याकूब 4

परमेसवर कर बस में हो जावा

1 तुमन कर मझारे लड़ाई अऊ झगरा कहां ले आए गईस? का ओही रीझ-रंग कर ईछा ले नई आईस, जेमन तुमन कर भीतरी में लड़त-भिड़त रथें। 2 तुमन कोनो चीज ला पाए कर असरा करथा, अऊ तुमन के नई मिले, तुमन मईनसे कर हतिया करथा अऊ डाह करथा अऊ कांही नई पावा, तबोले ले तुमन लड़था अऊ झगरा बाझ था। तुमन अपन ईछा कर चीज ला नई पावा, काबर कि परमेसवर ठन ले नई मांगा। 3 तुमन मांगथा अऊ नई पावा, काबरकि तुमन बुरा ईछा ले मांगथा, कि ओला अपन रीझ-रंग में उड़ाए देआ। 4 ए बेभीचार करोईया मन, का तुमन नई जाना कि ए संसार ले मया कराई कर मतलब, परमेसवर ठन ले बएर करई हवे? जे कोनों हर संसार कर संगता होए बर चाहथे, ओहर अपन आप ला परमेसवर कर बईरी बनाथे। 5 का तुमन ए समझथा कि पबितर किताब हर अनभनिया कथे, कि “जे आतमा ला परमेसवर हर हमर भीतरी बसाईसे ओहर ए चाहथे कि हमके मन ला अपन बर राखे?” 6 बकीन ओहर तो अगराहा अनुगरह देथे, तेकर ले परमेसवर कर किताब में अईसन लिखल हवे, “परमेसवर घमंडी मन कर विरोध करथे, बकीन नरम मन कर ऊपर अनुगरह करथे।” 7 एकरे ले तुमन परमेसवर कर बस में होए जा; अऊ सएतान कर सामना करा, त सएतान हर तुमन जग ले भाएग जाही। 8 परमेसवर कर ठांवे आवा त ओहू हर तुमन कर ठांवे आही। ए पापी मईनसे मन अपन जिनगी ला सुध करा, अऊ जेमन परमेसवर अऊ मईनसे ला फुरमा करे बर करथें ओहू मन अपन हिरदे ला पबितर करा। 9 दुखी होवा अऊ सोक करा अऊ रोवा। तुमन कर हंसी हर सोक में अऊ तुमन कर आनंद हर उदासी में बदेल जाए। 10 परभू कर आगु में नरम बना, त ओहर तुमन के बढ़ाही।

दूसर कर ऊपर ओरहन झईन लगावा

11 ए भाई-बहिन मन, एक दूसर कर बदनामी झईन करिहा, जेहर अपन भाई कर बईदनामी करथे, चाहे भाई कर उपरे ओरहन लगाथे। ओहर कानहूंन कर बईदनामी करथे अऊ कानहूंन कर उपरे ओरहन लगाथे, त तंए कानहूंन कर चलोईया नहीं, बकीन ओकर नियाव करोईया ठहरे। 12 बकीन कानहूंन कर देवईया अऊ नियाव करोईया तो एकच झे हवे, अऊ ओहर परमेसवर लागे, जेकर ठन बचाए कर अऊ नास करे कर सामरथ हवे, बकीन तंए कोन लागस जेहर अपन परोसी कर ऊपर ओरहन लगाथस।

घमंड कर बिरोध में चेतावनी

13 तुमन एकस कहथा, “आएज अखीर काएल हमरे कोनो आने सहर में जाएके ओठन एक बछर रहबो, अऊ काम-धंधा कएर के पईसा कमाबो।” 14 तुमन एला नई जाना कि काएल तुमन कर जिनगी में का होही। तुमन तो भांप कस हवा, जेहर तनीक जुआर बर दिखथे, तेकर मेंटाए जाथे। 15 एकर पलटा तुमन के एकस कहेक चाही, “कहों परभू चाही, त हमन जीयत रहबो, अऊ ए काम चाहे ओ काम ला करबो।” 16 बकीन अब तुमन, अपन डींग मारथा अऊ घमंड करथा, अईसना सब घमंड हर बुरा हवे। 17 एकर ले जे कोनो भलई करे बर जानथे, अऊ नई करे, त ओकर बर एहर पाप हवे।