2 مُلوك 14

أَمَصْيَا بِقي ملك في يَهُوذَا

١ وَ فِي السَّنَةْ التَّانِيَةْ هَنَا حُكُمْ يَهُآشْ وِلَيْد يَهُوحَازْ مَلِكْ مَمْلَكَةْ إِسْرَائِيلْ، أَمَصْيَا وِلَيْد يُوَاشْ بِقِي مَلِكْ فِي مَمْلَكَةْ يَهُوذَا. ٢ وَ أَمَصْيَا عِنْدَهْ 25 سَنَةْ وَكِتْ بِقِي مَلِكْ وَ حَكَمْ 29 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا يُوعَدَّانْ وَ هِي مِنْ مَدِينَةْ الْقُدُسْ. ٣ وَ هُو سَوَّى الْعَدِيلْ قِدَّامْ اللّٰهْ. مَا سَوَّى مِثِلْ جِدَّهْ دَاوُدْ سَوَّاهْ لَاكِنْ مِثِلْ أَبُوهْ يُوَاشْ. ٤ وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ وَ فَوْقهُمْ، الشَّعَبْ يِقَدُّمُوا ضَحَايَا وَ يِحَرُّقُوا بَخُورْ.

٥ وَ وَكِتْ أَمَصْيَا ثَبَّتْ الْمُلُكْ، هُو كَتَلْ كُلَّ الْمَسَائِيلْ الْكَتَلَوْا أَبُوهْ الْمَلِكْ يُوَاشْ. ٦ وَ لَاكِنْ هُو مَا كَتَلْ عِيَالْهُمْ. وَ دَا حَسَبْ مَكْتُوبْ فِي تَوْرَاةْ مُوسَى الْفَوْقَهْ اللّٰهْ أَمَرَاهُمْ وَ قَالْ: «الْأَبَّهَاتْ مَا يَكْتُلُوهُمْ بِسَبَبْ ذَنِبْ الْعِيَالْ وَ الْعِيَالْ مَا يَكْتُلُوهُمْ بِسَبَبْ ذَنِبْ الْأَبَّهَاتْ. أَيِّ وَاحِدْ يُمُوتْ بِسَبَبْ ذَنْبَهْ بَسْ.»

٧ وَ الْمَلِكْ أَمَصْيَا كَتَلْ 10 000 نَاسْ مِنْ الْأَدَوْمِيِّينْ فِي وَادِي الْمِلِحْ. وَ فِي الْحَرِبْ دَا، هُو شَالْ حِلَّةْ سَالَعْ وَ سَمَّاهَا يَقْتِيلْ وَ أُسُمْهَا دَا قَاعِدْ لَحَدِّي الْيَوْم.

يَهُآش أنّصر في أَمَصْيَا

٨ وَ خَلَاصْ بَعَدْ الْحَرِبْ دَا، أَمَصْيَا رَسَّلْ نَاسْ لِيَهُآشْ وِلَيْد يَهُوحَازْ وِلَيْد يَاهُو مَلِكْ مَمْلَكَةْ إِسْرَائِيلْ. وَ أَمَصْيَا قَالْ لَيَّهْ: «تَعَالْ نِلْقَابَلَوْا وَ نِلْحَارَبَوْا!»

٩ وَ يَهُآشْ مَلِكْ مَمْلَكَةْ إِسْرَائِيلْ رَسَّلْ لِأَمَصْيَا مَلِكْ مَمْلَكَةْ يَهُوذَا وَ حَجَّى لَيَّهْ بِالْمَثَلْ دَا: «يَوْم مِنْ الْأَيَّامْ فِي جِبَالْ لُبْنَانْ، شَوْكَايْ وَاحِدَةْ رَسَّلَتْ لِشَدَرْ الْأَرْز وَ قَالَتْ لَيَّهْ: ‹أَخِّدْ بِنَيِّتَكْ لِوِلَيْدِي!› وَ لَاكِنْ تَيْتَلْ وَاحِدْ هَنَا لُبْنَانْ فَجَّقْ الشَّوْكَايْ دِي وَ رِحِكْهَا مَرَّةْ وَاحِدْ.» ١٠ وَ يَهُآشْ قَالْ بَتَّانْ: «أَكِيدْ إِنْتَ أَنَّصَرْت فِي الْأَدَوْمِيِّينْ وَ فِي شَانْ دَا، فِرِحْت بِنَصْرَكْ وَ قَاعِدْ تِلْفَشَّرْ. وَ نُقُولْ لَيْك كَيْ: ‹أَقْعُدْ سَاكِتْ فِي بَيْتَكْ. مَالَا تِدَوْر تِقَوِّمْ حَرِبْ شَيْن الْيِدَمِّرَكْ إِنْتَ وَ مَمْلَكَةْ يَهُوذَا كُلَ؟›»

