2 مُلوك 19

حِزْقِيَّا رسّل للنبي إشَعْيا

١ وَ وَكِتْ الْمَلِكْ حِزْقِيَّا سِمِعْ كَلَامْهُمْ، هُو كُلَ قَمَّ شَرَّطْ خُلْقَانَهْ وَ لِبِسْ خَلَقْ الْحِزِنْ وَ مَشَى بَيْت اللّٰهْ. ٢ وَ هُو رَسَّلْ أَلِيَاقِيمْ مَسْؤُولْ فِي قَصِرْ الْمَلِكْ وَ شَبْنَا الْكَاتِبْ وَ رُجَالْ الدِّينْ الشِّيَّابْ. وَ كُلُّهُمْ كَيْ لَابْسِينْ خُلْقَانْ الْحِزِنْ وَ مَشَوْا لِلنَّبِي إِشَعْيَا وِلَيْد أَمُّوصْ. ٣ وَ هُمَّنْ قَالَوْا لَيَّهْ: «دَاهُو كَلَامْ الْمَلِكْ حِزْقِيَّا: ‹الْيَوْم دَا، يَوْم هَنَا ضِيقَةْ وَ عِقَابْ وَ فَضِيحَةْ. وَ دَا مِثِلْ الْعِيَالْ جَاهِزِينْ لِيَمُرْقُوا مِنْ بَطُنْ أَمُّهُمْ وَ لَاكِنْ هِي مَا عِنْدَهَا قُدْرَةْ لِتَلْدَاهُمْ. ٤ وَ أَكُونْ اللّٰهْ إِلٰـهَكْ يَسْمَعْ كُلَّ كَلَامْ قَايِدْ الدَّيْش السِّيدَهْ مَلِكْ بَلَدْ أَشُورْ رَسَّلَهْ لِيِعَيِّرْ اللّٰهْ الْحَيّ. وَ أَكُونْ اللّٰهْ إِلٰـهَكْ يَسْمَعْ كَلَامَهْ وَ يِعَاقِبَهْ. هَسَّعْ دَا، أَسْأَلْ اللّٰهْ فِي شَانْ الشَّعَبْ الْفَضَّلَوْا.›»

٥ وَ وَكِتْ مَسَائِيلْ الْمَلِكْ حِزْقِيَّا جَوْا قِدَّامْ إِشَعْيَا، ٦ هُو قَالْ لَيْهُمْ: «أَمْشُوا قُولُوا لِسِيدْكُو الْمَلِكْ حِزْقِيَّا: ‹دَاهُو اللّٰهْ قَالْ: ”مَا تَخَافْ مِنْ الْمُعْيَارْ السِّمِعْتَهْ الْعَيَّرَوْنِي بَيَّهْ خَدَّامِينْ مَلِكْ أَشُورْ. ٧ وَ دَاهُو أَنَا نَنْطِيهْ خَبَرْ وَ بِسَبَبْ الْخَبَرْ دَا، هُو يِقَبِّلْ بَلَدَهْ. وَ هِنَاكْ أَنَا نَكْتُلَهْ بِالْسَّيْف.“›»

٨ وَ قَايِدْ الدَّيْش سِمِعْ كَدَرْ مَلِكْ بَلَدْ أَشُورْ قَمَّ مِنْ حِلَّةْ لَكِيشْ وَ مَشَى لِيِحَارِبْ حِلَّةْ لِبْنَةْ. خَلَاصْ، هُو كُلَ قَبَّلْ لِحِقَهْ هِنَاكْ.

