قُضياء 1

كتاب القُضياء

من كتب تاريخ بني إسرائيل

بني إسرائيل سكنوا في بلد كَنْعَان

١ وَ بَعَدْ مَوْت يَشُوعْ، بَنِي إِسْرَائِيلْ سَأَلَوْا اللّٰهْ وَ قَالَوْا: «يَاتُو مِنِّنَا يُقُمّ أَوَّلْ يَهْجِمْ الْكَنْعَانِيِّينْ وَ يِحَارِبْهُمْ؟» ٢ وَ اللّٰهْ قَالْ: «قَبِيلَةْ يَهُوذَا بَسْ يَهْجُمُوهُمْ أَشَانْ أَنَا خَلَاصْ أَنْطَيْتهُمْ الْبَلَدْ دِي فِي إِيدَيْهُمْ.» ٣ وَ قَبِيلَةْ يَهُوذَا قَالَوْا لِأَخْوَانْهُمْ قَبِيلَةْ شِمْعُونْ: «يَلَّا! تَعَالُوا مَعَانَا لِأَرْضِنَا الْقَسَّمَوْهَا لَيْنَا وَ نِحَارُبُوا الْكَنْعَانِيِّينْ سَوَا. وَ بَعَدَيْن، أَنِحْنَ كُلَ نَمْشُوا مَعَاكُو لِنِشِيلُوا أَرْضُكُو.» وَ خَلَاصْ، قَبِيلَةْ شِمْعُونْ مَشَوْا مَعَاهُمْ.

٤ وَ قَبِيلَةْ يَهُوذَا هَجَمَوْا عُدْوَانْهُمْ وَ اللّٰهْ سَلَّمْ لَيْهُمْ فِي إِيدَيْهُمْ الْكَنْعَانِيِّينْ وَ الْفِرِزِّيِّينْ. وَ فِي حِلَّةْ بَازَقْ، هُمَّنْ كَتَلَوْا مِنْهُمْ 10 000 رَاجِلْ. ٥ وَ هِنَاكْ هُمَّنْ لِقَوْا الْمَلِكْ أَدُونِي بَازَقْ وَ حَارَبَوْه وَ أَنَّصَرَوْا فِي الْكَنْعَانِيِّينْ وَ الْفِرِزِّيِّينْ. ٦ وَ أَدُونِي بَازَقْ عَرَّدْ وَ لَاكِنْ هُمَّنْ تَابَعَوْه وَ كَرَبَوْه وَ قَطَّعَوْا أَصَابْعَهْ الْكُبَارْ هَنَا إِيدَيْنَهْ وَ رِجِلَيْنَهْ. ٧ وَ فِي الْبَكَانْ دَا، أَدُونِي بَازَقْ قَالْ: «70 مَلِكْ أَنَا قَطَّعْت أَصَابِعْهُمْ الْكُبَارْ هَنَا إِيدَيْهُمْ وَ رِجْلَيْهُمْ وَ هُمَّنْ لَقَّطَوْا الْأَكِلْ الْمُدَفِّقْ فِي بَكَانْ دَبَلَايْتِي. الشَّيّءْ الْأَنَا سَوَّيْتَهْ بَسْ، الرَّبّ قَبَّلَهْ لَيِّ.» وَ هُمَّنْ شَالَوْه وَ وَدَّوْه فِي مَدِينَةْ أُورُشَلِيمْ وَ مَاتْ هِنَاكْ.

٨ وَ قَبِيلَةْ يَهُوذَا هَجَمَوْا مَدِينَةْ أُورُشَلِيمْ وَ شَالَوْهَا وَ كَتَلَوْا كُلَّ سُكَّانْهَا بِالْسَّيْف وَ حَرَّقَوْهَا. ٩ وَ بَعَدْ دَا، قَبِيلَةْ يَهُوذَا مَشَوْا أَشَانْ يِحَارُبُوا الْكَنْعَانِيِّينْ الْقَاعِدِينْ فِي الْجِبَالْ وَ فِي صَحَرَاء نَقَبْ وَ فِي سَهَلَةْ شَفِيلَةْ. ١٠ قَبِيلَةْ يَهُوذَا قَمَّوْا ضِدّ الْكَنْعَانِيِّينْ الْقَاعِدِينْ فِي حِبْرُونْ الْأَوَّلْ أُسُمْهَا قَرْيَةْ أَرْبَعَةْ. وَ هِنَاكْ، هُمَّنْ هَزَمَوْا خُشُومْ بُيُوتْ شِيشَايْ وَ أَخِمَانْ وَ تَلْمَايْ.

