2 مُلوك 12

١ وَ دَا فِي السَّنَةْ السَّابْعَةْ هَنَا حُكُمْ يَاهُو مَلِكْ مَمْلَكَةْ إِسْرَائِيلْ. وَ يُوَاشْ حَكَمْ 40 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا صِبْيَا وَ هِي مِنْ حِلَّةْ بِيرْ سَبْعَةْ.٢ وَ فِي كُلَّ مُدَّةْ حَيَاتَهْ، يُوَاشْ سَوَّى الْعَدِيلْ قِدَّامْ اللّٰهْ أَشَانْ يَهُويَدَعْ رَاجِلْ الدِّينْ أَنْطَى وَصَايَا عَدِيلِينْ.٣ وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ وَ فَوْقهُمْ، الشَّعَبْ يِقَدُّمُوا ضَحَايَا وَ يِحَرُّقُوا بَخُورْ.

٤ وَ يُوَاشْ قَالْ لِرُجَالْ الدِّينْ: «لِمُّوا كُلَّ الْفُضَّةْ الْخَصَّصْتُوهَا لِبَيْت اللّٰهْ وَ الْفُضَّةْ هَنَا الْفَدَيَانْ أَوْ الْفُضَّةْ الْأَنْطَوْهَا حَسَبْ قُدُرْتَهْ وَ الْفُضَّةْ الْأَنْطَوْهَا بِجُودْ حَسَبْ النِّيَّةْ هَنَا أَيِّ وَاحِدْ. وَ كُلَّ الْفُضَّةْ دِي، جِيبُوهَا لِبَيْت اللّٰهْ. ٥ وَ خَلِّي أَيِّ رَاجِلْ دِينْ يِشِيلْ الْفُضَّةْ دِي مِنْ النَّاسْ الْيَعَرِفْهُمْ وَ بَيْهَا يِعَدُّلُوا كُلَّ الشُّقُوقْ الْقَاعِدِينْ فِي بَيْت اللّٰهْ.»

٦ وَ لَاكِنْ فِي سَنِةْ 23 هَنَا حُكُمْ يُوَاشْ، رُجَالْ الدِّينْ لِسَّاعْ مَا عَدَّلَوْا الشُّقُوقْ هَنَا بَيْت اللّٰهْ. ٧ وَ يُوَاشْ نَادَاهْ لِيَهُويَدَعْ رَاجِلْ الدِّينْ وَ لِرُجَالْ الدِّينْ الْآخَرِينْ وَ قَالْ لَيْهُمْ: «مَالَا مَا عَدَّلْتُوا الشُّقُوقْ هَنَا بَيْت اللّٰهْ؟ هَسَّعْ دَا، بَتَّانْ مَا تِشِيلُوا فُضَّةْ مِنْ النَّاسْ التَّعَرْفُوهُمْ لَاكِنْ خَلُّوهَا كُلَّهَا لِيِعَدُّلُوا بَيْهَا بَيْت اللّٰهْ.» ٨ وَ رُجَالْ الدِّينْ قَصَّدَوْا بَتَّانْ مَا يِشِيلُوا الْفُضَّةْ مِنْ الشَّعَبْ وَ لَا يِشِيلُوا الْمَسْؤُولِيَّةْ لِيِعَدُّلُوا الشُّقُوقْ هَنَا بَيْت اللّٰهْ.

