2 صَمُوِيل 9

دَاوُد و مَفِيبُشَت

١ وَ يَوْم وَاحِدْ، دَاوُدْ سَأَلْ وَ قَالْ: «هَلْ فَضَّلْ نَادُمْ وَاحِدْ مِنْ عَايِلَةْ شَاوُولْ النَّقْدَرْ نِسَوِّي لَيَّهْ خَيْر فِي شَانْ يُونَتَانْ وَلَّا؟»

٢ وَ فِي بَيْت شَاوُولْ، فِيَّهْ خَدَّامْ وَاحِدْ أُسْمَهْ صِيبَا وَ جَابَوْه بَكَانْ دَاوُدْ. وَ الْمَلِكْ سَأَلَهْ وَ قَالْ: «إِنْتَ بَسْ صِيبَا وَلَّا؟» وَ هُو رَدَّ وَ قَالْ: «أَيْوَى، أَنَا عَبْدَكْ.» ٣ وَ الْمَلِكْ قَالْ: «هَلْ مَا فَضَّلْ نَادُمْ وَاحِدْ مِنْ عَايِلَةْ شَاوُولْ النَّقْدَرْ نِسَوِّي لَيَّهْ خَيْر الرَّبّ وَلَّا؟» وَ صِيبَا رَدَّ لِلْمَلِكْ وَ قَالْ: «فَضَّلْ وِلَيْد وَاحِدْ هَنَا يُونَتَانْ الرِّجِلَيْنَهْ مَيْتِينْ.» ٤ وَ الْمَلِكْ قَالْ: «قَاعِدْ وَيْن؟» وَ صِيبَا رَدَّ لَيَّهْ وَ قَالْ: «هُو قَاعِدْ فِي حِلَّةْ لُودَبَارْ فِي بَيْت مَكِيرْ وِلَيْد عَمِيِيلْ.»

٥ وَ الْمَلِكْ دَاوُدْ رَسَّلْ جَابَوْه مِنْ بَيْت مَكِيرْ وِلَيْد عَمِيِيلْ فِي حِلَّةْ لُودَبَارْ. ٦ وَ وَكِتْ مَفِيبُشَتْ وِلَيْد يُونَتَانْ وِلَيْد شَاوُولْ وَصَّلْ بَكَانْ دَاوُدْ، وَقَعْ بِوِجْهَهْ وَ سَجَدْ قِدَّامَهْ. وَ دَاوُدْ سَأَلَهْ وَ قَالْ: «دَا إِنْتَ مَفِيبُشَتْ وَلَّا؟» وَ هُو رَدَّ وَ قَالْ: «أَيْوَى، أَنَا عَبْدَكْ.» ٧ وَ دَاوُدْ قَالْ لَيَّهْ: «مَا تَخَافْ. أَنَا نِسَوِّي لَيْك خَيْر فِي شَانْ الْأَمَانْ الْعِنْدِي لِأَبُوكْ يُونَتَانْ. وَ نَنْطِيكْ كُلَّ زِرَاعَةْ هَنَا جِدَّكْ شَاوُولْ. وَ إِنْتَ تَاكُلْ مَعَايِ دَايْماً فِي بَيْتِي.» ٨ وَ مَفِيبُشَتْ سَجَدْ وَ قَالْ: «أَنَا عَبْدَكْ مِثِلْ كَلِبْ مَيِّتْ. مَالَا تِهِمّ بَيِّ؟»

٩ وَ الْمَلِكْ نَادَاهْ لِصِيبَا خَدَّامْ شَاوُولْ وَ قَالْ لَيَّهْ: «كُلَّ شَيّءْ الْهَنَا سِيدَكْ شَاوُولْ وَ عَايِلْتَهْ، أَنَا نَنْطِيهْ لِوِلَيْد وِلَيْدَهْ مَفِيبُشَتْ. ١٠ إِنْتَ وَ عِيَالَكْ وَ خَدَّامِينَكْ تَحَرْتُوا لَيَّهْ. وَ الْإِنْتَاجْ، تِجِيبُوهَا لِوِلَيْد يُونَتَانْ وِلَيْد سِيدَكْ أَشَانْ يِعِيشْ بَيْهَا. وَ مَفِيبُشَتْ وِلَيْد سِيدَكْ يَاكُلْ دَايْماً مَعَايِ فِي بَيْتِي.» وَ صِيبَا دَا عِنْدَهْ 15 أَوْلَادْ وَ 20 خَدَّامْ. ١١ وَ صِيبَا رَدَّ لِلْمَلِكْ وَ قَالْ: «أَنَا عَبْدَكْ نِسَوِّي كُلَّ شَيّءْ السِّيدِي الْمَلِكْ أَمَرَانِي بَيَّهْ.»

وَ بِمِثِلْ دَا، خَلَاصْ مَفِيبُشَتْ قَاعِدْ يَاكُلْ دَايْماً فِي قَصِرْ الْمَلِكْ مِثِلْ وَاحِدْ مِنْ أَوْلَادَهْ. ١٢ وَ مَفِيبُشَتْ عِنْدَهْ وِلَيْد وَاحِدْ صَغَيَّرْ أُسْمَهْ مِيكَا. وَ كُلَّ النَّاسْ السَّاكْنِينْ فِي بَيْت صِيبَا قَاعِدِينْ يَخْدُمُوا لِمَفِيبُشَتْ. ١٣ وَ مَفِيبُشَتْ سَكَنْ فِي أُورُشَلِيمْ أَشَانْ يَمْشِي يَاكُلْ دَايْماً فِي بَيْت الْمَلِكْ. وَ مَفِيبُشَتْ دَا، رِجِلَيْنَهْ مَيْتِينْ.