جواب سَنْحَرِيب هنا التهْديد

٩ وَ خَلَاصْ، مَلِكْ بَلَدْ أَشُورْ سِمِعْ خَبَرْ. وَ الْخَبَرْ دَا بُقُولْ: «تِرْهَاقَا مَلِكْ بَلَدْ الْحَبَشَةْ قَمَّ جَايِ لِيِحَارِبَكْ.» وَ خَلَاصْ، مَلِكْ أَشُورْ رَسَّلْ مُرَسَّلِينْ لِحِزْقِيَّا وَ قَالْ لَيْهُمْ: ١٠ «أَمْشُوا لِحِزْقِيَّا مَلِكْ مَمْلَكَةْ يَهُوذَا وَ قُولُوا لَيَّهْ: ‹خَلِّي إِلٰـهَكْ الْإِنْتَ قَاعِدْ تِتْوَكَّلْ عَلَيَّهْ دَا مَا يُغُشَّكْ وَ يُقُولْ لَيْك: ”مَدِينَةْ الْقُدُسْ مَا تَقَعْ فِي إِيدَيْن مَلِكْ أَشُورْ!“ ١١ إِنْتَ ذَاتَكْ سِمِعْت بِكُلَّ شَيّءْ السَّوَّوْه مُلُوكْ بَلَدْ أَشُورْ فِي كُلَّ الْبُلْدَانْ وَ دَمَّرَوْهُمْ مَرَّةْ وَاحِدْ. وَ تَحْسِبْ إِنْتَ وِحَيْدَكْ بَسْ تَنْجَى وَلَّا؟ ١٢ وَ إِلٰـهَاتْ الْأُمَمْ الدَّمَّرَوْهُمْ جُدُودِي، هَلْ قِدْرَوْا نَجَّوْا حِلَّالْ قُزَانْ وَ حَارَانْ وَ رَصَفْ وَ ذُرِّيَّةْ عَدَنْ السَّاكْنِينْ فِي تَلَسَّارْ وَلَّا؟ ١٣ وَ وَيْن مُلُوكْ مُدُنْ حَمَاتْ وَ أَرْفَدْ وَ لَعِيرْ وَ سَفَرْوَايِمْ وَ هِينَعْ وَ عَوَّا؟›»

١٤ وَ حِزْقِيَّا شَالْ الْجَوَابْ مِنْ إِيدَيْ الْمُرَسَّلِينْ وَ قَرَاهْ. وَ مَشَى لِبَيْت اللّٰهْ وَ فَتَحْ الْجَوَابْ دَا قِدَّامْ اللّٰهْ. ١٥ وَ قِدَّامْ اللّٰهْ، حِزْقِيَّا سَأَلْ وَ قَالْ: «يَا اللّٰهْ إِلٰـهْ بَنِي إِسْرَائِيلْ! إِنْتَ الْقَاعِدْ فِي عَرْشَكْ فَوْق الْمَخْلُوقِينْ السَّمَاوِيِّينْ. وَ إِنْتَ وِحَيْدَكْ بَسْ إِلٰـهْ كُلَّ مَمَالِكْ الْأَرْض! وَ إِنْتَ بَسْ الْخَلَقْت السَّمَاوَاتْ وَ الْأَرْض! ١٦ يَا اللّٰهْ، خُطّ أَدَانَكْ وَ أَسْمَعْنِي! يَا اللّٰهْ، أَفْتَحْ عُيُونَكْ وَ شِيفْ! وَ أَسْمَعْ كَلَامْ سَنْحَرِيبْ مَلِكْ أَشُورْ الرَّسَّلَهْ لِيِعَيِّرَكْ إِنْتَ، الْإِلٰـهْ الْحَيّ. ١٧ يَا اللّٰهْ، أَكِيدْ مُلُوكْ أَشُورْ دَمَّرَوْا كُلَّ الْأُمَمْ وَ بُلْدَانْهُمْ. ١٨ وَ زَقَلَوْا إِلٰـهَاتْهُمْ فِي النَّارْ أَشَانْ هُمَّنْ أَصْنَامْ بَسْ السَّوَّوْهُمْ النَّاسْ بِإِيدَيْهُمْ مِنْ حَطَبْ وَ حَجَرْ. وَ مُلُوكْ أَشُورْ دَمَّرَوْهُمْ. ١٩ وَ هَسَّعْ، يَا اللّٰهْ إِلٰـهْنَا، نَجِّينَا مِنْ إِيدْ سَنْحَرِيبْ وَ بَيْدَا، كُلَّ مَمَالِكْ الْأَرْض يَعَرْفُوا كَدَرْ إِنْتَ يَا اللّٰهْ، إِنْتَ وِحَيْدَكْ بَسْ الرَّبّ.»