١١ وَ لَاكِنْ أَمَصْيَا مَا سِمِعْ كَلَامَهْ. وَ خَلَاصْ، يَهُآشْ مَلِكْ مَمْلَكَةْ إِسْرَائِيلْ مَرَقْ قَابَلَهْ. وَ عَسْكَرْ يَهُآشْ وَ عَسْكَرْ أَمَصْيَا مَلِكْ مَمْلَكَةْ يَهُوذَا أَلْحَارَبَوْا فِي حِلَّةْ بَيْت شَمْس فِي بَلَدْ يَهُوذَا. ١٢ وَ عَسْكَرْ مَمْلَكَةْ يَهُوذَا أَنْهَزَمَوْا قِدَّامْ عَسْكَرْ مَمْلَكَةْ إِسْرَائِيلْ وَ أَيِّ عَسْكَرِي عَرَّدْ قَبَّلْ بَيْتَهْ.

١٣ وَ فِي حِلَّةْ بَيْت شَمْس، يَهُآشْ مَلِكْ مَمْلَكَةْ إِسْرَائِيلْ كَرَبَهْ لِأَمَصْيَا مَلِكْ مَمْلَكَةْ يَهُوذَا وِلَيْد يُوَاشْ وِلَيْد أَخَزْيَا. وَ هُو بِقِي مَسْجُونْ الْحَرِبْ وَ يَهُآشْ وَدَّاهْ مَدِينَةْ الْقُدُسْ. وَ هِنَاكْ، هُو كَسَّرْ دُرْدُرْ الْمَدِينَةْ فِي طُولْ هَنَا 400 دُرَاعْ مِنْ بَابْ أَفْرَايِمْ لَحَدِّي بَابْ الرُّكُنْ. ١٤ وَ يَهُآشْ شَالْ كُلَّ الدَّهَبْ وَ الْفُضَّةْ وَ الْمُعِدَّاتْ هَنَا بَيْت اللّٰهْ. وَ شَالْ الْكَنْز مِنْ قَصِرْ الْمَلِكْ وَ خَطَفْ نَاسْ كُلَ. وَ بَعَدْ دَا، قَبَّلْ مَدِينَةْ السَّامِرَةْ.

١٥ وَ الْبَاقِي مِنْ عَمَلْ يَهُآشْ وَ كُلَّ شَيّءْ السَّوَّاهْ وَ فَرَاسِيّتَهْ وَ الْحُرُوبْ السَّوَّاهُمْ ضِدّ أَمَصْيَا مَلِكْ مَمْلَكَةْ يَهُوذَا، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. ١٦ وَ يَهُآشْ مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ السَّامِرَةْ مَعَ مُلُوكْ مَمْلَكَةْ إِسْرَائِيلْ. وَ بَعَدْ دَا، وِلَيْدَهْ يَرُبَعَامْ حَكَمْ فِي بَدَلَهْ.

١٧ وَ أَمَصْيَا وِلَيْد يُوَاشْ مَلِكْ مَمْلَكَةْ يَهُوذَا عَاشْ 15 سَنَةْ بَعَدْ مَوْت يَهُآشْ وِلَيْد يَهُوحَازْ مَلِكْ مَمْلَكَةْ إِسْرَائِيلْ. ١٨ وَ الْبَاقِي مِنْ عَمَلْ أَمَصْيَا مَكْتُوبْ فِي كِتَابْ تَارِيخْ مُلُوكْ بَنِي يَهُوذَا. ١٩ وَ فِي مَدِينَةْ الْقُدُسْ، نَاسْ وَاحِدِينْ أَتْمَرَّدَوْا ضِدّ أَمَصْيَا. وَ هُو عَرَّدْ وَ مَشَى حِلَّةْ لَكِيشْ لَاكِنْ هُمَّنْ رَسَّلَوْا نَاسْ وَرَايَهْ وَ كَتَلَوْه فِي الْحِلَّةْ دِي. ٢٠ وَ هُمَّنْ جَابَوْا جَنَازْتَهْ فِي مَدِينَةْ الْقُدُسْ بِخَيْل وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ.

