عَدد 32

القبايِل الصباح لبحر الأُرْدُن

١ وَ قَبِيلَةْ رَأُوبِينْ وَ قَبِيلَةْ قَادْ عِنْدُهُمْ بَهَايِمْ كَتِيرِينْ مَرَّةْ وَاحِدْ. وَ وَكِتْ شَافَوْا أَرْض يَعْزِيرْ وَ أَرْض قِلْعَادْ، هُمَّنْ عِرْفَوْا كَدَرْ الْأَرْض دِي تِوَافِقْ مَعَ الْبَهَايِمْ. ٢ وَ خَلَاصْ جَوْا لِمُوسَى وَ لِرَاجِلْ الدِّينْ أَلِعَازَرْ وَ لِشُيُوخْ الْمُجْتَمَعْ وَ قَالَوْا: ٣ «الْحِلَّالْ هَنَا عَطَرُوتْ وَ دِيبُونْ وَ يَعْزِيرْ وَ نِمْرَةْ وَ حَشْبُونْ وَ أَلِعَالَةْ وَ سَبَامْ وَ نَبُو وَ بَعُونْ دَوْل حِلَّالْ ٤ هَنَا الْبَلَدْ الْاللّٰهْ قَلَعَاهَا وَ أَنْطَاهَا لِمُجْتَمَعْ بَنِي إِسْرَائِيلْ. وَ الْأَرْض دِي مُوَافْقَةْ لِلْبَهَايِمْ. وَ دَاهُو أَنِحْنَ عَبِيدَكْ كُلَ عِنْدِنَا بَهَايِمْ.» ٥ وَ قَالَوْا بَتَّانْ: «كَنْ تَرْضَى لَيْنَا، أَنْطِينَا أَنِحْنَ عَبِيدَكْ الْأَرْض دِي مِثِلْ وَرَثَةْ. مَا تَجْبُرْنَا نَقْطَعَوْا بَحَرْ الْأُرْدُنْ.»

٦ وَ مُوسَى قَالْ لِقَبِيلَةْ قَادْ وَ قَبِيلَةْ رَأُوبِينْ: «مَالَا تِخَلُّوا أَخْوَانْكُو يَمْشُوا الْحَرِبْ وَ إِنْتُو تَقْعُدُوا هِنِي؟ ٧ مَالَا تِفَشُّلُوا بَنِي إِسْرَائِيلْ أَشَانْ مَا يَمْشُوا فِي الْبَلَدْ الْاللّٰهْ أَنْطَاهَا لَيْهُمْ؟ ٨ وَ دَا مِثِلْ الشَّيّءْ الْأَبَّهَاتْكُو سَوَّوْه وَكِتْ أَنَا رَسَّلْتُهُمْ مِنْ قَادِشْ بَرْنِيعَ يُرُوغُوا الْبَلَدْ. ٩ هُمَّنْ مَشَوْا لَحَدِّي وَادِي أَشْكُولْ وَ بَعَدْ عِرْفَوْا الْبَلَدْ، قَمَّوْا يِكَلُّمُوا لِيِفَشُّلُوا بَنِي إِسْرَائِيلْ أَشَانْ مَا يَدْخُلُوا فِي الْبَلَدْ الْاللّٰهْ أَنْطَاهَا لَيْهُمْ.

١٠ «وَ فِي الْوَكِتْ دَاكْ، اللّٰهْ غِضِبْ غَضَبْ شَدِيدْ وَ حَلَفْ وَ قَالْ: ١١ ‹أَبَداً النَّاسْ الْعُمُرْهُمْ مِنْ 20 سَنَةْ وَ فَوْق الْمَرَقَوْا مِنْ بَلَدْ مَصِرْ دَوْل، مَا يَدْخُلُوا فِي الْبَلَدْ الْأَنَا وَاعَدْت بَيْهَا إِبْرَاهِيمْ وَ إِسْحَاقْ وَ يَعْقُوبْ أَشَانْ النَّاسْ دَوْل أَبَوْا مَا يَسْمَعَوْا كَلَامِي. ١٢ إِلَّا كَالِبْ وِلَيْد يَفُونَى الْقِنَازِي وَ يَشُوعْ وِلَيْد نُونْ هُمَّنْ دَوْل بَسْ يَدْخُلُوا بَلَدْ كَنْعَانْ أَشَانْ هُمَّنْ تَابَعَوْا كَلَامِي أَنَا اللّٰهْ.›

١٣ «وَ خَلَاصْ، اللّٰهْ غِضِبْ غَضَبْ شَدِيدْ لِبَنِي إِسْرَائِيلْ وَ خَلَّاهُمْ عَايْرِينْ فِي الصَّحَرَاء لِمُدَّةْ 40 سَنَةْ لَحَدِّي كُلَّ الذُّرِّيَّةْ السَّوَّوْا الْفَسَالَةْ قِدَّامْ اللّٰهْ مَاتَوْا. ١٤ وَ دَاهُو إِنْتُو كُلَ تِدَوْرُوا تِشِيلُوا دَرِبْ أَبَّهَاتْكُو الْمُذْنِبِينْ وَ بَتَّانْ تِجِيبُوا غَضَبْ اللّٰهْ الْمُحْرِقْ فِي بَنِي إِسْرَائِيلْ. ١٥ أَشَانْ كَنْ أَبَيْتُوا مَا تِطِيعُوا اللّٰهْ، هُو بَتَّانْ يِخَلِّيكُو فِي الصَّحَرَاء لِمُدَّةْ طَوِيلَةْ وَ بَيْدَا، تِسَبُّبُوا مَوْت هَنَا كُلَّ الشَّعَبْ دَا.»