٩ وَ يَهُويَدَعْ رَاجِلْ الدِّينْ شَالْ صَنْدُوقْ وَ قَدَّ سِدَادْتَهْ وَ خَطَّاهْ جَنْب الْمَدْبَحْ بِنُصّ الزَّيْنَةْ هَنَا مَدَخَلْ بَيْت اللّٰهْ. وَ رُجَالْ الدِّينْ الْهُمَّنْ حُرَّاسْ الْمَدَخَلْ يُخُطُّوا فَوْقَهْ كُلَّ الْفُضَّةْ الْيِجِيبُوهَا لِبَيْت اللّٰهْ. ١٠ وَ كَنْ الْفُضَّةْ دِي بِقَتْ كَتِيرَةْ فِي الصَّنْدُوقْ، خَلَاصْ الْكَاتِبْ هَنَا الْمَلِكْ وَ كَبِيرْ رُجَالْ الدِّينْ يَجُوا وَ يِشِيلُوا الْفُضَّةْ الْجَابَوْهَا فِي بَيْت اللّٰهْ وَ يِحَاسُبُوهَا. ١١ وَ بَعَدْ حَسَبَوْا الْفُضَّةْ دِي، يَنْطُوهَا فِي إِيدْ النَّاسْ الْمُكَلَّفِينْ بِخِدْمَةْ بَيْت اللّٰهْ. وَ هُمَّنْ يِسْتَعْمَلَوْهَا لِيِكَفُّوا بَيْهَا الْخَشَّابِينْ وَ الْبَنَّايِينْ الْقَاعِدِينْ يَخْدُمُوا فِي بَيْت اللّٰهْ ١٢ وَ الْعَدَّالِينْ وَ نَقَّاشِينْ الْحَجَرْ وَ يَشْرُوا بَيْهَا مَرَادِيسْ وَ حُجَارْ مَقْطُوعِينْ لِيِعَدُّلُوا بَيْهَا شُقُوقْ بَيْت اللّٰهْ. وَ يِكَفُّوا بَيْهَا كُلَّ شَيّءْ الْوَاجِبْ لِعَدِّلِينْ الْبَيْت. ١٣ وَ لَاكِنْ بِالْفُضَّةْ الْجَابَوْهَا لِبَيْت اللّٰهْ دِي، مَا سَوَّوْا بَيْهَا وَ لَا مَوَاعِينْ هَنَا فُضَّةْ وَ لَا سَكَاكِينْ وَ لَا كِيسَانْ وَ لَا بُوقْ وَ لَا أَيِّ آلَةْ هَنَا دَهَبْ أَوْ فُضَّةْ. ١٤ هُمَّنْ أَنْطَوْا الْفُضَّةْ دِي لِلْمُكَلَّفِينْ بِالْخِدْمَةْ أَشَانْ يِسْتَعْمَلَوْهَا لِعَدِّلِينْ بَيْت اللّٰهْ. ١٥ وَ مَا يَسْأَلَوْهُمْ لِلْمُكَلَّفِينْ دَوْل مِنْ الْفُضَّةْ الْقَاعِدِينْ يِكَفُّوا بَيْهَا الْخَدَّامِينْ أَشَانْ هُمَّنْ نَاسْ الْعِنْدُهُمْ أَمَانْ. ١٦ وَ كَنْ لِلْفُضَّةْ الْيِجِيبُوهَا هَدِيَّةْ لِكَفَّارَةْ الْخَطَا وَلَّا هَدِيَّةْ لِكَفَّارَةْ الذَّنِبْ دِي، مَا يُصُبُّوهَا فِي بَيْت اللّٰهْ وَ لَاكِنْ يَنْطُوهَا لِرُجَالْ الدِّينْ.

نِهاية حُكُم يُوَاش

١٧ وَ يَوْم وَاحِدْ، حَزَيِيلْ مَلِكْ بَلَدْ أَرَامْ جَاءْ هَجَمْ حِلَّةْ قَاتْ وَ شَالْهَا. وَ حَزَيِيلْ شَالْ نِيَّةْ لِيَمْشِي يَهْجِمْ مَدِينَةْ الْقُدُسْ كُلَ. ١٨ وَ يُوَاشْ مَلِكْ مَمْلَكَةْ يَهُوذَا شَالْ الْمَوَاعِينْ الْخَصَّصَوْهُمْ أَبَّهَاتَهْ يَهُوشَفَطْ وَ يَهُورَامْ وَ أَخَزْيَا مُلُوكْ مَمْلَكَةْ يَهُوذَا وَ الْمَوَاعِينْ الْهُو ذَاتَهْ خَصَّصَاهُمْ وَ كُلَّ الدَّهَبْ الْقَاعِدْ فِي الْمَخَازِنْ هَنَا بَيْت اللّٰهْ وَ فِي قَصِرْ الْمَلِكْ. وَ رَسَّلْ كُلَّ الْأَشْيَاءْ دَوْل لِحَزَيِيلْ مَلِكْ أَرَامْ وَ هُو خَلَّى جَيْتَهْ فِي مَدِينَةْ الْقُدُسْ. ١٩ وَ الْبَاقِي مِنْ عَمَلْ يُوَاشْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا.

٢٠ وَ مَسَائِيلْ يُوَاشْ أَتْمَرَّدَوْا ضِدَّهْ وَ ضَرَبَوْه فِي حِلَّةْ بَيْت مِلُّو فِي الدَّرِبْ الْمَاشِي عَلَيْ حِلَّةْ صِلَّةْ. ٢١ وَ الْمَسَائِيلْ دَوْل هُمَّنْ يُزَاكَارْ وِلَيْد شِمْعَاتْ وَ يَهُزَبَادْ وِلَيْد شُمِيرْ. وَ هُمَّنْ ضَرَبَوْا يُوَاشْ وَ كَتَلَوْه. وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ. وَ وِلَيْدَهْ أَمَصْيَا حَكَمْ فِي بَدَلَهْ.