تَثْنِية 3

اللّه سلّم ليهم عُوق و بلده

١ وَ بَعَدْ دَا، أَنِحْنَ وَجَّهْنَا عَلَيْ بَاشَانْ. وَ لَاكِنْ عُوقْ مَلِكْ بَاشَانْ وَ شَعَبَهْ مَرَقَوْا وَ حَارَبَوْنَا فِي إِدْرَعِي. ٢ وَ اللّٰهْ قَالْ لَيِّ أَنَا مُوسَى: «مَا تَخَافْ أَشَانْ أَنَا نِسَلِّمَهْ لَيْك فِي إِيدَكْ، هُو وَ شَعَبَهْ وَ بَلَدَهْ. وَ سَوِّي فَوْقَهْ مِثِلْ سَوَّيْت فِي سِيحُونْ مَلِكْ الْأَمُورِيِّينْ الْقَاعِدْ فِي حَشْبُونْ.»

٣ وَ خَلَاصْ، اللّٰهْ إِلٰـهْنَا سَلَّمْ لَيْنَا فِي إِيدْنَا عُوقْ مَلِكْ بَاشَانْ وَ كُلَّ شَعَبَهْ. وَ أَنِحْنَ كَتَلْنَاهُمْ لَحَدِّي وَاحِدْ مِنْهُمْ كُلَ مَا فَضَّلْ حَيّ. ٤ وَ فِي الْوَكِتْ دَا، شِلْنَا كُلَّ مُدُنَهْ وَ مَا فِي مَدِينَةْ الْمَا شِلْنَاهَا. وَ عَدَدْ الْمُدُنْ دَوْل 60 فِي مَنْطَقَةْ أَرْقُوبْ فِي بَلَدْ بَاشَانْ الْحَاكِمْ فَوْقهَا عُوقْ. ٥ وَ كُلَّ الْمُدُنْ دَوْل، هُمَّنْ مُدُنْ قَوِيِّينْ وَ عِنْدُهُمْ دَرَادِرْ طُوَالْ وَ بِيبَانْ وَ حَوَادِرْ الْيِسِدُّوا بَيْهُمْ الْبِيبَانْ. وَ فِي حِلَّالْ آخَرِينْ كُلَ كَتِيرِينْ الْمَا عِنْدُهُمْ دَرَادِرْ. ٦ أَنِحْنَ شِلْنَا الْمُدُنْ دَوْل وَ دَمَّرْنَاهُمْ مِثِلْ دَمَّرْنَا سِيحُونْ مَلِكْ حَشْبُونْ. وَ كَتَلْنَا الرُّجَالْ وَ الْعَوِينْ وَ الْعِيَالْ هَنَا الْمُدُنْ دَوْل لَحَدِّي وَاحِدْ مِنْهُمْ كُلَ مَا فَضَّلْ حَيّ. ٧ وَ نَهَبْنَا كُلَّ الْبَهَايِمْ وَ شِلْنَا خُمَامْ الْمُدُنْ دَوْل مِثِلْ غَنِيمَةْ.

مُوسَى قسّم أرْض قِلْعَاد

٨ وَ فِي الْوَكِتْ دَاكْ، أَنِحْنَ شِلْنَا بَلَدْ مُلُوكْ الْأَمُورِيِّينْ الْإِتْنَيْن دَوْل يَعْنِي عُوقْ وَ سِيحُونْ. وَ دِي الْأَرْض الْقَاعِدَةْ صَبَاحْ لِبَحَرْ الْأُرْدُنْ مِنْ وَادِي أَرْنُونْ فِي الْوَطِي لَحَدِّي جَبَلْ حَرْمُونْ فِي الْمُنْشَاقْ. ٩ وَ جَبَلْ حَرْمُونْ دَا، نَاسْ بَلَدْ صَيْدَا سَمَّوْه سِرْيُونْ وَ الْأَمُورِيِّينْ كُلَ سَمَّوْه سَنِيرْ. ١٠ وَ أَنِحْنَ شِلْنَا كُلَّ مُدُنْ السَّهَلَةْ وَ كُلَّ تُرَابْ قِلْعَادْ وَ كُلَّ تُرَابْ بَاشَانْ لَحَدِّي مُدُنْ سَلْكَةْ وَ إِدْرَعِي. وَ دَوْل مُدُنْ بَاشَانْ الْحَكَمْ فَوْقهُمْ الْمَلِكْ عُوقْ. ١١ وَ عُوقْ مَلِكْ بَاشَانْ، هُو آخِرْ وَاحِدْ الْفَضَّلْ مِنْ الرَّفَايِينْ. وَ سَرِيرَهْ هَنَا حَدِيدْ قَاعِدْ فِي رَبَّةْ عَاصِمَةْ بَنِي عَمُّونْ. وَ طُولْ السَّرِيرْ دَا 9 دُرَاعْ وَ عُرْضَهْ 4 دُرَاعْ.