اللّه ردّ لحِزْقِيَّا

٢٠ وَ إِشَعْيَا وِلَيْد أَمُّوصْ رَسَّلْ لِحِزْقِيَّا وَ قَالْ لَيَّهْ: «دَاهُو اللّٰهْ إِلٰـهْ بَنِي إِسْرَائِيلْ قَالْ: ‹أَيْوَى، أَنَا سِمِعْت صَلَاتَكْ الْإِنْتَ وَجَّهْتَهَا لَيِّ فِي شَانْ سَنْحَرِيبْ مَلِكْ بَلَدْ أَشُورْ.›» ٢١ وَ إِشَعْيَا قَالْ بَتَّانْ: «دَاهُو كَلَامْ اللّٰهْ الْقَالَهْ ضِدّ سَنْحَرِيبْ:

‹صَهْيُون الْمِثِلْ بِنَيَّةْ عُدْرِيَّةْ

تَحْقِرَكْ وَ تِشَّمَّتْ فَوْقَكْ!

أَيْوَى! مَدِينَةْ الْقُدُسْ الْمِثِلْ بِنَيَّةْ

تِهِزّ رَاسْهَا وَرَاكْ.

٢٢ لِيَاتُو إِنْتَ عَيَّرْتَهْ

وَ أَشَّمَّتْ فَوْقَهْ؟

وَ ضِدّ يَاتُو إِنْتَ كَلَّمْت

وَ شِفْت بِإِسْتِكْبَارْ؟

دَا ضِدِّي أَنَا، قُدُّوسْ إِسْرَائِيلْ!

٢٣ بِوَاسِطَةْ نَاسَكْ الرَّسَّلْتُهُمْ،

إِنْتَ عَيَّرْت الرَّبّ وَ قُلْت:

”بِكَتَرَةْ عَرَبَاتِي،

أَنَا طَلَعْت فِي رُوسَيْ الْجِبَالْ

لَحَدِّي دَخَلْت فِي لُبْنَانْ دَاخَلْ

لِنَقْطَعْ شَدَرْهَا هَنَا الْأَرْز الطُّوَالْ

وَ شَدَرْهَا هَنَا السَّرْوِي السَّمَحْ.

وَ نَمْشِي لَحَدِّي نَلْحَقْ

الْمَلْجَأْ الْآخِرْ

وَ غَابَاتْهَا الضُّلُمْ.

٢٤ وَ أَنَا نَكَتْ بِيَارْ فِي بُلْدَانْ هَنَا نَاسْ آخَرِينْ

وَ شِرِبْت أَلْمِيهُمْ

وَ بِفَجْقَةْ رِجْلِي،

يَبَّسْت كُلَّ رُجُولْ نِيلْ مَصِرْ.“

٢٥ «‹وَ لَاكِنْ، يَا سَنْحَرِيبْ،

إِنْتَ مَا فِهِمْت

كَدَرْ مِنْ وَكِتْ طَوِيلْ،

أَنَا قَرَّرْت الشَّيّءْ دَا.

وَ مِنْ زَمَانْ أَنَا كَوَّنْتَهْ

وَ هَسَّعْ، نِحَقِّقَهْ.

وَ إِنْتَ كَمَانْ، قَاعِدْ تِدَمِّرْ الْمُدُنْ الْقَوِيِّينْ

وَ يَبْقَوْا كَوْم هَنَا تُرَابْ.

٢٦ وَ سُكَّانْهُمْ مَا عِنْدُهُمْ قُدْرَةْ

وَ خَافَوْا وَ خِجْلَوْا.

وَ هُمَّنْ يِبْسَوْا مِثِلْ

قَشّ الْكَدَادَةْ

وَ نَبَاتْ الْأَخْضَرْ

وَ الْقَشّ فِي رُوسَيْ الْبُيُوتْ

وَ يِبْسَوْا مِثِلْ الْقَمَحْ الْيِبِسْ

قُبَّالْ مَا يَنْجَضْ.

٢٧ وَ لَاكِنْ أَنَا نَعَرِفْ

وَكِتْ إِنْتَ تَقْعُدْ

وَ وَكِتْ تَمْرُقْ وَ تِقَبِّلْ

وَ وَكِتْ تَرْجِفْ مِنْ الزَّعَلْ ضِدِّي.

٢٨ وَ أَنَا سِمِعْت إِنْتَ رَجَفْت مِنْ الزَّعَلْ ضِدِّي

وَ أَسْتَكْبَرْت.

