2 مُلوك 5

نَعَمَان مشى يدَوْر العافَي

١ وَ فِيَّهْ قَايِدْ دَيْش هَنَا مَلِكْ بَلَدْ أَرَامْ الْأُسْمَهْ نَعَمَانْ. وَ هُو نَادُمْ مُهِمّ لِسِيدَهْ الْمَلِكْ وَ هُو رَضْيَانْ بَيَّهْ أَشَانْ بَيَّهْ هُو بَسْ اللّٰهْ أَنْطَى النَّصُرْ لِبَلَدْ أَرَامْ. وَ هُو رَاجِلْ فَارِسْ مَرَّةْ وَاحِدْ وَ لَاكِنْ مُجَدِّمْ. ٢ وَ نَاسْ بَلَدْ أَرَامْ مَشَوْا نَهَبَوْا مَمْلَكَةْ إِسْرَائِيلْ وَ شَالَوْا كَسِيبَةْ وَ فِي الْكَسِيبَةْ دِي، كَرَبَوْا لَيْهُمْ بِنَيَّةْ. وَ الْبِنَيَّةْ دِي جَابَوْهَا خَدَّامَةْ لِمَرِةْ نَعَمَانْ.

٣ وَ يَوْم وَاحِدْ، الْبِنَيَّةْ قَالَتْ لِسِتَّهَا: «كَنْ سِيدِي يَقْدَرْ يَمْشِي لِلنَّبِي الْقَاعِدْ فِي مَدِينَةْ السَّامِرَةْ، هُو يَشْفِيهْ مِنْ الْجِدَامْ دَا.» ٤ وَ نَعَمَانْ جَاءْ حَجَّى بِالْكَلَامْ دَا لِسِيدَهْ الْمَلِكْ وَ قَالْ: «الْبِنَيَّةْ الْمِنْ مَمْلَكَةْ إِسْرَائِيلْ حَجَّتْ كَلَامْ مِثِلْ دَا مِثِلْ دَا.» ٥ وَ مَلِكْ أَرَامْ قَالْ لَيَّهْ: «قُمّ أَمْشِي! وَ أَنَا نِرَسِّلْ مَعَاكْ جَوَابْ لِمَلِكْ مَمْلَكَةْ إِسْرَائِيلْ.»

وَ نَعَمَانْ قَمَّ مَشَى وَ شَالْ مَعَايَهْ 340 كِيلَوْ هَنَا فُضَّةْ وَ 70 كِيلَوْ هَنَا دَهَبْ وَ 10 خُلْقَانْ هَنَا غِيَارْ. ٦ وَ وَكِتْ وَصَّلْ فِي مَدِينَةْ السَّامِرَةْ، قَدَّمْ الْجَوَابْ دَا لِمَلِكْ مَمْلَكَةْ إِسْرَائِيلْ. وَ فِي الْجَوَابْ دَا مَكْتُوبْ: «هَسَّعْ نِرَسِّلْ لَيْك الْجَوَابْ دَا مَعَ عَبْدِي نَعَمَانْ أَشَانْ تَشْفِيهْ مِنْ الْجِدَامْ دَا.»

٧ وَ بَعَدْ قَرَى الْجَوَابْ دَا، مَلِكْ مَمْلَكَةْ إِسْرَائِيلْ شَرَّطْ خُلْقَانَهْ مِنْ الْحِزِنْ وَ قَالْ: «أَنَا اللّٰهْ وَلَّا؟ نَكْتُلْ وَ نَحَيِي النَّاسْ وَلَّا؟ كِكَّيْف مَلِكْ بَلَدْ أَرَامْ يِرَسِّلْ لَيِّ نَادُمْ وَ يُقُولْ نَشْفِيهْ مِنْ الْجِدَامْ دَا؟ بَيْدَا، شِيفُوا وَ أَعَرْفُوا كَدَرْ هُو يِدَوْر يِسَوِّي مَعَايِ مُشْكِلَةْ بَسْ!»

٨ وَ وَكِتْ أَلْيَسَعْ نَبِي اللّٰهْ سِمِعْ كَدَرْ مَلِكْ مَمْلَكَةْ إِسْرَائِيلْ شَرَّطْ خُلْقَانَهْ دَا، رَسَّلْ لَيَّهْ وَ قَالْ: «مَالَا إِنْتَ شَرَّطْت خُلْقَانَكْ؟ خَلِّي الرَّاجِلْ دَا يَجِي لَيِّ وَ بَيْدَا، هُو يَعَرِفْ كَدَرْ فِي نَبِي فِي مَمْلَكَةْ إِسْرَائِيلْ.»

