تَثْنِية 22

فكِّر في الخُمام المودِّر

١ وَ كَنْ تِشِيفْ تَوْر أَوْ خَرُوفْ أَخُوكْ مُوَدِّرْ، مَا تِخَلِّيهْ. شِيلَهْ وَ وَدِّيهْ لَيَّهْ. ٢ وَ كَنْ سِيدْ الْبَهِيمَةْ دِي مَا سَاكِنْ قَرِيبْ لَيْك أَوْ مَا تَعَرْفَهْ، شِيلْ بَهِيمْتَهْ دِي وَ لِمَّهَا مَعَاكْ. وَ خَلِّيهَا تَقْعُدْ فِي بَيْتَكْ لَحَدِّي هُو يَجِي يِفَتِّشْهَا وَ خَلَاصْ، تَنْطِيهَا لَيَّهْ. ٣ وَ تِسَوِّي مِثِلْ دَا كَنْ لِقِيتْ حُمَارَهْ أَوْ خَلَقَهْ أَوْ أَيِّ شَيّءْ الْأَخُوكْ يِوَدِّرَهْ، مَا تِخَلِّيهْ.

٤ وَ كَنْ لِقِيتْ حُمَارْ أَخُوكْ أَوْ تَوْرَهْ وَاقْعِ فِي الدَّرِبْ، مَا تِخَلِّيهْ. سَاعِدْ أَخُوكْ وَ قَوِّمَهْ مَعَايَهْ.

قوانين آخرين

٥ وَ الْمَرَةْ مَا تَلْبَسْ لُبَاسْ الرَّاجِلْ وَ الرَّاجِلْ مَا يَلْبَسْ لُبَاسْ الْمَرَةْ. وَ أَيِّ نَادُمْ الْيِسَوِّي شَيّءْ مِثِلْ دَا، اللّٰهْ إِلٰـهَكْ يَكْرَهَهْ.

٦ وَ كَنْ مَاشِي فِي دَرْبَكْ وَ لِقِيتْ عُشّ عِنْدَهْ فُرُوخْ أَوْ بَيْض هَنَا طَيْرَايْ فِي شَدَرَةْ أَوْ فِي الْأَرْض وَ أَمُّهُمْ رَاقْدَةْ فَوْقهُمْ، مَا تِشِيلْ الْأَمّ وَ فُرُوخْهَا سَوَا. ٧ وَ لَاكِنْ شِيلْ الْفُرُوخْ وِحَيْدهُمْ وَ خَلِّي الْأَمّ. وَ بَيْدَا، تَلْقَى الْخَيْر وَ عُمْرَكْ يَبْقَى طَوِيلْ.

٨ وَ كَنْ بَنَيْتُوا بَيْت جَدِيدْ، حَوُّقُوا رَاسَهْ بِدُرْدُرْ أَشَانْ بَيْتكُو مَا يَبْقَى سَبَبْ هَنَا دِمَّةْ وَكِتْ نَادُمْ يَقَعْ مِنَّهْ.

٩ مَا تَزْرَعَوْا شَيّءْ آخَرْ فِي جِنَيْنَةْ عِنَبْكُو. وَ دَا، أَشَانْ مَا تِخَصُّصُوا كُلَّ نَتِيجَةْ الشَّيّءْ الْإِنْتُو زَرَعْتُوهْ مَعَ إِنْتَاجْ عِنَبْكُو. ١٠ وَ مَا تَحَرْتُوا بِتَوْر وَ حُمَارْ سَوَا.

١١ وَ مَا تَلْبَسَوْا خَلَقْ مَصْنُوعْ بِصُوفْ وَ قُمَاشْ كَتَّانْ سَوَا. ١٢ وَ خَيُّطُوا حُبَالْ فِي الْكَوْنجَاتْ الْأَرْبَعَةْ هَنَا الْغِطَاءْ التِّلْغَطَّوْا بَيَّهْ.

قانون بُخُصّ الراجِل و مرْته

١٣ وَ أَكُونْ نَادُمْ يَاخُدْ مَرَةْ وَ بَعَدْ لَمَّ مَعَاهَا، يِخَلِّيهَا ١٤ وَ يَتْهَمْهَا كَدَرْ هِي مَا مَاشَةْ عَدِيلْ وَ يِحَجِّي فَوْقهَا كَلَامْ فَسِلْ وَ يُقُولْ: «أَنَا أَخَدْتَهَا وَ وَكِتْ دَخَلْت بَيْهَا، لِقِيتْهَا مَا بِنَيَّةْ.» ١٥ وَ فِي الْحَالَةْ الْمِثِلْ دِي، أَمّ الْبِنَيَّةْ وَ أَبُوهَا يَمْشُوا لِشُيُوخْ الْمَدِينَةْ فِي خَشُمْ بَابْ الْمَدِينَةْ وَ هِنَاكْ يِوَصُّفُوا عَلَامَةْ الْبَنَاتِيَّةْ لِشُيُوخْ الْمَدِينَةْ. ١٦ وَ أَبُو الْبِنَيَّةْ يُقُولْ لِلشُّيُوخْ: «أَنَا أَنْطَيْت بِنَيِّتِي لِلرَّاجِلْ دَا وَ هُو خَلَّاهَا. ١٧ وَ هُو تَهَمْهَا كَدَرْ هِي مَا مَاشَةْ عَدِيلْ وَ قَالْ لَيِّ: ‹بِنْتَكْ أَنَا مَا لِقِيتْهَا بِنَيَّةْ!› وَ لَاكِنْ دَاهُو الْعَلَامَةْ هَنَا بَنَاتِيَّةْ بِنْتِي!»

