2 صَمُوِيل 3

١ وَ الْحَرْبَةْ أَمْبَيْن عَايِلَةْ دَاوُدْ وَ عَايِلَةْ شَاوُولْ طَوَّلَتْ. وَ قُدْرَةْ دَاوُدْ قَاعِدَةْ تِزِيدْ وَ عَايِلَةْ شَاوُولْ كَمَانْ دَرَجَتْهُمْ قَاعِدَةْ تَنْقُصْ.

أوْلاد دَاوُد

٢ وَ دَاهُو أَوْلَادْ دَاوُدْ الْوِلْدَوْهُمْ لَيَّهْ فِي حِبْرُونْ. الْبِكِرْ أُسْمَهْ أَمْنُونْ وَ أَمَّهْ أُسُمْهَا أَخِنُوعَمُ مِنْ حِلَّةْ يَزْرَعِيلْ. ٣ وَ التَّانِي كِلَابْ وَ أَمَّهْ أُسُمْهَا أَبِقَايِلْ الْأَوَّلْ مَرِةْ نَابَالْ مِنْ حِلَّةْ كَرْمَلْ. وَ التَّالِتْ أَبْشَلُومْ وَ أَمَّهْ أُسُمْهَا مَعَاكَةْ بِنَيَّةْ تَلْمَايْ مَلِكْ بَلَدْ قَشُورْ. ٤ وَ الرَّابِعْ أَدُنِيَّا وَ أَمَّهْ أُسُمْهَا حَقِّيتْ. وَ الْخَامِسْ شَفَطْيَا وَ أَمَّهْ أُسُمْهَا أَبِطَالْ. ٥ وَ السَّادِسْ يِتْرَعَامْ وَ أَمَّهْ أُسُمْهَا عَقْلَةْ مَرِةْ دَاوُدْ. وَ دَوْل أَوْلَادْ دَاوُدْ الْوِلْدَوْهُمْ لَيَّهْ فِي حِبْرُونْ.

أَبْنِير تهموه

٦ وَ وَكِتْ الْحَرِبْ قَاعِدْ أَمْبَيْن عَايِلَةْ شَاوُولْ وَ عَايِلَةْ دَاوُدْ، أَبْنِيرْ قَاعِدْ يِلْمَكَّنْ فِي لُبّ عَايِلَةْ شَاوُولْ. ٧ وَ شَاوُولْ عِنْدَهْ سِرِّيَةْ وَاحِدَةْ أُسُمْهَا رِصْفَةْ وَ أَبُوهَا أُسْمَهْ أَيَّا. وَ يَوْم وَاحِدْ، إِشْبُوشَتْ تَهَمْ أَبْنِيرْ وَ قَالْ: «مَالَا دَخَلْت فِي سِرِّيَةْ أَبُويِ؟» ٨ وَ وَكِتْ أَبْنِيرْ سِمِعْ الْكَلَامْ دَا، زِعِلْ زَعَلْ شَدِيدْ وَ قَالْ: «أَنَا جَاسُوسْ هَنَا بَنِي يَهُوذَا وَلَّا؟ يَا هَسَّعْ كُلَ، أَنَا قَاعِدْ فِي أَمَانِي لِعَايِلَةْ شَاوُولْ أَبُوكْ وَ أَخْوَانَهْ وَ رُفْقَانَهْ. وَ إِنْتَ ذَاتَكْ، أَنَا مَا سَلَّمْتَكْ لِدَاوُدْ! وَ لَاكِنْ الْيَوْم، إِنْتَ تَهَمْتِنِي بِالْمَرَةْ دِي. ٩ خَلِّي الرَّبّ يِعَاقِبْنِي عِقَابْ شَدِيدْ كَنْ أَنَا مَا حَقَّقْت الشَّيّءْ الْحَلَفْ بَيَّهْ اللّٰهْ لِدَاوُدْ. ١٠ أَشَانْ اللّٰهْ قَالْ يِشِيلْ الْمُلُكْ مِنْ عَايِلَةْ شَاوُولْ وَ يَنْطِيهْ لِدَاوُدْ. وَ هُو يَحْكِمْ فِي بَنِي إِسْرَائِيلْ وَ بَنِي يَهُوذَا مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي.» ١١ وَ إِشْبُوشَتْ مَا يَقْدَرْ يُقُولْ كِلْمَةْ وَاحِدَةْ كُلَ لِأَبْنِيرْ أَشَانْ هُو خَايِفْ مِنَّهْ.