١٢ وَ وَكِتْ أَنِحْنَ شِلْنَا الْبَلَدْ دِي، أَنَا أَنْطَيْت لِقَبِيلَةْ رَأُوبِينْ وَ قَبِيلَةْ قَادْ الْأَرْض مِنْ حِلَّةْ عَرُوعِرْ الْفِي وَادِي أَرْنُونْ لَحَدِّي نُصّ بَلَدْ جِبَالْ قِلْعَادْ وَ مُدُنَهْ. ١٣ وَ الْفَضَّلْ مِنْ قِلْعَادْ وَ كُلَّ مَمْلَكَةْ عُوقْ فِي بَاشَانْ، أَنَا أَنْطَيْتَهْ لِنُصّ قَبِيلَةْ مَنَسَّى. وَ دَا، كُلَّ مَنْطَقَةْ أَرْقُوبْ وَ كُلَّ بَاشَانْ الْأَوَّلْ بِنَادُوهْ بَلَدْ الرَّفَايِينْ. ١٤ وَ ذُرِّيَّةْ يَيِيرْ وِلَيْد مَنَسَّى شَالَوْا كُلَّ مَنْطَقَةْ أَرْقُوبْ لَحَدِّي تُرَابْ الْقَشُورِيِّينْ وَ الْمَعَاكِيِّينْ. وَ سَمَّوْا بَلَدْ بَاشَانْ بِأُسُمْ جِدُّهُمْ يَيِيرْ وَ لَحَدِّي الْيَوْم كُلَ، بِنَادُوهَا فُرْقَانْ يَيِيرْ. ١٥ وَ أَنَا أَنْطَيْت النُّصّ الْمُنْشَاقِي هَنَا قِلْعَادْ لِذُرِّيَّةْ خَشُمْ بَيْت مَكِيرْ وِلَيْد مَنَسَّى.

١٦ وَ لِقَبِيلَةْ رَأُوبِينْ وَ قَبِيلَةْ قَادْ، أَنَا أَنْطَيْتهُمْ نُصّ بَلَدْ قِلْعَادْ لَحَدِّي وَادِي أَرْنُونْ وَ أُسْط الْوَادِي دَا بِقِي حُدُودْهُمْ الْجُنُوبِيِّةْ. وَ أَنْطَيْتهُمْ بَتَّانْ لَحَدِّي وَادِي يَبُّوقْ وَ هُو كُلَ بِقِي حُدُودْهُمْ مَعَ بَنِي عَمُّونْ. ١٧ وَ الْحُدُودْ الْغَرْبَانِيِّةْ هَنَا خَشُمْ بَيْت مَكِيرْ وَ قَبِيلَةْ رَأُوبِينْ وَ قَبِيلَةْ قَادْ، هُمَّنْ مَشَوْا مَعَ طُولْ وَادِي الْأُرْدُنْ مِنْ بَحَرْ الْجَلِيلْ فِي الْمُنْشَاقْ لَحَدِّي الْبَحَرْ الْمَيِّتْ فِي الْوَطِي. وَ مِنَّهْ، الْحُدُودْ مَشَوْا لَحَدِّي قَعَرْ جَبَلْ الْفِسْقَةْ فِي الصَّبَاحْ.

