لاوِيِّين 16

يوم الكفّارة

١ وَ اللّٰهْ حَجَّى لِمُوسَى بَعَدْ مَوْت أَوْلَادْ هَارُونْ الْإِتْنَيْن الْمَاتَوْا وَكِتْ جَوْا قِدَّامْ اللّٰهْ. ٢ وَ اللّٰهْ قَالْ لِمُوسَى: قُولْ لِأَخُوكْ هَارُونْ مَا يَدْخُلْ فِي أَيِّ وَكِتْ فِي الْبَكَانْ الْمُقَدَّسْ مَرَّةْ وَاحِدْ. وَ دَا، غَادِي لِلسِّتَارْ قِدَّامْ سِدَادَةْ الصَّنْدُوقْ. أَشَانْ مَا يُمُوتْ وَكِتْ نِبِينْ فِي سَحَابَايْ مِنْ فَوْق لِسِدَادَةْ الصَّنْدُوقْ.

٣ وَ دَاهُو الْوَاجِبْ لِهَارُونْ وَكِتْ يَدْخُلْ فِي الْبَكَانْ الْمُقَدَّسْ مَرَّةْ وَاحِدْ. هُو يِشِيلْ تَوْر ضَحِيَّةْ لِكَفَّارَةْ الذَّنِبْ وَ كَبِشْ لِلضَّحِيَّةْ الْمُحَرَّقَةْ. ٤ وَ هُو يَلْبَسْ خَلَقْ خَاصّ وَ سُرْوَالْ قِصَيِّرْ وَ يَرْبُطْ صُلْبَهْ بِحِزَامْ وَ يُكُجّ كَدْمُولْ، كُلُّهُمْ مِنْ قُمَاشْ هَنَا كَتَّانْ. وَ دَا كُلَّ اللُّبَاسْ الْخَاصّ. وَ هُو يِلْبَرَّدْ وَ يَلْبَسَهْ. ٥ وَ هُو يَلْقَى مِنْ مُجْتَمَعْ بَنِي إِسْرَائِيلْ إِتْنَيْن تُيُوسْ ضَحِيَّةْ لِكَفَّارَةْ الذَّنِبْ وَ وَاحِدْ كَبِشْ لِلضَّحِيَّةْ الْمُحَرَّقَةْ.

٦ وَ خَلَاصْ، هَارُونْ يِقَدِّمْ التَّوْر لِلضَّحِيَّةْ لِكَفَّارَةْ ذَنْبَهْ وَ يِسَوِّي كَفَّارَةْ لَيَّهْ هُو وَ لِعَايِلْتَهْ. ٧ وَ هُو يِشِيلْ التُّيُوسْ الْإِتْنَيْن وَ يُخُطُّهُمْ قِدَّامْ اللّٰهْ فِي مَدَخَلْ خَيْمَةْ الْإِجْتِمَاعْ. ٨ وَ هَارُونْ يِسَوِّي أَمْ عِيَيْدَاتْ لِيَعَرِفْ التَّيْس الْوَيْنُو يَبْقَى لِلّٰهْ وَ الْوَيْنُو يَبْقَى مَطْرُودْ لِلْجِنّ عَزَازَيْل. ٩ وَ هَارُونْ يِشِيلْ التَّيْس الْبِقِي لِلّٰهْ وَ يِقَدِّمَهْ ضَحِيَّةْ لِكَفَّارَةْ الذَّنِبْ. ١٠ وَ التَّيْس الْيَبْقَى مَطْرُودْ لِلْجِنّ عَزَازَيْل يُخُطُّوهْ حَيّ قِدَّامْ اللّٰهْ. وَ يَبْقَى كَفَّارَةْ وَكِتْ يَطُرْدُوهْ فِي الْخَلَاءْ.

١١ وَ هَارُونْ يِقَدِّمْ التَّوْر لِضَحِيَّةْ كَفَّارَةْ الذَّنِبْ وَ يِسَوِّي كَفَّارَةْ لَيَّهْ هُو وَ لِعَايِلْتَهْ. وَ بَعَدْ دَا، يَدْبَحْ التَّوْر هَنَا ضَحِيَّةْ كَفَّارَةْ ذَنْبَهْ. ١٢ وَ هُو يِشِيلْ مُخْبَرْ مَلَانْ جَمُرْ مِنْ الْمَدْبَحْ الْقِدَّامْ اللّٰهْ وَ مَلْيَةْ إِيدْ إِتْنَيْن هَنَا بَخُورْ مُعَطَّرْ مَرْحُوكْ. وَ يِوَدِّيهُمْ كُلَّ كَيْ غَادِي لِلسِّتَارْ. ١٣ وَ هُو يُصُبّ الْبَخُورْ دَا فِي النَّارْ قِدَّامْ اللّٰهْ أَشَانْ الدُّخَّانْ هَنَا الْبَخُورْ دَا يِغَطِّي سِدَادَةْ صَنْدُوقْ الْمُعَاهَدَةْ. وَ بِمِثِلْ دَا، هُو مَا يُمُوتْ. ١٤ وَ هُو يِشِيلْ مِنْ دَمّ التَّوْر بِأُصْبَعَهْ الزَّيْنَايْ وَ يُرُشّ بَيَّهْ سِدَادَةْ الصَّنْدُوقْ بِنُصّ الصَّبَاحْ وَ قِدَّامْ الصَّنْدُوقْ. وَ بِأُصْبَعَهْ، هُو يُرُشّ الدَّمّ سَبْعَةْ مَرَّاتْ فِي السِّدَادَةْ مِنْ قِدَّامْ.