أَبْنِير أنْضمّ لدَاوُد

١٢ وَ خَلَاصْ، أَبْنِيرْ رَسَّلْ نَاسْ لِدَاوُدْ وَ قَالْ لَيْهُمْ: «أَمْشُوا قُولُوا لِدَاوُدْ: ‹يَاتُو يَحْكِمْ الْبَلَدْ دِي؟› وَ قُولُوا لَيَّهْ بَتَّانْ: ‹خَلِّي يِسَوِّي مَعَايِ مُعَاهَدَةْ وَ أَنَا نِسَاعِدَهْ وَ كُلَّ بَنِي إِسْرَائِيلْ يِنْضَمَّوْا لَيَّهْ.›» ١٣ وَ دَاوُدْ قَالْ: «سَمَحْ! نِسَوِّي مَعَاكْ مُعَاهَدَةْ. وَ لَاكِنْ نَطْلُبْ مِنَّكْ شَيّءْ وَاحِدْ. قُبَّالْ مَا تَجِي تِقَابِلْنِي، جِيبْ لَيِّ مَرْتِي مِكَالْ بِنَيَّةْ شَاوُولْ. وَ بَعَدْ دَا، تَعَالْ قَابِلْنِي.»

١٤ وَ دَاوُدْ رَسَّلْ نَاسْ لِإِشْبُوشَتْ وِلَيْد شَاوُولْ وَ قَالْ: «قَبِّلْ لَيِّ مَرْتِي مِكَالْ الْأَنَا أَخَدْتَهَا بِمِيَةْ قُلَفْ هَنَا الْفِلِسْطِيِّينْ الْأَنَا كَتَلْتُهُمْ.» ١٥ وَ خَلَاصْ، إِشْبُوشَتْ رَسَّلْ مَرَقَوْهَا لِمِكَالْ مِنْ بَيْت رَاجِلْهَا فَلْطِيِيلْ وِلَيْد لَيِشْ. ١٦ وَ رَاجِلْهَا تَابَعْهَا بِبَكِي لَحَدِّي حِلَّةْ بَحُرِيمْ. وَ لَاكِنْ أَبْنِيرْ قَالْ لَيَّهْ: «يَلَّا قَبِّلْ أَمْشِي بَيْتَكْ!» وَ خَلَاصْ، هُو قَبَّلْ مَشَى بَيْتَهْ.

١٧ وَ أَبْنِيرْ لَمَّ شُيُوخْ بَنِي إِسْرَائِيلْ وَ حَجَّى لَيْهُمْ وَ قَالْ: «مِنْ زَمَانْ، إِنْتُو دَوَّرْتُوا دَاوُدْ يَبْقَى مَلِكُّو. ١٨ وَ هَسَّعْ دَا، دَرُّجُوهْ! أَشَانْ فِي سَبَبْ دَاوُدْ، اللّٰهْ قَالْ: ‹بِوَاسِطَةْ عَبْدِي دَاوُدْ، أَنَا نِنَجِّي شَعَبِي بَنِي إِسْرَائِيلْ مِنْ إِيدْ الْفِلِسْطِيِّينْ وَ مِنْ كُلَّ عُدْوَانْهُمْ.›» ١٩ وَ أَبْنِيرْ حَجَّى بِنَفْس الْكَلَامْ دَا لِكُبَارَاتْ قَبِيلَةْ بَنْيَامِينْ.

وَ بَعَدْ دَا، قَمَّ وَ مَشَى لِدَاوُدْ فِي حِبْرُونْ كَلَّمْ لَيَّهْ بِنِيَّةْ بَنِي إِسْرَائِيلْ وَ كُلَّ قَبِيلَةْ بَنْيَامِينْ. ٢٠ وَ وَكِتْ أَبْنِيرْ مَشَى بَكَانْ دَاوُدْ فِي حِبْرُونْ، شَالْ مَعَايَهْ 20 رَاجِلْ. وَ دَاوُدْ سَوَّى لَيْهُمْ عَازُومَةْ.

