ذُرّية رَأُوبِين
٥
١ وَ رَأُوبِينْ هُو بِكِرْ إِسْرَائِيلْ.
وَ أَشَانْ هُو دَخَلْ فِي مَرِةْ أَبُوهْ،*
حَقّ بُكُورِيّتَهْ أَنْطَوْه لِعِيَالْ يُوسُفْ الْهُو كُلَ وِلَيْد إِسْرَائِيلْ.
وَ بَيْدَا،
رَأُوبِينْ مَا لِقِي حَقّ الْبُكُورِيَّةْ.
٢ وَ حَتَّى كَانْ يَهُوذَا بِقِي شَدِيدْ مِنْ أَخْوَانَهْ وَ يَمْرُقْ مِنَّهْ الْمَلِكْ كُلَ،
حَقّ الْبُكُورِيَّةْ أَنْطَوْه لِيُوسُفْ.
٣ وَ أَوْلَادْ رَأُوبِينْ بِكِرْ إِسْرَائِيلْ هُمَّنْ
حَنُوكْ وَ فَلُّو وَ حَصْرُونْ وَ كَرْمِي.
٤ وَ يُوِيلْ وِلِدْ شَمَعْيَا
وَ شَمَعْيَا وِلِدْ جُوجْ
وَ جُوجْ وِلِدْ شِمْعِي
٥ وَ شِمْعِي وِلِدْ مِيكَا
وَ مِيكَا وِلِدْ رَايَا
وَ رَايَا وِلِدْ بَعَلْ.
٦ وَ بِيرَا وِلَيْد بَعَلْ هُو شَيْخ هَنَا قَبِيلَةْ رَأُوبِينْ.
وَ تَغْلَتْ فَلَاسَرْ مَلِكْ بَلَدْ أَشُورْ كَرَبَهْ وَ وَدَّاهْ فِي الْغُرْبَةْ.
٧ وَ دَاهُو سَجَّلَوْا أَسَامَيْ أَخْوَانْ بِيرَا الْمِنْ خَشُمْ بَيْتَهْ حَسَبْ ذُرِّيِّتْهُمْ.
الْأَوَّلَانِي يَعِيِيلْ
وَ بَعَدَهْ زَكَرِيَّا
٨ وَ بَالَعْ هُو وِلَيْد عَزَازْ وِلَيْد شَمَعْ وِلَيْد يُوِيلْ.
وَ دَاهُو ذُرِّيَّةْ رَأُوبِينْ السَّاكْنِينْ فِي الْمَنْطَقَةْ الْقَاعِدَةْ بَيْن حِلَّةْ عَرُوعِرْ فِي الْجُنُوبْ وَ جَبَلْ نَبُو وَ حِلَّةْ بَعَلْ مَاعَوْن فِي الْمُنْشَاقْ.
٩ وَ فِي الصَّبَاحْ كَمَانْ،
هُمَّنْ سَكَنَوْا فِي خَشُمْ الصَّحَرَاء الْمَاشِي لَحَدِّي بَحَرْ الْفُرَاتْ أَشَانْ هُمَّنْ عِنْدُهُمْ بَهَايِمْ كَتِيرِينْ فِي بَلَدْ قِلْعَادْ.
١٠ وَ فِي وَكِتْ الْمَلِكْ شَاوُولْ،
نَاسْ ذُرِّيَّةْ رَأُوبِينْ حَارَبَوْا بَنِي هَاجَرْ وَ أَنَّصَرَوْا فَوْقهُمْ.
وَ سَكَنَوْا فِي فُرْقَانْهُمْ فِي كُلَّ الْمَنْطَقَةْ الصَّبَاحْ لِبَلَدْ قِلْعَادْ.
ذُرّية قَاد
١١ وَ ذُرِّيَّةْ قَادْ سَكَنَوْا مُقَابِلِينْ ذُرِّيَّةْ رَأُوبِينْ فِي بَلَدْ بَاشَانْ لَحَدِّي حُدُودْ سَلْكَةْ.
١٢ وَ الْعَايِلَةْ الْأَوَّلَانِيَّةْ هِي هِنْت يُوِيلْ وَ وَرَايَهْ عَايِلَةْ شَافَامْ وَ يَعْنَايْ وَ شَافَاطْ كُلُّهُمْ فِي بَاشَانْ.
١٣ وَ مَعَاهُمْ سَبْعَةْ عَايِلَاتْ آخَرِينْ وَ هُمَّنْ مِكَايِيلْ وَ مَشُلَّامْ وَ شَبَعْ وَ يُرَايْ وَ يَعَكَانْ وَ زِيعْ وَ عِبَارْ.
١٤ وَ دِي الذُّرِّيَّةْ الْمَرَقَتْ مِنْ أَبِحَايِلْ.
وَ أَبِحَايِلْ هُو وِلَيْد حُورِي
وَ حُورِي وِلَيْد يَارُوحْ
وَ يَارُوحْ وِلَيْد قِلْعَادْ
وَ قِلْعَادْ وِلَيْد مِكَايِيلْ
وَ مِكَايِيلْ وِلَيْد يَشِيشَايْ
وَ يَشِيشَايْ وِلَيْد يَهْدُوا
وَ يَهْدُوا وِلَيْد بُوزْ.
١٥ وَ أَخِي هُو وِلَيْد عَبْدِيِيلْ وَ وِلَيْد وِلَيْدَهْ لِقُونِي.
