الذُرّية من آدَم لحدي نُوح
٥
١ دَاهُو كِتَابْ ذُرِّيَّةْ آدَمْ.
يَوْم الرَّبّ خَلَقْ الْإِنْسَانْ،
هُو خَلَقَهْ فِي صُورْتَهْ.
٢ رَاجِلْ وَ مَرَةْ،
هُو خَلَقَاهُمْ وَ بَارَكَاهُمْ وَ سَمَّاهُمْ إِنْسَانْ مِنْ يَوْم الْهُو خَلَقَاهُمْ.
٣ وَكِتْ آدَمْ عِنْدَهْ 130 سَنَةْ،
وِلِدْ وِلَيْد الْيِشَابِهَهْ وَ فِي صُورْتَهْ.
وَ سَمَّاهْ شِيتْ.
٤ بَعَدْ وَالُودَةْ شِيتْ،
آدَمْ عَاشْ بَتَّانْ 800 سَنَةْ وَ وِلِدْ أَوْلَادْ وَ بَنَاتْ آخَرِينْ.
٥ وَ مَاتْ فِي عُمُرْ هَنَا 930 سَنَةْ.
٦ وَكِتْ شِيتْ عِنْدَهْ 105 سَنَةْ،
وِلِدْ أَنُوشْ.
٧ وَ بَعَدْ وَالُودَةْ أَنُوشْ،
شِيتْ عَاشْ بَتَّانْ 807 سَنَةْ وَ وِلِدْ أَوْلَادْ وَ بَنَاتْ آخَرِينْ.
٨ وَ مَاتْ فِي عُمُرْ هَنَا 912 سَنَةْ.
٩ وَكِتْ أَنُوشْ عِنْدَهْ 90 سَنَةْ،
وِلِدْ قِنَانْ.
١٠ وَ بَعَدْ وَالُودَةْ قِنَانْ،
أَنُوشْ عَاشْ بَتَّانْ 815 سَنَةْ وَ وِلِدْ أَوْلَادْ وَ بَنَاتْ آخَرِينْ.
١١ وَ مَاتْ فِي عُمُرْ هَنَا 905 سَنَةْ.
١٢ وَكِتْ قِنَانْ عِنْدَهْ 70 سَنَةْ،
وِلِدْ مَهْلَلِيلْ.
١٣ وَ بَعَدْ وَالُودَةْ مَهْلَلِيلْ،
قِنَانْ عَاشْ بَتَّانْ 840 سَنَةْ وَ وِلِدْ أَوْلَادْ وَ بَنَاتْ آخَرِينْ.
١٤ وَ مَاتْ فِي عُمُرْ هَنَا 910 سَنَةْ.
١٥ وَكِتْ مَهْلَلِيلْ عِنْدَهْ 65 سَنَةْ،
وِلِدْ يَارَدْ.
١٦ وَ بَعَدْ وَالُودَةْ يَارَدْ،
مَهْلَلِيلْ عَاشْ بَتَّانْ 830 سَنَةْ وَ وِلِدْ أَوْلَادْ وَ بَنَاتْ آخَرِينْ.
١٧ وَ مَاتْ فِي عُمُرْ هَنَا 895 سَنَةْ.
١٨ وَكِتْ يَارَدْ عِنْدَهْ 162 سَنَةْ،
وِلِدْ أَخْنُوخْ.
١٩ وَ بَعَدْ وَالُودَةْ أَخْنُوخْ،
يَارَدْ عَاشْ بَتَّانْ 800 سَنَةْ وَ وِلِدْ أَوْلَادْ وَ بَنَاتْ آخَرِينْ.
٢٠ وَ مَاتْ فِي عُمُرْ هَنَا 962 سَنَةْ.
٢١ وَكِتْ أَخْنُوخْ عِنْدَهْ 65 سَنَةْ،
وِلِدْ مَتُوشَلَحْ.
٢٢ وَ بَعَدْ وَالُودَةْ مَتُوشَلَحْ كُلَ،
أَخْنُوخْ قَاعِدْ يِتَابِعْ دَرِبْ الرَّبّ لَحَدِّي 300 سَنَةْ وَ وِلِدْ أَوْلَادْ وَ بَنَاتْ آخَرِينْ.
٢٣ وَ أَخْنُوخْ عَاشْ 365 سَنَةْ.
٢٤ وَ أَخْنُوخْ تَابَعْ دَرِبْ الرَّبّ وَ بَعَدْ دَا،
بِقِي مَا فِيهْ أَشَانْ الرَّبّ رَفَعَهْ.
٢٥ وَكِتْ مَتُوشَلَحْ عِنْدَهْ 187 سَنَةْ،
وِلِدْ لَامَكْ.
٢٦ بَعَدْ وَالُودَةْ لَامَكْ،
مَتُوشَلَحْ عَاشْ بَتَّانْ 782 سَنَةْ وَ وِلِدْ أَوْلَادْ وَ بَنَاتْ آخَرِينْ.
٢٧ وَ مَاتْ فِي عُمُرْ هَنَا 969 سَنَةْ.
٢٨ وَكِتْ لَامَكْ عِنْدَهْ 182 سَنَةْ،
وِلِدْ وِلَيْد.
٢٩ وَ سَمَّاهْ نُوحْ وَ قَالْ:
«دَا الْوِلَيْد الْيِصَبِّرْنَا مِنْ تَعَبْ الْخِدْمَةْ اللِّحِقْنَا مِنْ يَوْم اللّٰهْ لَعَنْ التُّرَابْ.»
٣٠ وَ بَعَدْ وَالُودَةْ نُوحْ،
لَامَكْ عَاشْ بَتَّانْ 595 سَنَةْ وَ وِلِدْ أَوْلَادْ وَ بَنَاتْ آخَرِينْ.
٣١ وَ مَاتْ فِي عُمُرْ هَنَا 777 سَنَةْ.
٣٢ وَكِتْ نُوحْ عِنْدَهْ 500 سَنَةْ،
هُو وِلِدْ تَلَاتَةْ أَوْلَادْ وَ هُمَّنْ سَامْ وَ حَامْ وَ يَافَثْ.