2 مُلوك 3

يُورَام بِقي ملك في إسرائيل

١ وَ يُورَامْ وِلَيْد أَخَابْ بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ فِي سَنِةْ 18 هَنَا حُكُمْ يَهُوشَفَطْ مَلِكْ مَمْلَكَةْ يَهُوذَا. وَ هُو حَكَمْ 12 سَنَةْ. ٢ وَ هُو سَوَّى الْفَسَالَةْ قِدَّامْ اللّٰهْ وَ لَاكِنْ مَا مِثِلْ فَسَالَةْ أَمَّهْ وَ أَبُوهْ. هُو سَلَّ الْحَجَرْ الْأَبُوهْ غَزَّاهْ لِعِبَادَةْ الْإِلٰـهْ بَعَلْ. ٣ وَ هُو أَنْرَبَطْ فِي الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. يُورَامْ كُلَ مَا خَلَّى مِنَّهْ الذُّنُوبْ دَوْل.

ناس إسرائيل حاربوا بلد مُوَاب

٤ وَ مِيشَعْ مَلِكْ بَلَدْ مُوَابْ عِنْدَهْ بَهَايِمْ كَتِيرِينْ وَ قَاعِدْ يِكَفِّي 100 000 حُمْلَانْ وَ 100 000 كُبْشَانْ الْعِنْدُهُمْ صُوفْ طُوَالْ مِثِلْ مِيرِي لِمَلِكْ مَمْلَكَةْ إِسْرَائِيلْ. ٥ وَ لَاكِنْ وَكِتْ أَخَابْ مَاتْ، مَلِكْ بَلَدْ مُوَابْ أَتْمَرَّدْ ضِدّ الْمَلِكْ الْجَدِيدْ هَنَا مَمْلَكَةْ إِسْرَائِيلْ.

٦ وَ خَلَاصْ فِي الْيَوْم دَا، الْمَلِكْ يُورَامْ مَرَقْ مِنْ مَدِينَةْ السَّامِرَةْ وَ لَمَّ كُلَّ مَمْلَكَةْ إِسْرَائِيلْ لِلْحَرِبْ. ٧ وَ قَمَّ رَسَّلْ لِيَهُوشَفَطْ مَلِكْ مَمْلَكَةْ يَهُوذَا وَ قَالْ لَيَّهْ: «دَاهُو مَلِكْ بَلَدْ مُوَابْ أَتْمَرَّدْ ضِدِّي. تَقْدَرْ تَجِي مَعَايِ لِنِحَارُبُوا بَلَدْ مُوَابْ وَلَّا؟» وَ يَهُوشَفَطْ رَدَّ لَيَّهْ وَ قَالْ: «أَيْوَى، نَجِيكْ! أَنَا وَ إِنْتَ كُلِّنَا سَوَا، نَاسِي مِثِلْ نَاسَكْ وَ خَيْلِي مِثِلْ خَيْلَكْ.» ٨ وَ قَالْ بَتَّانْ: «بِالدَّرِبْ الْوَيْنُو نَمْشُوا؟» وَ يُورَامْ قَالْ لَيَّهْ: «بِدَرِبْ الْمَاشِي بِصَحَرَاء أَدَوْم.»

