثَبِّتَهْ فِي بَيْتِي وَ فِي مَمْلَكَتِي إِلَى الْأَبَدْ وَ مُلْكَهْ كُلَ يَثْبِتْ إِلَى الْأَبَدْ.“›»

١٥ وَ نَاتَانْ حَجَّى لِدَاوُدْ بِكُلَّ الْكَلَامْ الْقَالَهْ لَيَّهْ اللّٰهْ فِي الرُّؤْيَةْ دِي.

صلاة دَاوُد

١٦ وَ الْمَلِكْ دَاوُدْ دَخَلْ فِي الْخَيْمَةْ فِي حَضَرَةْ اللّٰهْ وَ قَالْ: «أَنَا يَاتُو، يَا اللّٰهْ إِلٰـهِي؟ وَ عَايِلْتِي تِسَاوِي شُنُو لَحَدِّي تَنْطِينِي دَرَجَةْ مِثِلْ دِي؟ ١٧ وَ دَا شَيّءْ حَيِّينْ سَاكِتْ لَيْك إِنْتَ، يَا إِلٰـهِي، وَ إِنْتَ عَاهَدْت عَايِلَةْ بَيْتِي أَنَا عَبْدَكْ فِي الْمُسْتَقْبَلْ. وَ سَوَّيْتنِي نَادُمْ مُهِمّ، يَا اللّٰهْ إِلٰـهِي. ١٨ وَ إِنْتَ تَعَرِفْنِي تَمَامْ أَنَا عَبْدَكْ. وَ نَقْدَرْ نُقُولْ شُنُو بَتَّانْ فِي الدَّرَجَةْ الْأَنْطَيْتنِي؟ ١٩ يَا اللّٰهْ! بِسَبَبِي أَنَا عَبْدَكْ وَ حَسَبْ نِيّتَكْ، إِنْتَ سَوَّيْت لَيِّ الْأَشْيَاءْ الْكُبَارْ دَوْل لِتِعَرِّفْ كُلَّ عَظَمَتَكْ. ٢٠ يَا اللّٰهْ! إِنْتَ مَا عِنْدَكْ شَبِيهْ وَ أَبَداً مَا فِي إِلٰـهْ إِلَّا إِنْتَ. وَ دَا حَسَبْ كُلَّ الْكَلَامْ السِّمِعْنَاهْ. ٢١ فِيَّهْ أُمَّةْ فِي كُلَّ الْأَرْض مِثِلْ شَعَبَكْ بَنِي إِسْرَائِيلْ وَلَّا؟ يَا رَبّ، إِنْتَ فَدَيْتهُمْ وَ سَوَّيْتهُمْ شَعَبَكْ أَشَانْ أُسْمَكْ يَبْقَى عَالِي. وَ إِنْتَ سَوَّيْت عَجَايِبْ كُبَارْ الْبِخَوُّفُوا. وَ طَرَدْت الْأُمَمْ الْآخَرِينْ قِدَّامْ شَعَبَكْ الْإِنْتَ فَدَيْتهُمْ مِنْ بَلَدْ مَصِرْ. ٢٢ وَ سَوَّيْت شَعَبَكْ بَنِي إِسْرَائِيلْ لِيَبْقَوْا شَعَبَكْ دَايْماً. يَا اللّٰهْ، إِنْتَ بِقِيتْ لَيْهُمْ إِلٰـهُّمْ.

٢٣ «وَ هَسَّعْ دَا، يَا اللّٰهْ، الْكَلَامْ الْقُلْتَهْ فَوْقِي أَنَا عَبْدَكْ وَ فَوْق عَايِلْتِي دَا، خَلِّي يِلْحَقَّقْ إِلَى الْأَبَدْ. وَ تَمِّمْ كُلَّ شَيّءْ الْقُلْتَهْ. ٢٤ وَ خَلِّي كَلَامَكْ يِلْحَقَّقْ وَ بَيْدَا، يِمَجُّدُوا أُسْمَكْ إِلَى الْأَبَدْ وَ يُقُولُوا: ‹اللّٰهْ الْقَادِرْ، هُو بَسْ إِلٰـهْ بَنِي إِسْرَائِيلْ!› وَ خَلِّي بَيْتِي أَنَا عَبْدَكْ دَاوُدْ يَقْعُدْ ثَابِتْ قِدَّامَكْ. ٢٥ أَشَانْ إِنْتَ ذَاتَكْ، يَا إِلٰـهِي، خَبَّرْتِنِي أَنَا عَبْدَكْ وَ قُلْت لَيِّ: ‹نِثَبِّتْ بَيْت عَايِلْتَكْ فِي الْمُلُكْ.› وَ فِي شَانْ دَا، أَنَا عَبْدَكْ لِقِيتْ الشَّجَاعَةْ وَ قَدَّمْت لَيْك الصَّلَاةْ دِي.

٢٦ «وَ هَسَّعْ دَا، يَا اللّٰهْ، إِنْتَ بَسْ الرَّبّ وَ عَاهَدْتِنِي أَنَا عَبْدَكْ بِكُلَّ الْخَيْر دَا. ٢٧ وَ خَلَاصْ هَسَّعْ دَا، إِنْتَ شِلْت نِيَّةْ تِبَارِكْ عَايِلْتِي أَنَا عَبْدَكْ لِيَمُلْكُوا قِدَّامَكْ إِلَى الْأَبَدْ. يَا اللّٰهْ، النَّادُمْ إِنْتَ بَسْ بَارَكْتَهْ، هُو يَلْقَى بَرَكَةْ إِلَى الْأَبَدْ.»