١٨ أَشَانْ فِي الْوَكِتْ دَاكْ، أَنَا أَمَرْتُهُمْ وَ قُلْت: «اللّٰهْ إِلٰـهْكُو أَنْطَاكُو الْبَلَدْ دِي وَرَثَةْ. وَ إِنْتُو الرُّجَالْ الْفَحَلِينْ، شِيلُوا سِلَاحْكُو وَ أَقْطَعَوْا بَحَرْ الْأُرْدُنْ قِدَّامْ أَخْوَانْكُو بَنِي إِسْرَائِيلْ الْآخَرِينْ. ١٩ إِلَّا عَوِينْكُو وَ عِيَالْكُو وَ مَالْكُو يَقْعُدُوا فِي الْحِلَّالْ الْأَنَا أَنْطَيْتهُمْ لَيْكُو. وَ أَنَا نَعَرِفْ كَدَرْ إِنْتُو عِنْدُكُو مَالْ كَتِيرْ. ٢٠ وَ سَاعُدُوا أَخْوَانْكُو لَحَدِّي اللّٰهْ يَنْطِيهُمْ الرَّاحَةْ مِثِلْكُو. وَ وَكِتْ هُمَّنْ كُلَ شَالَوْا الْبَلَدْ الْيَنْطِيهَا لَيْهُمْ اللّٰهْ إِلٰـهْكُو وَرَثَةْ غَرِبْ لِبَحَرْ الْأُرْدُنْ، فِي الْوَكِتْ دَا، إِنْتُو تِقَبُّلُوا وَ تَقْعُدُوا أَيِّ وَاحِدْ فِي أَرْضَهْ الْأَنَا أَنْطَيْتهَا لَيَّهْ.»

٢١ وَ فِي الْوَكِتْ دَاكْ، أَنَا أَنْطَيْت أَمُرْ لِيَشُوعْ وَ قُلْت لَيَّهْ: «إِنْتَ شِفْت بِعُيُونَكْ كُلَّ شَيّءْ السَّوَّاهْ اللّٰهْ إِلٰـهْكُو لِلْمُلُوكْ الْإِتْنَيْن دَوْل يَعْنِي عُوقْ وَ سِيحُونْ. وَ هُو يِسَوِّي نَفْس الشَّيّءْ فِي كُلَّ الْمَمَالِكْ التَّمْشُوا لَيْهُمْ غَرِبْ لِبَحَرْ الْأُرْدُنْ. ٢٢ مَا تَخَافَوْا مِنْهُمْ أَشَانْ اللّٰهْ إِلٰـهْكُو، هُو ذَاتَهْ يِحَارِبْ لَيْكُو.»

مُوسَى ما يدْخُل بلد كَنْعَان

٢٣ وَ فِي الْوَكِتْ دَاكْ، أَنَا شَحَدْت اللّٰهْ وَ قُلْت: ٢٤ «يَا اللّٰهْ الرَّبّ، إِنْتَ بَدَيْت تِوَصِّفْ لِعَبْدَكْ عَظَمَتَكْ وَ إِيدَكْ الشَّدِيدَةْ. هَلْ فِي إِلٰـهْ فِي السَّمَاءْ أَوْ فِي الْأَرْض الْيَقْدَرْ يِسَوِّي مِثِلْ عَمَلَكْ وَ خِدِمْتَكْ الشَّدِيدَةْ وَلَّا؟ ٢٥ يَا اللّٰهْ، نَشْحَدَكْ خَلِّينِي نَقْطَعْ غَرِبْ لِبَحَرْ الْأُرْدُنْ أَشَانْ نِشِيفْ الْبَلَدْ الْعَدِيلَةْ دِي وَ الْجِبَالْ السَّمْحِينْ وَ لُبْنَانْ.»

٢٦ وَ لَاكِنْ اللّٰهْ غِضِبْ عَلَيِّ بِسَبَبْكُو إِنْتُو وَ مَا سِمِعْ سُؤَالِي. وَ قَالْ لَيِّ: «خَلَاصْ، بَتَّانْ مَا تِحَجِّي لَيِّ بِالْكَلَامْ دَا. ٢٧ أَطْلَعْ فِي رَاسْ جَبَلْ الْفِسْقَةْ وَ شِيفْ مُنْشَاقْ وَ وَطِي وَ غَرِبْ وَ صَبَاحْ. وَ شِيفْ الْبَكَانْ دَا عَدِيلْ أَشَانْ إِنْتَ مَا تَقْطَعْ بَحَرْ الْأُرْدُنْ دَا. ٢٨ أَنْطِي أَمُرْ لِيَشُوعْ وَ خَلِّي يَبْقَى شَدِيدْ وَ فَحَلْ أَشَانْ هُو بَسْ الْيَقْطَعْ بَحَرْ الْأُرْدُنْ فِي رَاسْ الشَّعَبْ دَا وَ هُو بَسْ الْيَنْطِيهُمْ وَرَثَةْ الْبَلَدْ الْإِنْتَ قَاعِدْ تِشِيفْهَا.»

٢٩ وَ مِنْ الْوَكِتْ دَا، أَنِحْنَ قَاعِدِينْ هِنِي فِي الْوَادِي مُقَابِلِينْ بَيْت فَعُورْ.