١٦ وَ خَلَاصْ، هُمَّنْ قَرَّبَوْا لِمُوسَى وَ قَالَوْا لَيَّهْ: «أَنِحْنَ نِسَوُّوا زَرَايِبْ لِغَنَمْنَا وَ بَهَايِمْنَا وَ نَبْنُوا مُدُنْ لِعِيَالْنَا هِنِي. ١٧ وَ بَعَدْ دَا، نِشِيلُوا سِلَاحْنَا وَ نَمْشُوا قِدَّامْ بَنِي إِسْرَائِيلْ وَ نِوَدُّوهُمْ لَحَدِّي فِي الْبَكَانْ الْاللّٰهْ أَنْطَاهُمْ. وَ لَاكِنْ عِيَالْنَا يَقْعُدُوا هِنِي فِي الْمُدُنْ الْقَوِيِّينْ مِنْ سُكَّانْ الْبَلَدْ دِي. ١٨ وَ أَنِحْنَ مَا نِقَبُّلُوا فِي بُيُوتْنَا لَحَدِّي أَيِّ نَادُمْ مِنْ بَنِي إِسْرَائِيلْ يَلْقَى وَرَثَتَهْ. ١٩ وَ أَنِحْنَ مَا نَلْقَوْا مَعَاهُمْ وَرَثَةْ غَادِي لِبَحَرْ الْأُرْدُنْ أَشَانْ وَرَثَتْنَا أَنِحْنَ قَاعِدَةْ بِجَايِ لِبَحَرْ الْأُرْدُنْ فِي نُصَّهْ الصَّبْحَانِي.»

٢٠ وَ مُوسَى قَالْ: «طَبُّقُوا كَلَامْكُو وَ أَسَّلَّحَوْا وَ حَارُبُوا فِي شَانْ اللّٰهْ. ٢١ وَ خَلِّي كُلَّ رُجَالْكُو يِسَّلَّحَوْا وَ يَقْطَعَوْا بَحَرْ الْأُرْدُنْ فِي شَانْ اللّٰهْ وَ يِشِيلُوا أَرْض عُدْوَانَهْ. ٢٢ وَ خَلِّي رُجَالْكُو مَا يِقَبُّلُوا لَحَدِّي الْأَرْض تَبْقَى تِحِتْ مَسْؤُولِيَّةْ اللّٰهْ. وَ مِثِلْ دَا، وَ لَا اللّٰهْ وَ لَا بَنِي إِسْرَائِيلْ كُلَ يَجْعَلَوْكُو بَرِيِّينْ وَ خَلَاصْ الْأَرْض الْإِنْتُو قَاعِدِينْ فَوْقهَا، اللّٰهْ يَرْضَى هِي تَبْقَى مِثِلْ وَرَثَتْكُو. ٢٣ وَ لَاكِنْ كَنْ وَعَدْكُو دَا مَا طَبَّقْتُوهْ، إِنْتُو سَوَّيْتُوا ذَنِبْ ضِدّ اللّٰهْ وَ بَيْدَا، تَعَرْفُوا كَدَرْ ذَنِبْكُو دَا يَلْحَقْكُو. ٢٤ وَ هَسَّعْ دَا، أَبْنُوا مُدُنْ لِعِيَالْكُو وَ زَرَايِبْ لِغَنَمْكُو وَ لَاكِنْ الْوَعَدْ الْقُلْتُوهْ تِمُّوهْ.»

٢٥ وَ قَبِيلَةْ قَادْ وَ قَبِيلَةْ رَأُوبِينْ قَالَوْا لِمُوسَى: «عَبِيدَكْ يِطَبُّقُوا أَمْرَكْ، يَا سِيدْنَا. ٢٦ هَسَّعْ دَا، عِيَالْنَا وَ عَوِينَّا وَ بَهَايِمْنَا وَ كُلَّ مَالْنَا يَقْعُدُوا هِنِي فِي مُدُنْ قِلْعَادْ. ٢٧ وَ أَنِحْنَ عَبِيدَكْ كَمَانْ نِسَّلَّحَوْا وَ نَمْشُوا الْحَرِبْ تِحِتْ أَمُرْ اللّٰهْ مِثِلْ إِنْتَ قُلْتَهْ يَا سِيدْنَا.»

