लाजर कर मिरतु
11
1 बएतनियाह नांव कर गांव में मरियम अऊ मारथा नांव कर दुनों बहिन, अपन भाई लाजर कर संगे रहत रहीन अऊ ओ लाजर हर बेमार रहीस। 2 ए ओही मरियम रहीस, जेहर परभू कर गोड़ में ढेरेच महंगा सेंट लगाए के अपन चुंदी ले पोंछे रहीस। 3 तब लाजर कर बहिन मन ईसू जग खभेर भेजे रहीन, “ए परभू देख, जेकर ठन तंए मया करथस ओ बेमार हवे।” 4 एला सूईन के ईसू हर कहीस, “ए बेमारी ले ओ नई मरही, बकिन ए बेमारी हर परमेसवर कर महिमा बर हवे, अऊ एकर दुवारा परमेसवर कर बेटा कर महिमा होही।”5 ईसू हर मारथा अऊ ओकर बहिन मरियम अऊ लाजर ठन मया करत रहीस। 6 तबोले जब ओ सुनीस कि लाजर बेमार हवे, त जे जघा में ओहर रहीस, उहां अऊ दुई दिन रईह गईस। 7 एकर पाछू ईसू अपन चेला मन ला कहीस, “आवा हमन फेर एहूदिया जिला में चली।” 8 चेला मन ईसू के कहीन, “ए गुरूजी, तनीक दिन कर पहिले तो उहां कर एहूदी नेता मन, तोके पखना ले माएर के मरुवाए बर चाहत रहीन, अऊ का तंए फेर ओमन जग जाबे का?”
9 ईसू हर जबाब देहीस “का दिन में बारह घंटा नई होए? अगर कोनो हर दिन में रेंगही, त नई हपटही, काबरकि ओहर दुनिया कर इंजोर ला देखथे। 10 बकिन अगर कोनो हर राती रेंगथे, त हपटथे, काबरकि इंजोर नई रहे।” 11 तेकर ईसू ओमन जग फेर कहीस, “हमर संगता लाजर सूईत गईस हे, बकिन अब मंए ओके जगाए बर जाथों।” 12 तेकर चेला मन ईसू ला कहीन, “ए परभू, अगर लाजर सूईत गईस हे, त ओ ठीक होए जाही।” 13 ईसू हर तो लाजर कर मरे कर बारे में कहे रहीस, बकिन ओकर चेला मन समझीन कि, ओहर सूते कर बारे में कहीस हवे। 14 तेकर ईसू अपन चेला मन ला सफा-सफा कह देहीस, “लाजर मएर गईस हवे” 15 अऊ मंए तुमन कर चलते खुस हों, कि मंए ओजग नई रहें, एकरे चांड़हें तुमन मोर ऊपरे अऊ ढेर बिसवास करिहा। आवा अब हमरे ओकर जग चली।” 16 तेकर थोमा नांव कर चेला, जेला दिदिमुस कहत रहीन, ओहर अपन संगता चेला मन ला कहीस, “आवा हमू मन ओकर संगे मरे बर चली।”
ईसू दुनों बहिन ला ढाढस देहे बर आईस
17-18 बएतनियाह गांव हर एरुसलेम ले करीबन एक कोस दुरिहां रहीस। ओजग पहुंचे कर पाछू, ईसू ला ए पता चलीस कि, लाजर मएर गईस हवे अऊ ओकर लास ला मठ में राखे ले चाएर दिन होए गईसे। 19 अऊ लाजर कर मरे कर चलते ढेरेच अकन एहूदी मन मारथा अऊ मरियम ला ढाढस देहे बर आए रहीन। 20 जे घनी मारथा हर सुनीस कि ईसू आवत हे, त ओकर जग भेंटाए बर गईस, बकिन मरियम घरे रहीस।