٩ وَ خَلَاصْ، مَلِكْ مَمْلَكَةْ إِسْرَائِيلْ وَ مَلِكْ مَمْلَكَةْ يَهُوذَا وَ مَلِكْ بَلَدْ أَدَوْم قَمَّوْا وَ مَشَوْا سَوَا. وَ حَوَّقَوْا مُدَّةْ سَبْعَةْ يَوْم وَ أَلْمِي بِقِي مَا فِيهْ لِلْعَسْكَرْ وَ لِلْبَهَايِمْ الْمَاشِينْ مَعَاهُمْ. ١٠ وَ فِي الْبَكَانْ دَا، مَلِكْ مَمْلَكَةْ إِسْرَائِيلْ قَالْ: «أَكِيدْ اللّٰهْ جَابَانَا أَنِحْنَ الْمُلُوكْ التَّلَاتَةْ دَوْل هِنِي أَشَانْ يِسَلِّمْنَا فِي إِيدْ مَلِكْ بَلَدْ مُوَابْ.» ١١ وَ لَاكِنْ يَهُوشَفَطْ قَالْ: «هِنِي مَا فِي نَبِي اللّٰهْ الْبَيَّهْ هُو نَقْدَرَوْا نَسْأَلَوْا اللّٰهْ وَلَّا؟» وَ وَاحِدْ مِنْ مَسَائِيلْ مَلِكْ مَمْلَكَةْ إِسْرَائِيلْ قَالْ لَيَّهْ: «فِيَّهْ أَلْيَسَعْ وِلَيْد شَافَاطْ هُو الْأَوَّلْ تِلْمِيذْ هَنَا النَّبِي إِلِيَاسْ وَ قَاعِدْ يُصُبّ أَلْمِي فِي إِيدَيْنَهْ.» ١٢ وَ يَهُوشَفَطْ قَالْ بَتَّانْ: «الرَّاجِلْ دَا عِنْدَهْ كَلَامْ اللّٰهْ.» وَ مَلِكْ مَمْلَكَةْ إِسْرَائِيلْ وَ يَهُوشَفَطْ وَ مَلِكْ بَلَدْ أَدَوْم مَشَوْا لِأَلْيَسَعْ.

١٣ وَ أَلْيَسَعْ قَالْ لِمَلِكْ مَمْلَكَةْ إِسْرَائِيلْ: «شُنُو بَيْنِي وَ بَيْنَكْ، يَا مَلِكْ مَمْلَكَةْ إِسْرَائِيلْ؟ أَمْشِي لِأَنْبِيَاء أَمَّكْ وَ أَبُوكْ.» وَ خَلَاصْ، مَلِكْ مَمْلَكَةْ إِسْرَائِيلْ قَالْ: «لَا! أَشَانْ أَكِيدْ اللّٰهْ جَابَانَا أَنِحْنَ الْمُلُوكْ التَّلَاتَةْ دَوْل هِنِي لِيِسَلِّمْنَا فِي إِيدْ مَلِكْ بَلَدْ مُوَابْ.» ١٤ وَ أَلْيَسَعْ قَالْ: «نَحْلِفْ بِاللّٰهْ الْحَيّ الْقَادِرْ الْأَنَا قَاعِدْ نَعَبُدَهْ، كَنْ أَوَّلْ مَا عِنْدِي كَرَامَةْ لِيَهُوشَفَطْ مَلِكْ مَمْلَكَةْ يَهُوذَا دَا، أَنَا مَا نَجْعَلَكْ وَ لَا نِشِيفَكْ كُلَ. ١٥ هَسَّعْ دَا، جِيبُوا لَيِّ نَادُمْ الْيَعَرِفْ يَضْرُبْ جِقِنْدِيَّةْ.»

وَ وَكِتْ النَّادُمْ دَا بَدَا يَضْرُبْ الْجِقِنْدِيَّةْ، رُوحْ اللّٰهْ نَزَلْ فِي أَلْيَسَعْ. ١٦ وَ أَلْيَسَعْ قَالْ: «دَاهُو اللّٰهْ قَالْ: ‹أَنْكُتُوا نُقَارْ كَتِيرِينْ فِي الْوَادِي دَا.› ١٧ وَ دَاهُو اللّٰهْ قَالْ بَتَّانْ: ‹مَا تِشِيفُوا رِيحْ وَ لَا تِشِيفُوا مَطَرَةْ لَاكِنْ الْوَادِي دَا يِنْمَلِي أَلْمِي. وَ إِنْتُو وَ مَالْكُو وَ بَهَايِمْكُو تَشَرْبَوْا مِنَّهْ. ١٨ وَ دَا شَيّءْ هَيِّنْ لَيِّ أَنَا اللّٰهْ! وَ نِسَلِّمْ لَيْكُو بَلَدْ مُوَابْ فِي إِيدَيْكُو كُلَ. ١٩ وَ تِدَمُّرُوا كُلَّ الْمُدُنْ الْقَوِيِّينْ وَ كُلَّ مُدُنْ الْمُهِمِّينْ وَ تَقْطَعَوْا كُلَّ الشَّدَرْ الْعَدِيلْ وَ تَدْفُنُوا كُلَّ عُيُونْ الْأَلْمِي وَ تِتَلُّفُوا الزِّرَاعَةْ أَشَانْ تَمْلَوْهُمْ بِحُجَارْ.›»

