Tìɛlɛ 3

Saridi kàʔa tɛ́ngɛfɔlilɔ gboli sɛbɛ wè

1 «-Ki sɛbɛ ma tórigo Saridi kàʔa ni mɛ́ wè, ma wi yɛ: Ŋàa mɛ́ Kulocɛliɛ pígele kɔlisiin ke yē gèle nɛ́ ŋɔgɔlɔ kɔlisiin ní gèle, wi 'jo:

«Mi nyɛ́nì muɔ kakpiʔiligele cɛ́n gèle, muɔ míʔɛ ki 'yiri a pe 'jo muɔ yē wiiwe, nɛ̀ sí ki taa muɔ yē kùuwo wī. 2 Yɛ̀ ma yéri díɛ, má sí ŋɔri nyɔ́gɔ bìli sɛnminɛ nī bèle pe 'kò cɛ̀ri bè kùu bèle. Á kire 'laa wè, mi 'ki nyaa muɔ kakpiʔiligele kiyè nyuɔ nɛ̀ fori mi Kulocɛliɛ yiʔɛ mɛ́ gèʔ.

3 «Kire nɛ̄, ma sí sɔ̀ngi ma taa tɛnmɛnɛ náà muɔ 'taa lè nɛ́ gìi 'muɔ lúʔu gè; -ti cò má sí làa yiʔɛ. Á kire 'laa wè, a muɔ sì yɛ̀ nɛ̀ yéri wèʔ, m'bága pɛn bɛ̀ kàyuuwo tíɛlɛ; muɔ sǐ ki cɛ́nʔ lɛ̀lɛ níì nī m'bága pa muɔ fuu wèʔ. 4 Nɛ̀ sí ki taa siɛnnɛ pálì cɛ̀ri yē baa muɔ mɛ́ Saridi kàʔa nī gè, piyè pe burudo núʔɔ dèʔ. Peli bèle, pe bága de tári nɛ́ mi ní nɛ́ yafiire ní, nɛ̀ taʔa gíi nɛ̄, pe nyɛ́nì yɛli nɛ́ ki ní.

5 «A ŋìi kɛ́nì fànʔa taa nɛ̀ jáa nɛ̀ pɛ́nì fori wè, bɛ̀ wi bé yafiire le; miǐ wi míʔɛ kurugo gè bè láʔa sìi sɛbɛ nī wèʔ, nɛ̀ pínɛ m'bé wi wori juu dè mi Tuu wi yiʔɛ mɛ́ gè nɛ́ wi nyìʔɛnɛ tundunminɔ pe yiʔɛ mɛ́ gè.

6 «A ngbóli yē ŋìi nɛ̄, siɛn wi- ti lúʔu dàa niī nɛ nyu tɛ́ngɛfɔlilɔ gbuʔulo mɛ́ gèle.»

Fiiladɛlifii kàʔa tɛ́ngɛfɔlilɔ gboli sɛbɛ wè

7 «-Ki sɛbɛ ma tórigo Fiiladɛlifii kàʔa ni mɛ́ wè, ma wi yɛ: Ŋàa wī tiɛlɛ fùn wè, wiī kányiʔɛ gè, kɔ̀rikaanna niī wi mɛ́; a wi 'kɔ̀ri múgu gè siɛn sǐ gbɛ̀ ki tɔ́nʔ, a wi 'ki tɔ́n, siɛn sǐ gbɛ̀ ki múguʔ, wire 'wi jo:

8 «Mi 'muɔ kakpiʔiligele cɛ́n gèle. Nyaa, mi nyɛ́nì kɔ̀ri káà yérige muɔ yiʔɛ mɛ́ gè; kiī múguyaʔaga, siɛn sǐ gbɛ̀ jáa bè ki tɔ́nʔ. Muɔ ŋɔri ti 'tɔ̀ni nɛ̀ cɛ́ri, kire nɛ́ ki mìɛni ní a muɔ 'mi siɛnrɛ cò dè, muɔ sì mi míʔɛ cíi gèʔ. 9 Nyaa, m'bé Setɛni gboli wuulo pálì kɛn muɔ mɛ́, bàli pe 'jo peli yē Zuufulo bèle nɛ̀ sí ki yaʔa pe finɛnɛ wī, pe wè kireʔ. Pe bé pa pìye cáan muɔ tɔliyɔ láara yè bèri muɔ gbùʔɔrɔ́, bɛ̀ pe bé ki cɛ́n muɔ woli ni 'mi dɛ́ni.

10 «Bɛ̀ muɔ 'lèbaanna le nɛ̀ mi siɛnrɛ cò dè wè, bɛ̀ mìɛni m'bága de muɔ wéli a puuwelige lɛ̀lɛ ni kɛ́nì nɔ̀ lè. Ki lɛ̀lɛ niī nɛ báan, ni bága pa tuu duniya wuulo pe míɛni nɛ̄ bèle, bè wuʔɔgɔ cáan dàala wuulo nɛ̄ bèle. 11 Ki 'kò cɛ̀ mi nɛ báan baa. Tɛnmɛnɛ náà muɔ 'taa lè, -ni cò cɛ̀ngɛ; siɛn fǎga muɔ kpuʔɔrɔ ndɔ̀ngɔ suɔ gè muɔ mɛ́ʔ.