21 मारथा हर ईसू जग कहीस, “ए परभू, अगर तंए एजग रहते, त मोर भाई हर नई मरतीस। 22 अऊ अझरोच ले मंए जानथों कि, जे जाएत तंए परमेसवर जग मांगबे, ओहर तोके देही। 23 ईसू हर ओके कहीस, “तोर भाई फेर जी ऊठही।” 24 त मारथा हर ईसू ला कहीस, “मंए जानथों कि दुनिया कर आखरी दिन में, जब सब मरल मईनसे मन जी ऊठहीं ओही जुआर ओहूच जी ऊठही।”
25 ईसू हर मारथा ला कहीस, “जेमन मएर गईन हवें, ओमन के फेर ले जीवईया अऊ जीवन देवईया मंहीच लागों, जे कोनो मोर ऊपरे बिसवास करथे, अगर ओ मरीओच जाही तबो ले जी ऊठही, 26 अऊ जे कोनो जीयत हवे, अऊ मोर ऊपरे बिसवास करथे, ओहर कभों नई मरही, का तंए ए बात में बिसवास करथस?” 27 मारथा हर ईसू ला कहीस, “हओ, ए परभू, मंए बिसवास करथों, कि परमेसवर कर बेटा मसीह, जेहर संसार में अवईया रहीस, ओहर तंही लागस।”
ईसू रोईस
28 एतना कहिके मारथा वापिस चएल देहीस अऊ अपन बहिन मरियम ला बलाए के कलेकस कहीस, “गुरू हर एही ठन हवे अऊ तोके बलाथे।” 29 मरियम ए गोएठ ला सुन के, तुरतेंच उठीस अऊ ईसू ठन गईस। 30 (ईसू अझेर ले गांव में नई पहुंचे रहीस, बकिन ओही जघा रहीस, जिहां मारथा हर ओकर जग भेंटाए रहीस।) 31 त जेमन, मरियम कर संगे घर में रहींन अऊ ओके के ढाढस देहत रहीन, ओमन ए देखीन कि मरियम तुरतेंच उईठ के बाहरी गईस हवे। त ओमन ए सोंचीन कि मरियम हर मरघेटिया में रोए बर जात हे, त ओमन ओकर पाछू होए लेहीन। 32 जब मरियम उहां पहुंचीस, जिहां ईसू रहीस, त ईसू ला देख के ओकर गोड़े गिरीस अऊ कहीस, “ए परभू, अगर तंए एजग रहते, त मोर भाई नई मरतीस।” 33 जे घनी ईसू हर मरियम अऊ ओ एहूदी मन ला रोवत देखीस, त ओकर जीव में ढेरेच दुख लागीस अऊ घबराए गईस। 34 त ईसू हर ओमन ला पूछीस, “तुमन ओके कहां जग राखे हा?” ओमन ओके ला कहीन, “परभू, जाए के देख ले।” 35 त ईसू रोए लागीस। 36 तेकर एहूदी मन कहे लागीन, “देखा, ओहर ओकर जग केतना मान मया करत रहीस। 37 बकिन ओमे ले तनीक झेमन कहीन, “का एहर अंधा ला आंएख देहीस, त ए मईनसे ला मरे ले बचाए बर नई सकिस?”
