شَمْشُون شال التار في الفِلِسْطيّين
١٥
١ وَ بَعَدْ أَيَّامْ فِي وَكِتْ قَطِعِينْ الْقَمَحْ،
شَمْشُونْ سَافَرْ مَشَى بَكَانْ مَرْتَهْ.
وَ وَدَّى مَعَايَهْ سَخَلْ وَ قَالْ:
«نِدَوْر نَدْخُلْ فِي غُرْفَةْ مَرْتِي.»
وَ لَاكِنْ أَبُو مَرْتَهْ مَا أَنْطَاهْ إِذِنْ لِيَدْخُلْ.
٢ وَ قَالْ لِشَمْشُونْ:
«أَنَا حَسَبْت إِنْتَ أَبَيْتهَا وَ أَنَا أَنْطَيْتهَا لِوَزِيرَكْ.
وَ أَخُتْهَا طَرِيدِتْهَا مَا سَمْحَةْ مِنْهَا وَلَّا؟
خَلَاصْ شِيلْهَا فِي بَدَلْهَا.»
٣ وَ شَمْشُونْ قَالْ:
«هَسَّعْ دَا،
كَنْ نِسَوِّي شَيّءْ فَسِلْ فِي الْفِلِسْطِيِّينْ كُلَ،
مَا يَقْدَرَوْا يُلُومُونِي!»
٤ وَ مَشَى كَرَبْ 300 بَعَاشِيمْ وَ كُلِّ بَعَاشِيمْ إِتْنَيْن رَبَطْ دُنُبَّاهُمْ سَوَا.
وَ خَطَّ أَمْبَيْنَاتْ الدُّنُبَّ الْإِتْنَيْن دَوْل كِنِيتَةْ.
٥ وَ بَعَدْ دَا،
هُو قَبَّضْ الْكِنِيتَةْ وَ طَلَقْ الْبَعَاشِيمْ فِي زِرَاعَةْ الْفِلِسْطِيِّينْ.
وَ بَيْدَا،
هُو حَرَّقْ قَنَادِيلْ الْقَمَحْ الْوَاقِفْ فَوْق وَ رُبَطْ الْقَمَحْ الْمَقْطُوعْ.
وَ حَتَّى جِنَيْنَاتْ الْعِنَبْ وَ الزَّيْتُونْ كُلَ حِرْقَوْا.
٦ وَ الْفِلِسْطِيِّينْ قَالَوْا:
«يَاتُو السَّوَّى الشَّيّءْ دَا؟»
وَ قَالَوْا لَيْهُمْ:
«دَا شَمْشُونْ نَسِيبْ الرَّاجِلْ الْمِنْ حِلَّةْ تِمْنَةْ أَشَانْ هُو دَا،
شَالْ مَرْتَهْ وَ أَنْطَاهَا لِوَزِيرَهْ.»
وَ خَلَاصْ،
الْفِلِسْطِيِّينْ مَشَوْا حَرَّقَوْا الْمَرَةْ دِي وَ أَبُوهَا.
٧ وَ شَمْشُونْ قَالْ لَيْهُمْ:
«حَتَّى كَانْ سَوَّيْتُوا الشَّيّءْ دَا كُلَ،
أَنَا مَا نَقِيفْ لَحَدِّي نِشِيلْ تَارِي فَوْقكُو.»
٨ خَلَاصْ،
هُو هَجَمَاهُمْ وَ هَزَمَاهُمْ هَزِيمَةْ كَبِيرَةْ.
وَ بَعَدْ دَا،
مَشَى دَخَلْ فِي كَرْكُورْ حَجَرْ إِتَامْ وَ قَعَدْ فَوْقَهْ.
شَمْشُون أنّصر بسالْفة حُمار
٩ وَ بَعَدْ دَا،
الْفِلِسْطِيِّينْ قَمَّوْا خَطَّوْا مُعَسْكَرْهُمْ فِي تُرَابْ يَهُوذَا وَ هَجَمَوْا لَاحِي.
١٠ وَ رُجَالْ يَهُوذَا قَالَوْا لَيْهُمْ:
«مَالَا قَمَّيْتُوا ضِدِّنَا؟»
وَ الْفِلِسْطِيِّينْ قَالَوْا:
«أَنِحْنَ قَمَّيْنَا أَشَانْ نَكُرْبُوا شَمْشُونْ وَ نِسَوُّوا فَوْقَهْ مِثِلْ هُو سَوَّى فَوْقنَا.»
١١ وَ خَلَاصْ،
3 000 رَاجِلْ مِنْ يَهُوذَا قَمَّوْا مَشَوْا لِلْكَرْكُورْ هَنَا حَجَرْ إِتَامْ.