٩ وَ خَلَاصْ، نَعَمَانْ جَاءْ بِخَيْلَهْ وَ عَرَبَتَهْ وَ وَقَفْ فِي مَدَخَلْ بَيْت أَلْيَسَعْ. ١٠ وَ أَلْيَسَعْ رَسَّلْ خَدَّامَهْ أَشَانْ يُقُولْ لَيَّهْ: «أَمْشِي أَلْبَرَّد سَبْعَةْ مَرَّاتْ فِي بَحَرْ الْأُرْدُنْ. وَ تَلْقَى الْعَافَيْ وَ جِسْمَكْ يَبْقَى طَاهِرْ.» ١١ وَ نَعَمَانْ قَمَّ مَشَى زَعْلَانْ وَ قَالْ: «فِي فِكْرِي، نَحْسِبْ النَّبِي ذَاتَهْ يَجِي يَقِيفْ قِدَّامِي وَ يَسْأَلْ بِأُسُمْ اللّٰهْ إِلٰـهَهْ وَ يُخُطّ إِيدَهْ فِي الْبَكَانْ الْمَرْضَانْ وَ يَشْفِينِي مِنْ الْجِدَامْ. ١٢ هَلْ بُحُورْ هَنَا مَدِينَةْ دِمَشْق مِثِلْ بَحَرْ أَبَانَا وَ بَحَرْ فَرْفَرْ، هُمَّنْ دَوْل مَا أَخَيْر مِنْ أَلْمِي هَنَا مَمْلَكَةْ إِسْرَائِيلْ وَلَّا؟ هَلْ مَا نِلْبَرَّدْ فِي لُبُّهُمْ وَ نَبْقَى طَاهِرْ وَلَّا؟» وَ قَمَّ مُقَبِّلْ زَعْلَانْ.

١٣ وَ لَاكِنْ خَدَّامِينَهْ قَرَّبَوْا وَ حَجَّوْا لَيَّهْ وَ قَالَوْا: «يَا أَبُونَا! كَنْ النَّبِي طَلَبْ مِنَّكْ شَيّءْ قَاسِي كُلَ، مَا تِسَوِّيهْ وَلَّا؟ وَ مَالَا تَابَى كَنْ هُو يُقُولْ لَيْك تَمْشِي تِلْبَرَّدْ وَ تَبْقَى طَاهِرْ؟»

١٤ وَ خَلَاصْ، نَعَمَانْ نَزَلْ فِي بَحَرْ الْأُرْدُنْ وَ أَلْبَرَّدْ سَبْعَةْ مَرَّةْ حَسَبْ كَلَامْ نَبِي اللّٰهْ. وَ جِسْمَهْ بِقِي مِثِلْ جِسِمْ الْوِلَيْد الصَّغَيَّرْ وَ هُو بِقِي طَاهِرْ. ١٥ وَ طَوَّالِي، هُو وَ نَاسَهْ قَبَّلَوْا بَكَانْ نَبِي اللّٰهْ.

وَ وَكِتْ وَصَّلَوْا هِنَاكْ، نَعَمَانْ قَالْ: «هَسَّعْ دَا، أَنَا نَعَرِفْ كَدَرْ فِي كُلَّ الْأَرْض، مَا فِي إِلٰـهْ إِلَّا فِي بَلَدْ إِسْرَائِيلْ. مِنْ فَضْلَكْ، أَقْبَلْ مِنِّي أَنَا عَبْدَكْ الْهَدِيَّةْ النِّقَدِّمْهَا لَيْك.» ١٦ وَ أَلْيَسَعْ رَدَّ لَيَّهْ وَ قَالْ: «نَحْلِفْ بِاللّٰهْ الْحَيّ الْأَنَا قَاعِدْ نَعَبُدَهْ، أَنَا مَا نَقْبَلْ الْهَدِيَّةْ دِي.» وَ نَعَمَانْ عَصَرَهْ أَشَانْ يِشِيلْهَا وَ لَاكِنْ هُو أَبَى. ١٧ وَ نَعَمَانْ قَالْ لَيَّهْ: «كَنْ إِنْتَ أَبَيْت مَا تِشِيلْ مِنِّي الْهَدِيَّةْ دِي، هَسَّعْ دَا خَلِّينِي نِشِدّ بِغَالْ إِتْنَيْن بِتُرَابْ هَنَا بَلَدَكْ أَشَانْ أَنَا عَبْدَكْ مَا نِدَوْر بَتَّانْ نِقَدِّمْ وَ لَا ضَحِيَّةْ مُحَرَّقَةْ وَ لَا ضَحِيَّةْ آخَرَةْ لِإِلٰـهَاتْ آخَرِينْ بَلَا اللّٰهْ. ١٨ وَ لَاكِنْ أَنَا نَطْلُبْ مِنْ اللّٰهْ يَغْفِرْ لَيِّ أَنَا عَبْدَكْ فِي شَيّءْ وَاحِدْ. وَكِتْ سِيدِي الْمَلِكْ يَدْخُلْ فِي بَيْت الْعِبَادَةْ هَنَا إِلٰـهَهْ رِمُّونْ لِيَسْجُدْ قِدَّامْ إِلٰـهَهْ رِمُّونْ، هُو يِنْتَكِي فِي إِيدِي. وَ وَاجِبْ أَنَا كُلَ نَسْجُدْ. وَ بَيْدَا، خَلِّي اللّٰهْ يَغْفِرْ لَيِّ أَنَا عَبْدَكْ فِي الشَّيّءْ دَا.» ١٩ وَ أَلْيَسَعْ قَالْ لَيَّهْ: «أَمْشِي بِالسَّلَامَةْ.» وَ هُو قَمَّ مَشَى بَعِيدْ مِنَّهْ.

