مُعاهدة اللّه مع نُوح
٩
١ وَ الرَّبّ بَارَكْ نُوحْ وَ أَوْلَادَهْ وَ قَالْ لَيْهُمْ:
«أَلْدَوْا وَ أَبْقَوْا كَتِيرِينْ وَ أَمْلَوْا الْأَرْض.
٢ وَ كُلَّ الْمَخْلُوقِينْ الْحَيِّينْ فِي الْأَرْض يَخَافَوْا مِنْكُو وَ الرُّعُبْ يَكْرُبْهُمْ،
مِثِلْ طُيُورْ السَّمَاءْ وَ زَوَاحِفْ الْأَرْض وَ حُوتْ الْبَحَرْ،
كُلُّهُمْ كَيْ نَنْطِيهُمْ لَيْكُو فِي إِيدَيْكُو.
٣ مِثِلْ أَوَّلْ أَنْطَيْتكُو الْخَضَارْ لِلْأَكِلْ،
هَسَّعْ نَنْطِيكُو كُلَّ الْمَخْلُوقِينْ الْحَيِّينْ.
٤ «لَاكِنْ مَا تَاكُلُوا لَحَمْ بِدَمَّهْ أَشَانْ الرُّوحْ قَاعِدَةْ فِي دَمَّهْ.
٥ وَ لَاكِنْ كَنْ لِدَمُّكُو إِنْتُو أَوْ حَيَاتْكُو،
أَنَا نِعَاقِبْ الْحَيْوَانْ الْيَكْتُلْ نَادُمْ.
وَ نِعَاقِبْ أَيِّ إِنْسَانْ الْيَكْتُلْ إِنْسَانْ.
أَيْوَى،
نِعَاقِبَهْ فِي شَانْ حَيَاةْ أَخُوهْ الْهُو كَتَلَهْ.
٦ وَ النَّادُمْ الدَّفَّقْ دَمّ هَنَا نَادُمْ،
هُو كُلَ،
نَادُمْ آخَرْ يِدَفِّقْ دَمَّهْ.
أَشَانْ اللّٰهْ خَلَقْ الْإِنْسَانْ فِي صُورْتَهْ.
٧ وَ كَنْ لَيْكُو إِنْتُو،
أَلْدَوْا وَ أَبْقَوْا كَتِيرِينْ وَ زِيدُوا فِي الْأَرْض.»
٨ وَ الرَّبّ قَالْ بَتَّانْ لِنُوحْ وَ لِعِيَالَهْ الْمَعَايَهْ:
٩ «كَنْ لَيِّ أَنَا،
نِسَوِّي مُعَاهَدَتِي مَعَاكُو وَ مَعَ ذُرِّيِّتْكُو مِنْ بَعَدْكُو،
١٠ وَ مَعَ كُلَّ الْمَخْلُوقِينْ الْحَيِّينْ الْقَاعِدِينْ مَعَاكُو،
الطُّيُورْ وَ الْبَهَايِمْ وَ الْحَيْوَانَاتْ،
يَعْنِي كُلَّ الْمَخْلُوقِينْ الْمَرَقَوْا مَعَاكُو مِنْ السَّفِينَةْ.
وَ دَوْل كُلَّ الْمَخْلُوقِينْ الْيِعِيشُوا فِي الْأَرْض.
١١ وَ أَنَا نِسَوِّي مُعَاهَدَتِي مَعَاكُو وَ أَبَداً كُلَّ مَخْلُوقْ حَيّ مَا يِدَّمَّرْ بِالْغَرَقْ.
وَ أَبَداً الْغَرَقْ مَا يِدَمِّرْ الْأَرْض.»
علامة العلاقة
١٢ وَ الرَّبّ قَالْ:
«دِي هِي الْعَلَامَةْ هَنَا الْمُعَاهَدَةْ النُّخُطَّهَا بَيْنِي وَ بَيْنكُو وَ بَيْن كُلَّ الْمَخْلُوقِينْ الْمَعَاكُو.
وَ الْمُعَاهَدَةْ دِي تَبْقَى دَايْمَةْ مِنْ ذُرِّيَّةْ لِذُرِّيَّةْ.
١٣ أَنَا نُخُطّ نُبَّالِي وَ هُو حَجَّازْ الْمَطَرْ فِي السَّحَابْ وَ دَا يَبْقَى عَلَامَةْ هَنَا الْمُعَاهَدَةْ بَيْنِي وَ بَيْن الْأَرْض.