١٥ وَ يَدْبَحْ التَّيْس ضَحِيَّةْ لِكَفَّارَةْ ذَنِبْ الشَّعَبْ وَ يِوَدِّي الدَّمّ غَادِي لِلسِّتَارْ. وَ بِالدَّمّ دَا، هُو يِسَوِّي نَفْس الشَّيّءْ السَّوَّاهْ بِدَمّ التَّوْر، هُو يُرُشّ السِّدَادَةْ وَ قِدَّامْ الصَّنْدُوقْ. ١٦ وَ بِمِثِلْ دَا، هُو يِسَوِّي فِي الْبَكَانْ الْمُقَدَّسْ مَرَّةْ وَاحِدْ كَفَّارَةْ لِنَجَاسَةْ بَنِي إِسْرَائِيلْ وَ عِصْيَانْهُمْ وَ كُلَّ ذُنُوبْهُمْ. وَ يِسَوِّي نَفْس الشَّيّءْ لِخَيْمَةْ الْإِجْتِمَاعْ الْقَاعِدَةْ مَعَاهُمْ فِي أُسُطْ نَجَاسِتْهُمْ. ١٧ وَ نَادُمْ وَاحِدْ كُلَ مَا يُكُونْ فِي خَيْمَةْ الْإِجْتِمَاعْ وَكِتْ هَارُونْ يَدْخُلْ فِي الْبَكَانْ الْمُقَدَّسْ مَرَّةْ وَاحِدْ لِيِسَوِّي كَفَّارَةْ وَ لَحَدِّي يَمْرُقْ. وَ هُو يِسَوِّي كَفَّارَةْ لَيَّهْ هُو وَ لِعَايِلْتَهْ وَ لِكُلَّ مُجْتَمَعْ بَنِي إِسْرَائِيلْ.

١٨ وَ يَمْرُقْ عَلَيْ الْمَدْبَحْ الْقَاعِدْ قِدَّامْ اللّٰهْ وَ يِسَوِّي فَوْقَهْ الْكَفَّارَةْ. وَ يِشِيلْ مِنْ دَمّ التَّوْر وَ دَمّ التَّيْس وَ يُخُطَّهْ فِي قُرُونْ الْمَدْبَحْ مِنْ كُلِّ جِيهَةْ. ١٩ وَ هُو يِشِيلْ بِأُصْبَعَهْ مِنْ الدَّمّ وَ يُرُشّ الْمَدْبَحْ سَبْعَةْ مَرَّاتْ. وَ يِطَهِّرَهْ وَ يِخَصِّصَهْ مِنْ نَجَاسَةْ بَنِي إِسْرَائِيلْ.

٢٠ وَ وَكِتْ يِكَمِّلْ خَلَاصْ مِنْ الْكَفَّارَةْ هَنَا الْبَكَانْ الْمُقَدَّسْ مَرَّةْ وَاحِدْ وَ خَيْمَةْ الْإِجْتِمَاعْ وَ الْمَدْبَحْ، هُو يِقَدِّمْ التَّيْس الْحَيّ. ٢١ وَ هَارُونْ يُخُطّ إِيدَيْنَهْ فِي رَاسْ التَّيْس الْحَيّ وَ يِعْتَرِفْ بِكُلَّ الْخَطَا وَ كُلَّ الْعِصْيَانْ وَ كُلَّ الذُّنُوبْ هَنَا بَنِي إِسْرَائِيلْ وَ يُخُطُّهُمْ فِي رَاسْ التَّيْس دَا. وَ رَاجِلْ وَاحِدْ جَاهِزْ يِوَدِّيهْ فِي الْخَلَاءْ. ٢٢ وَ التَّيْس يِشِيلْ كُلَّ خَطَايَاهُمْ فِي رَاسَهْ وَ يِوَدِّيهُمْ فِي الصَّحَرَاء. وَ بِمِثِلْ دَا بَسْ، يَطُرْدُوا التَّيْس فِي الْخَلَاءْ.