٢٠ وَ قِحَازِي خَدَّامْ أَلْيَسَعْ نَبِي اللّٰهْ قَالْ فِي نَفْسَهْ: «سِيدِي أَبَى مَا يِشِيلْ الْهَدِيَّةْ الْقَدَّمَاهَا لَيَّهْ نَعَمَانْ الْمِنْ بَلَدْ أَرَامْ. وَ لَاكِنْ نَحْلِفْ بِاللّٰهْ الْحَيّ كَدَرْ نَجْرِي وَرَايَهْ وَ أَكِيدْ نَلْقَى مِنَّهْ شَيّءْ.»

٢١ وَ خَلَاصْ، قِحَازِي جَرَى وَرَاءْ نَعَمَانْ. وَ وَكِتْ نَعَمَانْ شَافَهْ جَارِي وَرَايَهْ، دَلَّى عَجَلَةْ مِنْ عَرَبَتَهْ وَ مَشَى لَاقَى وَ سَأَلَهْ وَ قَالْ: «مَالَكْ، مَا عَافَيْ وَلَّا؟» ٢٢ وَ هُو رَدَّ لَيَّهْ وَ قَالْ: «عَافَيْ! سِيدِي بَسْ رَسَّلَانِي لَيْك وَ قَالْ: ‹فِيَّهْ صُبْيَانْ تِنَيْن مِنْ مَجْمُوعَةْ الْأَنْبِيَاء جَوْا لَيِّ هَسَّعْ مِنْ جِبَالْ أَفْرَايِمْ. وَ هُو يَطْلُبْ مِنَّكْ تَنْطِي لَيْهُمْ 35 كِيلَوْ هَنَا فُضَّةْ وَ خُلْقَانْ إِتْنَيْن هَنَا غِيَارْ.›» ٢٣ وَ نَعَمَانْ قَالْ لَيَّهْ: «مِنْ فَضْلَكْ، شِيلْ 70 كِيلَوْ هَنَا فُضَّةْ!» وَ هُو عَصَرَهْ لِقِحَازِي وَ صَبَّ لَيَّهْ 70 كِيلَوْ هَنَا فُضَّةْ فِي إِتْنَيْن مَخَالِي وَ الْخُلْقَانْ هَنَا الْغِيَارْ كُلَ. وَ أَنْطَاهُمْ لِإِتْنَيْن مِنْ خَدَّامِينَهْ وَ هُمَّنْ شَالَوْهُمْ وَ مَشَوْا قِدَّامْ قِحَازِي.

٢٤ وَ وَكِتْ وَصَّلَوْا فِي الْجَبَلْ جَنْب مَدَخَلْ الْحِلَّةْ، قِحَازِي شَالْ الْخُمَامْ مِنْ إِيدَيْهُمْ وَ خَطَّاهْ فِي بَيْتَهْ وَ قَالْ لِلْخَدَّامِينْ دَوْل خَلِّي يِقَبُّلُوا. وَ خَلَاصْ هُمَّنْ فَاتَوْا. ٢٥ وَ قِحَازِي مَشَى بَكَانْ سِيدَهْ. وَ أَلْيَسَعْ سَأَلَهْ وَ قَالْ لَيَّهْ: «إِنْتَ جَايِ مِنْ وَيْن، قِحَازِي؟» وَ هُو رَدَّ وَ قَالْ: «عَبْدَكْ مَا مَشَى أَيِّ بَكَانْ.» ٢٦ وَ لَاكِنْ أَلْيَسَعْ قَالْ لَيَّهْ: «إِنْتَ مَا تَعَرِفْ كَدَرْ كَنْ أَنَا مَا مَعَاكْ كُلَ، قَلْبِي يِشِيفَكْ؟ وَكِتْ الرَّاجِلْ دَا دَلَّى بِعَجَلَةْ مِنْ عَرَبَتَهْ وَ جَاءْ لَاقَاكْ أَنَا شِفْتَكْ. هَلْ دَا الْوَكِتْ الْوَاجِبْ إِنْتَ تِشِيلْ قُرُسْ وَلَّا خُلْقَانْ وَلَّا زَيْتُونْ وَلَّا عِنَبْ وَلَّا بَقَرْ وَلَّا غَنَمْ وَلَّا عَبِيدْ وَلَّا خَدِيمْ؟ ٢٧ وَ بِسَبَبْ دَا، جِدَامْ نَعَمَانْ يَكُرْبَكْ إِنْتَ وَ ذُرِّيّتَكْ إِلَى الْأَبَدْ.»

وَ خَلَاصْ، قِحَازِي مَرَقْ مِنْ بَكَانْ أَلْيَسَعْ وَ جِلْدَهْ أَبْيَضْ كَرّ مِثِلْ الْقُطُنْ مِنْ جِدَامْ.