١١ وَ مِنْ الْبَكَانْ دَا، قَبِيلَةْ يَهُوذَا قَمَّوْا ضِدّ سُكَّانْ دَبِيرْ الْأَوَّلْ أُسُمْهَا قَرْيَةْ سِيفَرْ. ١٢ وَ كَالِبْ قَالْ: «النَّادُمْ الْهَجَمْ قَرْيَةْ سِيفَرْ وَ شَالْهَا، أَنَا نَنْطِيهْ بِنَيِّتِي عَكْسَةْ يَاخُدْهَا.» ١٣ وَ عُتْنِيِيلْ وِلَيْد قِنَازْ طَرِيدَهْ لِكَالِبْ، هَجَمْ قَرْيَةْ سِيفَرْ وَ شَالْهَا. وَ كَالِبْ أَنْطَاهْ بِنَيِّتَهْ عَكْسَةْ لِيَاخُدْهَا. ١٤ وَ لَاكِنْ مِنْ جَاتْ لَيَّهْ، هِي حَرَّشَتَهْ وَ قَالَتْ: «أَسْأَلْ أَبُويِ يَنْطِيكْ زَرَعْ.» وَ بَعَدْ هِي أَدَّلَّتْ مِنْ حُمَارْهَا، كَالِبْ قَالْ لَيْهَا: «تِدَوْرِي شُنُو؟» ١٥ وَ هِي رَدَّتْ لَيَّهْ وَ قَالَتْ: «هَسَّعْ دَا، بَارِكْنِي. إِنْتَ أَنْطَيْتنِي تُرَابْ فِي صَحَرَاء نَقَبْ وَ هَسَّعْ أَنْطِينِي عُيُونْ أَلْمِي كُلَ.» وَ هُو أَنْطَاهَا عُيُونْ أَلْمِي الْفَوْق وَ التِّحِتْ كُلَ.

١٦ وَ ذُرِّيَّةْ قِينِي نَسِيبْ مُوسَى مَرَقَوْا مِنْ مَدِينَةْ النَّخَلْ وَ مَشَوْا مَعَ قَبِيلَةْ يَهُوذَا فِي كَدَادَةْ يَهُوذَا عَلَيْ جُنُوبْ عَرَادْ. وَ هُمَّنْ سَكَنَوْا مَعَ الشَّعَبْ هِنَاكْ.

١٧ وَ بَعَدْ دَا، قَبِيلَةْ يَهُوذَا قَمَّوْا مَشَوْا مَعَ أَخْوَانْهُمْ قَبِيلَةْ شِمْعُونْ لِيِشِيلُوا أَرْضُهُمْ. وَ حَارَبَوْا الْكَنْعَانِيِّينْ السَّاكْنِينْ فِي صَفَتْ وَ دَمَّرَوْا الْحِلَّةْ دِي وَ سَمَّوْهَا حُرْمَةْ (مَعَنَاتَهْ الدَّمَارْ). ١٨ وَ قَبِيلَةْ يَهُوذَا شَالَوْا مُدُنْ غَزَّةْ وَ أَشْقَلُونْ وَ عَقْرُونْ بِكُلَ تُرَابْهُمْ. ١٩ وَ اللّٰهْ سَاعَدْ قَبِيلَةْ يَهُوذَا وَ هُمَّنْ شَالَوْا مَنَاطِقْ هَنَا الْجِبَالْ. وَ لَاكِنْ مَا قِدْرَوْا يِشِيلُوا بَلَدْ سُكَّانْ السَّهَلَةْ أَشَانْ السُّكَّانْ دَوْل عِنْدُهُمْ عَرَبَاتْ هَنَا حَدِيدْ لِلْحَرِبْ.

٢٠ وَ حَسَبْ كَلَامْ مُوسَى، حِلَّةْ حِبْرُونْ أَنْطَوْهَا لِكَالِبْ وَ هُو بَسْ شَالْهَا مِنْ التَّلَاتَةْ خُشُومْ بُيُوتْ هَنَا بَنِي عَنَقْ. ٢١ وَ كَنْ لِلْيَبُوسِيِّينْ السَّاكْنِينْ فِي أُورُشَلِيمْ، قَبِيلَةْ بَنْيَامِينْ مَا شَالَوْا مِنْهُمْ أَرْضُهُمْ. وَ الْيَبُوسِيِّينْ سَاكْنِينْ مَعَ قَبِيلَةْ بَنْيَامِينْ فِي أُورُشَلِيمْ لَحَدِّي الْيَوْم.