٢١ وَ أَبْنِيرْ قَالْ لِدَاوُدْ: «خَلِّي نَمْشِي نِلِمّ كُلَّ بَنِي إِسْرَائِيلْ لِيِنْضَمَّوْا لَيْك إِنْتَ، يَا سِيدِي الْمَلِكْ. وَ هُمَّنْ يِسَوُّوا مَعَاكْ مُعَاهَدَةْ وَ إِنْتَ تَحْكِمْ فِي أَيِّ بَكَانْ الْقَلْبَكْ يِدَوْرَهْ.» وَ خَلَاصْ، دَاوُدْ خَلَّاهْ مَشَى. وَ أَبْنِيرْ فَاتْ بِالسَّلَامَةْ.

يُوَاب كتل أَبْنِير

٢٢ وَ بَعَدْ شِيَّةْ، يُوَابْ وَ نَاسْ دَاوُدْ قَبَّلَوْا مِنْ الْحَرِبْ وَ جَابَوْا مَعَاهُمْ غَنِيمَةْ كَتِيرَةْ. وَ فِي الْوَكِتْ دَا، أَبْنِيرْ خَلَاصْ مَا فِيهْ فِي حِبْرُونْ أَشَانْ دَاوُدْ خَلَّاهْ مَشَى بِالسَّلَامَةْ. ٢٣ وَ وَكِتْ يُوَابْ وَ كُلَّ الْعَسْكَرْ الْمَعَايَهْ وَصَّلَوْا، خَبَّرَوْهُمْ كَدَرْ أَبْنِيرْ وِلَيْد نِيرْ جَاءْ بَكَانْ الْمَلِكْ وَ هُو خَلَّاهْ مَشَى بِالسَّلَامَةْ.

٢٤ وَ يُوَابْ قَابَلْ الْمَلِكْ وَ قَالْ: «دَا شُنُو السَّوَّيْتَهْ دَا؟ مَالَا أَبْنِيرْ جَاءْ لَيْك هِنِي وَ إِنْتَ خَلَّيْتَهْ مَشَى؟» ٢٥ وَ يُوَابْ قَالْ بَتَّانْ: «أَبْنِيرْ وِلَيْد نِيرْ دَا، إِنْتَ تَعَرْفَهْ تَمَامْ كَدَرْ هُو جَاءْ لَيْك لِيُغُشَّكْ وَ يَعَرِفْ مَرِقِينَكْ وَ جَيْتَكْ وَ يِشِيفْ كُلَّ شَيّءْ الْإِنْتَ قَاعِدْ تِسَوِّيهْ.»

٢٦ وَ طَوَّالِي، يُوَابْ مَرَقْ مِنْ بَكَانْ دَاوُدْ وَ رَسَّلْ نَاسْ وَرَاءْ أَبْنِيرْ وَ هُمَّنْ قَبَّلَوْه مِنْ بِيرْ سِيرَةْ. وَ لَاكِنْ دَاوُدْ مَا عِنْدَهْ خَبَرْ. ٢٧ وَ وَكِتْ أَبْنِيرْ قَبَّلْ جَاءْ فِي حِبْرُونْ، يُوَابْ لَاقَاهْ فِي خَشُمْ بَابْ الْحِلَّةْ وَ طَرَّفَهْ مِثِلْ يِدَوْر يِحَجِّي لَيَّهْ بِعَشِيرْ. وَ طَوَّالِي، طَعَنَهْ فِي بَطْنَهْ وَ كَتَلَهْ. وَ بَيْدَا، هُو أَلْكَفَّى التَّارْ هَنَا أَخُوهْ عَسَاحِيلْ.

٢٨ وَ وَكِتْ دَاوُدْ سِمِعْ بِشَيّءْ الْكَانْ دَا، قَالْ: «أَنَا وَ مَمْلَكَتِي بَرِيِّينْ قِدَّامْ اللّٰهْ مِنْ دِمَّةْ أَبْنِيرْ وِلَيْد نِيرْ إِلَى الْأَبَدْ. ٢٩ وَ خَلِّي الدِّمَّةْ دِي تَقَعْ فِي رَاسْ يُوَابْ وَ ذُرِّيّتَهْ. وَ خَلِّي دَايْماً وَاحِدِينْ مِنْهُمْ يَكْرُبْهُمْ مَرَضْ الْبَجَلْ أَوْ مَرَضْ الْجِسْمِي أَوْ يِسَوُّوا خِدْمَةْ الْعَوِينْ أَوْ يُمُوتُوا فِي الْحَرِبْ أَوْ يَتْعَبَوْا مِنْ الْجُوعْ.»