٢٨ وَ فِي سَبَبْهُمْ، مُوسَى أَنْطَى أَمُرْ لِرَاجِلْ الدِّينْ أَلِعَازَرْ وَ لِيَشُوعْ وِلَيْد نُونْ وَ لِكُبَارَاتْ الْعَايِلَاتْ هَنَا قَبَايِلْ بَنِي إِسْرَائِيلْ. ٢٩ وَ قَالْ: «كَنْ قَبِيلَةْ قَادْ وَ قَبِيلَةْ رَأُوبِينْ يِسَّلَّحَوْا وَ يَقْطَعَوْا بَحَرْ الْأُرْدُنْ مَعَاكُو وَ يِحَارُبُوا فِي شَانْ اللّٰهْ لَحَدِّي الْبَلَدْ تَبْقَى تِحِتْ مَسْؤُولِيِّتْكُو، إِنْتُو كُلَ تَنْطُوهُمْ بَلَدْ قِلْعَادْ مِثِلْ وَرَثَةْ. ٣٠ وَ لَاكِنْ كَنْ أَبَوْا مَا يِسَّلَّحَوْا وَ يَقْطَعَوْا مَعَاكُو، هُمَّنْ يَلْقَوْا وَرَثَتْهُمْ مَعَاكُو فِي بَلَدْ كَنْعَانْ.»

٣١ وَ قَبِيلَةْ قَادْ وَ قَبِيلَةْ رَأُوبِينْ رَدَّوْا لَيَّهْ وَ قَالَوْا: «أَنِحْنَ نِطَبُّقُوا كَلَامْ اللّٰهْ الْقَالَهْ لَيْنَا أَنِحْنَ عَبِيدَكْ. ٣٢ وَ نِشِيلُوا السِّلَاحْ وَ نَمْشُوا لِبَلَدْ كَنْعَانْ مِثِلْ اللّٰهْ أَمَرَانَا وَ لَاكِنْ وَرَثَتْنَا مِنْ الْأَرْض تُكُونْ بِهِنِي جَايْ لِبَحَرْ الْأُرْدُنْ.»

٣٣ وَ لِقَبِيلَةْ قَادْ وَ قَبِيلَةْ رَأُوبِينْ وَ نُصّ مِنْ قَبِيلَةْ مَنَسَّى وِلَيْد يُوسُفْ، مُوسَى أَنْطَاهُمْ مَمْلَكَةْ سِيحُونْ مَلِكْ الْأَمُورِيِّينْ وَ مَمْلَكَةْ عُوقْ مَلِكْ بَاشَانْ يَعْنِي كُلَّ الْبَلَدْ وَ مُدُنْهَا وَ الْحِلَّالْ الْمُحَوِّقِينْهُمْ.

٣٤ وَ قَبِيلَةْ قَادْ بَنَوْا حِلَّالْ دِيبُونْ وَ عَطَرُوتْ وَ عَرُوعِرْ ٣٥ وَ عَطَرُوتْ شُوفَنْ وَ يَعْزِيرْ وَ يُقْبَهَةْ ٣٦ وَ بَيْت نِمْرَةْ وَ بَيْت حَارَانْ. وَ هُمَّنْ بَنَوْا الْمُدُنْ الْقَوِيِّينْ دَوْل وَ سَوَّوْا زَرَايِبْ لِغَنَمْهُمْ.

٣٧ وَ قَبِيلَةْ رَأُوبِينْ بَنَوْا حَشْبُونْ وَ أَلِعَالَةْ وَ قِرْيَتَايِمْ ٣٨ وَ نَبُو وَ بَعَلْ مَاعَوْن وَ سِبْمَةْ. وَ هُمَّنْ غَيَّرَوْا أَسَامَيْ هَنَا حِلَّالْ وَاحِدِينْ وَ أَنْطَوْا أَسَامَيْ جَدِيدِينْ لِلْحِلَّالْ الْهُمَّنْ بَنَوْهُمْ.

٣٩ وَ خَشُمْ بَيْت مَكِيرْ وِلَيْد مَنَسَّى مَشَوْا بَلَدْ قِلْعَادْ وَ طَرَدَوْا الْأَمُورِيِّينْ مِنْهَا وَ شَالَوْهَا. ٤٠ وَ خَلَاصْ، مُوسَى أَنْطَى بَلَدْ قِلْعَادْ لِخَشُمْ بَيْت مَكِيرْ وِلَيْد مَنَسَّى لِيَسْكُنُوا فَوْقهَا. ٤١ وَ ذُرِّيَّةْ يَيِيرْ وِلَيْد مَنَسَّى مَشَوْا شَالَوْا فُرْقَانْ الْأَمُورِيِّينْ وَ سَمَّاهُمْ فُرْقَانْ يَيِيرْ. ٤٢ وَ نُوبَحْ مَشَى شَالْ قَنَاتْ وَ الْحِلَّالْ التَّابْعِينْ لَيْهَا وَ سَمَّاهَا بِأُسْمَهْ نُوبَحْ.