12 «A ŋìi kɛ́nì jáa nɛ̀ pɛ́nì paʔa wè, m'bé wi kpíʔile mi Kulocɛliɛ ki gèdinnɛ lè; wiǐ ní ga yiri kpànʔanɛ cíginiʔ. Nɛ̀ pínɛ m'bága mi Kulocɛliɛ wi míʔɛ sɛbɛ gè ki siɛn nɛ̄ wè nɛ́ mi Kulocɛliɛ kàʔa ki míʔɛ ní gè bè pínɛ, kire 'jo kàfɔngɔ gáà ki je ga kɔ́n baa nī lè mi Kulocɛliɛ wi tiʔɛ nī gè bè tìgi gè; m'bága mi míɛfɔngɔ sɛbɛ gè ki siɛn nɛ̄ wè bè pínɛ.

13 «A ngbúʔulo yē ŋìi nɛ̄, siɛn wi- ti lúʔu dàa niī nɛ nyu tɛ́ngɛfɔlilɔ gbuʔulo mɛ́ gèle.»

Lawodise kàʔa tɛ́ngɛfɔlilɔ gboli sɛbɛ wè

14 «-Ki sɛbɛ ma tórigo Lawodise kàʔa ni mɛ́ wè, ma wi yɛ: Ŋàa pe ye Kitaabuubɛ wè, nɛ́ ní kijuufɔli wè, nɛ́ ní tɛ́ngɛmɛ siɛn kányiʔɛfɔli wè, wire wī Kulocɛliɛ yafaanra ti nyùgo gè, wi 'jo:

15 «Mi 'muɔ kakpiʔiligele cɛ́n gèle, nɛ̀ ki cɛ́n muɔ wè nyíwɛʔ, muɔ sí ní wè sícaʔawaʔ. Kire kaala sî ní cɛ pɔ́ri ma cé puu nyíwɛ, á kire 'laa ma cé puu sícaʔawa.

16 «Bɛ̀ sí muɔ 'kò wúlɔmiwulɔmi wè, muɔ wè sícaʔawaʔ, muɔ sí ní wè nyíwɛ wèʔ, kire nɛ̄ m'bé muɔ tùbu bè yige. 17 Nɛ̀ taʔa gíi nɛ̄, muɔ nɛ ki nyu nɛ́ jo muɔ yē yakaafɔli, dí lɔri yē muɔ mɛ́, muɔ màakuu wè yafiɛn nɛ̄ʔ. Nɛ̀ sí ki taa muɔ sì ki cɛ́n muɔ yē fuunmɔ nī wīʔ, muɔ yē nyinimɛ wuu. Fɔ̀ngɔfɔli muɔ yē, nɛ ní fúɔn, nɛ ní bòribiɛ. 18 Tí m'bé muɔ yɛri yo: pa tiɛ suɔ mi mɛ́ ŋàa pe 'nyɛgɛ kàsun nī a wi 'cìile wè, bɛ̀ muɔ bé kò lɔrifɔli. Má sí yafiire suɔ ma le mìɛ nɛ̄ ma muɔ fìɛrɛ tiʔɛ tɔ́n gè, má sí nyapigele tiiluʔɔ suɔ ma le muɔ nyapigele nɛ̄ gèle, bɛ̀ muɔ béri nyaʔa.

19 «Mi wè, bìli pe mìɛni bīɛlɛ pe 'mi dɛ́ni bèle, mi nìɛ pe cɔ̀rí nɛ pe nii koligo nī. Ma sí cáʔara ma làa yiʔɛ díɛ ! 20 Nyaa, mi yē náʔa yériwe kɔ̀ri ki wìile nɛ̄ lè, níɛ ki kóli. A ŋìi kɛ́nì mi juumɔ lúʔu bè nɛ́ kɔ̀ri múgu gè, bɛ̀ m'bé jíin ki siɛn kúrugu wè bè lìi nɛ́ wi ní; wire míɛni wi bé lìi nɛ́ mi ní.

21 «A ŋìi kɛ́nì jáa nɛ̀ sɛ́nì nɔ̀ ki kúɔmɔ nɛ̄ bè, bɛ̀ m'bága tɛ́nidiʔɛ kɛn wi mɛ́ wi- puu nɛ́ mi ní mi kùlofɔligɔ kácunʔɔ nɛ̄ gè, majo bɛ̀ mi mìɛni wè mi 'fànʔa taa nɛ̀ jáa wè, nɛ́ tɛ́ni nɛ́ mi Tuu ní wè wi kùlofɔligɔ kácunʔɔ nɛ̄ gè.

22 «A ngbúʔulo yē ŋìi nɛ̄, wi- ti lúʔu dàa nii nɛ nyu tɛ́ngɛfɔlilɔ gbuʔulo mɛ́ gèle.»