٢١ وَ كُلَّ شَعَبْ مَمْلَكَةْ يَهُوذَا شَالَوْه لِعُزِّيَّا الْعِنْدَهْ 16 سَنَةْ وَ دَرَّجَوْه مَلِكْ فِي بَدَلْ أَبُوهْ أَمَصْيَا. ٢٢ وَ بَعَدْ الْمَلِكْ أَمَصْيَا مَاتْ وَ لِحِقْ أَبَّهَاتَهْ، عُزِّيَّا شَالْ حِلَّةْ إِيلَاتْ وَ بَنَاهَا بَتَّانْ وَ قَبَّلْهَا لِمَمْلَكَةْ يَهُوذَا.

يَرُبَعَام التاني ملك في إسرائيل

٢٣ وَ فِي سَنِةْ 15 هَنَا حُكُمْ أَمَصْيَا وِلَيْد يُوَاشْ مَلِكْ مَمْلَكَةْ يَهُوذَا، يَرُبَعَامْ وِلَيْد يَهُآشْ بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ هُو حَكَمْ 41 سَنَةْ. ٢٤ وَ هُو سَوَّى الْفَسَالَةْ قِدَّامْ اللّٰهْ. هُو مَا خَلَّى مِنَّهْ كُلَّ الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.

٢٥ وَ يَرُبَعَامْ وِلَيْد يَهُآشْ، هُو بَسْ الْقَلَعْ بَتَّانْ كُلَّ الْمَنَاطِقْ الْأَوَّلْ هَنَا مَمْلَكَةْ إِسْرَائِيلْ مِنْ لَبُو حَمَاتْ فِي الْمُنْشَاقْ لَحَدِّي الْبَحَرْ الْمَيِّتْ فِي الْجُنُوبْ. وَ دَا بِقِي حَسَبْ كَلَامْ اللّٰهْ إِلٰـهْ بَنِي إِسْرَائِيلْ الْقَالَهْ بِوَاسِطَةْ عَبْدَهْ النَّبِي يُونُسْ وِلَيْد أَمِتَّايْ الْمِنْ حِلَّةْ قَاتْ حِيفَرْ. ٢٦ اللّٰهْ شَافْ التَّعَبْ الشَّدِيدْ هَنَا بَنِي إِسْرَائِيلْ. وَ مَا فِي نَادُمْ وَ لَا مِنْ الْعَبِيدْ وَ لَا مِنْ الْحُرِّينْ الْيَجِي يَفْزَعْهُمْ. ٢٧ وَ لَاكِنْ أَبَداً اللّٰهْ مَا قَرَّرْ يُقُشّ أُسُمْ بَنِي إِسْرَائِيلْ مِنْ تِحِتْ السَّمَاءْ. وَ بَيْدَا، هُو نَجَّاهُمْ بِإِيدْ يَرُبَعَامْ وِلَيْد يَهُآشْ.

٢٨ وَ الْبَاقِي مِنْ عَمَلْ يَرُبَعَامْ وَ كُلَّ شَيّءْ السَّوَّاهْ وَ فَرَاسِيّتَهْ وَ حُرُوبَهْ وَ كِكَّيْف هُو قَبَّلْ مُدُنْ دِمَشْق وَ حَمَاتْ تِحِتْ حُكُمْ مَمْلَكَةْ إِسْرَائِيلْ وَ دَوْل مُدُنْ الْأَوَّلْ هَنَا مَمْلَكَةْ يَهُوذَا، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. ٢٩ وَ يَرُبَعَامْ مَاتْ وَ لِحِقْ أَبَّهَاتَهْ وَ دَفَنَوْه مَعَ مُلُوكْ بَنِي إِسْرَائِيلْ. وَ وِلَيْدَهْ زَكَرِيَّا حَكَمْ فِي بَدَلَهْ.