يَشُوع 5

١ وَ كُلَّ مُلُوكْ الْأَمُورِيِّينْ الْقَاعِدِينْ فِي النُّصّ الْغَرْبَانِي لِبَحَرْ الْأُرْدُنْ وَ كُلَّ مُلُوكْ الْكَنْعَانِيِّينْ الْفِي خَشُمْ الْبَحَرْ الْأَبْيَضْ سِمْعَوْا كَدَرْ اللّٰهْ يَبَّسْ أَلْمِي بَحَرْ الْأُرْدُنْ قِدَّامْ بَنِي إِسْرَائِيلْ لَحَدِّي قِدْرَوْا قَطَعَوْا. وَ وَكِتْ سِمْعَوْه خَلَاصْ، قُلُوبْ الْمُلُوكْ دَوْل أَنْقَطَعَوْا وَ مَا قِدْرَوْا يَقْعُدُوا قِدَّامْ بَنِي إِسْرَائِيلْ.

طهّروا رجال بني إسرائيل

٢ وَ فِي الْوَكِتْ دَا، اللّٰهْ قَالْ لِيَشُوعْ: «طَرِّقْ لَيْك حُجَارْ وَ طَهِّرْ الْمَا مُطَهَّرِينْ مِنْ بَنِي إِسْرَائِيلْ.» ٣ وَ خَلَاصْ، يَشُوعْ طَرَّقْ حُجَارْ وَ طَهَّرْ بَنِي إِسْرَائِيلْ فِي جَبَلْ الطَّهُورَةْ.

٤ وَ دَاهُو السَّبَبْ الطَّهَّرَاهُمْ فَوْقَهْ يَشُوعْ. أَوَّلْ، كُلَّ الرُّجَالْ الْمُحَارِبِينْ الْمَرَقَوْا مِنْ مَصِرْ مَاتَوْا فِي الصَّحَرَاء فِي دَرِبْهُمْ وَكِتْ جَايِينْ مِنْ مَصِرْ. ٥ وَ الشَّعَبْ الْمَرَقَوْا مِنْ مَصِرْ كُلُّهُمْ مُطَهَّرِينْ. لَاكِنْ عِيَالْهُمْ الْوِلْدَوْهُمْ فِي الصَّحَرَاء فِي الدَّرِبْ وَكِتْ جَايِينْ مِنْ مَصِرْ، وَاحِدْ كُلَ مِنْهُمْ مَا مُطَهَّرْ. ٦ بَنِي إِسْرَائِيلْ رَاغَوْا لِمُدَّةْ 40 سَنَةْ فِي الصَّحَرَاء لَحَدِّي كُلَّ الرُّجَالْ الْمُحَارِبِينْ الْمَرَقَوْا مِنْ مَصِرْ مَاتَوْا أَشَانْ هُمَّنْ مَا سِمْعَوْا كَلَامْ اللّٰهْ. وَ فِي شَانْ عِصْيَانْهُمْ، اللّٰهْ قَرَّرْ كَدَرْ مَا يِشَوِّفْهُمْ الْبَلَدْ الْأَوَّلْ هُو حَلَفْ لِجُدُودْهُمْ وَ قَالْ يَنْطِيهَا لَيْهُمْ. وَ دِي الْبَلَدْ الْمَلَانَةْ بِاللَّبَنْ وَ الْعَسَلْ. ٧ وَ اللّٰهْ وَدَّى عِيَالْهُمْ فِي بَدَلْهُمْ. وَ أَوْلَادْهُمْ دَوْل بَسْ النَّاسْ الطَّهَّرَاهُمْ يَشُوعْ أَشَانْ هُمَّنْ مَا طَهَّرَوْهُمْ فِي الدَّرِبْ.

٨ وَ وَكِتْ طَهَّرَوْا كُلَّ رُجَالْ الْأُمَّةْ، هُمَّنْ قَعَدَوْا فِي الْفَرِيقْ لَحَدِّي بِرَوْا. ٩ وَ اللّٰهْ قَالْ لِيَشُوعْ: «الْيَوْم أَنَا مَرَقْت مِنْكُو الْعَيْب الْجِبْتُوهْ مِنْ مَصِرْ.» وَ أَشَانْ دَا، سَمَّوْا الْبَكَانْ دَا قِلْقَالْ (مَعَنَاتَهْ مَرَقْ مِنْكُو). وَ الْأُسُمْ دَا قَاعِدْ لَحَدِّي الْيَوْم كُلَ.

أوّل عيد الْفِصْح في كدادة أَرِيحَا

١٠ وَ بَنِي إِسْرَائِيلْ نَزَلَوْا فِي قِلْقَالْ وَ عَيَّدَوْا عِيدْ الْفِصْحَ فِي يَوْم 14 هَنَا الشَّهَرْ الْأَوَّلْ بِعَشِيَّةْ فِي كَدَادَةْ أَرِيحَا. ١١ وَ أَمْبَاكِرْ، هُمَّنْ أَكَلَوْا مِنْ إِنْتَاجْ الْبَلَدْ وَ خُبْزَةْ بَلَا تَوَّارَةْ وَ فَرِيكِي. ١٢ وَ فِي الْيَوْم الْأَكَلَوْا مِنْ إِنْتَاجْ الْبَلَدْ، خَلَاصْ الْمَنَّةْ وَقَفَتْ. الْمَنَّةْ وَقَفَتْ مِنْ بَنِي إِسْرَائِيلْ وَ هُمَّنْ أَكَلَوْا مِنْ إِنْتَاجْ بَلَدْ كَنْعَانْ فِي السَّنَةْ دِي.

يَشُوع قابل قايِد دَيْش اللّه

١٣ وَ وَكِتْ يَشُوعْ قَاعِدْ جَنْب أَرِيحَا، هُو رَفَعْ رَاسَهْ وَ شَافْ نَادُمْ وَاقِفْ قِدَّامَهْ وَ سَيْفَهْ مَسْلُولْ فِي إِيدَهْ. وَ يَشُوعْ مَشَى لَيَّهْ وَ قَالْ: «إِنْتَ لَيْنَا أَنِحْنَ وَلَّا لِعَدُونَا؟» ١٤ وَ هُو قَالْ: «لَا! أَنَا قَايِدْ دَيْش اللّٰهْ. وَ هَسَّعْ جِيتْ.» وَ خَلَاصْ، يَشُوعْ وَقَعْ فِي الْأَرْض وَ سَجَدْ قِدَّامَهْ وَ قَالْ لَيَّهْ: «يَا سَيِّدِي! شُنُو كَلَامَكْ لَيِّ أَنَا عَبْدَكْ؟» ١٥ وَ قَايِدْ دَيْش اللّٰهْ قَالْ لِيَشُوعْ: «سِلّ نَعَالَكْ أَشَانْ الْبَكَانْ الْإِنْتَ قَاعِدْ فَوْقَهْ دَا مُقَدَّسْ.» وَ خَلَاصْ، يَشُوعْ سَلَّ نَعَالَهْ مِثِلْ أَمَرَهْ بَيَّهْ.