وَ بِسَبَبْ دَا، أَنَا نِدِسّ لَيْك

زُمَامْ فِي مُنْخَرَكْ

وَ لِجَامْ فِي خَشْمَكْ

وَ نِقَبِّلَكْ بِالدَّرِبْ

الْإِنْتَ جِيتْ بَيَّهْ.›»

٢٩ «وَ دِي هِي الْعَلَامَةْ، يَا حِزْقِيَّا.

فِي السَّنَةْ دِي،

تَاكُلُوا مِنْ الْكِشَّيْب

وَ فِي السَّنَةْ التَّانِيَةْ،

تَاكُلُوا مِنْ الْبَنْدَرْ.

وَ لَاكِنْ فِي السَّنَةْ التَّالْتَةْ،

تِتَيْرُبُوا وَ تَقْطَعَوْا

وَ تِمَقُّنُوا جِنَيْنَاتْكُو هَنَا الْعِنَبْ

وَ تَاكُلُوا مِنْ فَوَاكِهُّمْ.

٣٠ وَ النِّجَوْا مِنْ بَنِي يَهُوذَا

وَ فَضَّلَوْا

يَبْقَوْا مِثِلْ شَدَرَةْ

التِّدِسّ عُرُوقْهَا مِنْ جَدِيدْ فِي الْأَرْض

وَ فُرُوعْهَا يِنْمَلُوا بِفَوَاكِهْ.

٣١ أَشَانْ مِنْ مَدِينَةْ الْقُدُسْ

يَمُرْقُوا النَّاسْ الْفَضَّلَوْا

أَيْوَى، مِنْ جَبَلْ صَهْيُون

يَمُرْقُوا هُمَّنْ النِّجَوْا.

وَ دَا، اللّٰهْ الْقَادِرْ يِسَوِّيهْ

حَسَبْ مَحَبِّتَهْ الشَّدِيدَةْ.»

سَنْحَرِيب كتلوه

٣٢ وَ فِي شَانْ دَا، دَاهُو اللّٰهْ قَالْ فِي مَلِكْ بَلَدْ أَشُورْ:

«هُو مَا يَدْخُلْ فِي الْمَدِينَةْ دِي

وَ لَا يِزَرِّقْ فَوْقهَا نُشَّابْ.

وَ لَا يِقَرِّبْ لَيْهَا بِدَرَقْ

وَ لَا يِقَوِّمْ رَدْمِيَّةْ وَرَاءْ دُرْدُرْهَا.»

٣٣ وَ دَاهُو كَلَامْ اللّٰهْ:

«هُو يِقَبِّلْ بِالدَّرِبْ الْجَاءْ بَيَّهْ

وَ فِي الْمَدِينَةْ دِي، مَا يَدْخُلْ.

٣٤ أَنَا نَحْمِي الْمَدِينَةْ دِي

وَ نِنَجِّيهَا.

وَ دَا فِي شَانِي أَنَا اللّٰهْ

وَ فِي شَانْ عَبْدِي دَاوُدْ.»

٣٥ وَ خَلَاصْ فِي اللَّيْلَةْ دِي، مَلَكْ اللّٰهْ جَاءْ ضَرَبْ مُعَسْكَرْ الْأَشُورِيِّينْ وَ كَتَلْ 185 000 رَاجِلْ. وَ بِفَجُرْ وَكِتْ قَمَّوْا، الْفَضَّلَوْا مِنْهُمْ شَافَوْا كُلَّ الْجَنَازَاتْ دَوْل. ٣٦ وَ خَلَاصْ، سَنْحَرِيبْ مَلِكْ بَلَدْ أَشُورْ قَبَّلْ وَ مَشَى قَعَدْ فِي مَدِينَةْ نِينَوَى.

٣٧ وَ يَوْم وَاحِدْ، سَنْحَرِيبْ مَشَى فِي بَيْت نِسْرُوكْ إِلٰـهَهْ لِيَعَبُدَهْ. وَ عِيَالَهْ الْإِتْنَيْن أَدْرَمَلِكْ وَ شَرَاصَرْ دَخَلَوْا ضَرَبَوْه وَ كَتَلَوْه بِالْسَّيْف وَ عَرَّدَوْا مَشَوْا لِبَلَدْ أَرَرَاطْ. وَ وِلَيْدَهْ أَسَرْ حَدُّونْ حَكَمْ فِي بَدَلَهْ.