عَدد 6

النادم اليخصِّص نفْسه للّه

١ وَ اللّٰهْ حَجَّى لِمُوسَى وَ قَالْ: ٢ «حَجِّي لِبَنِي إِسْرَائِيلْ وَ قُولْ لَيْهُمْ الْكَلَامْ دَا. أَيِّ رَاجِلْ أَوْ مَرَةْ كَنْ يِعَاهِدْ اللّٰهْ بِنَذِرْ أَشَانْ يِخَصِّصْ نَفْسَهْ لَيَّهْ، ٣ النَّادُمْ دَا مَا يَشْرَبْ خَمَرْ هَنَا عِنَبْ وَ لَا أَيِّ شَرَابْ الْبِسَكِّرْ. وَ مَا يَشْرَبْ شَرَابْ حَامُضْ هَنَا عِنَبْ وَ لَا شَرَابْ حَامُضْ هَنَا أَيِّ شَرَابْ الْبِسَكِّرْ وَ لَا يَشْرَبْ عَصِيرْ هَنَا عِنَبْ وَ لَا يَاكُلْ عِنَبْ لَيِّنْ وَ لَا يَابِسْ. ٤ وَ فِي كُلَّ أَيَّامْ نَذْرَهْ، النَّادُمْ دَا أَبَداً مَا يَاكُلْ أَكِلْ مَارِقْ مِنْ عِيَالْ شَدَرَةْ الْعِنَبْ حَتَّى مِنْ قِشِرْهُمْ وَ لَا عِيَالْهُمْ الدَّاخَلْ كُلَ.

٥ «وَ فِي كُلَّ أَيَّامْ نَذْرَهْ، النَّادُمْ دَا مَا يِزَيِّنْ رَاسَهْ. وَ وَكِتْ يِخَصِّصْ نَفْسَهْ لِلّٰهْ، وَاجِبْ يِخَلِّي صُوفْ رَاسَهْ يِزِيدْ لَحَدِّي يِتِمّ أَيَّامْ نَذْرَهْ. ٦ وَ فِي كُلَّ أَيَّامْ نَذْرَهْ لِلّٰهْ، النَّادُمْ دَا أَبَداً مَا يَمْشِي فِي بَكَانْ نَادُمْ مَيِّتْ. ٧ حَتَّى كَانْ الْمَيِّتْ دَا أَبُوهْ أَوْ أَمَّهْ أَوْ أَخُوهْ أَوْ أَخْتَهْ كُلَ، هُو مَا يِنَجِّسْ بَيَّهْ نَفْسَهْ. أَشَانْ الشَّعَرْ الْقَاعِدْ فِي رَاسَهْ دَا يِوَصِّفْ نَذْرَهْ مَعَ الرَّبّ. ٨ وَ فِي كُلَّ أَيَّامْ نَذْرَهْ، هُو يَبْقَى خَاصّ لِلّٰهْ.

٩ «وَ كَنْ فَجْأَةً نَادُمْ مَاتْ جَنْبَهْ، هُو يِنَّجَّسْ وَ نَذْرَهْ كُلَ. وَ يِطَّهَّرْ فِي الْيَوْم السَّابِعْ وَ فِي الْيَوْم دَا بَسْ، يِزَيِّنْ رَاسَهْ. ١٠ وَ فِي الْيَوْم التَّامِنْ، يِجِيبْ قِمْرِيْ إِتْنَيْن أَوْ فُرُوخْ حَمَامْ إِتْنَيْن لِرَاجِلْ الدِّينْ فِي مَدَخَلْ خَيْمَةْ الْإِجْتِمَاعْ. ١١ وَ رَاجِلْ الدِّينْ يِقَدِّمْ الْوَاحِدْ ضَحِيَّةْ لِكَفَّارَةْ الذَّنِبْ وَ الْآخَرْ ضَحِيَّةْ مُحَرَّقَةْ. وَ دَا يَبْقَى كَفَّارَةْ لِلذَّنِبْ الْهُو سَوَّاهْ بِسَبَبْ الْمَيِّتْ وَ فِي نَفْس الْيَوْم هُو بَتَّانْ يِخَصِّصْ رَاسَهْ. ١٢ وَ يِخَصِّصْ نَفْسَهْ مِنْ جَدِيدْ لِلّٰهْ لَحَدِّي يِتِمّ نَذْرَهْ. وَ يِجِيبْ خَرُوفْ وَلْد سَنَةْ وَ يِقَدِّمَهْ ضَحِيَّةْ لِكَفَّارَةْ الْخَطَا. وَ الْأَيَّامْ الْفَاتَوْا مَا يَحْسِبْهُمْ أَشَانْ نَذْرَهْ الْأَوَّلْ دَا أَنَّجَّسْ خَلَاصْ.