٢٣ وَ بَعَدْ دَا، هَارُونْ يَدْخُلْ فِي خَيْمَةْ الْإِجْتِمَاعْ وَ يِسِلّ خُلْقَانَهْ هَنَا الْكَتَّانْ اللِّبِسْهُمْ وَكِتْ دَخَلْ فِي الْبَكَانْ الْمُقَدَّسْ مَرَّةْ وَاحِدْ. وَ يُخُطُّهُمْ فِي الْبَكَانْ دَا. ٢٤ وَ هُو يِلْبَرَّدْ فِي بَكَانْ مُقَدَّسْ وَ يَلْبَسْ خُلْقَانَهْ. وَ خَلَاصْ، يَمْرُقْ وَ يِقَدِّمْ ضَحِيّتَهْ الْمُحَرَّقَةْ وَ الضَّحِيَّةْ الْمُحَرَّقَةْ هَنَا الشَّعَبْ وَ هُو يِسَوِّي كَفَّارَةْ لَيَّهْ هُو وَ لِلشَّعَبْ. ٢٥ وَ هُو يِحَرِّقْ الشَّحَمْ هَنَا الضَّحِيَّةْ لِكَفَّارَةْ الذَّنِبْ فِي الْمَدْبَحْ.

٢٦ وَ الرَّاجِلْ الْوَدَّى التَّيْس الْمَطْرُودْ لِلْجِنّ عَزَازَيْل يِغَسِّلْ خُلْقَانَهْ وَ يِلْبَرَّدْ وَ بَعَدْ دَا، يَدْخُلْ فِي الْفَرِيقْ. ٢٧ وَ يِشِيلُوا تَوْر الضَّحِيَّةْ هَنَا كَفَّارَةْ الذَّنِبْ وَ تَيْس الضَّحِيَّةْ هَنَا كَفَّارَةْ الذَّنِبْ، الْوَدَّوْا دَمُّهُمْ فِي الْبَكَانْ الْمُقَدَّسْ مَرَّةْ وَاحِدْ لِلْكَفَّارَةْ. وَ يِشِيلُوا الْفَضَّلْ مِنْ الضَّحَايَا دَوْل وَ يِوَدُّوهْ بَرَّا مِنْ الْفَرِيقْ وَ يِحَرُّقُوا فِرَاوْهُمْ وَ لَحَمْهُمْ وَ بَعَرْهُمْ. ٢٨ وَ النَّادُمْ الْيِحَرِّقْهُمْ، وَاجِبْ يِغَسِّلْ خُلْقَانَهْ وَ يِلْبَرَّدْ. وَ بَعَدْ دَا، يَدْخُلْ فِي الْفَرِيقْ.

٢٩ وَ دَاهُو الْيَبْقَى لَيْكُو شَرْط دَايِمْ. وَ فِي الْيَوْم الْعَاشِرْ هَنَا الشَّهَرْ السَّابِعْ، صُومُوا وَ مَا تِسَوُّوا أَيِّ خِدْمَةْ وَ لَا إِنْتُو وَ لَا الْأَجْنَبِي السَّاكِنْ مَعَاكُو. ٣٠ وَ فِي الْيَوْم دَا، يِسَوُّوا لَيْكُو كَفَّارَةْ لِيِطَهُّرُوكُو مِنْ كُلَّ ذُنُوبْكُو وَ تَبْقَوْا طَاهِرِينْ قِدَّامْ اللّٰهْ. ٣١ وَ الْيَوْم دَا يَبْقَى لَيْكُو يَوْم هَنَا سَبْت، يَوْم هَنَا جُمَّةْ وَ صِيَامْ. وَ دَا يَبْقَى لَيْكُو شَرْط دَايِمْ. ٣٢ وَ الْكَفَّارَةْ دِي يِسَوِّيهَا رَاجِلْ الدِّينْ الْمَسَحَوْه وَ دَرَّجَوْه لِيِشِيلْ بَكَانْ أَبُوهْ رَاجِلْ الدِّينْ. وَ يَلْبَسْ خُلْقَانْ الْكَتَّانْ الْخَاصِّيْن. ٣٣ وَ هُو يِسَوِّي كَفَّارَةْ لِلْبَكَانْ الْمُقَدَّسْ مَرَّةْ وَاحِدْ وَ لِخَيْمَةْ الْإِجْتِمَاعْ وَ لِلْمَدْبَحْ. وَ يِسَوِّي كَفَّارَةْ لِرُجَالْ الدِّينْ وَ لِكُلَّ مُجْتَمَعْ الشَّعَبْ. ٣٤ وَ دَا يَبْقَى لَيْكُو شَرْط دَايِمْ فِي أَيِّ سَنَةْ وَكِتْ تِسَوُّوا كَفَّارَةْ لِكُلَّ ذُنُوبْ بَنِي إِسْرَائِيلْ.

وَ سَوَّوْا كُلَّ شَيّءْ مِثِلْ اللّٰهْ أَمَرْ بَيَّهْ مُوسَى.