परभू हर पऊलूस ला बिखार सांप ले बचाथे
28
1 जे घनी हमन बांएच निकलेन ओही घनी पता चलीस,
कि जे टापू में हवन ओला मालटा टापू कथें।
2 उहां कर रहोईया मन हमन ऊपरे ढेरेच दया करीन,
काबरकि पानी बरसे कर चलते जाड़ लागत रहीस। एकर ले ओमन हमन ला आगी बाएर के पईरघाईन।
3 बकिन जब पऊलूस हर लकरी कर भिंडा ला रपोएट के आगी में मड़हाईस,
त आगी कर आंच पाए के बिखार सांप हर निकेल के पऊलूस कर हांथे लपटाए गईस।
4 जब ओ टापू कर रहोईया मन पऊलूस कर हाथे सांप ला लपटाल देख के एक दूसर झन ले कहे लागीन,
“ए मईनसे हर सहीच में जनमरवा हवे,
जबकी समूंदर ले बांएच गईस,
तबोले नियाओ कर देवी हर जियत रहे नई देहीस।”
5 तब ओहर सांप ला आगी में झटेक देहीस अऊ ओके ला कांही नई होईस।
6 बकिन ओमन जोहत रहीन,
कि ओहर फुईल जाही,
नहीं तो एकेच दाएर गिर के मएर जाही अऊ ओमन ओके ला ढेरे जुआर ले देखत रहीन,
बकिन जब ओके ला कांही नई होईस,
त ओमन कर बिचार हर बदेल गईस अऊ कहीन,
“कि एहर तो कोनो देंवता लागे। ”
7 ओ जघा कर आस-पास ओ टापू कर मुखिया पुबलियुस कर जमीन रहीस,
ओहर हमन ला अपन घरे ले जाए के,
तीन दिन मया ले पहुना मन कस सेवा-जतन करीस।
8 पुबलियुस कर दाऊ हर जर अऊ आंव पेट कर बेमारी में परे रहीस,
पऊलूस हर ओके ला देखीस अऊ पराथना कएर के ओकर ऊपरे हांथ राखीस अऊ चंगा करीस।
9 जब एकस होईस,
त ओजग कर अऊ बेमरीहा मन आईन अऊ पऊलूस हर ओमन के चंगा करीस।
10 ओमन मन हमर ढेरेच माएन-मरजाद करीन,
अऊ जब हमन ओजग ले जाए लागेन,
त जे जाएत कर हमर के जरूरत रहीस,
ओ जाएत ला पानी जहाज में राएख देहीन।
पऊलूस हर रोम देस कती पहुंचथे
11 तीन महीना कर पाछू हमन,
सिकंदरिया कर एगोट पानी जहाज में चएघ के,
ओ जघा ले निकेल गएन। ओ जहाज हर जाड़ भेर ओ टापू में रुके रहीस जेकर चिनहा जुडूवा देंवता रहीस।
12 फेर सरकूसा में लंगर डाएल के,
तीन दिन ओही जग रुके रहेन।
13 ओजग ले हमन किनदेर के रेगियुम पहुंचेन अऊ एक दिन कर पाछू दखिन बईहर चलीस अऊ हमन ओकर बिहान दिन पुतियुली में आएन।
14 ओजग तनीक भाई मन भेंटाईन अऊ ओमन कर कहे ले हमरे सात दिन तक ओमन कर घरे रहेन अऊ एकस कएर के हमन रोम देस में चएल गएन।
15 जब रोम कर भाई मन सुनीन कि हमरे आए हन त ओमन हमर जग भेंट करे बर,
अपियुस कर चऊंक अऊ तीन-सराए गांव ले आईन। ओमन ला देख के पऊलूस हर परमेसवर ला धनबाद देहीस अऊ हिमेत बांधीस।
16 जब हमन रोम में पहुंचेन,
त पऊलूस ला एक झे सिपाही जेहर ओकर पहरा करत रहीस ओकर संगे एक झे रहे कर अगींया मिल गईस।
पऊलूस हर रोम सहर में परचार करथे
17 तीन दिन कर पाछू ओहर,
एहूदी मन कर मुखिया मन ला बलाईस अऊ जब ओमन जूटीन त ओहर कहीस,
“ए भाई मन मंए अपन मईनसे अऊ पूरखा मन कर रीती-रीवाज कर बिरोध में कांहीच नई करें तबोले मोके कएदी बनाए के एरुसलेम में रोमी मन कर हांथे जिमा देहल गएं।
18 ओमन मोके ला जाएंच के,
छोंएड़ देहे बर चाहत रहीन,
काबरकि मोर में मरुवाए लाईक कांही दोस नई रहीस।
19 बकिन जब एहूदी मन मोर बिरोध में कहे लागीन,
त मोके ला महाराजा कएसर ला बिनती करेक परीस,
एहर एकस गोएठ ना लागे कि मंए अपन मईनसे मन कर ऊपरे कोनो दोस लगाथों।
20 एकर ले मंए तुमन के बलाए हों,
कि तुमन जग भेंटाओं अऊ गोएठ बात करों,
कि मसीह जेहर इसराईल कर असरा हवे ओहर आईस हे ओमे मंए बिसवास करथों,
तेकर ले मंए ए संखरी में बंधाए हों।
21 तब ओमन ओके ला कहीन,
एहूदिया जिला ले हमन तोर बारे में कोनो चिठी नई पाए हन अऊ भाई मन में ले कोनो आए के तोर बारे में कांही नई बताईन हें अऊ कोनो खराब गोएठ नई कहीन हें।
22 बकिन तोर का बिचार हे,
ओही गोएठ ला तोर जग ले हमन सुने बर चाहथन,
काबरकि हमन ए डगर कर बारे में ए जानथन,
कि सब जघा कर मईनसे मन एकर बिरोध में गोठियाथें।”
23 तब ओमन पऊलूस बर एगोट दिन ठहराईन अऊ ढेरेच अकन मईनसे मन ओकर जग आए के जुईट गईन। ओहर परमेसवर कर राएज कर गवाही देहत रहीस अऊ मूसा कर कानहूंन अऊ अगमजानी मन कर किताब ले,
ईसू कर बारे में समझाए-समझाए के भिनसार ले सांझ कएर देहीस।
24 तब तनीक झेमन ओकर गोएठ ला मानीन अऊ तनीक झेमन बिसवास नई करीन।
25 जब ओमन एक मन नई होईन,
अऊ ओजग ले जाए लागीन तेहीच घनी पऊलूस हर ए गोएठ ला कहीस,
पबितर आतमा हर एसायाह अगमजानी कर दुवारा तुमन कर पूरखा मन जग ठीकेच कहीस,
26 तुमन सुनत रईहा
बकिन नई समझीया अऊ देखत तो रईहा,
बकिन नई बुझीहा।
27 काबरकि ए मईनसे मन कर मन हर मोट हो गईसे
अऊ ओमन कान ला ढांएप लेहीन हवें अऊ
ओमन अपन आंएख ला मूईंद लेहीन हवें,
एकरले ओमन कभों झईन देखें
अऊ कभों झईन सुने अऊ मन में कभों झईन समझें अऊ फिरें
एकरले मंए ओमन के चंगा नई करों।
28 “एकर ले तुमन जाना कि,
परमेसवर कर ए उदधार कर कहनी,
गएर एहूदी मन जग भेजल गईस हे अऊ ओमन एला अपनाहीं।”
29 (जब पऊलूस एकस कहीस त,
एहूदी मन एक दूसर ले ढेरेच बंहसा-बंहसी करे लागीन अऊ ओजग ले चईल देहीन।)