شَمْشُون و المرة الفِلِسْطيّة
١٤
١ وَ يَوْم وَاحِدْ،
شَمْشُونْ مَشَى فِي تِمْنَةْ وَ هِنَاكْ هُو شَافْ مَرَةْ وَاحِدَةْ مِنْ بَنَاتْ الْفِلِسْطِيِّينْ.
٢ وَ هُو مَشَى لِأَبُوهْ وَ أَمَّهْ وَ قَالْ لَيْهُمْ:
«فِي تِمْنَةْ،
أَنَا شِفْت مَرَةْ وَاحِدَةْ مِنْ بَنَاتْ الْفِلِسْطِيِّينْ.
وَ هَسَّعْ،
أَمْشُوا آخُدُوهَا لَيِّ.»
٣ وَ أَبُوهْ وَ أَمَّهْ قَالَوْا لَيَّهْ:
«مَا لِقِيتْ مَرَةْ مِنْ بَنَاتْ أَخْوَانَكْ وَ لَا مِنْ شَعَبْنَا وَلَّا؟
مَالَا تَمْشِي تِشِيلْ مَرَةْ مِنْ الْفِلِسْطِيِّينْ الْمَا مُطَهَّرِينْ دَوْل؟»
وَ لَاكِنْ شَمْشُونْ قَالْ لِأَبُوهْ:
«الْبِنَيَّةْ دِي بَسْ عَجَبَتْنِي.
أَمْشِي آخُدْهَا لَيِّ!»
٤ وَ أَبُوهْ وَ أَمَّهْ مَا عِرْفَوْا كَدَرْ بِالشَّيّءْ دَا اللّٰهْ يِجِيبْ فُرْصَةْ لِمُحَارَبَةْ الْفِلِسْطِيِّينْ.
وَ هُو قَاعِدْ يِفَتِّشْ طَرِيقَةْ لِيِحَارِبْ الْفِلِسْطِيِّينْ.
أَشَانْ فِي الْوَكِتْ دَا،
بَنِي إِسْرَائِيلْ قَاعِدِينْ تِحِتْ حُكُمْ الْفِلِسْطِيِّينْ.
٥ وَ خَلَاصْ،
شَمْشُونْ مَشَى تِمْنَةْ مَعَ أَبُوهْ وَ أَمَّهْ.
وَ وَكِتْ وَصَّلَوْا فِي جِنَيْنَاتْ الْعِنَبْ هَنَا تِمْنَةْ،
شَمْشُونْ شَافْ فَرْخ هَنَا دُودْ قَاعِدْ يِكِرّ جَارِي جَايِ لَيَّهْ.
٦ فِي الْبَكَانْ دَا،
رُوحْ اللّٰهْ نَزَلْ فِي شَمْشُونْ.
هُو مَا عِنْدَهْ سِلَاحْ فِي إِيدَهْ وَ لَاكِنْ بِإِيدَيْنَهْ بَسْ،
كَرَبْ الدُّودْ وَ شَقَّهْ تِنَيْن مِثِلْ سَخَلْ.
وَ هُو مَا كَلَّمْ أَبُوهْ وَ لَا أَمَّهْ بِالشَّيّءْ السَّوَّاهْ.
٧ وَ هُو مَشَى تِمْنَةْ وَ كَلَّمْ مَعَ الْمَرَةْ وَ هِي عَجَبَتَهْ.
٨ وَ بَعَدْ أَيَّامْ،
هُو قَبَّلْ لِيَاخُدْهَا.
وَ هُو بَارَى مِنْ دَرْبَهْ أَشَانْ يِشِيفْ الرِّمَّةْ هَنَا الدُّودْ.
وَ فِي لُبّ الرِّمَّةْ دِي،
هُو لِقِي بَيْت هَنَا نَحَلَةْ مَلَانْ عَسَلْ.
٩ هُو شَالْ مِنْ الْعَسَلْ دَا فِي لُبّ إِيدَهْ وَ مَاشِي وَ قَاعِدْ يَاكُلْ.
وَ وَكِتْ وَصَّلْ بَكَانْ أَبُوهْ وَ أَمَّهْ،
هُو أَنْطَاهُمْ وَ أَكَلَوْا هُمَّنْ كُلَ.
وَ لَاكِنْ مَا خَبَّرَاهُمْ كَدَرْ شَالْ الْعَسَلْ دَا مِنْ لُبّ الرِّمَّةْ هَنَا الدُّودْ.
١٠ وَ خَلَاصْ،
أَبُوهْ قَمَّ مَشَى بَكَانْ الْمَرَةْ.
شَمْشُونْ سَوَّى عَازُومَةْ هِنَاكْ وَ دَا مِثِلْ عَادَةْ الصُّبْيَانْ فِي الْوَكِتْ دَا.
١١ وَ وَكِتْ الْفِلِسْطِيِّينْ شَافَوْه،
هُمَّنْ عَزَلَوْا 30 صُبْيَانْ لِيَقْعُدُوا مَعَايَهْ.