ईसू हर लाजर ला मरल में ले जियाथे
38 तेकर ईसू हर अपन जीव में ढेरेच दुखी होए के मरघेटिया में गईस, ओहर एगोट गुफा रहीस अऊ ओकर दुरा ला एगोट पखना में ढाके रहीन। 39 ईसू हर कहीस “ए पखना ला कगरावा।” त ओ मरल लाजर कर बहिन मारथा हर ईसू ला कहीस “रहे दे परभू, ओहर तो अब घिनक बसात होही, काबरकि ओके मरे ले चाएर दिन होए गईस हवे।” 40 ईसू हर मारथा ला कहीस, “का मंए तोके नई कहे रहें, कि अगर तंए बिसवास करबे, त परमेसवर कर महिमा ला देखबे।”
41 तेकर ओमन पखना ला कगराईन, ईसू हर ऊपर कती ला देख के कहीस, “ए दाऊ, मंए तोर धनबाद करथों, कि तंए मोर पराथना ला सुईन लेहे हस।” 42 मंए जानत रहें, कि तंए हमेसा मोर पराथना ला सुनथस। बकिन जे भीड़ मोर अगल-बगल में ठड़होईन हवें, ओकरे चलते मंए एकस कहें, तेमेकि ओमन बिसवास करें कि तंए मोके भेजे हस। 43 ए कईह के ईसू हर रोसे किरलाए के कहीस, “ए लाजर, निकेल आ।” 44 जेहर मएर गए रहीस ओहर कफन में हांथ गोड़ बंधाल निकेल आईस अऊ ओकर मूंह हर ओढ़ना में लपटाले रहीस। त ईसू हर ओमन जग कहिस, “ओके छोएर देआ अऊ जाए देआ।”
ईसू ला माएर दारे कर विचार बनाथें
45 जे एहूदी मन मरियम संगे ओजग आए रहीन, तेमन ईसू कर ए काम ला देखे रहीन, ओमे ले ढेरेच झेमन ओकर ऊपरे बिसवास करीन। 46 बकिन ओमे ले तनीक झेमन, फरीसी दल कर मईनसे मन ठे जाए के, ईसू हर जे जाएत करे रहीस ओकर बारे में बताए देहीन। 47 तेकर मुख आजक मन अऊ फरीसी मन, महा सभा बलाईन अऊ कहीन, “हमरे का करथन? ए मईनसे हर तो ढेरेच चिनह चमतकार देखाथे। 48 अगर हमरे ओके अईसने छोंएड़ देबो, त सब मईनसे मन ओकर ऊपर बिसवास करहीं, अऊ रोमी देस कर मईनसे मन आए के, हमर मंदिर अऊ हमर जाति मन ला नास कएर देहीं।” 49 तब ओमे ले काइफा नांव कर एगोट मईनसे रहीस, जेहर ओ बछर कर महाआजक रहीस, ओमन जग कहीस, “तुमन कांहीच ला नई जाना। 50 तुमन के ए समझे बर चाही कि, तुमन बर एहर बढियां हवे कि, सबो झेला बचाए बर एगोट मईनसे हर मरे, अऊ सब जाति मन नास झईन होएं। 51 ए गोएठ ला ओहर अपन कती ले नई कहीस, बकिन ओ बछर कर महाआजक होए कर चलते अगमबानी करीस, कि ईसू एहूदी जाति मन बर मरही। 52 ए गोएठ ला ओहर एकरे चांड़हे कहीस, कि ओहर सिरिप एहूदी जातिच मन बर नई मरही, बकिन समुचा दुनिया में जेतना झेमन परमेसवर कर ऊपर बिसवास करथें, ओ सब झन ला जुटाए बर ओहर मरही। 53 ओही दिन ले ओमन ईसू ला माएर मरुवाए कर उपाए खोजे लागीन।
54 एकरे ले ईसू हर ओ घनी, एहूदी मन कर देखार में नई आत-जात रहीस, बकिन ओजग ले एगोट सुनसान जघा कर लिघे, इफराईम नांव कर एगोट सहर में गईस अऊ अपन चेला मन कर संगे उहां रहे लागीस।
55 एहूदी मन कर फसह नांव कर तिहार हर लिघे रहीस अऊ ढेरेच झेमन तिहार ले पहिले, सुध होए कर रिवाज ला करे बर अपन-अपन गांव ले एरुसलेम सहर में गईन। 56 त ओमन ईसू ला खोजे लागीन अऊ मंदिर में ठड़होए के एक दूसर ले कहे लागीन “तुमन का सोंचथा? का ओहर तिहार में नई आही?” 57 बकिन मुख आजक मन अऊ फरीसी मन, ए हुकुम देहे रहीन कि, कहों कोनो ला ए पता चलही, कि ईसू हर कहां हवे, त ओहर आए के बताए तेमेकि ओमन ईसू ला धएर सकें।