٣٠ وَ بِمِثِلْ دَا، يُوَابْ وَ أَخُوهْ أَبِشَايْ كَتَلَوْا أَبْنِيرْ أَشَانْ هُو كَتَلْ أَخُوهُمْ عَسَاحِيلْ فِي الْحَرِبْ الْكَانْ فِي حِلَّةْ قِبْعُونْ.

٣١ وَ فِي الْبَكَانْ دَا، دَاوُدْ قَالْ لِيُوَابْ وَ لِكُلَّ النَّاسْ الْمَعَايَهْ: «شَرُّطُوا خُلْقَانْكُو وَ أَلْبَسَوْا خُلْقَانْ هَنَا شُوَالَاتْ لِتِوَصُّفُوا حِزِنْكُو لِأَبْنِيرْ.» وَ دَاوُدْ مَشَى وَرَاءْ الْجَنَازَةْ. ٣٢ وَ دَفَنَوْا جَنَازَةْ أَبْنِيرْ فِي حِبْرُونْ. وَ دَاوُدْ بَكَى شَدِيدْ فِي الْقَبُرْ وَ كُلَّ النَّاسْ الْمَعَايَهْ بَكَوْا. ٣٣ وَ دَاوُدْ وَصَّفْ حِزْنَهْ لِأَبْنِيرْ بِغِنَيْ وَ قَالْ:

«يَا أَبْنِيرْ،

مَالَكْ تُمُوتْ مِثِلْ الْمُغَفَّلْ؟

٣٤ إِيدَيْنَكْ مَا مَرْبُوطِينْ

وَ رِجِلَيْنَكْ كُلَ مَا مُجَنْزَرِينْ.

وَ مَوْتَكْ مِثِلْ النَّادُمْ

الْكَتَلَوْه مُجْرِمِينْ.»

وَ كُلَّ النَّاسْ الْحَاضْرِينْ قَاعِدِينْ يَبْكُوا فِي شَانْ أَبْنِيرْ. ٣٥ وَ بَعَدْ دَا، نَاسَهْ لِدَاوُدْ جَوْا لِيَنْطُوهْ أَكِلْ وَ دَا قُبَّالْ الْحَرَّايْ مَا تَقَعْ. وَ لَاكِنْ دَاوُدْ حَلَفْ وَ قَالْ: «خَلِّي الرَّبّ يِعَاقِبْنِي عِقَابْ شَدِيدْ كَنْ أَنَا أَكَلْت خُبْزَةْ وَلَّا شَيّءْ آخَرْ قُبَّالْ الْحَرَّايْ مَا تَقَعْ.»

٣٦ وَ كُلَّ النَّاسْ شَافَوْا صِيَامَهْ وَ رِضَوْا بَيَّهْ. وَ بِمِثِلْ دَا، كُلَّ النَّاسْ رَضْيَانِينْ بِكُلَّ شَيّءْ الْمَلِكْ قَاعِدْ يِسَوِّيهْ. ٣٧ وَ فِي الْيَوْم دَا، كُلَّ نَاسْ بَنِي يَهُوذَا وَ كُلَّ بَنِي إِسْرَائِيلْ عِرْفَوْا كَدَرْ كَتِلْ أَبْنِيرْ وِلَيْد نِيرْ دَا، مَا بِأَمُرْ مِنْ الْمَلِكْ.

٣٨ وَ الْمَلِكْ قَالْ لِمَسَائِيلَهْ: «أَعَرْفُوا كَدَرْ الْيَوْم قَايِدْ كَبِيرْ مَاتْ فِي إِسْرَائِيلْ. ٣٩ وَ الْيَوْم كَنْ مَسَحَوْنِي وَ دَرَّجَوْنِي مَلِكْ كُلَ، أَنَا نَعَرِفْ كَدَرْ مَا عِنْدِي قُدْرَةْ. لَاكِنْ يُوَابْ وَ أَبِشَايْ أَوْلَادْهَا لِصَرُويَةْ، هُمَّنْ دَوْل قَوِيِّينْ. وَ خَلِّي اللّٰهْ يِعَاقِبْهُمْ فِي الْفَسَالَةْ السَّوَّوْهَا.»