١٣ «وَ دَاهُو قَانُونْ النَّذِرْ. وَكِتْ النَّادُمْ دَا يِتِمّ نَذْرَهْ، يِوَدُّوهْ فِي مَدَخَلْ خَيْمَةْ الْإِجْتِمَاعْ. ١٤ وَ يِوَدِّي مَعَايَهْ هَدِيَّةْ لِلّٰهْ. وَ الْهَدِيَّةْ دِي، مُكَوَّنَةْ مِنْ خَرُوفْ وَلْد سَنَةْ الْمَا عِنْدَهْ أَيِّ عَيْب لِيِقَدِّمَهْ ضَحِيَّةْ مُحَرَّقَةْ وَ غَنَمَايْ بِنْت سَنَةْ الْمَا عِنْدَهَا أَيِّ عَيْب لِيِقَدِّمْهَا هَدِيَّةْ لِكَفَّارَةْ الذَّنِبْ وَ كَبِشْ الْمَا عِنْدَهْ أَيِّ عَيْب لِيِقَدِّمَهْ ضَحِيَّةْ سَلَامَةْ ١٥ وَ قُفَّةْ الْعِنْدَهَا كَعَكْ السَّوَّوْه بِدَقِيقْ بَلَا تَوَّارَةْ مُخَلْبَطْ بِدِهِنْ وَ كِسَارْ مَمْسُوحْ بِدِهِنْ وَ هَدَايَا آخَرِينْ الْوَاحِدْ هَنَا دَقِيقْ وَ الْآخَرْ هَنَا شَرَابْ. ١٦ وَ رَاجِلْ الدِّينْ يِوَدِّي كُلَّ الْهَدَايَا دَوْل قِدَّامْ اللّٰهْ وَ يِقَدِّمْهُمْ ضَحِيَّةْ لِكَفَّارَةْ الذَّنِبْ وَ ضَحِيَّةْ مُحَرَّقَةْ. ١٧ وَ الْكَبِشْ هُو يِقَدِّمَهْ لِلّٰهْ ضَحِيَّةْ السَّلَامَةْ مَعَ الْقُفَّةْ الْعِنْدَهَا كَعَكْ بَلَا تَوَّارَةْ. وَ بَتَّانْ رَاجِلْ الدِّينْ يِقَدِّمْ هَدِيَّةْ هَنَا دَقِيقْ وَ هَدِيَّةْ هَنَا شَرَابْ.

١٨ «وَ النَّادُمْ السَّوَّى النَّذِرْ يِزَيِّنْ رَاسَهْ فِي مَدَخَلْ خَيْمَةْ الْإِجْتِمَاعْ وَ يِشِيلْ شَعَرْ رَاسَهْ وَ يَزْقُلَهْ فِي النَّارْ وَكِتْ هِي قَاعِدَةْ تِنَجِّضْ ضَحِيَّةْ السَّلَامَةْ. ١٩ وَ رَاجِلْ الدِّينْ يِشِيلْ الْقَايْمَةْ الْقِدَّامِيَّةْ هَنَا الْكَبِشْ وَكِتْ تَنْجَضْ وَ يِشِيلْ مِنْ الْقُفَّةْ كَعَكَايْ بَلَا تَوَّارَةْ وَ يِشِيلْ كِسَارَايْ وَ يُخُطُّهُمْ فِي إِيدَيْن النَّادُمْ السَّوَّى النَّذِرْ بَعَدْ زَيَّنْ رَاسَهْ. ٢٠ وَ رَاجِلْ الدِّينْ يَرْفَعْ الْهَدَايَا دَوْل قِدَّامْ اللّٰهْ. وَ دَا يَبْقَى حَقّ مُقَدَّسْ لِرَاجِلْ الدِّينْ يِزِيدَهْ فِي الْهَدِيَّةْ الْمَرْفُوعَةْ هَنَا الزَّوْر وَ الْقَايْمَةْ الْوَرَّانِيَّةْ الْوَاجِبْ لَيَّهْ. وَ بَعَدْ دَا، النَّادُمْ السَّوَّى النَّذِرْ يَقْدَرْ يَشْرَبْ خَمَرْ مِثِلْ أَوَّلْ.

٢١ «وَ خَلَاصْ دَا قَانُونْ النَّادُمْ الْيِعَاهِدْ اللّٰهْ بِنَذِرْ. هُو يِقَدِّمْ الْهَدِيَّةْ لِلّٰهْ مِثِلْ هُو قَالَهْ فِي نَذْرَهْ وَ كَنْ يِزِيدْ عَلَيْهَا شَيّءْ آخَرْ كُلَ مَا مُشْكِلَةْ. لَاكِنْ هُو يِسَوِّيهْ حَسَبْ مُعَاهَدَتَهْ الْهُو سَوَّاهَا وَ حَسَبْ قَانُونْ النَّذِرْ.»

اللّه أنْطى كلِمات البركة

٢٢ وَ اللّٰهْ حَجَّى لِمُوسَى وَ قَالْ: ٢٣ «حَجِّي لِهَارُونْ وَ أَوْلَادَهْ وَ قُولْ لَيْهُمْ كَنْ يِبَارُكُوا بَنِي إِسْرَائِيلْ، خَلِّي يُقُولُوا مِثِلْ دَا:

٢٤ ‹اللّٰهْ يِبَارِكُّو

وَ يَحْفَضْكُو.

٢٥ اللّٰهْ يِوَجِّهْ عَلَيْكُو نُورْ وِجْهَهْ

وَ يَرْحَمْكُو.

٢٦ اللّٰهْ يَرْضَى بَيْكُو

وَ يَنْطِيكُو السَّلَامْ.›

٢٧ وَ الْكَلِمَاتْ دَوْل يِثَبُّتُوا أُسْمِي فِي بَنِي إِسْرَائِيلْ وَ أَنَا نِبَارِكْهُمْ.»