Tìɛlɛ 5

Sìnbapile náà ni 'sɛbɛ sáʔala wè kpuʔɔrɔ ti 'yɛli ni nɛ̄

1 Ŋàa wi 'puu tɛ́niwɛ kùlofɔlilɔ kácunʔɔ nɛ̄ gè, a mi 'sɛbɛkuruwo wáà nyaa wi mɛ́ kàliige nī gè, yasɛbɛrɛ ní baa wi laamɛ nī bè, tàa ní wi kàduʔu nɛ̄ gè, á yasuʔɔgɔlɔ kɔlisiin ní wi nɛ̄. 2 A mi 'fali nɛ̀ wáà nyaa, wi 'puu nɛ́ fànʔa ní. A wire 'ki jáari yékpogbuɔlɔ nī nɛ́ jo: «Ŋáasiɛn wi 'nyuɔ nɛ̀ yɛli bè gbɛ̀ jáa bè sɛbɛkuruwo ŋáà wi yasuʔɔgɔlɔ múgolo gèle, bé sí wi sáʔala wè ?»

3 Ki siɛn wiì taaʔ, ma 'jo nī yo, dàala nɛ̄ yo, dàala laamɛ nī yo, siɛn sì taaʔ ŋàa wi bé gbɛ̀ sɛbɛkuruwo sáʔala wèʔ, bé nɛ́ ga cɛ jo bè wéli baa wi laamɛ nī bèʔ.

4 A kire mi 'kɛn a mi 'nyɛni nìʔɛgɛ, bɛ̀ ki 'nyaa siɛn sì taaʔ ŋàa wi 'nyuɔ nɛ̀ yɛli bè gbɛ̀ sɛbɛkuruwo sáʔala wèʔ, bé nɛ́ ga jo bè nyaa wi laamɛ nī bèʔ. 5  nī bèle, a wàa 'mi yɛ: «Fǎri nyɛniʔ. Nyaa, jàri ŋáà wi 'yiri saʔa tùlugo nī gè, siimɛ tùlugo wuu wè, wi nyɛ́nì fànʔa taa nɛ̀ jáa, wi bé sɛbɛkuruwo sáʔala wè nɛ́ wi yasuʔɔgɔlɔ kɔlisiin ní gèle.»

6 A mi 'Sìnbapile láà nyaa yérile kùlofɔlilɔ kácunʔɔ ki sunʔɔmɔ nī bè, yawiiye sicɛri sunʔɔmɔ nɛ́ liɛlɛ pe sunʔɔmɔ nī bè, ni 'puu majo pe cé kíni nɛ̀ ni kpúu wī. Nyɛgɛlɛ kɔlisiin 'puu ni nɛ̄, nɛ́ nyapigele kɔlisiin ní; nyapigele kɔlisiin keli gīɛlɛ Kulocɛliɛ pígele gàli wi 'tórigo duniya wi mìɛni nī wè.

7 Ŋàa wi 'puu tɛ́niwɛ kùlofɔlilɔ kácunʔɔ nɛ̄ gè, a Sìnbapile ni 'pɛn nɛ̀ pɛ́nì sɛbɛkuruwo suɔ wè wi mɛ́ wi kàliige nī gè.

8 Bà wi 'sɛbɛ suɔ wè, a yawiiye sicɛri yè, nɛ́ liɛlɛ togo nɛ́ sicɛri ní bèle, a pe 'tuu nɛ̀ yiɛyɛ cúbulo yè Sìnbapile ni yiʔɛ mɛ́ gè. Gɔrilɔ 'puu pe mìɛni nigbe nigbe mɛ́ bèle nɛ́ tiɛ yagbuʔɔlɔ ní, nùdaanna wusuna 'puu ke nī nɛ̀ ke nyì; Kulocɛliɛ wuulo pe náariyɛ yire yī. 9 A pe 'yɛ̀ nɛ̀ ŋúnugo káà le nɛ ŋú ŋúnuvɔngɔ ki 'puu, níɛ waa:

«Muɔ wī

ma 'nyuɔ nɛ̀ yɛli

bè gbɛ̀ sɛbɛ suɔ wè

bé sí wi yasuʔɔgɔlɔ múgolo gèle.

Nɛ̀ taʔa gíi nɛ̄, muɔ cé kùu,

a kire 'ki kɛn

muɔ sìsiɛn kire fànʔa nɛ̄ gè

a muɔ 'siɛnnɛ suɔ

nɛ̀ kɛn Kulocɛliɛ mɛ́ wè,

siɛnnɛ feliye yi mìɛni yè,

siɛnrɛ felide

ti mìɛni wuulo bèle,

nɛ́ kùlogolo

ke mìɛni ní gèle,

nɛ́ duniya siɛnfeliye

yi mìɛni ní yè.

10 Muɔ pe 'kpíʔile

kùlofɔligɔ wuulo

pe ní

Kulocɛliɛ mɛ́ wè;

pe bága de fànʔa kpúɔn

dàala wuulo nɛ̄ bèle.»

11 A mi 'kire gáà nyaa gè, nɛ́ ń'nɛ̀ nyìʔɛnɛ tundunminɔ yékpuʔulo lúʔu; pe 'puu nìʔɛnɛ wī nɛ̀ kùlofɔlilɔ kácunʔɔ màʔa gè, nɛ́ yawiiye ní yè, nɛ́ liɛlɛ ní bèle. Pe yé niʔɛ nɛ̀ siramuʔɔyɔ nyuɔ kúɔ, 12 níɛ ki nyu kpuʔɔ níɛ waa:

«Sìnbapile náà pe 'kpúu lè,

fànʔa ki 'yɛli ni nɛ̄, nɛ́ lɔri ní dè,

nɛ́ sícilige ní gè, nɛ́ ŋɔri ní dè,

nɛ́ ní dè nɛ́ kpuɔmɔ ní bè,

nɛ́ gbùʔɔrigɔ ŋúnudo ní dè.»

13 Yafaanra díì ti mìɛni dī baa nyìʔɛnɛ nī lè, nɛ́ dàa dī dàala nɛ̄ lè, nɛ́ dìi dī dàala laamɛ nī bè, nɛ́ dìi dī kuʔɔjiile nī bèle, ki 'nyaa duniya yafaanra ti mìɛni dè, a mi 'ti juumɔ lúʔu bè a ti 'jo:

«Ŋàa wī tɛ́niwɛ kùlofɔlilɔ kácunʔɔ nɛ̄ gè, wire nɛ́ Sìnbapile ní lè,

gbùʔɔrigɔ ŋúnudo ti 'yɛli pe nɛ̄, nɛ́ kpuʔɔrɔ ní dè,

nɛ́ kpuɔmɔ ní bè, nɛ́ fànʔa ní gè lɛ̀gɛlɛ ke mìɛni nī súuri.»

14 A yawiiye sicɛri yi 'jo: « !» A liɛlɛ pe 'tìgi nɛ̀ yiɛyɛ cúbulo yè nɛ̀ wi gbùʔɔrɔ.