٢٠ وَ بِفَجُرْ فِي وَكِتْ قَدِّمِينْ الْهَدَايَا، شَافَوْا أَلْمِي جَارِي جَايِ مِنْ عَلَيْ نُصّ بَلَدْ أَدَوْم وَ الْأَرْض أَنْمَلَتْ بِأَلْمِي. ٢١ وَ الْمُوَابِيِّينْ سِمْعَوْا كَدَرْ الْمُلُوكْ التَّلَاتَةْ دَوْل جَايِينْ لِيِحَارُبُوهُمْ. خَلَاصْ، لَمَّوْا كُلَّ نَاسْهُمْ مِنْ الصُّبْيَانْ لَحَدِّي الشِّيَّابْ الْيَقْدَرَوْا يِشِيلُوا سِلَاحْ وَ خَطَّوْهُمْ فِي الْحُدُودْ. ٢٢ وَ بِفَجُرْ بَدْرِي وَكِتْ نَاسْ بَلَدْ مُوَابْ قَمَّوْا، الْأَلْمِي قَاعِدْ يِرَارِي فِي طَلُوعْ الْحَرَّايْ وَ هُمَّنْ شَافَوْا الْأَلْمِي دَا أَحْمَرْ مِثِلْ دَمّ. ٢٣ وَ خَلَاصْ، قَالَوْا: «أَكِيدْ الْمُلُوكْ دَوْل يِدَّاوَسَوْا أَمْبَيْنَاتْهُمْ بِالْسَّيْف. هَسَّعْ دَا، يَا الْمُوَابِيِّينْ، قُمُّوا لِلْكَسِيبَةْ!»

٢٤ وَ هُمَّنْ قَرَّبَوْا لِمُعَسْكَرْ بَنِي إِسْرَائِيلْ. وَ طَوَّالِي، بَنِي إِسْرَائِيلْ قَمَّوْا وَ هَجَمَوْهُمْ لِلْمُوَابِيِّينْ وَ هُمَّنْ عَرَّدَوْا مِنْ بَنِي إِسْرَائِيلْ. وَ هُمَّنْ مَشَوْا وَرَاهُمْ لَحَدِّي دَخَلَوْا فِي بَلَدْهُمْ وَ دَمَّرَوْهُمْ مَرَّةْ وَاحِدْ. ٢٥ وَ بَنِي إِسْرَائِيلْ دَمَّرَوْا مُدُنْهُمْ وَ أَيِّ وَاحِدْ دَفَّقْ حَجَرْ وَ مَلَوْا كُلَّ الزِّرَاعَةْ وَ دَفَنَوْا كُلَّ عُيُونْ الْأَلْمِي وَ قَطَعَوْا الشَّدَرْ الْعَدِيلْ. وَ فِي أَخِيرْ فَضَّلَتْ إِلَّا حِلَّةْ قِيرْ حَارَسْ. وَ لَاكِنْ النَّاسْ الْعِنْدُهُمْ مِقْلَاعْ حَوَّقَوْهَا وَ هَجَمَوْهَا هِي كُلَ.

٢٦ وَ وَكِتْ مَلِكْ بَلَدْ مُوَابْ شَافْ كَدَرْ الْحَرِبْ دَا بِقِي لَيَّهْ شَدِيدْ بِلْحَيْن، شَالْ 700 عَسْكَرْ الْيَعَرْفُوا حَرْب السُّيُوفْ وَ يِدَوْرُوا يُشُقُّوا مِنْ جِيهَةْ مَلِكْ بَلَدْ أَدَوْم. وَ لَاكِنْ مَا قِدْرَوْا. ٢٧ وَ مَلِكْ بَلَدْ مُوَابْ شَالْ وِلَيْدَهْ الْبِكِرْ الْوَاجِبْ يَحْكِمْ بَعَدَهْ وَ رَفَعْ فِي رَاسْ دُرْدُرْ الْحِلَّةْ وَ قَدَّمَهْ ضَحِيَّةْ مُحَرَّقَةْ. وَ غَضَبْ شَدِيدْ نَزَلْ فِي بَنِي إِسْرَائِيلْ وَ هُمَّنْ كَسَّوْا مِنْ مَلِكْ بَلَدْ مُوَابْ وَ قَبَّلَوْا بَلَدْهُمْ.