٢٢ وَ ذُرِّيَّةْ يُوسُفْ قَمَّوْا ضِدّ حِلَّةْ بَيْت إِيلْ وَ اللّٰهْ كَانْ مَعَاهُمْ. ٢٣ وَ ذُرِّيَّةْ يُوسُفْ رَسَّلَوْا نَاسْ أَشَانْ يُرُوغُوا بَيْت إِيلْ الْأَوَّلْ أُسُمْهَا لُوزْ. ٢٤ وَ الرَّوَّاغِينْ دَوْل وَكِتْ جَوْا فِي الْحِلَّةْ، لِقَوْا رَاجِلْ مَارِقْ مِنْهَا. وَ هُمَّنْ قَالَوْا لَيَّهْ: «وَصِّفْ لَيْنَا مَدَخَلْ الْحِلَّةْ وَ أَنِحْنَ نِسَوُّوا لَيْك الْخَيْر.» ٢٥ وَ هُو وَصَّفْ لَيْهُمْ مِنْ وَيْن يَدْخُلُوا الْحِلَّةْ. وَ هُمَّنْ دَخَلَوْا وَ كَتَلَوْا كُلَّ سُكَّانْهَا بِالْسَّيْف. وَ لَاكِنْ لِلرَّاجِلْ الْوَصَّفْ لَيْهُمْ الدَّرِبْ، خَلَّوْه هُو وَ كُلَّ عَايِلْتَهْ يَمْشُوا بِسَلَامْ. ٢٦ وَ الرَّاجِلْ دَا مَشَى فِي بَلَدْ الْحِتِّيِّينْ وَ بَنَى لَيَّهْ حِلَّةْ وَ سَمَّاهَا لُوزْ. وَ دَا أُسُمْهَا لَحَدِّي الْيَوْم.

٢٧ وَ قَبِيلَةْ مَنَسَّى مَا شَالَوْا أَرْض سُكَّانْ بَيْت شَانْ وَ تَعْنَكْ وَ دُورْ وَ يِبْلَعَامْ وَ مَقِدُّو وَ حِلَّالْهُمْ التَّابْعِينْ لَيْهُمْ. وَ بَيْدَا، الْكَنْعَانِيِّينْ قَاعِدِينْ يَسْكُنُوا فِي الْبَلَدْ دِي. ٢٨ وَ وَكِتْ بَنِي إِسْرَائِيلْ لِقَوْا قُدْرَةْ، قَمَّوْا عَبَّدَوْهُمْ لِلْكَنْعَانِيِّينْ وَ لَاكِنْ مَا شَالَوْا مِنْهُمْ أَرْضُهُمْ.

٢٩ وَ قَبِيلَةْ أَفْرَايِمْ مَا شَالَوْا أَرْض الْكَنْعَانِيِّينْ السَّاكْنِينْ فِي قَازَرْ. وَ بَيْدَا، الْكَنْعَانِيِّينْ سَكَنَوْا فِي أُسُطْ قَبِيلَةْ أَفْرَايِمْ.

٣٠ وَ قَبِيلَةْ زَبُلُونْ مَا شَالَوْا أَرْض الْكَنْعَانِيِّينْ السَّاكْنِينْ فِي قِطْرُونْ وَ فِي نَحْلَالْ. وَ بَيْدَا، الْكَنْعَانِيِّينْ سَكَنَوْا فِي أُسُطْ قَبِيلَةْ زَبُلُونْ لَاكِنْ قَبِيلَةْ زَبُلُونْ قَمَّوْا عَبَّدَوْهُمْ.

٣١ وَ قَبِيلَةْ أَشِيرْ مَا شَالَوْا أَرْض سُكَّانْ عَكُّو وَ صَيْدَا وَ أَحْلَبْ وَ أَكْزِيبْ وَ حَلْبَةْ وَ أَفِيقْ وَ رَحُوبْ. ٣٢ وَ قَبِيلَةْ أَشِيرْ سَكَنَوْا فِي أُسْط الْكَنْعَانِيِّينْ السَّاكْنِينْ فِي الْبَلَدْ أَشَانْ مَا شَالَوْا مِنْهُمْ أَرْضُهُمْ.

٣٣ وَ قَبِيلَةْ نَفْتَالِي مَا شَالَوْا أَرْض الْكَنْعَانِيِّينْ السَّاكْنِينْ فِي بَيْت شَمْس وَ بَيْت عَنَاةْ. وَ بَيْدَا، هُمَّنْ سَكَنَوْا فِي أُسْط الْكَنْعَانِيِّينْ وَ لَاكِنْ قَبِيلَةْ نَفْتَالِي قَمَّوْا عَبَّدَوْهُمْ لِسُكَّانْ الْحِلَّالْ التِّنَيْن دَوْل.

٣٤ وَ الْأَمُورِيِّينْ قَمَّوْا حَاصَرَوْهُمْ لِقَبِيلَةْ دَانْ فِي الْجِبَالْ وَ دَحَرَوْهُمْ مَا يَنْزُلُوا فِي الْوُدْيَانْ. ٣٥ وَ بَيْدَا، الْأَمُورِيِّينْ قَاعِدِينْ سَاكْنِينْ فِي جَبَلْ حَارَسْ وَ أَيَّلُونْ وَ شَعَلْبِيمْ وَ لَاكِنْ وَكِتْ ذُرِّيَّةْ يُوسُفْ لِقَوْا قُدْرَةْ، عَبَّدَوْهُمْ. ٣٦ وَ حُدُودْ بَلَدْ الْأَمُورِيِّينْ يَمْشُوا مِنْ قِيزَانْ الْعَقَارِبْ وَ لَحَدِّي غَادِي لِسَالَعْ.