١٢ وَ شَمْشُونْ قَالْ لَيْهُمْ:
«مِنْ فَضُلْكُو،
خَلِّي نِحَجِّي لَيْكُو حِجَّيَّة.
كَنْ قِدِرْتُوا عِرِفْتُوا مَعَنَاتْهَا وَ حَلَّيْتُوهَا فِي السَّبْعَةْ يَوْم هَنَا الْعَازُومَةْ،
أَنَا نَنْطِيكُو 30 جَوَّانِيَّةْ وَ 30 خُلْقَانْ تِغَيُّرُوا بَيْهُمْ.
١٣ وَ لَاكِنْ كَنْ مَا قِدِرْتُوا حَلَّيْتُوا الْحِجَّيَّة كَمَانْ،
إِنْتُو تَنْطُونِي 30 جَوَّانِيَّةْ وَ 30 خُلْقَانْ نِغَيِّرْ بَيْهُمْ.»
وَ هُمَّنْ قَالَوْا لَيَّهْ:
«قُولْ حِجَّيِّتَكْ وَ أَنِحْنَ نَسْمَعَوْهَا.»
١٤ وَ شَمْشُونْ قَالْ لَيْهُمْ:
«مِنْ الْبِيَاكُلْ مَرَقْ الْأَكِلْ
وَ مِنْ الْقَوِي مَرَقْ الْحَلُو.»
وَ مُدَّةْ تَلَاتَةْ يَوْم،
الصُّبْيَانْ مَا قِدْرَوْا يِفَسُّرُوا مَعَنَى الْحِجَّيَّة دِي.
١٥ وَ لَاكِنْ فِي الْيَوْم السَّابِعْ،
هُمَّنْ قَالَوْا لِمَرِةْ شَمْشُونْ:
«غُشِّي رَاجِلْكِ لِيِأَوْرِينَا مَعَنَى الْحِجَّيَّة دِي.
كَنْ مَا غَشَّيْتِيهْ،
أَنِحْنَ نِحَرُّقُوكِ إِنْتِ وَ عَايِلَةْ أَبُوكِ.
وَلَّا إِنْتُو عَزَمْتُونَا لِتَنْهَبَوْنَا؟»
١٦ وَ بَيْدَا،
مَرِةْ شَمْشُونْ بَكَتْ كَتِيرْ وَ قَالَتْ لَيَّهْ:
«إِنْتَ كِرِهْتِنِي وَ أَبَداً مَا تِحِبِّنِي.
الْحِجَّيَّة الْإِنْتَ قُلْتَهَا لِصُبْيَانْ شَعَبِي كُلَ إِنْتَ مَا أَوْرَيْتنِي مَعَنَاتْهَا.»
وَ هُو قَالْ لَيْهَا:
«أَنَا لِأَبُويِ وَ أَمِّي كُلَ مَا أَوْرَيْتهُمْ وَ لَيْكِ إِنْتِ بَسْ نِأَوْرِيكِ وَلَّا؟»
١٧ وَ فِي مُدَّةْ سَبْعَةْ يَوْم هَنَا الْعَازُومَةْ،
هِي دَايْماً تَبْكِي.
وَ فِي الْيَوْم السَّابِعْ،
هُو قَالْ لَيْهَا الْمَعَنَى أَشَانْ هِي تَعَّبَتَهْ.
وَ خَلَاصْ،
هِي مَشَتْ كَلَّمَتْ مَعَنَى الْحِجَّيَّة دِي لِصُبْيَانْ شَعَبْهَا.
١٨ وَ فِي الْيَوْم السَّابِعْ قُبَّالْ الْحَرَّايْ مَا تَقَعْ،
نَاسْ الْمَدِينَةْ قَالَوْا لَيَّهْ:
«شُنُو الْحَلُو مِنْ الْعَسَلْ
وَ شُنُو الْقَوِي مِنْ الدُّودْ؟»
وَ هُو رَدَّ لَيْهُمْ وَ قَالْ:
«كَنْ مَا حَرَتُّوا مَعَ عِجِلْتِي،
مَا تِحِلُّوا حِجَّيِّتِي.»
١٩ وَ خَلَاصْ،
رُوحْ اللّٰهْ نَزَلْ فَوْقَهْ.
وَ شَمْشُونْ مَشَى مَدِينَةْ أَشْقَلُونْ وَ كَتَلْ مِنْ سُكَّانْهَا 30 رَاجِلْ وَ شَالْ خُلْقَانْهُمْ وَ أَنْطَاهُمْ لِلنَّاسْ الْحَلَّوْا الْحِجَّيَّة.
وَ زِعِلْ شَدِيدْ وَ قَبَّلْ لِبَيْت أَبُوهْ.
٢٠ وَ مَرِةْ شَمْشُونْ كَمَانْ،
أَنْطَوْهَا لِصَبِي الْبِقِي وَزِيرَهْ.