وَ قَالَوْا لِشَمْشُونْ:
«إِنْتَ مَا تَعَرِفْ كَدَرْ أَنِحْنَ قَاعِدِينْ تِحِتْ حُكُمْ الْفِلِسْطِيِّينْ وَلَّا؟
وَ شُنُو الْإِنْتَ سَوَّيْتَهْ دَا؟»
وَ هُو قَالْ لَيْهُمْ:
«أَنَا سَوَّيْت فَوْقهُمْ مِثِلْ هُمَّنْ سَوَّوْا فَوْقِي.»
١٢ وَ هُمَّنْ قَالَوْا لَيَّهْ:
«أَنِحْنَ جِينَا لِنَكُرْبُوكْ وَ نِسَلُّمُوكْ لِلْفِلِسْطِيِّينْ.»
وَ شَمْشُونْ قَالْ لَيْهُمْ:
«أَحَلْفُوا لَيِّ كَدَرْ إِنْتُو كَيْ مَا تَكْتُلُونِي.»
١٣ وَ هُمَّنْ قَالَوْا لَيَّهْ:
«لَا،
أَنِحْنَ نِدَوْرُوا نَكُرْبُوكْ وَ نِسَلُّمُوكْ لَيْهُمْ بَسْ لَاكِنْ مَا نَكْتُلُوكْ.»
خَلَاصْ،
هُمَّنْ رَبَّطَوْه بِحُبَالْ جُدَادْ إِتْنَيْن وَ مَرَقَوْه مِنْ الْكَرْكُورْ.
١٤ وَ وَكِتْ جَاءْ قَرِيبْ لِلَاحِي،
الْفِلِسْطِيِّينْ مَرَقَوْا لَاقَوْه بِكُرَوْرَاكْ هَنَا حَرِبْ.
لَاكِنْ رُوحْ اللّٰهْ نَزَلْ فَوْقَهْ وَ الْحُبَالْ الرَّابْطِينْ بَيْهُمْ إِيدَيْنَهْ بِقَوْا مِثِلْ الْجَنَاقَوْ الْحَرَقَتْهُمْ النَّارْ وَ دَفَّقَوْا مِنْ إِيدَيْنَهْ.
١٥ وَ طَوَّالِي،
هُو لِقِي سَالْفَةْ هِنْت حُمَارْ مَاتْ قَرِيبْ وَاقْعَةْ وَ شَالْهَا وَ كَتَلْ بَيْهَا 1 000 رَاجِلْ.
١٦ وَ شَمْشُونْ قَالْ:
«بِسَالْفَةْ حُمَارْ،
أَنَا هَزَمْتُهُمْ!
بِسَالْفَةْ حُمَارْ بَسْ،
أَنَا كَتَلْت 1 000 رَاجِلْ.»
١٧ وَ مِنْ كَمَّلْ كَلَامَهْ بَسْ،
هُو زَقَلْ مِنَّهْ السَّالْفَةْ.
وَ سَمَّوْا الْبَكَانْ دَا رَامَة لَاحِي (مَعَنَاتَهْ جَبَلْ السَّالْفَةْ).
١٨ وَ هُو عَطْشَانْ زِيَادَةْ وَ سَأَلْ اللّٰهْ وَ قَالْ:
«إِنْتَ بَسْ الْجِبْت النَّصُرْ الْكَبِيرْ دَا بِإِيدْ أَنَا عَبْدَكْ.
وَ هَسَّعْ،
هَلْ أَنَا نُمُوتْ مِنْ الْعَطَشْ وَ نَقَعْ فِي إِيدَيْن النَّاسْ الْمَا مُطَهَّرِينْ وَلَّا؟»
١٩ وَ الرَّبّ شَقَّ الْجَبَلْ الْفِي لَاحِي وَ أَلْمِي جَرَى مِنَّهْ.
وَ شَمْشُونْ شِرِبْ وَ بَتَّانْ بِقِي شَدِيدْ وَ حِيِي.
وَ بِسَبَبْ دَا،
عَيْن أَلْمِي الْقَاعِدَةْ لَحَدِّي الْيَوْم فِي لَاحِي سَمَّوْهَا عَيْن قُورِي (مَعَنَاتَهْ عَيْن هَنَا النَّادُمْ الْيَسْأَلْ اللّٰهْ).
٢٠ وَ فِي وَكِتْ الْفِلِسْطِيِّينْ،
شَمْشُونْ حَكَمْ فِي بَلَدْ إِسْرَائِيلْ 20 سَنَةْ.