وَ يِفِلُّوا الْفَرْدَةْ الْعِنْدَهَا دَمّ الْبَنَاتِيَّةْ قِدَّامْ الشُّيُوخْ هَنَا الْمَدِينَةْ. ١٨ وَ شُيُوخْ الْمَدِينَةْ دِي يَكُرْبُوا الرَّاجِلْ دَا وَ يِأَدُّبُوهْ. ١٩ وَ يَعَصُرُوهْ يِكَفِّي حُكُمْ هَنَا 100 حَجَرْ فُضَّةْ لِأَبُو الْبِنَيَّةْ أَشَانْ هُو تَلَّفْ سِمْعَةْ الْبِنَيَّةْ الْعُدْرِيَّةْ فِي إِسْرَائِيلْ. وَ خَلَاصْ فِي الْبَكَانْ دَا، الْبِنَيَّةْ تَقْعُدْ مَرْتَهْ وَ هُو مَا يَقْدَرْ يَطْرُدْهَا فِي كُلَّ مُدَّةْ حَيَاتَهْ.

٢٠ وَ لَاكِنْ كَنْ كَلَامْ الرَّاجِلْ دَا صَحِيحْ وَ كَنْ عَلَامَةْ الْبَنَاتِيَّةْ مَا أَنْلَقَتْ فِي الْفَرْدَةْ، ٢١ خَلَاصْ يَمُرْقُوا الْبِنَيَّةْ دِي فِي خَشُمْ بَيْت أَبُوهَا وَ نَاسْ الْمَدِينَةْ يَرْجُمُوهَا لَحَدِّي الْمَوْت أَشَانْ هِي سَوَّتْ فِعِلْ شَيْن فِي إِسْرَائِيلْ وَ أَشَّرْمَطَتْ مِنْ هِي فِي بَيْت أَبُوهَا. وَ بَيْدَا، تَمُرْقُوا الشَّرّ مِنْ أُسُطْكُو.

الزِنى و الرقدان بقوء

٢٢ وَ كَنْ لِقِيتُوا رَاجِلْ رَاقِدْ مَعَ مَرِةْ رَاجِلْ، هُمَّنْ الْإِتْنَيْن يُمُوتُوا، الرَّاجِلْ وَ الْمَرَةْ كُلَ. وَ بَيْدَا، تَمُرْقُوا الشَّرّ مِنْ أُسُطْ بَنِي إِسْرَائِيلْ.

٢٣ وَ كَنْ بِنَيَّةْ عُدْرِيَّةْ كَارْبِينْ رَاسْهَا وَ رَاجِلْ وَاحِدْ لَاقَاهَا فِي الْمَدِينَةْ وَ رَقَدْ مَعَاهَا، ٢٤ وَاجِبْ تَمُرْقُوهُمْ هُمَّنْ الْإِتْنَيْن فِي خَشُمْ بَابْ الْمَدِينَةْ وَ تَرْجُمُوهُمْ لَحَدِّي يُمُوتُوا. وَ دَا، أَشَانْ الْبِنَيَّةْ مَا عَاطَتْ لِنَاسْ الْمَدِينَةْ وَ الرَّاجِلْ أَشَانْ هُو سَوَّى الْعُنُفْ لِمَرِةْ أَخُوهْ. وَ بَيْدَا، تَمُرْقُوا الشَّرّ مِنْ أُسُطْكُو.

٢٥ وَ لَاكِنْ كَنْ فِي الْكَدَادَةْ بَسْ الرَّاجِلْ دَا لَاقَى الْبِنَيَّةْ الْكَارْبِينْ رَاسْهَا دِي وَ كَرَبَاهَا وَ رَقَدْ مَعَاهَا، الرَّاجِلْ يَكْتُلُوهْ وِحَيْدَهْ. ٢٦ وَ مَا تِسَوُّوا لِلْبِنَيَّةْ دِي شَيّءْ أَشَانْ هِي مَا سَوَّتْ ذَنِبْ الْيِجِيبْ لَيْهَا الْمَوْت. وَ الْحَالَةْ دِي، هِي مِثِلْ نَادُمْ قَمَّ ضِدّ أَخُوهْ وَ كَتَلَهْ. ٢٧ وَ الْبِنَيَّةْ الْكَارْبِينْ رَاسْهَا دِي، الرَّاجِلْ لَاقَاهَا فِي الْكَدَادَةْ وَ هِي عَاطَتْ وَ مَا لِقَتْ نَادُمْ الْيِنَجِّيهَا مِنَّهْ.

٢٨ وَ كَنْ نَادُمْ كَرَبْ بِنَيَّةْ عُدْرِيَّةْ الْمَا كَارْبِينْ رَاسْهَا وَ رَقَدْ مَعَاهَا وَ كَرَبَوْه، ٢٩ خَلَاصْ الرَّاجِلْ دَا يِكَفِّي لِأَبُو الْبِنَيَّةْ 50 حَجَرْ فُضَّةْ أَشَانْ هُو كَرَبَاهَا بِقُوءْ. وَ هُو يَاخُدْهَا وَ مَا يَقْدَرْ يَطْرُدْهَا مِنْ بَيْتَهْ فِي كُلَّ مُدَّةْ حَيَاتَهْ.

٣٠ أَبَداً نَادُمْ مَا يَقْدَرْ يَرْقُدْ مَعَ مَرِةْ أَبُوهْ أَشَانْ دَا مِثِلْ كَشَفْ عَوْرَةْ أَبُوهْ.