١٤ وَكِتْ نِلِمّ السَّحَابْ مِنْ فَوْق لِلْأَرْض وَ حَجَّازْ الْمَطَرْ يِبِينْ فِي لُبّ السَّحَابْ دَا،
١٥ أَنَا نِفَكِّرْ فِي الْمُعَاهَدَةْ السَّوَّيْتهَا مَعَاكُو وَ مَعَ كُلَّ مَخْلُوقْ حَيّ.
وَ أَبَداً الْغَرَقْ مَا يَنْزِلْ لِيِدَمِّرْ كُلَّ مَخْلُوقْ حَيّ.
١٦ وَكِتْ حَجَّازْ الْمَطَرْ يِبِينْ فِي السَّحَابْ،
أَنَا نِشِيفَهْ وَ نِفَكِّرْ فِي الْمُعَاهَدَةْ الدَّايْمَةْ الْقَاعِدَةْ بَيْنِي أَنَا الرَّبّ وَ بَيْن كُلَّ النَّاسْ وَ كُلَّ مَخْلُوقْ حَيّ فِي الْأَرْض.»
١٧ وَ الرَّبّ قَالْ لِنُوحْ:
«دِي بَسْ الْعَلَامَةْ هَنَا الْمُعَاهَدَةْ السَّوَّيْتهَا مَعَ كُلَّ الْمَخْلُوقِينْ الْقَاعِدِينْ فِي الْأَرْض.»
أوْلاد نُوح التلاتة
١٨ وَ نُوحْ مَرَقْ مِنْ السَّفِينَةْ مَعَ عِيَالَهْ وَ هُمَّنْ سَامْ وَ حَامْ وَ يَافَثْ.
وَ حَامْ هُو أَبُوهْ لِكَنْعَانْ.
١٩ وَ كُلَّ النَّاسْ الْمُشَتَّتِينْ فِي الْأَرْض مَرَقَوْا مِنْ عِيَالْ نُوحْ التَّلَاتَةْ دَوْل بَسْ.
٢٠ وَ نُوحْ هُو أَوَّلْ حَرَّاتِي الْمَقَّنْ جِنَيْنَةْ عِنَبْ.
٢١ وَ قَمَّ شِرِبْ الْخَمَرْ هَنَا عَصِيرْ الْعِنَبْ وَ سِكِرْ وَ رَقَدْ عَرْيَانْ فِي لُبّ خَيْمِتَهْ.
٢٢ وَ حَامْ أَبُو كَنْعَانْ شَافْ عِرَيْ أَبُوهْ وَ مَرَقْ مَشَى خَبَّرْ أَخْوَانَهْ.
٢٣ وَ خَلَاصْ،
سَامْ وَ يَافَثْ شَالَوْا خَلَقْ كَبِيرْ هَنَا أَبُوهُمْ وَ خَطَّوْه فِي كَتَافَيْهُمْ وَ رَاغَوْا بِقَفَاهُمْ وَ غَطَّوْا عَوْرَةْ أَبُوهُمْ.
وَ مَا شَافَوْا عَوْرَةْ أَبُوهُمْ أَشَانْ هُمَّنْ مَا مُوَجِّهِينْ عَلَيَّهْ.
٢٤ وَكِتْ السَّكَرْ شَتَّتْ مِنْ نُوحْ،
هُو عِرِفْ الشَّيّءْ الْوِلَيْدَهْ الصَّغَيَّرْ حَامْ سَوَّاهْ لَيَّهْ.
٢٥ وَ قَالْ:
«اللّٰهْ يَلْعَنْ كَنْعَانْ
وَ يَبْقَى عَبْد الْعَبِيدْ هَنَا أَخْوَانَهْ.»
٢٦ وَ قَالْ بَتَّانْ:
«بَارَكْ اللّٰهْ إِلٰـهْ سَامْ.
خَلِّي كَنْعَانْ يَبْقَى عَبِدْ لِسَامْ!
٢٧ خَلِّي الرَّبّ يِوَسِّعْ تُرَابْ يَافَثْ
وَ هُو يَسْكُنْ فِي خَيْمَةْ سَامْ
وَ كَنْعَانْ يَبْقَى لَيَّهْ عَبِدْ.»