وَ هُو بَسْ كَبِيرْ هَنَا كُلَّ الْعَايِلَاتْ دَوْل.
١٦ وَ كُلَّ عَايِلَاتْ قَادْ سَكَنَوْا فِي قِلْعَادْ وَ فِي بَاشَانْ وَ فِي الْحِلَّالْ التَّابْعِينْ لَيْهُمْ وَ فِي بَكَانَاتْ الْمَرْعَى هَنَا شَارُونْ لَحَدِّي حُدُودْهُمْ.
١٧ وَ كُلَّ النَّاسْ الْقَبِيلَةْ دِي سَجَّلَوْا أُسُمْهُمْ فِي وَكِتْ يُوتَامْ مَلِكْ بَنِي يَهُوذَا وَ يَرُبَعَامْ مَلِكْ بَنِي إِسْرَائِيلْ.
١٨ وَ قَبِيلَةْ رَأُوبِينْ وَ قَبِيلَةْ قَادْ وَ نُصّ قَبِيلَةْ مَنَسَّى،
هُمَّنْ كُلَّ عِنْدُهُمْ 44 760 رُجَالْ فَحَلِينْ الْيَعَرْفُوا يِسْتَعْمَلَوْا الدَّرَقَةْ وَ السَّيْف وَ النُّشَّابْ وَ جَاهِزِينْ لِلْحَرِبْ.
١٩ وَ هُمَّنْ حَارَبَوْا بَنِي هَاجَرْ وَ ذُرِّيَّةْ يَطُورْ وَ نَفِيشْ وَ نُدَابْ.
٢٠ وَ فِي وَكْت الْحَرْبَةْ دِي،
هُمَّنْ كَوْرَكَوْا لِلرَّبّ لِيَفْزَعْهُمْ أَشَانْ هُمَّنْ مُتَوَكِّلِينْ عَلَيَّهْ.
وَ هُو قِبِلْ سُؤَالْهُمْ وَ نَصَرَاهُمْ فِي بَنِي هَاجَرْ وَ النَّاسْ الْمَعَاهُمْ.
٢١ وَ هُمَّنْ نَهَبَوْا بَهَايِمْ كَتِيرِينْ،
50 000 إِبِلْ وَ 250 000 غَنَمْ وَ 2 000 حَمِيرْ.
وَ كَرَبَوْا 100 000 نَاسْ مَسَاجِينْ
٢٢ وَ كَتَلَوْا نَاسْ كَتِيرِينْ أَشَانْ الْحَرِبْ دَا،
الرَّبّ بَسْ أَمَرْ بَيَّهْ.
وَ هُمَّنْ سَكَنَوْا فِي بَدَلْهُمْ لَحَدِّي الْوَكِتْ الْوَدَّوْهُمْ فِي الْغُرْبَةْ.
ذُرّية مَنَسَّى
٢٣ وَ ذُرِّيَّةْ نُصّ قَبِيلَةْ مَنَسَّى سَكَنَوْا فِي الْبَلَدْ مِنْ بَاشَانْ لَحَدِّي بَعَلْ حَرْمُونْ وَ سَنِيرْ وَ جَبَلْ حَرْمُونْ.
هُمَّنْ كَتِيرِينْ مَرَّةْ وَاحِدْ.
٢٤ وَ دَاهُو أَسَامَيْ كُبَارَاتْ عَايِلَاتْهُمْ.
هُمَّنْ عِفِرْ وَ يِشْعِي وَ أَلِيِيلْ وَ عَزْرِيِيلْ وَ إِرْمِيَا وَ هُدَوْيَا وَ يَحْدِيِيلْ.
هُمَّنْ دَوْل رُجَالْ فُرَّاسْ وَ قَادْرِينْ وَ كُبَارَاتْ عَايِلَاتْهُمْ.
٢٥ وَ لَاكِنْ فِي الأَخِيرْ نَاسْ قَبِيلَةْ رَأُوبِينْ وَ قَبِيلَةْ قَادْ وَ نُصّ قَبِيلَةْ مَنَسَّى عِصَوْا اللّٰهْ رَبّ جُدُودْهُمْ.
وَ هُمَّنْ أَشَّرْمَطَوْا مَعَ إِلٰـهَاتْ آخَرِينْ وَ عَبَدَوْهُمْ.
وَ دَوْل إِلٰـهَاتْ الشُّعُوبْ الدَّمَّرَاهُمْ الرَّبّ مِنْ قِدَّامْهُمْ.
٢٦ وَ خَلَاصْ،
اللّٰهْ إِلٰـهْ بَنِي إِسْرَائِيلْ لَزَّ فُولْ مَلِكْ بَلَدْ أَشُورْ وَ هُو الْأُسْمَهْ تَغْلَتْ فَلَاسَرْ.
وَ تَغْلَتْ فَلَاسَرْ جَاءْ شَالْ قَبِيلَةْ رَأُوبِينْ وَ قَبِيلَةْ قَادْ وَ نُصّ قَبِيلَةْ مَنَسَّى.
وَ وَدَّاهُمْ فِي الْغُرْبَةْ فِي بَلَدْ أَشُورْ* فِي حِلَّالْ حَلَحْ وَ حَابُرْ وَ هَارَا وَ قَرِيبْ لِبَحَرْ قُزَانْ.
وَ هُمَّنْ سَاكْنِينْ هِنَاكْ لَحَدِّي الْيَوْم.